El Gobiernu d’Asturies aprobó güei el plan de choque contra la folada de quemes qu’afaró Asturies les últimes selmanes. Esti programa, alcordáu esta mañana en Tinéu –unu de los conceyos más estropiaos polos fueos-, va incluyir ayudes directes, midíes de prevención y reconstrucción.
La batería d’iniciatives, detallada pol presidente Adrián Barbón, va desenvolvese en trés bloques complementarios: valoración de daños, reformes normatives y ayudes económiques.
Valoración de daños
Esti capítulu básase na valoración de los daños. Pa ello, l’Executivu del Principáu yá ta trabayando na midida de les árees afaraes. Xuntu col habitual trabayu de campu tán utilizándose drones ya imaxes per satélite. Según les primeres estimaciones, les llapaes afararon 32.000 hectárees, 12.000 d’elles de superficie arbolada.
En paralelu, empecipiáronse los procedimientos alministrativos de cara a facilitar los permisos de curtia nos montes privaos, de tal manera que pueda recuperase la mayor cantidá posible de madera. El Principáu va trabayar en tou momentu en collaboración coles empreses del sector.
Aparte, y como yá s’anunció, l’Executivu va solicitar la declaración d’Asturies como zona afectada gravemente por una emerxencia de protección civil, la denominación actual de zona catastrófica. Pa ello, empecipióse un procedimientu de recoyida d’información sobre tolos bienes afectaos que va tar abiertu hasta’l 30 d’abril.
Reformes normatives y organizativas
El segundu bloque de midíes tien un planteamientu estructural: va consistir na aplicación d’iniciatives organizativas, normatives y de planificación que dexen facer frente nel futuru a posibles situaciones tan escepcionales como la vivida nes últimes selmanes coles mayores garantíes de seguridá pa la población. D’esta miente, van incluyise cambeos na regulación actual, que van incidir tantu sobre la vixilancia como na prevención y estinción de quemes.
Estos cambeos inclúin:
- La reforma de la Llei de Montes, que va pasar a llamase Llei de Montes y Prevención de Quemes Forestales. Va Ser la primer iniciativa del próximu mandatu. Pa encetala, va constituyise llueu un comité técnicu a partir del Conseyu Forestal.
- La ellaboración, con calter inmediatu, d’un nuevu resolvimientu de prevención de quemes. Esti testu va conceder especial atención al terrén cercanu a les poblaciones (el interfaz urbanu-forestal), onde esisten más riesgos pa les vides, les cases y les propiedaes.
- L’adecuación del Plan Forestal, que la so tramitación foi paralizada precisamente por que pueda recoyer los cambeos que s’introduzan na Llei de Montes.
- L’impulsu de polítiques de autoprotección de los pueblos. Pa ello, va ameyorase la xestión de los recursos forestales, van reforzase les infraestructures d’estinción, la formación de los vecinos y la coordinación de dispositivos de protección civil. El proyectu pilotu desenvueltu con ésitu pol Grupu de Desenvolvimientu Rural Alto Narcea-Muniellos va sirvir de referencia.
Midíes de sofitu económicu
- Pa particulares, conceyos y propietarios
El Principáu va conceder ayudes directes a particulares, conceyos y propietarios de montes afectaos por daños o perdes patrimoniales. La determinación de la cuantía ta pendiente de la evaluación de los perxuicios. Estes subvenciones van ser directes y van tramitase pela vía d’urxencia, por aciu alcuerdu del Conseyu de Gobiernu.
El sofitu empobinaráse tantu a particulares como a conceyos. Nel primer casu, pa desaniciar los efectos causaos n’edificaciones, casetes de preseos, naves agrícoles, etcétera. Nel segundu, pa compensar daños n’infraestructures municipales.
Per otru llau, van habilitase ayudes pa encarar les perdes forestales que sufrieron los propietarios de montes. Los primeros cálculos apunten a qu’eses compensaciones van bazcuyar ente los 500 y los 1.200 euros per hectárea. Tampoco nesti casu puede dase una cantidá zarrada, porque la valoración depende del tipu d’especie, la densidá forestal o la edá del arboláu, ente otros parámetros.
- Pa reforestación
El Gobiernu d’Asturies tamién va disponer nes próximes selmanes d’ayudes pa ordenación y desenvolvimientu de los montes, destinaes tanto a particulares como a entidaes locales, que van dexar la reforestación de toles zones afectaes con una subvención del 100%
La llínea pa particulares 2023 va tar dotada con 4 millones que van poder ampliase hasta los 5,5. Pa les entidaes locales ta prevista una convocatoria de 700.000 euros, ampliable de la mesma hasta 850.000.
Adicionalmente, va cuntar con financiamientu del Ministeriu pa la Transición Ecolóxica y el Retu Demográficu que va dexar completar toles necesidaes de reforestación precises.
- Pa prevención
El Principáu yá punxo a disposición de los conceyos y entidaes locales 2,4 millones al traviés de les ayudes pa prevención de quemes.
Amás, va activar en mayu’l nuevu fondu de prevención recoyíu nos presupuestos d’anguaño, que suma 4,5 millones y va dexar doblar los recursos facilitaos a los conceyos pa esti fin. Esti nuevu fondu, qu’inclúi un sistema de xestión más axilosa que l’actual, tien calter tresañal (2023-2025) y algama una dotación de 13,5 millones, cofinanciada pol Fondu Européu Agrariu de Desenvolvimientu Rural (Feader).
