Categoría: Sporting

José Alberto: «Trátase de quedar lo más arriba posible»

«Trátase de quedar lo más arriba posible na clasificación y de facelo tamién coles meyores sensaciones». Asina encara José Alberto‘l partíu d’esti sábadu énte l’Albacete, un equipu del que destaca’l so «potencial nes dos árees y la so pegada, amás de que nun precisa tener muncha posesión». L’entrenador del Sporting quier la victoria «por nós mesmos, pola nuesa afición y polos rivales que tán en competición», por una evidente cuestión d’integridá.

Na so comparecencia énte los medios de comunicación, José Alberto refugó falar del futuru más allá d’esta temporada, del presente, anque reconoció sentir «l’enfotu del club». Preguntáron-y pol llunar que vio esta campaña: «El nuesu debe de la temporada foi nun poder consiguir qu’El Molinón se convirtiera nun fortín».

Preguntáu pola afición, l’entrenador del Sporting amosóse bien estimosu. Siente que-y tresmite ilusión. Tocantes a la posibilidá de que pueda vese esti sábadu un centru del campu íntegramente de Mareo, respondió que «too ye posible».

24/05/2019
El Sporting recibe a un emerxente Albacete

El Sporting recibe esti sábadu a les seis de la tarde nel estadiu d’El Molinón a un emerxente Albacete Balompié. El partíu va ser arbitráu por Vicandi Garrido. Nos prolegómenos del alcuentru guardaráse un minutu de silenciu en memoria de del que foi xugador y técnicu roxiblancu Miguel Montes, fináu esta selmana. José Alberto dirixió esta mañana l’últimu entrenamientu previu al partíu, pal que se reserva hasta los sos preliminares, como suel faer siempres que se xuega en casa, tanto la convocatoria como l’equipu inicial.

Febas considera que va ser un partíu «complicáu»

Febas, el xugador del Albacete dexar pol Real Madrid señaló con respectu al alcuentru d’esti sábadu, que “el Sporting va ser un rival difícil, qu’agora ta xugando con un 4-4-2 y que enriba tien xugadores bonos y fuertes». Considera que ye «un gran equipu que podría tar enriba». Ve l’alcuentru complicáu» y destacó El Molinón, «un campu bien guapo”.

24/05/2019
Too llisto pal III Alcuentru de Peñes Sportinguistes

Yá ta too llisto pa la celebración del III Alcuentru de Peñes Sportinguistes. La Federación de Peñes Sportinguistes presentó esti xueves na sala de prensa de la Escuela de Fútbol de Mareo l’eventu, que se va celebrar en Mieres del Camín el próximu 22 de xunu. La organización y collaboración del Conceyu de Mieres y de la Peña Sportinguisita Mieres del Camín fueron clave pa qu’esti tercer alcuentru se celebre na localidá asturiana.

N’él, va apurrise’l clásicu troféu ‘Molinón de Plata’ y va haber una misa n’honor a los peñistas difuntos nel caberu añu. Amás, tan programaes actuaciones de grupos de música y actividaes por que los más pequenos pasen un gran día. Como novedá, va ponese a disposición de los interesaos nel eventu unos billetes especiales de RENFE pa que s’alleguen dende Xixón ensin necesidá d’usar el coche.

24/05/2019
«La continuidá de José Alberto va ser una bona noticia»

El centrocampista del Sporting Cristian Salvador pronuncióse esta mañana na sala de prensa de Mareo pola más que posible continuidá de José Alberto al frente del equipu. «Va ser una bona noticia y amás va poder coyer al equipu dende’l principiu». El xugador valoró especialmente esti aspectu y añadió que’l técnicu «nun lu tuvo fácil».

No personal, el centrocampisa zamoranu amosóse satisfechu pol so afitamientu nel equipu, anque llamentó que «nun pudiéramos dar el saltu». Al respective de los dos próximos partíos, Cristian apeló a la profesionalidá del equipu tres una selmana «na qu’entrenemos perbién». Espunxo que se trata de «quedar lo más alto posible na clasificación».

23/05/2019
Dani Martín y Nacho Méndez, cola sorrisa del draft

Dani Martín y Nacho Méndez empecipiaron l’entrenamientu del Sporting d’esta mañana con una sorrisa, en sabiéndose ente los meyores promeses del fútbol español. El porteru foi escoyíu meyor porteru sub21 pol Comité Técnicu del Fútbol Draft d’esta temporada, mientres que’l centrocampista integra’l segundu equipu, el denomináu de plata.

Na votación formaron parte del Comité Técnicu, como espertos nel fútbol de cantera, Javier Lasagabaster (director xeneral Futbol Draft), Josá María Timón (coordinador gabinete RFEF), Francis Hernández (coordinador de Selecciones Nacionales RFEF), Jacinto Alonso pPresidente de la Federación Rioxana y miembru de la Xunta Directiva de la RFEF), Luis de la Fuente (seleccionador sub21), David Gordo (seleccionador sub17), Julen Guerrero (seleccionador sub16), Pedro López (Seleccionador femenín Sub 19), Jesús Barbadilla “Jesule” (AFE), Ángel Caballero (AEAF – Asociación Española Axentes Xugadores), Ricardo Resta (La Lliga), Vicente Miera (exseleccionador nacional absolutu), Nacho Silván, (espertu de fútbol cantero) y Ana Rossell (esperta en fútbol femenino).

