Categoría: Uncategorized

La presencia de la llingua asturiana desapaeció nel estand del Principáu d’Asturies na última edición de la Feria Internacional de Turismu (FITUR). L’asturianu y l’eonaviegu nun s’utilizaron en nengún de los elementos comunicativos, nin siquiera nel llogotipu institucional “Principáu d’Asturies”, que sí figuraba en delles ediciones anteriores de la feria.

Por esti motivu,  delles persones asistentes al eventu turísticu, celebráu recientemente en Madrid, treslladaron una quexa a Iniciativa pol Asturianu. La reclamación foi recibida al traviés del Buzón del Asturianu, un espaciu habilitáu na web de la entidá, pa recoyer felicitaciones, quexes y reclamaciones sobre l’usu del idioma, como ye esti casu.

La presidenta d’Iniciativa pol Asturianu, Arantza Margolles, llamentó esti retrocesu nel usu institucional del idioma nun espaciu de promoción turística, nel que la llingua propia pue desempeñar un papel relevante como elementu diferenciador y como valor añadíu nel mercáu turísticu. Margolles recordó que “otres comunidaes con llingua propia tamién faen promoción turística nel so idioma ensin xenerar esti apueste una merma de visitantes”.

Amás, Margolles apuntó que “l’usu del idioma propiu contribúi a crear una imaxe de marca propia, como demuestren otres comunidaes con llingua propia, como mesmamente ye’l casu de Galicia. La promoción turística del Xacobeo a nivel estatal faise en gallegu, ensin que ello supunxera problemes pa los visitantes nin una perda de pelegrinos”.

L’asociación señala tamién que l’ausencia del asturianu en FITUR nun s’axusta a los criterios llingüísticos sobre l’usu del asturianu y l’eonaviegu na Alministración, aprobaos pol mesmu Gobiernu del Principáu d’Asturies en febreru de 2024. En concreto, recuerden que dichos criterios recueyen, nel so apartáu de Criterios Xenerales de Comunicación, que se debe favorecer la integración del asturianu xunto col castellán nos mensaxes y comunicaciones del sector públicu.

La ilesia de la Llaboral rexistró 13.118 visites nes xornaes de puertes abiertes organizaes pola Conseyería de Cultura, Política Llingüística y Deporte tres la restauración integral de la so cúpula, ún de los símbolos más representativos d’esti conxuntu monumental.

Del total d’asistentes, 4.131 persones escoyeron les visites guiaes programaes en distintos pases, mientres que 8.987 accedieron n’horariu d’entrada llibre hasta completar l’aforu. La respuesta del públicu a lo llargo de los diez díes d’apertura (del 13 al 22 de febreru) confirma la gran expectación xenerada pola reapertura y l’altu interés social pol patrimoniu cultural asturianu.

La restauración de la cúpula supunxo una inversión de 814.000 euros. L’actuación resolvió los problemes de filtraciones y permitió recuperar les pintures murales, amás de garantizar la estanqueidá y la estabilidá estructural del templu, asegurando la so correcta conservación. Esta intervención intégrase nun plan sosteníu d’inversión nel conxuntu de la Universidá Llaboral, al que’l Principáu destinó más de dos millones d’euros nos últimos trés años pa caltenimientu y conservación, xunto con otres actuaciones empobinaes a modernizar y revitalizar l’espaciu.

Diseñada pol arquitectu Luis Moya Blanco, la ilesia de la Llaboral ye ún de los fitos arquitectónicos más singulares del sieglu XX n’España. Los trabayos foron executaos por un equipu técnicu especializáu, acordies con criterios de conservación patrimonial y respetando los valores históricos y artísticos del inmoble. La intervención incluyó la restauración de la réplica de la Cruz de la Victoria asitiada na fachada principal. El procesu contempló l’escaneáu tridimensional de les pieces conservaes, la so llimpieza, la reposición d’elementos decorativos y la sustitución de la estructura de soporte pa reforzar la so estabilidá.

Dende’l 23 de febreru, la ilesia y la so cúpula incorpórense de mou estable al percorríu de visites guíaes de la Llaboral. El Gobiernu d’Asturies reafita asina’l so compromisu cola protección d’un patrimoniu públicu que combina memoria, educación y creación contemporánea, y refuerza la candidatura del conxuntu a Patrimoniu Mundial, tres la so inclusión na Llista Indicativa en xineru de 2025.

