Xixón al día

Categoría: Tema del día

  • L’Unión Club Ceares impulsa la campaña navidiega cola apertura d’una Pop Up Store

    L’Unión Club Ceares impulsa la campaña navidiega cola apertura d’una Pop Up Store

    L‘Unión Club Ceares (UCC) abre esti Nadal una Pop Up Store col fin de reforzar el vínculu col so entornu social, facilitar l’accesu a productos oficiales del club y promover una campaña de sofitu al so proyectu deportivu y comunitariu.

    La tienda efímera abre les sos puertes los díes 22, 23, 24, 29, 30 y 31 d’avientu, amás del 5 de xineru, en horariu de 17:00 a 20:00 hores, y ta allugada na Avenida Hermanos Felgueroso, númberu 42, baxu, nel propiu barriu de Ciares.

    Baxo’l lema “Esti Nadal… Regala Ciarismu”, la iniciativa quier poner en valor los principios que definen al UCC: fútbol popular, compromisu social, participación ciudadana y arraigu col territoriu. La Pop Up Store conviértese nun espaciu d‘alcuentru ente club y afición, nel que se van poder mercar camisetes, merchandising oficial y otros artículos venceyaos a la identidá del UC Ceares.

    Esta acción navidiega busca tamién ufiertar una alternativa de regalu consciente, apostando pol consumu llocal y pol sofitu a un proyectu deportivu que va más allá de la competición. L‘UCC ye reconocíu pol so papel activu na vida social del barriu, pola promoción de valores como la igualdá, la inclusión y la solidaridá, y pola so defensa d’un modelu de fútbol participativu y accesible.

    La apertura de la Pop Up Store forma parte de les estratexes del club pa diversificar los sos ingresos y garantizar la sostenibilidá del proyectu, ensin renunciar a los sos principios fundacionales. Al empar, supón una oportunidá pa que siguidores y vecindá conozan más de cerca’l trabayu que se desenvuelve dende la entidá a lo llargo de tol añu.

    Dende l‘Unión Club Ceares anímase a la ciudadanía a visitar la Pop Up Store, participar na campaña y compartir un Nadal venceyáu a los valores del deporte popular y del compromisu col entornu.

  • L’UC Ceares convierte’l derbi xixonés nun altavoz pola vivienda digna

    L’UC Ceares convierte’l derbi xixonés nun altavoz pola vivienda digna

    El UC Ceares celebró na tarde de güei una rueda de prensa con motivu del próximu derbi xixonés frente al Xixón Industrial, un alcuentru que tresciende lo deportivo pa convertise nuna acción de concienciación social. El club ciarista anunció que’l partíu va tar dedicáu a la defensa del derechu a una vivienda digna, una problemática qu’afecta de manera directa a miles de persones en Xixón y nel conxuntu d’Asturies.

    Representantes del club esplicaron qu’esta iniciativa naz de la esmolición pola situación actual del accesu a la vivienda, marcada pol aumentu de los precios del arriendu, la escasez de vivienda pública y la dificultá creciente pa que la mocedá, families trabayadores y colectivos vulnerables puedan desenvolver un proyectu de vida dignu.

    “El fútbol ye una ferramienta poderosa pa llegar a muncha xente. Queremos aprovechar la visibilidá del derbi pa poner el focu nun problema que nun ye astractu, sinón que tien nomes y apellíos nos nuesos barrios”, señalaron dende la directiva del UC Ceares mientres la rueda de prensa. Nesti sentíu, aprofiaron que’l club nun entiende’l deporte separao de la realidá social que la arrodia y qu’acciones como esta formen parte de la so identidá.

    El derbi xixonés ente’l UC Ceares y el Xixón Industrial ye unu de los alcuentros con mayor carga simbólica del fútbol llocal. Pal UC Ceares, esti contestu supón una oportunidá única pa llanzar un mensaxe claru: la vivienda digna ye un derechu, non un privilexu. Y lo harán apoyando a Blanca, una vecina pensionista amenazada de desahuciu tres una xubida del arriendu de casi’l 50%.

    Mientres la rueda de prensa detalláronse dalgunes de les acciones previstes pal día del partíu. El club anunció que va haber mensaxes visibles nel campu y na grada rellacionaos cola defensa de la vivienda digna, mesmo que la collaboración con colectivos sociales y vecinales que trabayen diariamente nesti ámbitu. L’oxetivu ye xenerar conciencia, fomentar l’alderique y recordar que les instituciones públiques tienen la responsabilidá de garantizar esti derechu básicu.

