Suspendida l’actividá de los centros sociales catorce díes pol coronavirus

La decisión tómase teniendo en cuenta la evolución de la situación y pola vulnerabilidá de les persones usuaries

0
593

El Gobiernu asturianu suspende l’actividá en tolos centros sociales catorce díes. Esta midida va afectar tanto los centros de titularidá autonómica como municipal. Son les nueves midíes de control y prevención de contaxu de COVID-19. Los trabayadores d’estes instalaciones sí van caltener la so actividá llaboral. «Tomamos esta midida teniendo en cuenta la evolución de la situación y la vulnerabilidá de les persones que faen usu d’estos centros», esplicó Melania Álvarez. La conseyera de Derechos Sociales y Bienestar, añadió qu’esta midida podría tener qu’adaptase en función del impactu de la enfermedá.

Asturies cunta con 36 centros sociales pa persones mayores de titularidá pública y del ERA. En Xixón son los de Pumarín, L’Arbeyal, El Llano y Xixón Centru. Nel restu d’Asturies veránse afectaos los d’A Veiga, Ḷḷuarca, Jardín de Cantos, La Luz, Cuadonga, Grau, Llugones, Morea, La Pola Ḷḷena, Turón, Cangas, Cuideiru, Lluanco, Nava, Cabrales, La Felguera, Sama, Lada, Caborana, Barros, Ciañu, La Pola Llaviana, Mieres, As Figueiras, Tapia de Casariego, Puertu, Ribeseya, Santa Teresa, La Tenderina, Valentín Palaciu, Clara Ferrer y Riañu. A estos hai que sumar los de titularidá municipal.

Midíes complementaries

Los trabayadores d’estos centros con sintomatoloxía respiratoria tendrán de consultar a los servicios sanitarios de prevención. Encamiéntase a los usuarios que presenten dalguna sintomatoloxía nun s’alleguen a estes instalaciones hasta la so remisión. Los residentes con síntomes tendrán d’acutar al máximu’l tránsitu peles zones comunes. Nel casu de que tengan que percorreles, van tener d’usar un mázcaru quirúrxicu. De la mesma, encamiéntase que tou residente con sintomatoloxía que vaiga ser atendíu por un trabayador lleve tamién un mázcaru. Amás, va suspendese temporalmente tou tipu d’actividá programada comuñal nos centros.

Evitar contaxos

La conseyería encamienta a reforzar les midíes d’hixene a los centros municipales de servicios sociales y al serviciu d’atención d’ayuda a casa. El programa Rompiendo Distancias encamienta a suspender el préstamu de llibros, los talleres y toles actividaes de voluntariáu. L’atención nos Centros Rurales d’Apoyu Diurnu va rexise polos encamientos pa centros sociosanitarios.