El conseyeru d’Ordenación del Territoriu, Urbanismu, Vivienda y Derechos Ciudadanos, Ovidio Zapico, presentó güei n’Avilés el proyectu de construcción de 235 viviendes públiques destinaes a arriendu algamadizu na zona de La Grandiella, que va movilizar más de 30 millones d’inversión global. Les edificaciones van distribuyir en dos parceles allugaes en La Grandiella, con 130 pisos nuna d’elles y 105 na otra.

Zapico, que presentó esta actuación xunto cola alcaldesa d’Avilés, Mariví Monteserin, esplicó que va empezar a materializase a partir de 2026 y que va suponer “un pasu decisivu pa reforzar el parque públicu algamadizu y dar respuesta a les necesidaes de la clase trabayadora de la ciudá”. Amás, esplicó que los presupuestos autonómicos de 2026 van cuntar yá con una partida inicial de 2.465.500 euros pa empezar los trabayos.

El titular de Derechos Ciudadanos sorrayó la importancia d’estremar ente parque públicu social y parque públicu algamadizu y esplicó qu’esta promoción va integrase nesti postreru, empobináu a facilitar l’accesu a la vivienda a persones trabayadores qu’atopen dificultaes nel mercáu llibre.

Amás, destacó que’l Gobiernu d’Asturies tien anguaño en fase de llicitación más de 560 pisos de promoción pública destinaos al arriendu algamadizu, de los cualos doce allúguense n’Avilés. La conseyería trabaya coles mires de licitar otru millar más primero que remate la llexislatura.

En relación colos plazos, Zapico avanzó que la llicitación conxunta del proyectu y la obra va poner en marcha mientres los primeros meses de 2026, una vegada tean vixentes los presupuestos. “Va ser una única unidá alministrativa, de cuenta que’l proyectu y les condiciones de la obra van quedar definíes nun mesmu actu xurídicu”, amestó.

Respectu al entamu de la construcción, indicó qu’entá ye difícil concretar una fecha esacta, magar se preve que pueda empezar en febreru de 2027, unos 14 meses dempués de l’axudicación.

La Universidá d’Uviéu presume de raigaños en Nueva York. Los próximos 11 y 12 de setiembre l’eventu Asturies: territoriu de conocencia y de cultures avera a la gran metrópoli estauxunidense la institución académica, asina como’l patrimoniu cultural y llingüísticu de la comunidá al traviés de los sos creadores contemporaneos. La cita inaugura la collaboración cola Universidá de Nueva York al traviés del centro Espaciu de Cultures y tien l’oxetivu de dar a conocer la singularidá de les manifestaciones culturales asturianes, mesmo que la convivencia ente la tradición local y la so vocación internacional.

La iniciativa cunta col patrociniu de la Conseyería de Cultura, Política Llingüística y Deporte
del Principáu d’Asturies, asina como del Institutu Cervantes y del Consuláu Xeneral d’España en Nueva York. La delegada del Rector pal Real Colexu Complutense en Harvard y América del Norte, Cristina Valdés, foi la impulsora d’esti proyectu col que la Universidá d’Uviéu busca “reafitar el so compromisu col territoriu al empar que fomenta la so proyección global”. “Llevar la cultura asturiana a un espaciu como’l de la Universidá de Nueva York significa abrir nueves víes de collaboración académica y cultural que beneficien tanto a Asturies como a la comunidá hispanofalante d’Estaos Xuníos”, añedió.

El programa inclúi trés actividaes culturales que reflexen la riqueza académica, artística y lliteraria asturiana y va desenvolvese na sede d’Espaciu de Cultures de la Universidá de Nueva York, en Washington Square. Mientres la primer xornada va afrontase la lliteratura y el papel de la Universidá n’Asturies al traviés de dos propuestes. Va abrir el ciclu una conferencia sobre la Universidá d’Uviéu nel so territoriu que va impartir la mesma Cristina Valdés, profesora de Filoloxía Inglesa, p’amosar la vocación internacional y el compromisu col territoriu de la institución académica asturiana. Dempués, va tener llugar un conversatoriu ente les escritores asturianes Laura Casielles, Alba González Sanz y Paquita Suárez Coalla, tituláu Lliteratura n’Asturies, escribir ente dos veres. Nél van afrontar los grandes desafíos de la lliteratura actual y les singularidaes de la producida por muyeres, dende dambes veres.

