26/09/2021
Entamu Actualidá Suspendíos por usar l’asturianu nun posgráu sobre cultura asturiana na Universidá d’Uviéu

Suspendíos por usar l’asturianu nun posgráu sobre cultura asturiana na Universidá d’Uviéu

0
404

Iniciativa pol Asturianu denuncia una nueva discriminación qu’únicamente puede solucionase cola oficialidá del asturianu

Iniciativa pol Asturianu denuncia un nuevu casu de discriminación llingüística na Universidá d’Uviéu. Esti fechu ocurrió nel títulu propiu tituláu Especialista n’Asturies. Espaciu, Patrimoniu, Hestoria, Cultura, lo que lo fai especialmente llamentable esti fechu.

A lo llargo del cursu, dellos alumnos presentaron diferentes trabayos, xeres y actividaes n’asturianu ensin problema, faciendo un usu normal del idioma. Al llegar el resultáu de les evaluaciones finales, la calificación d’un trabayu apaecía como «non presentáu» y polo tanto, l’asignatura con un suspensu pa lo menos trés alumnos que dieron anuncia d’esta discriminación. Y ye qu’al consultar el motivu d’esta calificación la rempuesta foi que l’actividá taba fecha n’asturianu, reclamándose-yos la traducción del trabayu al castellán como condición pa poder ser evaluaos. Dempués de reclamar y nun tener rempuesta del profesor responsable, na segunda convocatoria, el director del Títulu propiu asumió la corrección de la xera, lo que-y queremos reconocer dende Iniciativa pol Asturianu, por buscar una solución como compromisu personal del docente. Sicasí, esti voluntarismu nun pue ser la solución definitiva pa garantizar los drechos llingüísticos del alumnáu.

Iniciativa pol Asturianu tresllada’l sofitu y el reconocimientu a los alumnos afectaos y denuncia esta nueva discriminación na Universidá d’Uviéu. Nesi sen, hai qu’aclarar que l’asturianu ye una llingua completamente intelixible y, por tanto, ye absurdo dicir que nun s’entiende l’idioma pa correxir un documentu, más cuando falamos de persones d’amplia formación académica como ye’l casu de profesoráu universitariu.

L’asociación fai un llamáu a la institución académica pa iguar de manera definitiva estes situaciones, ensin qu’en nengún casu pase’l pesu de cualquier carga estra sobre l’alumnáu que decide espresase n’asturianu. Amás, la entidá recuerda que la oficialidá ye la ferramienta constitucional qu’aporta igualdá pa les persones independientemente de la llingua que falen. Nadie tien que ser discrimináu pola llingua que fale, seya castellán o asturianu.