Xixón al día

Categoría: Tema del día

  • Últimos díes pa matriculase nos cursos de B1 y B2 d’asturianu de l’Academia

    Últimos díes pa matriculase nos cursos de B1 y B2 d’asturianu de l’Academia

    Últimos trés díes pa poder inscribise nos cursos de B1 y B2 d’asturianu qu’ufierta l’Academia de la Llingua Asturiana. El plazu acaba esti vienres, 30 de xineru. Les clases presenciales van ser los martes y xueves n’horariu de 17 a 19 h, dende’l 10 de febreru hasta’l 28 de mayu, nel llar social de l’Academia (C/Águila, 10 – Uviéu). El preciu, de 150 €, inclúi materiales y una prueba final de nivel. La matrícula abre güei hasta’l 30 de xineru.

    Noyos ye un métodu d’alfabetización n’asturianu que garra’l Marco Común Européu de Referencia pa les Llingües como base pa graduar los diferentes niveles. Dende un puntu de vista comunicativu, al traviés del trabayu de les comunicaciones y de les espresiones orales y escrites, esti proyeutu quier abarcar los niveles elementales (A1 y A2), medios (B1 y B2) y superiores (C1 y C2). L’únicu requisitu d’entrada ye acreditar un nivel elemental d’asturianu (certificáu de superación de la Prueba de conocencia, cursu elemental de l’ALLA o certificáu de superación el A2 del MCER).

  • Asturies rexistra 169 incidencies rellacionaes colos fenómenos meteorolóxicos costeros y vientos

    Asturies rexistra 169 incidencies rellacionaes colos fenómenos meteorolóxicos costeros y vientos

    El Serviciu d’Emerxencies del Principáu d’Asturies (SEPA) rexistró, ente les 00.00 y les 19.00 hores del domingu, un total de 169 incidencies rellacionaes colos avisos meteorolóxicos por fenómenos costeros y vientos pa la nuestra comunidá.

    La mayor parte de los incidentes, en concretu 96, correspondiéronse con cortes y llimpieces de carreteres (arboles o oxetos cayíos na rede viaria, restos de maleza o cañes, etc.). Amás, contabilizáronse 69 incidentes rellacionaos cola retirada d’elementos peligrosos o inestabilidá vertical (desprendimientos en fachaes, bistechos o teyaos, allumáu o postes de teléfonos cayíos…). Ha destacase que tolos incidentes rexistraos, anque numberosos pueden calificase de calter menor.

    Nestes 19 hores, el Centru de Coordinación d’Emerxencies del 112 Asturies atendió un total del 2790 llamaes con una significativa medría d’aquelles rellacionaes col episodiu de vientos.

  • Xixón refuga l’anovamientu de la Cuesta’l Cholo

    Xixón refuga l’anovamientu de la Cuesta’l Cholo

    L’equipu de gobiernu de Xixón, lideráu pola forista Carmen Moriyón, anunció ayeri l’anovamientu de la Cuesta’l Cholo de Cimavilla, un llugar emblemáticu del barriu que va pasar a tener una grada. Sicasí, la sociedá civil y los partíos políticos refugaron dende’l primer momentu esti anovamientu.

    Dende Izquierda Xunida califíquenlo como un «atentáu escontra’l patrimoniu y la convivencia nel barriu» y consideren “irónico que’l mesmu partíu qu’abarganó les escaleres de la plaza del Llavaderu en 2013 pa evitar el botellón seya agora’l que va instalar unes graes nel mesmu barriu que van sirvir puramente pa consumir alcohol na cai, aumentando la concentración de xente nun llugar yá de por sí saturáu”.

    Pela so parte, Podemos lo define como «una degradación evidente de la redolada d’un conxuntu históricu declaráu como bien d’interés cultural, y equí l’únicu interés que paez tar primando ye’l de la hostelería y el turismu, como siempres”. La vocera morada cunta que la obra “va agravar los problemes de los que yá carez el barriu, como’l ruíu y la suciedá” y denuncia que “el fechu de que s’acometa una intervención asina ensin tener en cuenta opiniones de vecinos nin espertos demuestra qu’esta ciudá la gobierna Otea, y que se trabaya con un plan claru: que les zones centrales como esta yá nun seyan un llugar pa que viva la xente, sinón puramente p aqu’unos cuantos algamen beneficiu económicu”.

