El Gobiernu d’Asturies sacó a llicitación les obres de construcción de trés carriles bici nel conceyu de Siero con un presupuestu de 1.236.198 euros. Les nueves víes ciclables, que van conectar con otres yá esistentes na zona, van desenvolvese na redolada de la urbanización de La Fresneda y nos polígonos de Bravo, Natalio y Bobes.
Los trabayos del aniellu perimetral de La Fresneda, que se licitan por 355.778 euros, inclúin la construcción de más de 1,7 kilómetros de carril bici bidireccional. La mayor parte del trazáu va desenvolvese a lo llargo del camín de La Llosa y l’avenida principal de La Fresneda. Amás, nel itinerariu establecerán cinco conexones con caminos ciclables yá esistentes. Esta iniciativa inclúi, amás, la reordenación del tráficu en zones de cruces y entronques.
Les otres dos actuaciones, que tienen como oxetivu comunicar zones residenciales con árees industriales del conceyu, van favorecer l’usu de la bicicleta nos desplazamientos escontra los centros de trabayu dende les distintes poblaciones.
Per un sitiu, va executase la unión de los polígonos de Bravo y Natalio, en Granda, con 2,20 kilometros de carril unidireccional y otros 450 metros de carril bidireccional. A esta obra van destinase 414.554 euros. Per otra parte, va construyise un carril bici bidireccional de 2,6 kilómetros nel polígonu de Bobes, con un presupuestu de llicitación de 465.866 euros.
El plazu d’execución de caúna de les actuaciones ye de trés meses y en tolos casos anovará la señalización horizontal y vertical de los tramos executaos.
Amás, el proyectu completu entiende la construcción d’otros trés carriles bici na localidá de Llugones y 14 aparcamientos seguros para bicicletes nel conceyu, que van movilizar una inversión cercana a los dos millones. Anguaño, ta executándose’l carril bici que conecta esta localidá de Siero col vecín conceyu d’Uviéu.
Les otres dos víes tán en llicitación, tantu la que va xunir l’avenida de Viella con Santo Isabel, al traviés de la cai Cuadonga, como la que va conectar les cais de Leopoldo Lugones y Juan Uría Ríu.
