Xixón al día

Categoría: Sporting

  • Canella: «Siempres voi llevar al Sporting nel corazón»

    Canella: «Siempres voi llevar al Sporting nel corazón»

    Roberto Canella punxo’l vienres puntu final a la so etapa nel Sporting. Nuna sala de prensa d’El Molinón – Enrique Castro ‘Quini’ enllena con familiares, amigos y medios de comunicación, el llavianés tresmitió la decisión que, como él mesmu aseguró, «tenía tomada dende’l principiu»: cerrar la so etapa como xugador del Sporting.

    «Llegué como un neñu y despídome ya adultu cola sensación de ser un privilexáu que cumplió’l suañu de la so vida», esplicó nuna una estensa carta lleida por él mesmu. Ensin ser capaz de contener la emoción nin les llárimes, nun s’escaeció de los sos compañeros nin de los trabayadores del club. «Espero que’l Sporting xuba bien lluéu a Primera División. Ye’l so sitiu, onde merez estar. Anque xuegue na categoría que xuegue va ser un club bien especial, cargáu d’hestoria y sentimientos», dixo. Y aseguro que dende agora va ser «un abonáu más» que «siempres va llevar tatuáu nel corazón l’escudu de la so vida».

    Canella recordó a Manuel Preciado y Enrique Castro Quini. Tamién quixo treslladar el so agradecimientu a los medios de comunicación pol respetu col que foi tratáu estos años. «Acabóse la mio etapa nel Sporting, acabóse un ciclu y van venir coses nueves que voi afrontar con ganes», esplicó a entrugues de los periodistes. Pela so parte, el club fízo-y entrega d’un brazalete y una camiseta roblaos polos sos compañeros, y un cuadru cola so imaxe.

  • Ramón Riego y Pablo Fernández dexen el Sporting

    Ramón Riego y Pablo Fernández dexen el Sporting

    Ramón Riego y Pablo Fernández nun van siguir na disciplina del Sporting. Dambos xugadores rematen la so etapa nel filial roxiblancu y «estimamos el so esfuerzu y dedicación mientres tolos años que defendieron la camiseta del club». Nesti sentíu, «deseyamos muncha suerte a Ramón y Pablo nes sos nueves etapes», asegura’l club na so páxina web.

    Ramón Riego García (Candás, 1995) llegó al Sporting na temporada 2012-2013 procedente del TSK Roces pa incorporase a la División d’Honor Xuvenil. Tuvo dexar un añu nel UP Llangréu y volvió a Mareo pa enrolarse nel filial, nel qu’exerció de capitán y llegó a xugar un playoff d’ascensu a La Lliga 123. Esta temporada xugó 34 partíos.

    Pablo Fernández Blanco ( Candás, 1996) vivió dos etapes nel Sporting. Llegó na temporada 2008-2009 procedente del Victoria de Perlora pa empezar nel infantil roxiblancu. Na temporada 2014-2015 volvió la disciplina sportinguista, integrándose na División d’Honor Xuvenil. Una vegada rematada esa etapa llegó al filial y debutó col primer equipu, ante’l Málaga CF na temporada 2016-2017. Anguaño xugó 36 partíos y anotó 2 goles col filial y xugó la primer xornada de lliga col primera forno ante’l AD Alcorcón.

  • En directo: rueda de prensa de Miguel Torrecilla

    En directo: rueda de prensa de Miguel Torrecilla

  • Babin anueva trés temporaes col Sporting

    Babin anueva trés temporaes col Sporting

    Jean-Sylvain Babin va siguir xugando nel Sporting. El xugador martinicanu y el club xixonés alcordaron la renovación del contratu del defensa para les próximes trés temporaes. Babin foi escoyíu meyor xugador de la temporada polos siguidores sportinguistes votantes del Troféu Mahou. El xugador diz que s’atopa «bien ilusionáu por tar en Xixón la temporada que vien» y «ta seguru que va cumplir l’oxetivu del ascensu col Sporting».

  • José Alberto: «Tenemos que ser más fuertes n’El Molinón»

    José Alberto: «Tenemos que ser más fuertes n’El Molinón»

    José Alberto fixo balance de la temporada desque se fixo cargu del Sporting. Esplicó que non siempres pudo recurrir al sistema de xuegu qu’a él-y gusta, pero qu’apertaba la necesidá de sumar puntos. Destacó l’esfuerzu realizáu y el llastre xeneráu tres el partíu en Tarragona. Asumió que «fuimos irregulares» y non lo suficientemente sólidos en casa. Por eso, pa la próxima temporada señaló que «tenemos que ser más fuertes n’El Molinón«. Considerólo perimportante.

