Xixón al día

Etiqueta: Amieva

  • Alcuentren fináu a un vecín d’Amieva

    Alcuentren fináu a un vecín d’Amieva

    Un equipu cinolóxicu de la Unidá Canina de Rescate del Serviciu d’Emerxencies del Principáu d’Asturies (SEPA), formáu por dos guíes y un perru, alcontró ayeri nueche’l cuerpu ensin vida d’un varón de 23 años sumíu n’Amieva. Los sos restos mortales fueron alcontraos pol perru de rescate nuna carba, a unos 200 metros del llugar onde tenía’l so vehículu, un quad.

    Hasta’l llugar tamién se movió’l Grupu de Rescate, la Unidá de Drones y el xefe de zona del oriente de Bomberos el SEPA al pie de dos axentes del Greim de la Guardia Civil. Vecinos del fináu llevaben buscándolo dende esa mesma tarde cuando s’estrañaron de la so ausencia en xubiendo, al rodiu de les 14.00 hores a ver el ganáu.

    El Centru de Coordinación d’Emerxencies del 112 Asturies recibió l’avisu a les 19.35 hores. Na llamada, realizada por un vecín, indicaben que taben buscando a un vecín que faltaba de la so casa dende les dos de la tarde. Xubiera a ver al ganáu y creíen que podía pasalu daqué porque nun tornara a casa.

    La Sala 112 del SEPA movilizó a la Unidá Canina de Rescate y al Grupu de Rescate al pie de la Unidá de Drones y el xefe de zona empobine. Amás informóse a la Guardia Civil qu’activó al Greim de Cangues d’Onís.

  • El SEPA realiza dos rescates n’Amieva y Sobrescobiu

    El SEPA realiza dos rescates n’Amieva y Sobrescobiu

    El Grupu de Rescate del Serviciu d’Emerxencies del Principáu d’Asturies (SEPA), a bordu del helicópteru medicalizáu de Bomberos d’Asturies, treslladó al Hospital del Oriente, en Les Arriondes, a una muyer que resultó mancada nuna pierna cuando realizaba una ruta de monte, la del picu Priniello, nel conceyu d’Amieva.

    L’afectada, de 79 años, foi atendida nel llugar del accidente pola médica-rescatadora. Amás de suministra-y analxesia, inmovilizó-y la pierna derecha con una férula, con ayuda d’un bomberu-rescatador. Darréu, dambes, fueron izaes al helicópteru medicalizáu por aciu una operación de grúa na que s’esplegaron 40 metros de cable. La senderista presentaba esguince de rodía.

    El Centru de Coordinación d’Emerxencies del 112 Asturies recibió l’avisu a les 16.29 hores. Na llamada indicaben que yeren un grupu de cuatro persones y una d’elles nun podía siguir caminando. Sufriera una cayida y dolía-y enforma una rodía.

    Rescate de monte en Sobrescobiu

    Primeramente’l Grupu de Rescate col helicópteru medicalizáu allegara a rescatar a un varón que s’había desnortiao cuando realizaba una ruta pel picu Cuyargayos, en Sobrescobiu. El mesmu afectáu llamara al 112 Asturies a les 14.41 hores. Nel avisu indicó que s’atopaba nuna fastera con muncho desnivel y taba enriscáu. Habíase desnortiao y agora nun podía nin xubir nin baxar del llugar onde s’atopaba.

    La Sala 112 del SEPA activó al Grupu de Rescate col helicópteru que rescató ilesu al afectáu, de 49 años, y treslladólo hasta Sotu d’Agues onde había dexao aparcáu’l so vehículu. Tantu l’accesu al senderista como la so evacuación realizóse por aciu dos tales operaciones cola grúa de l’aeronave nes que s’esplegaron 35 metros de cable en caúna d’elles.

  • Mediu Ambiente conclúi les obres d’anovación del colector de Sames, n’Amieva

    Mediu Ambiente conclúi les obres d’anovación del colector de Sames, n’Amieva

    La Conseyería d’Alministración Autonómica, Mediu Ambiente y Cambéu Climáticu invirtió 160.645 euros nes obres de renovación del colector de Sames, nel conceyu d’Amieva, realizaes con calter d’emerxencia.

    La infraestructura, que da serviciu a 70 habitantes, yá ta totalmente operativa, mientres que l’asfaltáu de la cai nel tramu afectáu pol frayatu ta a puntu de concluyir. Amás, el tráficu ta restituyíu.

    Por cuenta de los desperfectos causaos polos episodios d’intenses agües, Mediu Ambiente decidió anovar el colector. Les obres consistieron na construcción d’una nueva canalización pa regar, la reposición del colector de saneamientu afectáu pol frayatu de la canalización y l’execución de los pozos de rexistru necesarios pal caltenimientu de la infraestructura, amás de la sustitución completa del firme de la cai.

  • Rescaten a dos senderistes desorientaos n’Amieva

    Rescaten a dos senderistes desorientaos n’Amieva

    Efectivos de Bomberos del Serviciu d’Emerxencies del Principáu d’Asturies (SEPA), con base nel parque de Cangues d’Onís y el Grupu de Rescate alcontraron y rescataron ilesos, esta nueche, a dos senderistes que se desorientaron cuando realizaben una ruta de monte n’Amieva.

