Podemos Asturies reclamó esti llunes que se reparen “de manera urxente” les instalaciones de la residencia mista de Xixón y, coles mesmes, solicitó la contratación de más personal por que pueda atendese “como es debido” (sic) a toos y toles usuaries del complexu residencial del ERA.

Asina lo reclamó la coordinadora autonómica y diputada nel Congresu, Sofía Castañón, mientres una visita a la residencia na que tuvo acompañada por Olaya Suárez, Secretaria de Sociedá Civil, Alejandra Melandru, voceru de Podemos Xixón, según pola directora del centru y representantes de la sección sindical de la CSI na ERA. Amás, tamién participó la conseyera de Derechos Sociales y Bienestar, Melania Álvarez.

Tres la visita, Castañón señaló énte los medios de comunicación qu’amás de los desperfectos visibles na fachada “na planta 10ª hai munchos desperfectos y mugores” que tienen de ser reparaos “de manera urxente”. Amás, pidió más personal por que toos y toles usuaries “puedan reincorporase cuanto antes, tanto a les zona de día como tamién por que puedan faer usu del módulu de convalecencia”. Precisamente sobre esi módulu de convalecencia de recién apertura, Castañón pidió que s’igüen nel menor tiempu posible” una serie de necesidaes por que’l serviciu “pueda tar a plenu rendimientu pa dar una meyor respuesta y sobre cargando menos a otros centros  de Xixón”.

Nesi sentíu, incidió en que na Mixta “precísase una renovación integral de munchos de los sos espacios para garantizar el derechu de toles persones a ser curiaes y faelo dende los servicios públicos. Y ende, dende’l Ministeriu de Derechos Sociales ta faciéndose unu llabor coordináu cola Conseyería”. Amás, recordó que dende’l mesmu Ministeriu fíxose “una inversión importante nos dos últimos años, aumentando nun 108% , lo que dexó que baxe la llista d’espera de les persones usuaries d’esti tipu de centros. Pero lo que tenemos que consiguir, ye que toles persones que tienen estes necesidaes ver cubiertes porque de lo que se trata ye de garantizar un derechu” .

Tamién señaló que la renovación que precisa la residencia Mista de Xixón “cunta con un enorme consensu tantu del personal llaboral, de les usuaries y de la mesma Conseyería, como pudimos conocer a lo llargo d’esta visita”.