    Dende l’UC Ceares quixo sorrayase qu’esta iniciativa nun pretende señalar a naide en concretu, sinón sumar voces y sensibilidaes al rodiu d’una causa común. “Creemos nun fútbol que xune, que constrúi comunidá y que sirve p’ameyorar la vida de les persones. Dedicamos esti derbi a la vivienda digna porque ye una llucha que nos apela como club y como vecinos y vecines de Xixón”, afirmaron.

    Coles mesmes, el club destacó la importancia de que’l fútbol modestu y popular siga siendo un espaciu de participación y compromisu. Frente a un modelu de fútbol cada vez más alloñáu de la realidá cotidiana, el UC Ceares reivindica’l so papel como axente social activu, capaz de tender pontes ente’l deporte y los problemes reales de la ciudadanía.

  • Arantza Margolles unvia a una carta a Álvaro Queipo demandando la vuelta del asturianu al Mercáu Navidiegu de Xixón

    Arantza Margolles unvia a una carta a Álvaro Queipo demandando la vuelta del asturianu al Mercáu Navidiegu de Xixón

    La presidenta d’Iniciativa pol Asturianu, Arantza Margolles, ta acabante d’unviar una comunicación al presidente del Partíu Popular d’Asturies, Álvaro Queipo, pola supresión del usu de l’asturianu y de la toponimia oficial nel Mercáu Navidiegu de Xixón (MENAX). L’usu de la llingua asturiana y de la toponimia tuvo presente nesti eventu dende la so creación hai casi una década ensin xenerar discutiniu, disputa o falta de venta polos comerciantes.

    Nesta edición, la conceyalía d’Atención Ciudadana y Distritos encabezada por Abel Junquera tomó la decisión de dar marcha atrás na presencia normal del idioma.

    Margolles considera qu’esta determinación va contra lo que defende en materia llingüística’l Partíu Popular d’Asturies. La presidenta de la entidá recordó nel escritu que “nun ye de recibu anular l’usu del asturianu, escaecer la so promoción y la so normalización, como tampoco lo ye tapecer la toponimia tradicional y al tiempu ‘incensar’ la Llei d’Usu”.

    Asinamesmo, la representante del colectivu de reivindicación llingüística apuntó tamién que “Una parte de la decepción con esta decisión del gobiernu municipal de Xixón, parte d’esto: desconocer cuál ye’l motivu p’arrenunciar al usu del nuesu idioma nesti mercáu, cuestión nunca xeneró conflictu nengún”.

    Arantza Margolles treslladó la decepción de les persones asociaes a Iniciativa pol Asturianu y que tamién son militantes del PP diciendo que “oi presidenta d’una asociación de defensa del asturianu plural, na que tamién hai votantes, simpatizantes y afiliaos del Partíu Popular, que me treslladen que nun entienden que’l so partíu, autor de la única llei que protexe l’asturianu, seya’l mesmu partíu qu’avale pasos atrás na so normalización y visibilidá”.

    La presidenta amestó tamién “nun pretendemos xenerar un conflictu internu nel to partíu nin nel gobiernu municipal de Xixón. Confiamos dafechu na to defensa del patrimoniu llingüísticu, pero entiende, por favor, que precisamos comprobar esti cambéu d’actitú del PP d’Asturies al respective de les nuestres llingües. Pa eso, pidímoste que convides a los reponsables d’esti erru a enmendalu”.

    Margolles terminó poniéndose a disposición del llíder el PP d’Asturies pa iguar esti conflictu reclamando-y fuercia y valentía: “pídote fuercia y valentía pa evitar pasos atrás nel idioma, agora y cuando seya, nel gobiernu o na oposición. Asturies precisa líderes nel centru-derecha, y sobremanera nel son principal partíu, el PP, con criteriu, pallabra, convicción na defensa de les nueses llingües. Nun se puede prometer defender la Llei d’Usu y tolerar estes actuaciones […] Toi segura que vas entender el motivu d’esta carta, la nuesa pena, pero confíamos nel to poder pa enmedar esti cambéu”.

    La organización de reivindicación llingüística quedó a la disposición del PP pa iguar con sentíu común y delicadeza esta regresión nel usu del idioma y de la toponimia oficial.

  • Vibra Mahou Fest vuelve a Xixón en 2026

    Vibra Mahou Fest vuelve a Xixón en 2026

    Xixón va volver acoyer en 2026 Vibra Mahou Fest, una cita yá imprescindible nel calendariu musical d’Asturies y cola que la plataforma musical de Mahou Cinco Estrellas refuerza l’apueste pola música en directu.