    Dende l’asociación de vecinos Gigia Cimavilla, argumenten que «se precisa xustamente lo contrario. Conciliar la vida de los vecinos y vecines col ociu, nun poner graes pa beber que potencie y aumente’l consumu d’alcohol na cai. Por nun falar de l’aberración que supón patrimonialmente nun barriu BIC, que ruempe dafechu la estética orixinal de la zona.
    Amás como bien manifestamos nel últimu conseyu de distritu, les obres comprometíes con Cimavilla vienen reflexaes nel plan d’actuación Cimavilla 2030, pal cual nun se consiguieron fondos europeos, esta obra nun vien incluyida nesi plan, polo qu’esos 200.000 euros deben de destinase a actuaciones reflexaes nel proyectu, por coherencia, si non, de que nos estraña que nos denieguen los fondos, cuando’l mesmu conceyu nun actúa acorde a lo que plantega», concluyen.

  • León Benavente, Fillas de Cassandra y Alcalá Norte, protagonistes del VibraMahou Fest Xixón

    León Benavente, Fillas de Cassandra y Alcalá Norte, protagonistes del VibraMahou Fest Xixón

    VibraMahou Fest va volver a Xixón esta primavera y failo con un cartelu protagonizáu por Alcalá Norte, Anabel Llee, Drugos, Fillas de Cassandra, Ginebras, León Benavente y Parquesvr.

    Con esta programación, una de les más esperaes del añu pol públicu asturianu, VibraMahou reafita’l so propósitu d’impulsar esperiencies cinco estrelles alredor de la música en vivu.
    La cita, que yá se consolidó como un imprescindible del calendariu musical d’Asturies, va tener llugar el sábadu 16 de mayu nel Recintu Ferial d’Asturies Luis Adaro y les sos entraes tán yá disponibles equí.

    Nesta quinta edición xixonesa, l’actitú, diversión y enerxía d’Anabel Lee va sumar al canalléu de Parquesvr col so caos controláu ya irreverencia madrilana. El puntu de pop risonderu van ponelu Ginebras, que nun podía perdese la cita para presentar les temes del so nuevu discu. Xixón tamién va esfrutar del directu de los madrilanos Alcalá Norte, unu de los fenómenos del panorama musical de los dos últimos años. León Benavente, iconu del indie nacional, va demostrar la so presencia escénica coles temes del so últimu álbum ‘Nueva Sinfonía Sobre el Caos’. Tamién van tar Fillas de Cassandra, cola so propuesta única de mitoloxía, tradición gallega y beats. Y la representación asturiana va llegar de la mano de Drugos, qu’entemez rock & roll y blues.

     

  • Iniciativa pol Asturianu esixe que la nueva dirección de la RTPA cuente con una persona de reconocida sensibilidá cola llingua asturiana

    Iniciativa pol Asturianu esixe que la nueva dirección de la RTPA cuente con una persona de reconocida sensibilidá cola llingua asturiana

    Tres la salida del anterior director de la RTPA, Francisco G. Orejas, ábrese un periodu nel que la Xunta Xeneral del Principáu d’Asturies tien que nomar un nuevu director de la radiotelevisión pública asturiana. Pa Iniciativa pol Asturianu «trátase d’un momentu clave pa demostrar el sofitu de los partíos a la normalización y a la presencia del asturianu nos medios de comunicación públicos».

    Esti oxetivu apaez yá nel Estatutu d’Autonomía de 1981 y na propia Llei d’Usu y Promoción del Asturianu de 1998, espliquen dende la entidá. Esta reclamación ta tamién sofitada pola Carta Europea de les Llingües Rexonales o Minoritaries, ratificada pol Estáu español en 2001, recueye nel so artículu 11, relativu a los medios de comunicación, la importancia d’implementar polítiques efectives nos medios, estableciendo claramente la garantía de la creación polo menos d’una emisora de radio y d’un canal de televisión nes llingües rexonales o minoritaries.

    Dende la ONG recuerden que los propios principios rectores del ente públicu asturianu reflexen claramente esta cuestión. L’añu pasáu aprobóse’l Mandatu Marcu, que establez precisamente una mayor presencia de les llingües propies d’Asturies nes emisiones de la radiotelevisión pública. «Sicasí, dende entós nun se vieron pasos alantre significativos», denuncien.