    Amosóse satisfechu del trabayu realizáu énte’l Cádiz polos xugadores del filial, que «tuvieron al so nivel» nun partíu que definió d’ambiente frío». Destacó «l’entamu de xugada que tuvimos, anque nos faltó enriba daqué más de llegada, magar dispunximos de trés o cuatro causes pa marcar».

  • José Alberto va siguir «sacando conclusiones» con xugadores de filial

    José Alberto va siguir «sacando conclusiones» con xugadores de filial

    La normativa federativa indica que sobro’l terrén de xuegu deben de tar a lo menos siete xugadores con ficha federativa del primer equipu. Una espulsión d’unu d’ellos llevaría al Sporting a incurrir n’alliniación indebida. Por eso José Alberto, qu’anunció que va siguir dando minutos a xugadores del filial, adelantó que va caltener a un máximu de trés nel campu, partiendo de la base de qu’unu va tar con seguridá na portería.

    «Trátase de siguir sacando conclusiones cola xente de baxo», señaló. Preguntáron-y por Gragera. «Tien opciones de xugar, como los restantes 17 que tán na convocatoria; trabayó bien», respondió. Espunxo que «llegamos a esti alcuentru final con un sabor agriduz, porque nun cumplimos los oxetivos». Añadió que «nun vamos mirar escontra otros marcadores, vamos salir a ganar en busca los trés puntos». Sobro la rivalidá, dixo qu’entiende que la hai, pero percima de too tán los mesmos clubes y la «nuesa profesionalidá».

    De la temporada que conclúi echó en falta tener más regularidá. Cree que s’escapó la clasificación pal ‘play off’ n’El Molinón: «Nun llogramos remanar bien el control de los partíos y tener más efectividá». Sí cree que tuvo regularidá’l Cádiz, lo que-y dexó llegar a esti partíu con opciones. Destaca del cuadru andaluz el so «orde defensivu y los sos contras ofensives».

  • El Cádiz, l’últimu visitante de la temporada pal Sporting

    El Cádiz, l’últimu visitante de la temporada pal Sporting

    El Sporting recibe esti sábadu a les 20.30 hores al Cádiz en partíu de LaLiga 123 correspondiente a la xornada 42 que va poner fin al campeonatu regular. Los xixoneses tienen la baxa federativa de Peybernes, ente que s’atopen convocaos coles sos respectives selecciones Lod y Dani Martín. Con un importante númberu xugadores con problemes físicos, José Alberto trabayó mientres los dos últimes selmanes con dellos xugadores del filial. La normativa federativa especifica la necesidá de qu’a lo llargo del alcuentru haya un mínimu de siete xugadores con ficha del primer equipu.

    El Sporting entrénase esta mañana en Mareo. El técnicu roxiblancu va aguardar a los prolegómenos del alcuentru para dar cuenta tantu la convocatoria como l’equipu inicial.

    El Cádiz, con una única novedá

    Álvaro Cervera introdució una novedá na convocatoria pa Xixón con respectu al alcuentru del pasáu martes énte l’Estremadura nel Ramón de Carranza. Cayóse de la llista Vincenzo Rennella, que dexó al so sitiu a Djordje Jovanovic. La llista al completu ta integrada por Alberto Cifuentes, David Gil, Rober Correa, David Carmona, Ivan Kecojevic, Fali, Sergio Sánchez, Marcos Mauro, Alfonso Espino, José Mari, Álex Fernández, Salvi Sánchez, Ager Aketxe, Jairo Izquierdo, Djordje Jovanovic, David Querol, Mario Barco y Dejan Lekic.

    El técnicu cadista señaló en rueda de prensa que «teníamos la oportunidá de siguir dependiendo de nós mesmos, nun foi asina. Fallamos, sabémoslo, llamentámoslo enfoma porque dimos pie a depender d’otros. Sicasí, vamos dir a ganar, vamos intentar ganar porque pueden pasar en fútbol bien de coses como se vio esti día».

    Sobro posibles cambeos señalo que va haber dalgunu: «L’únicu que nun puede xugar en Garrido, sancionáu, al marxe de Juan Hernández y Pantic, y de Machís y Manu».