    Por cuenta de la llegada de les feches navidiegues, Vibra Mahou Fest punxo a la venta una primer riestra d’entraes a un preciu promocional esclusivu de 20€ + gastos de xestión, disponible por tiempu llimitáu, y que yá pueden adquirise equí.

    La quinta edición de Vibra Mahou Fest en Xixón va tener llugar el próximu sábadu 16 de mayu na Recintu Ferial d’Asturies Luis Adaro y va volver combinar música en directu, espacios con actividaes dedicaes a la cultura cervecera y propuestes gastronómiques, una seña d’identidá que reafita la esencia de Vibra Mahou: ufiertar esperiencies cinco estrellas al rodiu del directu.

    A lo llargo de la so hestoria, axuntó a artistes referentes del panorama nacional como Arde Bogotá, Viva Suecia, Shinova, Zahara o Ginebras, ente munchos otros. Nomes amestaos mui estrechamente a otru de los grandes afitaos de la plataforma musical, la Xira Vibra Mahou, que percuerre cada añu distintos sales de la xeografía española. Amás, el talentu emerxente local ye otru de los grandes protagonistes, reforzando’l compromisu del festival cola escena asturiana.

    En 2026, Vibra Mahou Fest va cuntar tamién con paraes en Valladolid (21 de marzu na Feria de Valladolid), en Llión (25 d’abril nel Palaciu de Congresos y Esposiciones de Llión) y en Segovia (12 de setiembre nel CIDE). Asina, el festival va consolidar un percorríu únicu per tol estáu pa celebrar la diversidá musical y cultural española. El próximu 15 de xineru van poder conocese los cartelos colos artistes que van protagonizar les distintes paraes del festival.

  • Muerre Jorge Martínez, cantante d’Ilegales

    Muerre Jorge Martínez, cantante d’Ilegales

    Jorge Martínez, cantante d’Ilegales, ta acabante de morrer, pocos meses depués de dar anuncia va pocos meses del parón de la xira col so grupu Ilegales pa enfrentase a un cáncanu.

    El músicu asturianu anunció que carecía cáncanu y que se vía obligáu a suspender la xira prevista pa los próximos meses. La noticia foi comunicada al traviés d’un mensaxe oficial nel que’l grupu esplicó que l’artista taba empecipiando un procesu de tratamientu médicu.

    El comunicáu señaló que tolos conciertos quedaben atayaos por tiempu indefiníu, y que la prioridá absoluta nesi momentu yera que Martínez pudiera centrase na so recuperación. La banda agradeció’l sofitu de los siguidores y pidió comprensión énte la situación. Naquel momentu, la mira taba puesta na evolución del tratamientu y na posibilidá de que’l cantante pudiera retomar la so actividá artística una vegada superáu’l procesu médicu.

    Güei, 9 d’avientu, la cadena pública asturiana, TPA, dio anuncia d’esta triste noticia.

     

  • Les xornaes dedicaes a la cultura asturiana de la gaita axunten a más de 260 espertos con presencia escasa de la muyer gaitera

    Les xornaes dedicaes a la cultura asturiana de la gaita axunten a más de 260 espertos con presencia escasa de la muyer gaitera

    Les Xornaes de la Música Tradicional Asturiana: Escueles de música tradicional y retos de la cultura asturiana de la gaita, un alcuentru qu’axunta a más de 260 participantes ente ponentes, alumnáu d’escueles, integrantes de bandes de gaites y solistes, dexa arrequexada la presencia de la muyer nesti eventu.

    Entamáu pol Gobiernu d’Asturies en collaboración col Conceyu de la Gaita, l’eventu celébrase en Llaboral Ciudá de la Cultura, en Xixón, col propósitu d’espublizar esta manifestación artística y fortalecer los espacios de reflexón y tresmisión colectiva, coincidiendo col entamu del espediente de declaración de la cultura asturiana de la gaita como bien d’interés cultural (BIC).

    Las Xornaes celebran esta tarde uno de sus actos centrales: el gran encuentro de escuelas de música tradicional, que reunirá a cerca de 180 alumnos y alumnas procedentes de centros municipales, agrupaciones tradicionales y academias privadas. La exhibición, que comenzará a las 18:00 horas en el Teatro de la Laboral, pondrá de manifiesto la vitalidad de estas enseñanzas en Asturias y su papel esencial en la transmisión generacional, con un recorrido que abarca bandas infantiles, grupos de baile tradicional y ensembles de gaita, percusión y cuerda.