    Pa Iniciativa pol Asturianu resulta evidente que los avances nesti ámbitu van dase con mayor facilidá si la persona que tea al frente de la RTPA ye una persona con sensibilidá cola normalización llingüística y con conocimientu de la realidá sociollingüística asturiana. Amás, por supuestu, de cuntar con un proyectu que venceye la realidá asturiana a esti mediu informativu. «La llingua asturiana precisa de manera urxente contar con una mayor presencia en tolos medios, tanto na televisión como na radio y n’Internet, y ye equí onde la radiotelevisión pública tien d’aumentar la so presencia», espliquen.

    Iniciativa pol Asturianu esixe que esti seya un procesu «tresparente y nel que se tengan en cuenta de manera destacada los méritos llingüísticos, yá que ún de los oxetivos principales nuna comunidá onde esisten dos llingües propies tien de ser, sobre too, la presencia de la llingua propia y la so normalización social».

    Per otra parte, l’asociación entamará un ciclu de contactos colos partíos políticos del parllamentu asturianu p’amosar la so postura y conocer los sos oxetivos, teniendo en cuenta la importancia d’esta cuestión.

    Pa la organización de reivindicación llingüística ye una oportunidá hestórica pa que la llingua asturiana y l’eonaviegu puedan contar con unos medios de comunicación verdaderamente útiles pa la so difusión y pa garantizar que les persones falantes y que tola población d’Asturies tenga accesu a unos medios nos que puedan escuchar la so propia llingua y familiarizase col so usu n’ámbitos formales ya informales. La radiotelevisión pública tien de difundir, por supuesto de manera tresversal, l’usu del asturianu dende la población infantil hasta la adulta, dende los conteníos d’entretenimientu hasta los informativos, pasando polos deportes y por tolos conteníos que emita l’ente.

  • Fin a la fuelga médica tres l’alcuerdu ente gobiernu y sindicatu

    Fin a la fuelga médica tres l’alcuerdu ente gobiernu y sindicatu

    El Serviciu de Salú del Principáu (Sespa) y el Sindicatu Médicu Profesional d’Asturies (SIMPA) suscribieron na tarde d’ayeri un alcuerdu que pon fin a la fuelga empecipiada’l pasáu 14 de xineru y sienta les bases pa reforzar el sistema sanitariu públicu dende’l diálogu y la corresponsabilidá.

    Tolos puntos incluyíos nel alcuerdu busquen caltener y ameyorar la calidá de l’asistencia emprestada a los usuarios de la sanidá pública per aciu l’amenorgamientu de les llistes d’espera, la optimización de l’accesibilidá al sistema sanitariu y el fomentu de la captación y fidelización del talentu médicu, como condición necesaria pa la sostenibilidá y la continuidá asistencial. Too ello incide directamente nuna meyor respuesta del sistema públicu de salú.

    El documentu afronta de manera integral cuestiones como la organización de la xornada, la conciliación y la salú llaboral, la meyora de les condiciones retributives y la reconocencia profesional. Igualmente, incorpora midíes específiques pa médicos residentes y pa les especialidaes d’atención primaria, urxencies y emerxencies.

    Por casu, facilítase la reorganización del trabayu na rede de primaria, mientres que nos servicios hospitalarios nos que seya posible van entamase guardies de doce hores. Tamién se van impulsar iniciatives p’ameyorar la captación y fidelización de profesionales.

    L’alcuerdu va ayudar a dotar al sistema sanitariu de mayor estabilidá, al definir criterios más claros pa planiar plantiyes, cubrir incidencies y xestionar la movilidá por razón de serviciu, garantizando la continuidá asistencial.

    Una mesa de siguimientu va ser la encargada de velar pol cumplimientu efectivu de los compromisos adquiríos ente dambes partes.

  • El Gobiernu d’Asturies abre la primer escuelina autonómica de Xixón con una matrícula de 31 neños y neñes

    El Gobiernu d’Asturies abre la primer escuelina autonómica de Xixón con una matrícula de 31 neños y neñes

    El Gobiernu d’Asturies abrió güei la escuelina Los Nuberinos, asitiada nel Colexu Asturias del distritu Xixón-Sur, que se convierte na cuadraxésimu quinta de la nueva rede pública, autonómica y gratuita y la primera que’l gobiernu asturianu constrúi nesti conceyu.