La segunda xornada d’Asturies: territoriu de conocencia y de cultures va tar dedicada a la música y al folclor. Pa ello, Xaime Martínez y Rodrigo Cuevas, que va participar per videoconferencia, van reflexonar sobre la innovación y la creatividá de los creadores asturianos contemporaneos al traviés de la esploración de nueves formes d’espresión ensin perder el venceyu colos sos raigaños. Xunto a la musicóloga Raquel López Fernández, van dialogar sobre la vocación internacional de la cultura asturiana y el papel de la industria cultural nel mediu rural. L’alcuentru va ser presentáu por Luke Bowe, historiador venceyáu a la Universidá de Nueva York que realizó una estancia na Universidá d’Uviéu.

Ente lo más destacable de la iniciativa, ha señalase la implicación y collaboración que numberosos asturianos y asturianes residentes en Nueva York amosaron cola organización del eventu. Con esta iniciativa, la Universidá d’Uviéu consolida’l so papel como ponte ente la tradición asturiana y los escenarios internacionales, reforzando la visibilidá de la llingua, la lliteratura y la música de la comunidá nun marcu global.

L’artista asturiana Tania Blanco ganó la octava edición del Premio Muséu Barjola d’artes plástiques cola so obra «Gas, óxido, sal». Esti galardón, que convoca la Conseyería de Cultura, Política Llingüística y Deporte, conceder al meyor proyectu espositivu creáu específicamente pa la capiya de la Trinidá del Muséu Barjola de Xixón y ta dotáu con 6.200 euros.

El xuráu, presidíu pol director xeneral de Patrimoniu Cultural, Pablo León, alcordó por unanimidá premiar esti proyectu, qu’apurre narratives relevantes sobre l’alcuentru del paisaxe natural ya industrial asturianu y la so percepción. Tania Blanco consigue resignificar, al traviés del arte, materiales y borrafes que recuerden los efectos del antropocenu nel territoriu nuna propuesta de calidá poética y crítica.

L’artista

Tania Blanco (Uviéu, 1987), ye llicenciada en Belles Artes pola Universidá de Salamanca y cuenta con un máster n’Educación Artística y Pedagoxía de la Universidá Complutense y otru de Diseñu Gráficu y Preimpresión de la Escuela Aula Creativa de Madrid. Completó dos ciclos cimeros de Grabáu y Estampación na Escuela d’Arte y Restauración de Llión y de Cerámica Artística na Escuela d’Arte de Cádiz.

Tien una abondosa trayectoria espositiva con amueses individuales dende 2012 en galeríes d’Asturies, Castiella y Llión y Euskadi. Amás, representó a Asturies nel Festival Intercélticu de Lorient, na Bretaña francesa, en 2019.

Col proyectu agora premiáu, amplía les sos últimes investigaciones al rodiu de la contaminación industrial en Xixón, en concretu na zona d’Aboño y Sotiello. Afita la so atención en cómo les borrafes industriales tiñen el mediu que los arrodia (muries, carreteres, güertes) y evidencia la entrada nuna nueva dómina, l’antropocenu, que se consolida y faise visible nestos llugares nos que la llinia ente l’espaciu natural y l’industrial empieza a disolvese.

L’Observatoriu Xixonés de la Movilidá (OXM) y el Conseyu de la Mocedá de Xixón (CMX) llancen la campaña “¿Xixón bici, o Xixón ensin bici?” conun mensaxe directu: Xixón Bici ye un serviciu públicu y municipal, que precisa urxentemente una ampliación de la flota. Dambes entidaes alverten que’l serviciu puede morrer del ésitu, yá que la demanda supera en demasía la capacidá actual. Esto ta provocando estaciones vacíes, amás d’un aumentu d’averíes y de bicicletes fuera de serviciu, esto ye, un mal serviciu a los ciudadanos. Estos problemes, sorrayen, nun se deben a la dexadez de caltenimientu, sinón a la saturación,
que trai la gastadura de la flota por un usu intensivu d’un parque mui llimitáu de bicicletes.

El serviciu actual, tal que se dimensionó nel so entamu, cuenta con 250 bicicletes disponibles, que suponen apenes 9 bicis por cada 10.000 habitantes en Xixón. Esti númberu ye bien inferior al de los servicios d’otres ciudaes: en Pamplona cunten con 19, en Madrid con 24, y en Valladolid con 29 bicis por cada 10.000 habitantes.

L’últimu Informe 2024 XixónBici confirmaba l’ésitu del sistema nel añu 2024, y l’enclín
sigue a l’alza en 2025 con más de 46.000 viaxes rexistraos en xunu, y 49.500 en xunetu, frente a 20.000 y 31.000 nos mesmos meses de 2024. Los mozos son los que más les usen, cola franxa de 20 a 30 años representando’l 32% de los viaxes; amás, más de la metá de les persones usuaries tienen menos de 40 años.

