Xixón al día

Categoría: Tema del día

  • Barbón reivindica les reformes como frenu a la meyora reaccionaria na apertura de los cursos de branu d’UXT

    Barbón reivindica les reformes como frenu a la meyora reaccionaria na apertura de los cursos de branu d’UXT

    El presidente d’Asturies, Adrián Barbón, reivindicó’l papel tresformador de les reformes sociales ya industriales como respuesta a la puxanza de los movimientos reaccionarios. “N’Asturies y n’España, el que reforma, gana”, afirmó mientres la so intervención na 25ª edición de la Escuela Internacional de Verano Manuel Fernández López “Lito”, entamada por UXT Asturies col lema “Tiempu de reformes, tiempu de resistencies”.

    Barbón empezó la so intervención contestualizando el momentu políticu actual, marcáu pol crecimientu de fuerces que cuestionen el feminismu, la diversidá, l’Estáu de bienestar y el respetu a les riegles democrátiques. “Nun basta con aguantar, como dicía Camilo José Cela. Pa vencer, hai qu’avanzar”, afirmó, sollertando de que l’alternativa a la izquierda yá nun ye una derecha conservadora, sinón una involución antisistema que tien nel trumpismu’l so principal referente.

    Énte esti escenariu, el presidente sorrayó que la izquierda nun puede dexase’l paralís nin el mieu. “Quieren qu’arrenunciemos a les reformes. Pues, xusto, al contrariu, l’axenda social tien que ser siempres el nuesu estandarte”, señaló, reivindicando les polítiques impulsaes pol Gobiernu asturianu como exemplu de compromisu cola mayoría social.

    Ente les midíes destacaes, Barbón mentó la reforma del IRPF que beneficia al 80% de los contribuyentes, el pactu educativu Asturies Educa con una inversión de 45 millones d’euros, la gratuidá del accesu a la Universidá d’Uviéu dende esti cursu, el lideralgu n’inversión sanitaria por habitante y l’oxetivu d’empecipiar 1.000 viviendes públiques en dos años. “Van poder criticanos por munches coses, pero nun tienen d’escaecer les nueses señes: somos el gobiernu de l’axenda social”, afirmó.

    Amás, el presidente aportunó na necesidá de reforzar la política industrial como complementu imprescindible de la transición ecolóxica. Reclamó mayor axilidá a la Comisión Europea nel esplegue de midíes de sofitu a sectores estratéxicos como la siderurxa, y pidió al Gobiernu d’España garantíes pal suministru enerxéticu. “Si la UE pon les piles y el Gobiernu central cumple, la puxanza industrial y económico d’Asturies ta bien aseguráu”, aseguró.

    Barbón sofitó les sos palabres con datos que reflexen la evolución positiva de la comunidá: el paru per debaxo de les 50.000 persones, cerca de 400.000 empleos, l’impulsu del sector de la defensa con iniciatives como la compra del tallerón de Duru, y más de 60 proyectos empresariales dispuestos a invertir 5.000 millones n’Asturies.

    La intervención concluyó con una apelación al trabayu conxuntu ente gobiernos, partíos y sindicatos d’izquierda, faciendo del diálogu social una ferramienta permanente. “La fola reaccionaria ye tarrecible, pero podemos vencela si nun encoyemos énte’l so emburrie. Nada d’atrincheranos, faigámonos líderes del cambéu”, sentenció.

  • 37.000€ por un quesu Cabrales, el más caru del mundu

    37.000€ por un quesu Cabrales, el más caru del mundu

    Recór nuevu nel 53 Certame Quesu Cabrales de 2025 cola ufierta final de la puya pol meyor quesu Cabrales, con 37.000. Con esta, yá son cinco les vegaes que la celebración quesera bate’l récor Guinnes, superando en 1000€ a cantidá que pagó el mesmu Iván Suárez, d’El Llagar de Colloto, va un añu. Tamién repitió la quesería ganadora, que foi la Quesería Ángel Díaz Herrero.