    La escuelina -que consta de trés unidaes- empieza la so andadura con 31 neños y neñes, que se van dir incorporando progresivamente, a partir de les nueve de la mañana, dientro del periodu d’adaptación. El personal ta compuestu por una directora y seis técniques d’educación infantil (TEI), dos per cada unidá.

    Los Nuberinos pertenez a la fase I de la rede autonómica de Les Escuelines/As Escolías. La obra encargóla’l gobiernu d’Asturies a la empresa Citanias y tuvo un costu de 372.529 euros, con financiamientu de los fondos europeos del Mecanismu de Recuperación y Resiliencia (MRR).

    La escuela ocupa la planta baxa del colexu y tien un accesu independiente. Amás de les trés aules dotaes con un aséu caúna, el centru dispón d’un cuartu bañu afechu y trés sales pa xuntes, la dirección y una polivalente. Nesta postrera va emprestase’l serviciu de comedor. Tamién cunta con un patiu de xuegos y una zona esterior urbanizada. En total, suma casi 400 metros cuadraos de superficie construyida.

    Per otru llau, el Gobiernu d’Asturies tien programaes otres trés escuelines en Xixón dientro de la fase II de la rede. La de Montevil, de cuatro unidaes, ta en fase d’execución. Y tán a puntu de recibir los proyectos de les previstes nos colexos Rei Pelayo y Santa Olaya, de dos unidaes caúna. Amás, el Conceyu de Xixón ta construyendo otru centru nel barriu d’El Llanu, que va asumir el gobiernu en cuanto tea concluyíu.

    Con esta nueva apertura, la rede autonómica de 0 a 3 años ta formada por 45 escuelines/escolías, 23 de la fase I y 22 municipales yá integraes. Esti mes ta prevista la inauguración de Los Ablaninos, n’Ayande.

    En febreru, van empezar la so andadura la escolía El Cabás, de Tapia, y les escuelines Les Xanines, de Caravia, y El Reblincu, de Quirós. Toes elles formen parte de la fase I de la rede, sacante la d’Ayande, incluyida yá na segunda.

  • La maxa de los Reis Magos percorrerá les cais de Xixón na Cabalgata

    La maxa de los Reis Magos percorrerá les cais de Xixón na Cabalgata

    Xixón prepárase pa vivir unu de los díes más máxicos del añu cola llegada de los Reis Magos d’Oriente. Melchor, Gaspar y Baltasar, acompañaos de S.A.R. el Príncipe Aliatar, van facer vibrar la ciudá dende primera hora de la mañana con un programa cargáu d’emoción, fantasía y tradición.

    La llegada de Sus Maxestaes ta prevista pa les 10:15 hores nel Puertu Deportivu, onde van desembarcar nel pantalán más cercanu a l’Antigua Rula. Dempués d’atender a los medios de comunicación, van desfilar en vehículu y a pie pola cai Claudio Alvargonzález hasta la Plaza del Marqués. Ellí van saludar a les neñes y neños aconceyaos delantre del Palaciu Revillagigedo y van ser recibíos poles autoridaes municipales. La comitiva real va permanecer na Plaza del Marqués hasta les 11:30 hores. Durante’l desembarcu y la llegada va haber un puntu reserváu pa persones con discapacidá xunto al árbol de la sidra.

    Al mediudía, ente les 13:00 y les 15:00 hores, los Reis Magos van recibir a les neñes y neños nel Salón de Recepciones del Conceyu de Xixón, onde van poder entregar les sos cartes. L’accesu a la cola va interrumpise a les 11:30 hores y va habilitase un accesu rápidu pa persones con discapacidá nel llateral del edificiu municipal.

    La tarde va tar protagonizada pola tradicional Cabalgata de Reis, que va dar entamu a les 18:30 hores dende’l Colexu Públicu Begoña. El desfile va tar formáu por 11 carroces, 8 vehículos d’apoyu y alredor de 800 persones a pie, llevando la maxa a cada rincón de la ciudá. El percorríu va pasar poles cais Poeta Ángel González, Anselmo Solar, Ramón y Cajal, Uría, Jovellanos o Los Moros, hasta llegar a los Xardinos de la Reina. Va habilitase un espaciu reserváu pa persones con discapacidá enfrente del Hospital del Carmen, na cai Ramón y Cajal.

    Tres la cabalgata, alredor de les 21:30 hores, Sus Majestaes van dirixise a la ciudadanía col so tradicional discursu dende’l balcón del Conceyu, poniendo’l broche final a una xornada inescaecible.