A pesar d’estes cifres récord, OXM y CMX denuncien que la falta de sofitu per parte del conceyu ta conduciendo a la gastadura del serviciu y el descontentu de los sos usuarios, y llimita l’usu del mediu de tresporte públicu más económicu y menos contaminante de la ciudá.

Les organizaciones reclamen al Conceyu un aumentu inmediatu de la flota de polo menos 100 bicicletes, asina como l’aumentu de la capacidá de les estaciones. Tamién piden una revisión de la tarificación cola posibilidá d’abonos semestrales o trimestrales, de forma que la inversión inicial nun seya una torga pa nuevos usuarios, mesmo que tarifes bonificaes pa usuarios prioritarios, como ye yá’l casu nel autobús pa menores de 26 y mayores de 65. El Conseyu de la Mocedá de Xixón recuerda que la bicicleta pública ye, pa les persones nueves, una ferramienta d’autonomía, salú y conexón cola ciudá. L’Observatoriu Xixonés de la Movilidá alvierte que Xixón s’atopa nun momentu clave: o refuerza y espande Xixón Bici como un verdaderu serviciu públicu de movilidá sostenible, o s’arriesga a dexalo enllancáu, incapaz de responder a la so propia demanda.

El cultivu in vitro de plantes, la improvisación teatral, los derechos llaborales o la llingua asturiana son dalgunos de les temes que va tomar la ufierta formativa de la Universidá d’Uviéu pal mes de xunetu. En total, el Vicerrectoráu d’Estensión Universitaria y Proyección Cultural programó diez cursos de branu que se van desenvolver nesta edición n’Uviéu, Xixón y Mieres y cumplen coles mires de la institución académica de caltener l’actividá fora del periodu lectivu.

La matrícula, que puede formalizase de manera online, yá ta abierta pa los diez programes disponibles. “Los cursos de branu formen parte del ADN de la Universidá d’Uviéu y representen una de les nueses víes d’estensión universitaria más veteranes y emblemátiques.

«Animo a tola comunidá universitaria y al conxuntu de la ciudadanía a buscar ente la ufierta una temática d’interés y aprovechar estos cursos como espacios p’actualizar conocencies y fomentar la reflexón, l’alderique y l’alcuentru”, indicó María Pilar García Cuetos, vicerrectora d’Estensión Universitaria y Proyección
Cultural.

Ente les novedaes d’anguaño inclúyese la primer edición de la Escuela de Branu Anita Sirgo: Trabayu decente y ordenación del tiempu de trabayu, que se va desenvolver nel Aula Magda del Edificiu Históricu de la Universidá d’Uviéu ente’l 1 y el 4 de xunetu.

Amás, xunto a l’Academia de la Llingua Asturiana (ALLA) programóse una nueva edición de la Universidá Asturiana de Branu (UABRA) qu’inclúi, nesta ocasión, trés cursos que se van impartir nel Campus d’Humanidaes d’El Milán ente’l 21 y el 25 de xunetu ya inclúin formación llingüística y cultural.

La ufierta detallada de cursos de branu pa esti 2025 ye esta:

• L’actualidá del pasáu: Confreríes, oficios y asistencia na ciudá medieval
• I Edición de la Escuela de Branu Anita Sirgo: Trabayu decente y ordenación del tiempu de trabayu
• Enerxía anovable geotérmica: de la teoría a la práctica
• Cultivu in vitro de plantes: del llaboratoriu al campu
• Un averamientu multidisciplinar a les artes marciales, deportes de llucha y defensa personal: aspectos prácticos, deportivos y empresariales
• Les competencies profesionales en momentos de cambéu: docencia, dirección ya inspección educativa
• La impro teatral como ferramienta pa desenvolver el nuesu potencial comunicativu
• UABRA: La traducción al asturianu: teoría, práctica y nuevos retos sociales y tecnolóxicos
• UABRA: El teatru asturianu. Del testu a la escena
• UABRA: Cursu intensivu d’asturianu (nivel B2)

El plazu de matrícula yá ta abiertu y aquelles persones que la deseyen van poder formalizar la so inscripción de forma telemática o solicitando una cita previa na Unidá d’Información y Matrícula del Serviciu d’Estensión Universitaria.