    Na última edición, el Llagar de Colloto volvió ser protagonista al desembolsar nada menos que 36.000 euros pol quesu ganador, ellaboráu pola quesería Ángel Díaz Herrero. Nun ye un fechu aislláu: l’establecimientu yá inscribiera’l so nome nel Llibru Guinness en delles ocasiones, faciéndose con pieces en puya qu’algamaron cifres de 14.300 euros en 2018, 20.500 en 2019 y 30.000 en 2023.

    Baxo la dirección d’Iván Suárez, el local atropa amás una racha destacada: nos cinco últimes ediciones celebraes llevó siempres el quesu meyor puntuáu pol xuráu, que prueba unu a unu los exemplares antes de proclamar al vencedor. En 2022, tres el paréntesis obligáu pol andanciu de la covid, yá invirtieren 17.000 euros na pieza ganadora. Con esti nuevu trunfu, sumen seis reconocencies consecutives. Como vien asocediendo nos últimos años, un 15% del importe pagu va destinase nuevamente a l’Asociación Galbán, xestu solidariu que se repite per cuarta ocasión consecutiva.

    Na puya pol meyor Quesu Cabrales participaron La Montera Picona de Ramón (Xixón), Sidrería Román (Xixón), Carlos Tartiere (Madrid), el Camping Las Gaviotas (Castrillón), Lo de Viole (Madrid), El Dólar (Uviéu), Sidrería La Cuenca (Madrid) y El Carbayín (Madrid).

     

  • Barbón destaca l’ameyoramientu de la situación nes quemes forestales gracies al agua y al «esfuerzu titánicu” de tol operativu que trabaya na so estinción

    Barbón destaca l’ameyoramientu de la situación nes quemes forestales gracies al agua y al «esfuerzu titánicu” de tol operativu que trabaya na so estinción

    El presidente d’Asturies, Adrián Barbón, destacó güei l’ameyoramientu na situación de les quemes forestales, de lo que solamente una se considera activa, n’Ibias, gracies al agua y al esfuerzu titánicu” de too l’operativu que trabaya na so estinción. “Pel momento nun ta solucionáu tou, nin tanto, pero la situación ameyoró. Y ameyoró non solo de resultes del cambéu ambiental, sinón tamién de l’actuación que se siguió ayeri “, esplicó.

    Barbón, que confió en que se confirmen les bones temperatures y que podamos dir embridando la situación”, repitió’l so llamamientu a la collaboración ciudadana pa evitar los fueos intencionales, situación que tou paez indicar que ye la causa de la quema de Ibias. “Precisamos qu’ante’l mínimu indiciu o noticia de quién pudo tar detrás de cualquier quema provocada, por favor, que lo comuniquen a les autoridaes, precisamos actuar con contundencia”, aseguró. “La persona que provocara una quema poniendo en riesgo vides, tien que pagar por ello”, añedió.

    El presidente tamién apeló a la ciudadanía pa que collabore coles autoridaes nos desallugos preventivos derivaos de les quemes forestales, especialmente nel qu’afecta al conceyu d’Ibias, onde hubo que treslladar a 41 persones de seis pueblos. “Cuando se determina la necesidá d’un desallugu, faise pola seguridá de les persones. Ayeri hubo que sacar xente n’helicópteru porque la carretera yera yá intransitable”. Poro, pidió que se cumplan con estes indicaciones “porque se trata de protexer vides, tanto de quien viven nos pueblos como de quien trabayen nos operativos.

  • Izquierda Xunida y Podemos acusen al conceyal de Deportes nun querer sofitar económicamente la Copa de la Reina de h.oquei

    Izquierda Xunida y Podemos acusen al conceyal de Deportes nun querer sofitar económicamente la Copa de la Reina de h.oquei

    El voceru municipal d’Izquierda Xunida nel Conceyu de Xixón, Javier Suárez Llana, acusó al conceyal de Deportes de pretender “nun invertir nin un euru” na Copa de la Reina de h.oquei sobre patinos que se va celebrar “al so pesar” el próximu añu na ciudá. Suárez Llana fixo estes declaraciones en conociendo la propuesta d’ordenances del Patronatu Deportivu Municipal pa 2026, qu’inclúin xuna tarifa pal cobru d’entraes a los partíos de la competición.