    Dende l’Ayuntamientu recomiéndase l’usu del tresporte públicu, yá que se van producir restricciones de tráficu y modificaciones nes llinies d’EMTUSA. Tamién se pide a toles persones asistentes que sigan en tou momentu les indicaciones de los cuerpos de seguridá y de la organización, que caltengan la distancia de seguridá coles carroces y que recuerden que les neñes y neños son los verdaderos protagonistes d’esta fiesta.

    Cola llegada de los Reis Magos, Xixón vuelve enllenase de suaños, ilusión y maxa na nueche más especial del añu.

  • Xixón alluma con bengales pa esixir la llibertá de ‘Les 6 de La Suiza’ y denunciar la criminalización sindical

    Xixón alluma con bengales pa esixir la llibertá de ‘Les 6 de La Suiza’ y denunciar la criminalización sindical

    Cerca d’un centenar de persones concentráronse esti llunes pela tarde nel barriu d’El Llano de Xixón nuna orixinal y reivindicativa acción con bengalas pa esixir la llibertá de Les 6 de La Suiza y denunciar lo que consideren una criminalización del sindicalismu.

    La protesta, entamada pol colectivu Sofitu a les 6 de La Suiza, consistió nuna cadena humana qu’enllenó de color el cielu nocherniegu con bengales de lluz naranxa, simbolizando tanto la indignación como la esperanza énte la situación d’estes seis sindicalistes condergaes a trés años y mediu de prisión.

    Los participantes axuntáronse na avenida del Llano y, pasaes les 19:00 hores, activaron al unísonu les sos bengales, nun actu ensin incidentes so la mirada de la Policía Local, que supervisó la concentración respetando los permisos de xunta.

    Les voceres esplicaron que la iniciativa buscaba “visibilizar la demanda de llibertá” de los seis persones condergaes y tamién denunciar lo que consideren un “grave ataque a los derechos sindicales”. Reivindicaron qu’esta acción ye clave p’amosar que les sindicalistes “nun van tar soles” y pa evidenciar que’l so procesamientu xudicial nun constitúi otra cosa sinón un intentu de criminalizar l’acción sindical lexítima”.

  • El IV Semando Fest axunta n’Uviéu a proyectos de música moza n’asturianu el 7 de febrero de 2026

    El IV Semando Fest axunta n’Uviéu a proyectos de música moza n’asturianu el 7 de febrero de 2026

    El IV Semando Fest va celebrase’l sábadu 7 de febreru de 2026 na Sala Lata de Zinc d’Uviéu. El festival, centráu na música moza n’asturianu, va empezar a les 20:00 hores y va cuntar con delles actuaciones en directu a lo llargo de la nueche. Nesta cuarta edición, el cartelu del festival ta integráu polos proyectu Rellume, Entós, Fruela 757 & Lucía Rojo y PVXARRA. Caúna d’estes propuestes desenvuelve la so actividá dientro de la escena musical asturiana contemporanea, con formatos y planteamientos diversos, que van dende trabayos venceyaos a la tradición oral y musical hasta proyectos de creación actual.

    El Semando Fest nació coles mires de sirvir como espaciu de visibilización y alcuentru pa grupos qu’utilicen l’asturianu como llingua de creación artística. Dende la so primer edición, el festival apostó por axuntar nun mesmu escenariu distintes propuestes musicales, favoreciendo l’espardimientu de nuevos proyectos y la continuidá d’iniciatives yá consolidaes dientro del panorama musical del país.

    Les entraes pal IV Semando Fest tan a la venta al traviés de la plataforma Entradium, onde’l públicu puede consultar los precios, les modalidaes disponibles y la información actualizada sobre l’aforu. La organización encamienta la compra antemanada, dáu’l calter
    llimitáu del espaciu.

    L’eventu va tener llugar na Sala Lata de Zinc, un recintu habitual de conciertos y actividaes culturales n’Uviéu, que va acoyer nuevamente’l festival tres ediciones anteriores. La programación va desenvolvese íntegramente n’horariu de tarde-nueche. Con esta nueva edición, el Semando Fest sigue la so trayectoria dientro del calendariu cultural asturianu, calteniendo’l so formatu de festival de sala y el so enfoque na música en asturianu, con especial atención a les nueves xeneraciones d’intérpretes y creadores.