    Nel alcuentru participen la Bandina Infantil de Gaites Salia de la Escuela Municipal de Música de Ribeseya, mesmo que les escueles de música tradicional de la Banda de Gaites La Tarabica (Guadarrama), La Quintana (Xixón), Música y Danza Popular de Noreña, A Mansalva (Llangréu), El Gumial (Ayer) y Saxum (Xixón). Les sos actuaciones ufiertaron una panorámica de la diversidá de propuestes formatives que conviven güei n’Asturies y del impulsu colectivu que sostien esti ámbitu.

    La segunda xornada va celebrase’l xueves, 11 d’avientu, y va afondar na cultura asturiana de la gaita, anguaño en fase de documentación pa la so declaración como BIC. Van afrontase cuestiones como la fabricación del preséu, les llinies d’investigación en marcha y la presencia de les muyeres gaiteres na tradición y na actualidá, con referentes como Enriqueta Keti García, Ánxeles Concepción Bernardo Muñiz y Clara María Suárez Rodríguez, que les sos trayectories contribúin a consolidar una mirada plural y contemporanea sobre’l patrimoniu musical. Sicasí, esto último choca cola nula presencia de muyeres nes ponencies, dalgo que llama l’atención, yá que la presencia de la muyer na escena ye bien bayurosa, sobre manera nos años caberos.

  • Sunwafe, la primer empresa en solicitar reserva de suelu na Zalia

    Sunwafe, la primer empresa en solicitar reserva de suelu na Zalia

    El conseyu d’alministración de la Zona d’Actividaes Loxístiques ya Industriales d’Asturies (Zalia) celebró güei una sesión ordinaria na que s’informó sobre la recepción de la primer solicitú formal de reserva de suelu presentada nel marcu del procedimientu públicu de competencia de proyectos, el mecanismu diseñáu pa captar iniciatives empresariales interesaes n’enllantase nesta redolada.

    La solicitú correspuende a la empresa Sunwafe S.L., qu’apurrió y rexistró la documentación según los requisitos establecíos na convocatoria pública. El plazu pa la presentación de solicitúes remató’l pasáu vienres.

    La documentación apurrida inclúi los dos sobres requeríos pol procedimientu: unu cola información xeneral y la propuesta d’implantación y otru cola documentación técnico y económico del proyectu.

    N’informando al conseyu d’alministración sobre la evolución del procedimientu, Zalia va siguir agora los pasos fitos na convocatoria. Asina, de primeres, va dar na revisión y evaluación técnica de la documentación. Darréu, va ellaborase una propuesta p’alzala al conseyu d’alministración, que tendrá d’adoptar l’alcuerdu d’axudicación y la posterior formalización cola entidá promotora.

    La tramitación d’esti espediente enmárcase nos oxetivos estratéxicos de Zalia: facilitar la implantación d’iniciatives industriales y loxístiques, impulsar la inversión granible y contribuyir al desenvolvimientu económicu d’Asturies.

    Estos principios van siguir emponiendo’l llabor de Zalia, qu’aspira a afitase como espaciu de referencia pa nueves iniciatives empresariales y avanzar nel impulsu de proyectos loxísticos venceyaos a la Rede Transeuropea de Tresportes. D’esta miente, va reforzar la so función estratéxica como parte de la área d’influencia (hinterland) del Puertu de Xixón y va ayudar a consolidar Asturies como polu loxísticu del Cantábricu.

  • El mercáu navidiegu Xixón pierde’l so nome n’asturianu y pasa a llamase “Mercado Navideño de Gijón”

    El mercáu navidiegu Xixón pierde’l so nome n’asturianu y pasa a llamase “Mercado Navideño de Gijón”

    El mercáu navidiegu Xixón va perder esti añu la so denominación n’asturianu y pasará a conocese oficialmente como “Mercado Navideño de Gijón”. Con esti cambéu, desapaez de la imaxe pública del eventu un nome que yá formaba parte del paisaxe festivu de la ciudá, especialmente nel entamu del nadal.

    La sustitución del nome n’asturianu supón tamién una mengua na presencia visible de la llingua propia nel ámbitu festivu y turísticu, onde yera habitual atopar rotulación y materiales n’asturianu xunto col restu d’actividaes del nadal. Pa munches persones, esti tipu de denominaciones tien un papel simbólicu importante na identidá cultural de Xixón, y la so ausencia dexa al eventu con una imaxe menos venceyada a les formes y denominaciones tradicionales de la ciudá.

    Asina, el cambéu de mercáu navidiegu a mercado navideño marca un puntu d’inflexón na presencia pública del asturianu nun de los eventos más concurríos del añu.