    Los dos senderistas, dos varones de 76 y 66 años d’edá, fueron alcontraos polos bomberos canguetos a unos 500 metros d’unes antenes asitiaes percima de la llocalidá de Pen. Atopábense nuna fastera con fuerte vexetación y muncho enclín. Hasta’l llugar llegaron con posterioridá’l Grupu de Rescate y al alcuentru de toos el Grupu de Rescate ya Intervención de Monte (GREIM) de la Guardia Civil. Los equipos del SEPA solicitaron la so collaboración pa portear a unu de los afectaos que finalmente consiguió, con ayuda, baxar pol so propiu pie.

    Los senderistas fueron treslladaos hasta la localidá de Santillán onde dexaran aparcao’l so vehículu.

    El Centru de Coordinación d’Emerxencies del 112 Asturies recibió l’avisu a les 18.19 hores. Los mesmos afectaos indicaron que taben realizando la ruta del Beyu Pen pero se desorientaron. Nesi momentu taben nuna zona con muncha maleza y desnivel.

    La Sala 112 del SEPA púnxose en contactu telefónicu col Grupu de Rescate que, en falando con ellos, señalen que saben onde s’atopen pero nun creen que puedan salir pelos sos medios. L’equipu va dir movilizándose y amás, como los senderistes señalen que tán viendo en llínea recta la carretera, actívase una dotación de bomberes del parque cangués.

    A les 19.28 hores los bomberos alcuentren visualmente a los afectaos pero tienen qu’atopar una vía d’accesu hasta ellos. A les 21.45 los bomberos informen que yá tán colos senderistes. Unu d’ellos tien dificultaes pa caminar polo que se deriva al Grupu de Rescate al parque cangués a buscar una camiya de portéu y solicítase la collaboración del GREIM qu’activa a dos axentes.

    A les 23.39 hores el personal del SEPA indiquen que yá tán toos aconceyaos al pie de los perdíos. Yá falaron col GREIM que se dirixe al so alcuentru. Ellos van empecipiar el descensu colos dos senderistes.

    Más d’una hora más tarde, a les 01.58 hores, informen que dexaron a los escursionistes nel llugar onde teníen aparcáu’l so vehículu. Tán cansaos pero atópense en perfectu estáu. Nun precisen asistencia sanitaria. Los equipos retiren a les sos respectives bases.

  • Rescaten a una muyer que se mancó cuando facía barranquismu n’Amieva

    Rescaten a una muyer que se mancó cuando facía barranquismu n’Amieva

    Una muyer resultó mancada mientres practicaba barranquismo con una empresa de turismu activu nel ribayu del Vallegón, n’Amieva. L’afectada, que presentaba una posible quebra de tibia y peroné, foi sacupada pol Grupu de Rescate de Bomberos del Serviciu d’Emerxencies del Principáu d’Asturies (SEPA), a bordu del helicópteru medicalizáu, al Hospital Comarcal de Les Arriondes.

    El Centru de Coordinación d’Emerxencies recibió l’avisu a les 12:26 hores. Na llamada, realizada por un monitor de la empresa de turismu activu, indicóse qu’una persona mancárase y nun había accesu rodáu al llugar. Darréu movilizóse al equipu de rescate, a bordu del helicópteru medicalizado, amás de al Xefe de Bomberos del SEPA de la Zona Oriental y a 4 efectivos del parque de Cangues d’Onís, que se treslladaron col furgón multisocorro y un pick-up.

    Una vegada na zona, inmovilizóse la estremidá mancada de la muyer asitiándo-y una férula enchible. De siguío izóse a l’aeronave executando una operación de grúa doble cola que se sacó, col triángulu de rescate, al médicu-rescatador cola afectada. En total efectuáronse cuatro operaciones de grúa, nes que s’esplegaron, de cada vez, alredor de 38 metros de cable.

    Una vegada a bordu de l’aeronave, treslladóse a la muyer al Hospital Comarcal de Les Arriondes.

    L’equipu de rescate dio per rematada la intervención a la so llegada a base, a les 14:31 hores. La sala del 112 del SEPA informó del sucesu a la Guardia Civil y al Serviciu d’Atención Médica Urxente (SAMU).

  • Rescaten ilesos a dos senderites que se desnortiaron cola borrina n’Amieva

    Rescaten ilesos a dos senderites que se desnortiaron cola borrina n’Amieva

    L’helicópteru medicalizáu de Bomberos d’Asturies rescató ilesos a dos senderistes que se desnortiaron cola borrina cuando realizaben una ruta dende’l mirador de Ordiales a Vegabaño, n’Amieva. Los dos afectaos, una muyer de 24 años y un varón de 25, fueron alcontraos baxando escontra la presa de La Jocica. L’helicópteru dexó a unos 800 metros de los afectaos, por aciu una maniobra de sofitu de patín, a unu de los bomberos-rescatadores. Este foi a buscar a la pareya y acompañólos de nuevu hasta l’aeronave que los evacuó por aciu la mesma maniobra.

    El Centru de Coordinación d’Emerxencies del 112-Asturies recibió l’avisu a les 15.37 hores. Na llamada, los mesmos afectaos esplicaron que por cuenta de la borrina confundiéronse y llegaron a una zona complicada y nun podíen siguir. La Sala 112 del SEPA movilizó al Grupu de Rescate col helicópteru medicalizáu y comunicó l’incidente a la Guardia Civil. A les 17.16 hores l’equipu informa que remató’l rescate y torna a la so base en Llamorgal onde llega a les 17.36 hores.