23/05/2019
Álex Alegría: «Nel Sporting volví a sentime futbolista»

Álex Alegría llegó cedíu nel mercáu d’iviernu, procedente del Rayo Vallecano en calidá de vencíu pol Betis. El so futuru ta en manos del club verdiblancu, pero’l delanteru dexó clares les sos intenciones: «Siguir equí ye la mio primer opción, pero dependo del Betis». Reconozse «feliz en Xixón, tanto la mio familia como yo, y eso pa mi ye daqué fundamental».

Aspira a llegar a los siete goles desque llegó. Alegría marcóse esa cifra y quéden-y dos partíos pa poder llogralo. Nun dulda en señalar na sala de prensa de Mareo que «nel Sporting volví sentime futbolista». Dá-y especial valor, porque «muncha xente duldaba de cómo podía recuperame de la mancadura que tuvi». Güei nun s’entrenó por un golpe nun cadril. Nun-y torgará tar a disposición el sábadu.

De lo vivío nesta etapa roxiblanca, quédase «cola capacidá de recuperación que tuvimos». Al respective de les últimes selmanes, cree que «los rivales pudieron estudianos, amás de que pudo faltanos efectividá». Ta contentu de la so asociación con Djurdjevic: «Formamos una bona dupla, na qu’ún-y apurre al otru».

22/05/2019
Álex Alegría trabaya preventivamente nel ximnasiu

Un golpe na cadera fizo qu’Álex Alegría reciba tratamientu, sométase a fisioterapia y trabaye nel ximnasiu separáu del grupu. Sicasí, los servicios médicos del club xixonés alvierten de que se trata d’una midida preventiva y que nun apeligra que’l delanteru del equipu pueda participar nel partíu d’esti próximu sábadu énte l’Albacete n’El Molinón.

Quien foi novedá sobro’l prau ye Ivi, qu’empieza a dexar tras les sos dolencies musculares. Fixo’l trabayu de calentamientu colos sos compañeros y prosiguió depués, al pie de Aitor, col rehabilitador. L’entrenamientu de mañana xueves va repetise: a les 10.30 hores, en Mareo, de puertes abiertes.

Baxes y altes nel Albacete

En cuanto al Albacete, va llegar ensin el so máximu goliador, Jérémie Bela, que vio’l pasáu llunes la so quinta tarxeta mariella. Otra manera, Luis Miguel Ramis recupera a Eugeni y Fran García.

22/05/2019
Robin Lod: «El Sporting ye un club bien grande»

Robin Lod considera que «puedo faelo meyor» nel Sporting, anque añade que «preciso continuidá y enfotu, porque sinón ye difícil para mi». Tien una temporada más de contratu como sportinguista y espera poder encetar el so futuru cuando termine l’actual campaña. «Como tolos futbolistes, lo que quiero ye xugar».

Autor de los dos tantos roxiblancos la pasada xornada, «quíta-y importancia, porque per delantre ta siempres la resultancia». Sicasí, confiésase feliz en Xixón, “tanto la mio familia como yo». Preguntáu por si pa él supon un atrasu xugar en Segunda respondió: «Non, porque ésti ye un club bien grande y lo que me gustaría sería ayudar a poder xubir».

Recordáronlu que robló los sos meyores partíos en Copa del Rei, ante rival de primera División. Paez-y un poble consuelo, porque «quiero xugar bien énte toos». Nun siente pena n’absolutu de venir al Sporting «porque yera lo que quería».

21/05/2019
El Sporting entama a preparar la visita del Albacete

El Sporting tornó esta mañana a los entrenamientos en Mareo, n’esfrutando ayeri de día de descansu. L’equipu xixonés va recibir el sábadu al Albacte a les seis de la tarde n’El Molinón con arbitraxe del colexáu vascu Iñaki Vicandi Garrido. El cuadru manchegu perdió ayeri nel so campu énte la Granada (0-1), lo que lu caltien nel tercer puestu, anque alloña les sos opciones d’ascensu directu.

Nel Sporting la única novedá del día ye l’ausencia nel entrenamientu d’Álvaro Jiménez, aquexáu de problemes musculares, pa los que se somete a tratamientu y fisioterapia. Tocantes a los cuatro xugadores de baxa, siguen colos sos respectivos protocolos: Aitor y Ivi trabayen col readaptador y Diego Mariño, al que-y retiraron los puntos que-y fueron aplicaos na operación, y Isma Cerro, prosiguen cola rehabilitación.

El Sporting volverá entrenase nuevamente mañana en Mareo a los diez y media de la mañana.

21/05/2019
A la venta les entraes pal Sporting – Albacete

Les entraes pal choque ente’l Sporting y l’Albacete del próximu sábadu tan yá a la venta. L’equipu castellán-manchegu va visitar l’estadiu d’El Molinón a les 18 hores pa disputar l’antepenúltima xornada de LaLliga 123. Les localidaes pueden alquirise colos siguientes precios y horarios:

Grada y Tribuna Norte: 15 euros
Grada y Tribuna Sur: 15 euros
Grada y Tribuna Esti: 20 euros
Tribuna Oeste: 25 euros
Junior: 5 euros

Horarios:

Taquilla d’El Molinón-Enrique Castro «Quini»
De martes a vienres: 10 a 13.30 y de 17 a 20 hores
Sábadu de 11 a empiezu de partíu

Tienda de San Bernardo

De martes a vienres: 10 a 13.30 y 17 a 20 hores
Sábadu: 11 a 13:30 hores

21/05/2019