    “El conceyal de Deportes pretende que la recaldación de taquilla vaiga al PDM de manera que recupere lo invertío. Esto ye, que’l sofitu económicu del Conceyu por que se celebre en Xixón la Copa de la Reina va ser cero. Pero quien asume siempres el mayor esfuerzu organizador nesti tipu de competiciones son el club anfitrión y la so masa social, nesti casu’l Telecable H.oquei Club”, esplica’l conceyal d’IX, que defende que “tendría de ser ehó, nel mesmu deporte base, onde impacte la torna económica de la inversión municipal”.

    Pa Suárez Llana, “Jorge Pañeda sigue poniendo palos nes ruedes; primero fixo tolo posible porque la Copa nun se celebrara en Xixón y agora pretende amenorgar a cero la inversión y nun sabemos ensin con ello estremar al club de la organización o cuantimenos enzancar la so participación”. El conceyal d’IX llamenta “el tratu que ta dando’l PP a los clubes deportivos de la ciudá y la nula complicidá del Gobiernu municipal col deporte femenín”. IX va presentar una enmienda a la ordenanza del Patronatu Deportivu Municipal pa desaniciar la tarifa venceyada a la Copa de la Reina y encamienta al conceyal de Deportes a sentase col Telecable a alcordar un marcu de collaboración pa la organización del eventu deportivu”.

    Pa Olaya Suárez, “llama l’atención que, dempués de tantu discutiniu y tantes vueltes, el
    conceyal Jorge Pañeda solo decidiera a entamar un eventu que tien un costu tan
    pequeñu cuando se-y echó enriba la presión social, y too por qu’a la fin en realidá la inversión real del Conceyu vaya a ser nula”. La vocera morada enfeó amás que dende l’equipu de gobiernu nun tean cuntando pa la organización del tornéu col Telecable H.oquei Club, “unu de los clubes deportivos más importantes de Xixón”, llamentando que “nun
    faen parte a la so masa social nin dexen que’l beneficiu d’un eventu como esti repercuta nel so deporte base”.

  • Asturies crea la marca Artesanía d’Asturies pa dar visibilidá a los productos y fortalecer el sector, pero ensin l’asturianu

    Asturies crea la marca Artesanía d’Asturies pa dar visibilidá a los productos y fortalecer el sector, pero ensin l’asturianu

    El gobiernu d’Asturies creó’l distintivu Artesanía d’Asturies, una marca institucional que tien como oxetivu dotar d’imaxe propia, única y reconocible a los productos realizaos polos artesanos de la comunidá. La Dirección Xeneral d’Empresa y Comerciu aprobó la regulación d’esti sellu, qu’empezó a recibir solicitúes d’usu per parte d’empreses, talleres y profesionales del sector, inscritos nel Rexistru d’Actividaes Artesanes.

    Con esta iniciativa pretende dase visibilidá, protexer y caltener el prestíu de los artesanos asturianos y de les sos obres, teniendo en cuenta la variedá d’oficios y, por tanto, de los productos d’esti tipu esistentes n’Asturies. Sicasí, la presencia del asturianu ye inesistente y nel manual de marca nun apaez. Mesma situación pal eonaviego, que nun apaez per nenguna parte, magar que dambos idiomes formen parte esencial de la cultura d’Asturies y de la so artesanía.

    El desenvolvimientu de la marca impúlsase tres l’alquisición, el pasáu mes de xineru, de la propiedá del distintivu Artesanía d’Asturies per parte del gobiernu. El nuevu sellu ta formáu por un isotipu inspiráu nun trisquel celta, símbolu d’identidá asturiana, y formáu por dos lletres A n’azul y mariellu acompañaes del logotipu Artesanía d’Asturies.

    Esta acreditación institucional busca destacar y roblar productos fechos n’Asturies; destacar la so procedencia; favorecer el so espardimientu y comercialización frente a los consumidores; protexer el prestíu de los talleres y artesanos asturianos, mesmo que de les sos creaciones, ya informar claramente sobre la naturaleza artesanal de los productos a los consumidores que los merquen.

    El decretu que regula esti distintivu, publicáu pola Conseyería de Ciencia, Industria y Comerciu nel Boletín del Principáu (BOPA), establez el so usu pa empreses y talleres artesanos inscritos nel Rexistru d’Artesanía del Principáu d’Asturies, asina como asociaciones profesionales del sector, puramente n’actividaes de promoción o comercialización de productos realizaos por asociaos que tean daos d’alta nel mentáu rexistru.

