La meyora del llaboratoriu, la compra de maquinaria y el fomentu de la competitividá movilizaron una inversión superior al millón.
El Gobiernu d’Asturies sofitó la modernización y meyora de les instalaciones de la empresa Sidra El Gaiteru (Valle, Ballina y Fernández, S.A.), en Villaviciosa, con 313.340 euros en subvenciones. El Principáu, al traviés de la llinia d’ayudes a industries agroalimentaries y forestales, sofitó estes actuaciones que, al tiempu, movilizaron una inversión superior al millón.
El conseyeru de Mediu Rural y Cohesión Territorial, Alejandro Calvo, y la directora xeneral de Desenvolvimientu Rural y Agroalimentación, Begoña López, visitaron güei la compañía pa conocer los trabayos realizaos. En concreto, la empresa ameyoró’l so llaboratoriu cola alquisición de nuevos equipos; mercó maquinaria pa perfeccionar los procesos de tresformación y comercialización, como una nueva mayadora y una enllenadora de barriles, y adaptóse a nueves necesidaes p’aumentar la so competitividá.
La llinia d’ayudes a les industries agroalimentaries y forestales, de calter tresañal y cofinanciada pola Unión Europea al traviés del Fondu Européu Agrícola de Desenvolvimientu Rural (Feader), permite a les empreses ameyorar los sos sistemes de producción y calidá. Amás, facilita la planificación de les inversiones, yá que pueden desenvolvese a lo llargo de trés años desque se presenten les solicitúes.
Nel periodu 2015-2020, el Gobiernu d’Asturies destinó 2,2 millones a ayudes al sector sidreru, col fin de consolidar un nichu económicu modernu y eficaz. La inversión total per parte de les empreses nel últimu llustru xubió a 7,3 millones.
La convocatoria de subvenciones pa facilitar la financiación en tresformación, comercialización y desenvolvimientu de productos agrícoles ta dotada esti añu con 9,3 millones.
Amás, el Gobiernu d’Asturies convocó ayudes del fondu de rescate pa tratar de desaniciar los efectos de la pandemia n’actividaes que sufrieron llimitaciones severes, como la industria ellaboradora de sidra. Les empreses van recibir subvenciones que van ente los 3.000 y los 6.000 euros.
