L’HUCA recibe la máxima certificación internacional de calidá n’asistencia a enfermos de cáncer

La entrega tuvo llugar en Chicago, nel marcu del Annual Meeting de la Sociedá Americana d'Oncoloxía. El centru conviértese nel quintu d'España en recibir esti reconocimientu

0
697
El serviciu d'Oncoloxía del HUCA recibe la máxima certificación internacional de calidá n'asistencia a enfermos de cáncer nel congresu americanu de la especialidá clínica.
El serviciu d'Oncoloxía del HUCA recibe la máxima certificación internacional de calidá n'asistencia a enfermos de cáncer nel congresu americanu de la especialidá clínica.

El doctor Emilio Esteban, xefe del serviciu d’Oncoloxía del Hospital Universitariu Central d’Asturies (HUCA), y la doctora Pilar Solís, oncóloga del mesmu hospital, recoyeron el sellu de calidá que los acredita como centru d’excelencia n’asistencia a pacientes con cáncer. Ye’l quintu centru sanitariu español en consiguir la máxima certificación internacional pall tratamientu de persones cola enfermedá.

Nel actu, celebráu en Chicago, l’HUCA recibió la distinción de manes de Vicente Guillem, presidente de la Fundación ECU (Excelencia y Calidá de la Oncoloxía), y de Stephen Grubbs, vicepresidente del departamentu de Clinical Affairs de l’American Society of Clinical Oncology (ASCU). La entrega enmárcase nel Annual Meeting d’ASCU, qu’axuntó a más de 40.000 profesionales de la especialidá.

La certificación supón un impulsu pal centru asturianu, que diagnostica 2.200 nuevos casos de cáncer cada añu. La mayoría son tumores de mama, de pulmón y dixestivos. Pa llograr el sellu, el serviciu sometióse a una rigorosa auditoría sobre distintos aspectos claves na asistencia. El so cumplimientu acredítalu como centru d’altu rendimientu.

La entrega enmárcase nel Annual Meeting d’ASCU, qu’axuntó a más de 40.000 profesionales de la especialidá

Los espertos valoraron el nivel de salú de los pacientes, les sos necesidaes y mires, el so bienestar emocional y el siguimientu del so dolor, según la preparación de quimioterapia per parte del equipu de farmacia y la so alministración nel hospital de día, ente otres cuestiones.

La oncóloga Pilar Solís coordinó esti proyectu pol que, nun añu aprosimao, el serviciu d’Oncoloxía del HUCA pudo autoevaluar les sos práctiques asistenciales en base a criterios d’excelencia. Esti procesu realízase n’España al traviés de la Fundación ECU pa la Excelencia y la Calidá de la Oncoloxía. Esta entidá ensin ánimu d’arriquecimientu trabaya pa llograr los máximos niveles na docencia, l’asistencia y la investigación na especialidá.

España ye’l segundu país, depués d’Estaos Xuníos, con más centros acreditaos. Anguaño disponen de la certificación QOPI los hospitales Ramón y Cajal de Madrid, Xeneral de Valencia, Institutu Valencianu d’Oncoloxía y Clínicu Universitariu de Santiago de Compostela, a los qu’agora se suma l’HUCA.