    La Dirección Xeneral de Comerciu yá empezó a tramitar les primeres solicitúes, que tienen de presentase al traviés de la see electrónica del Principáu d’Asturies. El procedimientu va caltenese abiertu de manera permanente y el plazu pa conceder autorización pal usu del distintivu ye d’un máximu de trés meses.

  • La Vuelta Ciclista a España torna a Asturies ente les crítiques a la presencia del equipu Israel Premiere Tech

    La Vuelta Ciclista a España torna a Asturies ente les crítiques a la presencia del equipu Israel Premiere Tech

    La Vuelta Ciclista a España 2025 vuelve esti próximu mes a les carreteres asturianes y, con ella, la presencia del equipu Israel Premiere Tech, una participación que xeneró nuevamente protestes y llamamientos a la movilización social.

    Diversos colectivos recordaron que, dende ochobre de 2023, l’exércitu israelín acabó cola vida de más de 800 deportistes palestinos, y denuncien lo que consideren un “blanqueamientu” del Estáu d’Israel al traviés del deporte d’altu nivel.

    Nesta llinia, asociaciones y movimientos sociales llamaron a la ciudadanía a salir a les carreteres y a los puertos asturianos, animando a amosar la bandera palestina y a organizar movilizaciones pacífiques coincidiendo col pasu del pelotón.

    Los convocantes señalen que’l deporte y la cultura “nun pueden sirvir pa normalizar un conflictu nin un xenocidiu” y recalquen que, ensin valores éticos, “una prueba deportiva pierde la so épica y queda reducida a un simple exerciciu físicu”.

    La organización de la Vuelta, pola so parte, nun fixo declaraciones sobre estes crítiques, centrándose na preparación d’un percorríu que volverá situar a Asturies como unu de los escenarios clave de la ronda ciclista.

  • 87 años de la última declaración d’independencia d’Asturies

    87 años de la última declaración d’independencia d’Asturies

    Un 24 d’agostu de 1937 Xixón convertíase na capital d’una Asturies independiente. Facía tiempu que los territorios d’Asturies y Llión taben xeográficamente dixebraos del restu de territoriu embaxo control del gobiernu lexítimu republicanu. Les tropes fascistes del xeneral Franco ocupaben tola zona central peninsular faciendo bien difíciles les comunicaciones ente los dos territorios que defendíen la llegalidá democrática asaltada.


    El presidente del Conseyu Rexonal d’Asturies y Llión, presidíu pol sindicalista y diputáu socialista Belarmino Tomás resistía dende Xixón y llevaba tiempu actuando de forma autónoma, con non pocos conflictos col gobiernu central, que taba centráu na defensa del frente mediterráneu dexando nun ciertu abandonu a Asturies y el restu de territorios del norte peninsular.

    En xunu de 1936 cai Bilbao y Asturies queda sola dafechu, col occidente y Uviéu tomaes tamién poles tropes franquistes.

    El decretu aprobáu aquel 24 d’agostu funda’l Conseyu Soberanu d’Asturies y Llión cola «plena responsabilidá del mandu soberanu nel territoriu de la so autoridá», dicía’l solemne decretu. El Gobiernu del presidente Belarmino Tomás, con socialistes, comunistes y anarquistes, asume toles competencies y el control sobre l’actividá civil y militar. El Conseyu emite la so modena propia, que se conoz como «belarminos» y Xixón conviértese na capital dende’l día de la entrada en vigor de la independencia, 25 d’agostu.

    El gobiernu va instalase na Casa Blanca, l’edificiu racionalista asitiáu na Plaza’l Parchín de Xixón. Los conseyos de gobiernu celebrábense nel agora Vieyu Institutu Xovellanos.


    Popularmente conozse entós al Conseyu como «el gobiernín», términu qu’usen con despreciu los miembros del Gobiernu de la España republicana y el presidente de la República Manuel Azaña.

