La Fundación Santa María La Real, en collaboración col Serviciu Públicu d’Empléu del Principáu (Sepepa), empecipió un nuevu programa de formación y busca d’empléu destináu a muyeres. D’esta iniciativa, denominada Entrena Empléu +, benefíciense 18 muyeres de 20 a 58 años, la mayoría en situación de desempléu de llarga duración.

Les participantes tienen distintos niveles formativos (ESO, Formación Profesional, Bachilleratu, graos universitarios o másteres) y cunten con esperiencia en distintos sectores: comerciu, hostelería, llimpieza, alministración, tresporte marítimu, atención sociosanitaria, cartografía y construcción, ente otros. Vienen de Avilés, Cangues d’Onís, Carreño, Xixón, Llangréu, Llaviana, Mieres, Noreña, Uviéu y Pravia.

De les inscrites na iniciativa, 17 tán en paru y una n’activu, con un contratu llaboral inferior a media xornada. El 55% tán en situación de desempléu de llarga duración y lleva más d’un añu ensin contratu llaboral.

Ente les 17 participantes desemplegaes, la gran mayoría (un 88%) tán en paru en realizando un parón na so actividá profesional pa dedicase a la crianza de los sos fíos y fíes. El programa busca sofitar la so reactivación llaboral por aciu la definición de nuevos oxetivos profesionales y l’ellaboración d’un plan de reinserción.

El formatu del programa va ser telemáticu y les muyeres participantes van cuntar mientres dos meses col asesoramientu d’especialistes de la Fundación Santa María La Real pa realizar un nuevu itinerariu de busca d’empléu y enfocar el so oxetivu profesional.

Les participantes van realizar actividaes en subgrupos p’actualizar los sos currículos, reforzar competencies tresversales y habilidaes dixitales pal empléu, ensayar entrevistes de trabayu, ellaborar mapes d’empleabilidá y visitar empreses en busca del so insertamientu.

En toles actividaes van identificase y van ponese en valor les habilidaes qu’adquirieron o reforzáu mientres la maternidá o un periodu dedicáu a l’atención d’otres persones, pa que puedan aplicales dempués na so prospección llaboral.

Al rematar el programa, les participantes van recibir un certificáu qu’acredita’l so nivel de competencies y habilidaes dixitales, y van tener la posibilidá de sumase al Plan Acompaña, que-yos ufierta siguimientu y asesoramientu posterior pa la so prospección llaboral.