Per tercer añu consecutivu’l grupu de docentes Arte en Red, integráu por profesores de secundaria, de la especialidá de Dibuxu, vuelve poner la Educación Artística nel llugar que se merez. Nesta ocasión les reflexones que lleven a cabu col so alumnáu céntrense nel cuestionamientu de les llendes y les fronteres nel so más ampliu sentíu, yá que non solo delimiten territorios, sinón que tamién definen les barreres invisibles que construyimos nes nuestres mentes y sociedaes. Les propuestes artístiques resultantes espónense, sol títulu Llende allá, na III Muestra d’Arte Contemporaneu Escolar d’Asturies (MACEAS), qu’entamen cola collaboración del Área de Mocedá del Conceyu de Llangréu y pue visitase n’El Tallerón del IES Cuenca del Nalón del 28 d’abril al 16 de mayu.

Caún de los 14 centros participantes nesti proyectu espositivu presenta una obra artística distinta, que nos lleva, al traviés de la so mirada adolescente, a distintes reflexones sobre les fronteres y les llendes, yá sían personales, territoriales o inclusive polítiques, xenerando propuestes que parten de temes rellacionaos cola so propia vida y esperiencia y que planteguen cuestiones bien vixentes nel Arte Contemporaneu, onde les fronteres cuestiónense, esplórense y reinterprétense, convidándonos a reflexonar sobre la so función y el so significáu. Los alumnos y les alumnes conviértense con ello non yá n’artistes, sinón tamién n’axentes de cambéu social, con iniciativa y voz propies, llogrando que la so intervención trescienda les aules y xenere un impactu cultural y artísticu na sociedá asturiana.

El grupu de docentes que coordina esta propuesta tien como oxetivu la emponderación de la Enseñanza Artística y el so gran poder didácticu, ya que l’Arte Contemporaneu non solo ye vehiculizaor d’infinidá d’aprendizaxes, reflexones o diálogos, sinón tamién un potente nexu d’unión de distintos conteníos y problemátiques sociales, económiques o personales.

Nes bases d’esti colectivu artísticu-docente atópense la defensa de la llingua asturiana, patrimoniu cultural indiscutible de la nuestra comunidá autónoma, y la perspectiva de xéneru, que ta presente na concepción de cada obra, dende los sos plantegamientos, yá de mano.

La inauguración de la muestra va tener llugar nel IES Cuenca del Nalón, en La Felguera, el llunes 28 d’abril y nesta ocasión cunta con una madrina bien especial, Leticia Baselgas, qu’a les 10.30 hores va impartir una charra sobre la difusa llinia esistente ente la construcción del relatu personal y el colectivu. Tres de la charra, va haber una actuación al cargu de la compañía de danza Proyecto Piloto, a partir d’un fragmentu de la so obra BAUH inspirada nel Ballet Triádico de Oskar Schlemmer.

A les 11.30 hores, va tener llugar la inauguración oficial de la muestra, a la que van asistir una representación del Equipu de Gobiernu del Conceyu de Llangréu; la Conseyera de Cultura, Política Llingüística y Deporte, Vanesa Gutiérrez; el Director General de Consumo, Faustino Zapico Álvarez; el director del Área de Alta Inspección de Educación, José Antonio Fernández Espina; la responsable del Departamentu d’Educación del Museo de Bellas Artes de Asturias, Cristina Heredia Alonso; la Coordinadora d’esposiciones y residencies de Laboral Centro de Arte y Creación Industrial, María Romalde Menchaca y otros representantes de la Conseyería d’Educación y de diverses instituciones. La cita va ser nel llugar espositivu, El Tallerón, un gran espaciu del institutu qu’allugó nel so día talleres de soldadura y mecanizao pero que güei ta en desusu. Esti llugar industrial resulta afayadizu p’aldericar coles propuestes artístiques del alumnáu, que son de lo más variaes: videos, instalaciones, pintura, bordáu, testiles, escultura, o performance.

Una pareya d’alumnos o alumnes de cada centru va esplicar la so obra a les persones convidaes, pa que s’entienda’l so procesu creativu y como, dende’l so centru, trabayaron colos temes propuestos, al traviés de les distintes manifestaciones qu’ufierta l’Arte Contemporaneu, que nos reta a pensar más allá de lo que conocemos, a cruciar fronteres non solo físiques, sinón tamién mentales, escontra un futuru más inclusivu y diversu, xenerando conocencia competencial y vivencial de primer orde, demostrando, poro, que l’Arte ye esencial na Educación.