    L’hestoriador hispanista Hugh Thomas denominó a aquel gobiernu la República d’Asturies, anque Belarmino Tomás esplicaba qu’aquella independencia nun buscaba «separatismu» sinón necesidá de xestionar el territoriu en tan complicaes circunstancies, frente a les crítiques de desllealtá y d’insurrección espedíes pola República española. Belarmino Tomás yera pa dalgunos sospechosu, pues participara como unu de los cabezaleros na Revolución d’Asturies de 1934, onde tamién esistió un esperimientu soberanista asemeyáu sobre los territorio dominaos polos revolucionarios.

    Daquella Belarmino Tomás fuera condergáu a pena de muerte, conmutada por pena de cárcel un añu dempués y a la fin lliberáu dempués de la victoria del Frente Popular nel 36.

    La independencia fecha por non independentistes duró hasta’l 20 d’ochobre, cuando los miembros del Gobiernu d’Asturies celebraron el conseyu de gobiernu caberu, saliendo en barcu dende’l puertu d’El Musel un día dempués, entamando una dura represión contra los que nun fueren quien a fuxir de Xixón.

    Nun informe posterior, Belarmino Tomás echaba en cara al gobiernu d’España les acusaciones que contra ellos fixeren:  “Sospechar que naquellos momentos, marxistes, llibertarios y republicanos, declaraben una soberanía con fines separatistes más que de ser fatos ye tener  maldá”.

    57 díes duró la esperiencia independentista « por necesidá», que reproducía de dalguna manera a la proclamación de soberanía de la Xunta Xeneral d’Asturies frente a la invasión francesa del 25 de mayu de 1808.

    El despachu de Belarmino Tomás foi incantáu y dende va unos años volvió a ponese en valor tanto la so figura como los muebles del so despachu. El presidente Adrián Barbón dedicó-y una estancia nel Palaciu de los Presidentes, llar de la presidencia del Gobiernu d’Asturies n’Uviéu, onde agora firma dellos de los decretos de más importancia o celebra actos como l’homenaxe a los fundadores de Conceyu Bable, como xestu simbólicu de reconocencia a la tradición presidencial asturiana.

     

  • Namás 2850 places d’aspirantes a interinidá nel próximu cursu escolar

    Namás 2850 places d’aspirantes a interinidá nel próximu cursu escolar

    Conseyería d’Educación publicó güei nel portal www.educastur.es la primer convocatoria de places p’aspirantes a interinidá del cursu escolar 2025-2026. La ufierta componse de 2.850 puestos: 1.533 pa Secundaria y otros cuerpos, y 1.317 pa Primaria. Unos datos que nun son del too bonos, yá que les fueron mayores n’años anteriores.

    Nesti primer llistáu incluyéronse les vacantes esistentes n’enseñances artístiques, la totalidá de les comisiones de serviciu aprobaes hasta’l momentu, y les places xeneraes por equipos directivos, lliberaciones sindicales o la sustitución de persones en situación de servicios especiales.

    Tamién formen parte de la ufierta los puestos de personal de los distintos programes d’inclusión educativa: aules abiertes en centros ordinarios, d’inmersión llingüística y hospitalaries; la unidá escolar del hospital de día infanto-xuvenil, y l’equipu mistu-conveniu ONCE. Nel casu de les aules abiertes, les nueves van cuntar con dos maestros especialistes a xornada completa: unu de Pedagoxía Terapéutica (PT) y otru d’Audición y Llinguaxe (AL).

    La convocatoria inclúi, amás, once places de dirección pa escueles de 0 a 3 años, mesmo que de personal pa los Centros de Profesoráu y Recursos (CPR) destinaos a los programes de cooperación territorial, financiaos con fondos europeos: refuerzu de la competencia matemático y llector, el PROA+, bienestar emocional y educación inclusiva.

    Cola publicación d’esta ufierta, les 17.855 persones convocaes van poder presentar les sos solicitúes dende güei y hasta’l próximu vienres, 22 d’agostu, hasta les 23:59 hores. L’oxetivu ye que puedan quedar axudicaes pa principios de la próxima selmana.