  • Gragera: «José Alberto confía muncho na cantera»

    Gragera: «José Alberto confía muncho na cantera»

    Anque inda xuvenil, José Gragera desenvolvióse na sala de prensa de Mareo como si d’un veteranu tratárase. «Atópome bien cómodu entrenando col primer equipu, ponénmelo fácil, ye un gran grupu», señaló’l mediocampista, que «considera qu’ameyoró dende entós» no personal. Reconoz que’l ritmu de xuegu ye distintu al respective d’otres categoríes, «va más rápidu’l balón». L’anterior xornada vio’l partíu dende’l banquín. Asegura que nun s’encegola cola posibilidá de debutar. Namá piensa «en trabayar», anque reconoz que faelo ye «un suañu pa tou canteranu», magar asume que «hai más xugadores nel equipu».

    El Sporting ye daqué bien importante pa él: «Voi a El Molinón desque tengo trés años; para la mio familia ye daqué bien importante». Foi’l so padre’l que lu introdució y col que lleva viviendo tolos tramos de la so vida futbolística. Gústa-y falar y aldericar con él. Anueche vio’l partíu del Cádiz con él: «Afitámonos especialmente nos mediocampistes».

    Esplicó que «José Alberto confía na cantera». Fíxo-y debutar nel filial y podría facelo bien lluéu col primer equipu. Naide-y dixo nada inda sobre la pretemporada: «Nun sé nada, pero reconozo que me gustaría facela col primer equipu». Vivió un gran añu, convocáu pola Selección Española Sub19, habitual nel filial, entrenándose nel tramu final lligueru col primer equipu… Sicasí, l’anterior tamién-y paeció bien bona, cuando «llegamos a la final de la Copa de Campeones (xuveniles)».

    Gragera espunxo que nun-y resultaba fácil definise como mediocampista, anque se considera «un xugador d’equipu al que-y gusta trabayar en comuña». Afitar en Busquets y en Parejo y tocantes a xugadores que vio xugar nel Sporting, citó a Sergio Álvarez y a Rivera.

  • José Alberto afai llínees

    José Alberto afai llínees

    El Sporting encara’l tercer entrenamientu de la selmana previu al partíu del sábadu que va cerrar la temporada liguera n’El Molinón énte’l Cádiz. José Alberto incide nel trabayu tácticu y afai llínees. Tres el procesu víricu que dexó tras, Hernán Santana sumóse al entrenamientu, nel que nun participa güei Isma Cerro, que s’emplega col readaptador, al igual que faen Aitor, Álvaro Jiménez, Traver y Geraldes, ente que Diego Mariño sigue col rehabilitador. Mañana xueves, nuevu entrenamientu en Mareo, a les diez y media de la mañana.

    La mala nueche del Cádiz

    Tres la so derrota anueche en casa énte l’Estremadura, el Cádiz complicó la so clasificación pal ‘playoff’ d’ascensu. Sicasí, caltien abiertes les puertes, magar yá nun depende de sí mesmu, circunstancia qu’agora favorez al Dépor, que va recibir nel so campu a la Córdoba.

  • Última selmana de competición pal Sporting

    Última selmana de competición pal Sporting

    El Sporting empieza la última selmana de competición. El sábadu va zarrar la temporada cola visita del Cádiz. En sumando los trés preceptivos puntos del partíu énte’l Reus, los de José Alberto encaren esti zarru de campaña col ánimu de quedar lo más alto posible na clasificación. Pela so parte, el cuadru andaluz tien inda pindiu d’apostar mañana énte l’Estremadura’l so penúltimu alcuentru, aplazáu pol fallecimientu de Reyes.

    La selmana empezó en Mareo con delles ausencies nel entrenamientu del grupu: Dani Martín, cola Selección Española Sub21; Lod, cola de Finlandia; Geraldes, Aitor García y Álvaro Jiménez, col readaptador; Hernán Santana, na so casa por una afección vírica; Traver, sometíu a tratamientu y fisioterapia, y Diego Mariño, col rehabilitador, ente que Isma Cerro emplégase parcialmente colos sos compañeros. Ye baxa federativa pa la próxima xornada Peybernes.

    El Sporting volverá entrenase mañana martes a les 10.30 hores en réxime de concentración, con comida a la fin del mesmu nes instalaciones raxones.