  • La Llaboral acueye’l 8 y 11 d’avientu les Xornaes de la Música Tradicional Asturiana

    La Llaboral acueye’l 8 y 11 d’avientu les Xornaes de la Música Tradicional Asturiana

    La conseyera de Cultura, Política Llingüística y Deporte, Vanessa Gutiérrez, presentó güei la programación de les Xornaes de la Música Tradicional Asturiana, un alcuentru que se va celebrar na Llaboral Ciudá de la Cultura, en Xixón, el 8 y el 11 d’avientu, pa difundir esta manifestación artística y abrir un espaciu de diálogu y reflexón sobre la so importancia.

    Gutiérrez destacó qu’estes espresiones culturales constitúin “una pilastra fundamental sobre’l que se sofita la identidá asturiana”, polo que sorrayó la necesidá de calteneles, por casu, al traviés de los espedientes empecipiaos pa declarar bienes d’interés cultural (BIC) de calter inmaterial la cultura asturiana de la gaita, les mazcaraes d’iviernu, el teatru costumista o les dances tradicionales, que se sumen a les yá reconocíes, como la misa de gaita, l’asturianada, los bolos o la cultura sidrera asturiana, esta postrera declarada pola Unesco patrimoniu inmaterial de la humanidá’l 4 d’avientu de 2024.

    Estes xornaes, entamaes en collaboración cola asociación Conceyu de la Gaita, van axuntar a más de 260 participantes, ente intérpretes, investigadores y docentes, coles mires de fortalecer esti tipu d’espresión musical y ampliar la so proyección social y la so tresmisión.

    El primer día va centrase na hestoria y evolución de les escueles de música popular, los modelos europeos y los retos actuales, y va ufiertar un alcuentru d’agrupaciones que va amosar la vitalidá d’estes manifestaciones n’Asturies. Pa ello, va cuntar cola participación de músicos como Carlos Núñez, Xuacu Amieva, Pedro Pangua, José Ángel Hevia y Santi Caleya, y d’espertos como Lisardo Lombardía y la presidenta de la confederación de gaiteros bretonos, Maïna Daouphards.

    La segunda xornada va centrar na fabricación de gaites y nes principales llinies d’investigación en cursu, antes de l’amuesa internacional Gaites del mundu, que va cuntar coles actuaciones d’intérpretes d’Asturies, Galicia, Escocia, Bélxica ya Italia. El programa va rematar col conciertu de clausura al cargu de la Banda Gaites Llacín, que va presentar el so discu Resollu.

  • Inspección de Trabayu detecta alredor de dos mil empleos irregulares n’Asturies

    Inspección de Trabayu detecta alredor de dos mil empleos irregulares n’Asturies

    l’Inspección de Trabayu y Seguridá Social detectaron esti añu n’Asturies 1.935 empleos irregulares, lo que supón un 127,11% más que l’añu pasáu, cuando se toparon 852.Esti ye unu de los datos analizaos na última xunta de la Comisión Operativa Autonómica de la Inspección de Trabayu y Seguridá Social, l’órganu conxuntu del Ministeriu de Trabayu y Economía Social y el Gobiernu d’Asturies nel que s’evalúen los resultaos del llabor inspector n’Asturies y defínense les acciones de llucha contra’l fraude.

    Dende avientu de 2024 y hasta esti mes, los 45 inspectores y subinspectores realizaron 6.119 visites, de les cuales 821 fueron n’horarios especiales. Nesti periodu, aumentaron los controles nocherniegos un 5,70% y un 12% les segundes visites venceyaes a la seguridá y la salú.

    En total, efectuáronse 2.680 actuaciones en materia d’economía irregular, qu’amás d’aprucir cerca de 2.000 empleos somorguiaos detectaron 210 infracciones en prestaciones de desempléu y 63 altes d’empreses ficticies.

    Destaca especialmente la detección d’empleos irregulares de trabayadores estranxeros, con 212 sanciones por importe de 2,2 millones. Esto supon un aumentu del 47,22% nel númberu d’infracciones y del 51,18% nes cuantíes de les multes respecto al añu pasáu.

    Dientro de la área de Seguridá Social, producióse un aumentu del 14,23% na cuantía de los espedientes de lliquidación de cuotes (actes de lliquidación, requerimientos de cuotes, informes de derivación de responsabilidá a la Tesorería Xeneral, etcétera) hasta algamar un valor global de 13,2 millones.

    El númberu d’espedientes sancionadores en materia de Seguridá Social aumentó un 71,26% en comparanza col exerciciu anterior (1.305 infracciones frente a 762) y dobló l’importe de les sanciones (116,5%), hasta llegar a 5,4 millones.

    Respecto al área de falsos autónomos, de xineru a ochobre detectáronse 558 infracciones por un importe de 5,6 millones, lo que dexó aprucir 1.147 nuevos empleos.