    El director xeneral de Personal Docente, César González, esplicó que la convocatoria ye similar a la de 2023, añu en que tamién se celebraron procesos d’oposiciones similares. Per otru llau, la conseyería yá trabaya pa poder incluyir na segunda convocatoria de setiembre los puestos correspondientes a los programes de cooperación territorial destinaos a los centros educativos. La convocatoria ta prevista pal 9 de setiembre, va publicase’l día 11 y la incorporación va ser el 15 d’esi mes.

  • El PSOE pidi consultar al sector y vecinos sobre’l Paseo Gastro

    El PSOE pidi consultar al sector y vecinos sobre’l Paseo Gastro

    El conceyal Rodrigo Sánchez considera que l’eventu «xenera desequilibrios y competencia deslleal» na hostelería xixonense

    Finalizada la segunda edición del Paseo Gastro, que esti veranu amplió la so ubicación dende Begoña tamién a la calle Claudio Alvargonzález, en Cimavilla, el PSOE solicitó una revisión del modelu. Los socialistes consideran que esta celebración «asfixia a los hosteleros locales y a los vecinos» y instaron al Ayuntamientu a abrir un periodu de consulta.

    El conceyal Rodrigo Sánchez señala que «l’excesu d’oferta del Ayuntamientu durante la Semana Grande xenera desequilibrios y competencia deslleal col sector hosteleru, además de dificultar la convivencia vecinal. Hai negocios que trabayen a diario pa dar vida a los barrios y que pagan los sos impuestos tolo añu, que nun pudieron trabayar con normalidá. El Paseo Gastro tuvo dos ubicaciones en zones moi concurríes».

    «¿A quién-y vino bien esti eventu?», cuestiona Sánchez, recordando les protestes de los vecinos de Cimavilla. Nesi sentíu, el edil propuso la celebración d’una consulta a toes les empreses del sector y a les asociacións vecinales afectades «pa evaluar de forma rigurosa el so impactu, más aún cuando l’any que vien amenacen con sumar una tercer ubicación. El sector hosteleru ye amplíu y, antes de poner otra nueva ocurrencia sobre la mesa, deberían conocer, de mou fiel y con datos verídicos, cuál ye la so opinión y cómo afectará a los sos negocios», afitma Sánchez.

    El conceyal socialista defende «un modelu festivu más equilibráu, sostenible y respetuosu tantu col sector como colos vecinos y vecines».

  • Más de mil persones amuesen el so refugu a la tauromaquia en Xixón

    Más de mil persones amuesen el so refugu a la tauromaquia en Xixón

    Más de mil persones percorrieron ayeri les cais de Xixón baxo un glayíu unánime: la fin de la tauromaquia n’Asturies y, de manera concreta, en Xixón, la única ciudá na comunidá que caltién estos eventos.

    «Volvemos manifestar el nuesu refugu escontra esti espectáculu. Entendemos que nun tienen cabida nesta sociedá», señaló la vocera de Asturies Antitaurina, Fernanda Blanco. «Nun s’entiende qu’una persona como l’alcaldesa, Carmen Moriyón, médicu d’oficiu, nun seya capaz d’entender el dolor de los toros, que sufren igual que nós», denunció.

    Fueron más de 100 los colectivos que se xuntaron a la manifestación, incluyendo formaciones polítiques como PACMA, Podemos, IX, Verdes-Equo, Somos Asturies Sumar, y Convocatoria por Asturies, mesmo qu’ensame d’asociaciones venceyaes a la protección animal y del mediu ambiente, feministes y sindicalistes.

    Esto demuestra’l sofitu de la ciudadanía asturiana a la llucha antitaurina, como yá asocedió n’otres ocasiones. Y ye que más de 30,000 asturianos y asturianes roblaron la Iniciativa Lexislativa Popular “Nun ye la mio cultura” pa desaniciar el blindaxe cultural de la tauromaquia, ente los que destaquen personalidaes del mundu de la cultura como Nacho Vegas, Xune Elipe, Pilar Sánchez Vicente, Cristina del Valle, Ángeles Caso o Rodrigo Cuevas; y políticos como Adrián Barbón, Olaya Suárez, Rafa Cofiño, Verónica Martínez, Covadonga Tomé, Javier Suárez o Noelia Ordieres. Formen parte de les más de 715.000 algamaes en toa España pa reclamar la retirada de la tauromaquia como patrimoniu cultural.