Xixón al día

Etiqueta: Cabrales

  • El Principáu amuesa los paisaxes queseros a la prensa internacional que cubre los World Cheese Awards

    El Principáu amuesa los paisaxes queseros a la prensa internacional que cubre los World Cheese Awards

    Trece representantes de medios de comunicación internacionales como The Daily Telegraph, BBC Radio, Eater o Culture Cheese Magazine participaron estos díes en viaxes organizaos pol Principáu p’amosar los principales recursos y valores turísticos d’Asturies, con un enfoque preferente pa la so condición de territoriu gastronómicu, embaxo la marca Cocina de Paisaxe, y pa los paisaxes queseros.

    Al traviés de dos itinerarios, Los paisaxes de Picos d’Europa y los quesos Cabrales y Gamonéu, na comarca oriental, y Paisaxes de quesos y vinos, pel centru y occidente, periodistes del Reinu Xuníu, EEUU, Suecia, Portugal ya Italia pudieron conocer los paisaxes, espacios y procesos productivos de recursos gastronómicos asturianos, talos como cueves naturales de maduración de quesu en Picos d’Europa o bodegues y viñedos integraos na DOP Vinu de Cangas.

    La viceconseyera de Turismu, Graciela Blanco, afirmó qu’estos viaxes constituyen «una fórmula p’amplificar el potencial de la oferta turística d’Asturies», aprovechando les posibilidaes qu’ufre la celebración de los World Cheese Awards n’Uviéu.

  • Parres, Cangues, Cabrales, Ribeseya y Llanes, n’alerta naranxa por riesgu altu de contaxu

    Parres, Cangues, Cabrales, Ribeseya y Llanes, n’alerta naranxa por riesgu altu de contaxu

    Alerta naranxa nos conceyos de Parres, Cangues, Cabrales, Ribeseya y Llanes pol altu riesgu de tresmisión del coronavirus. Estos cinco conceyos concentren el mayor númberu de casos de covid-19 pola aglomeración de residentes y turistes, según datos de la Conseyería de Salú. El director xeneral de Salú Pública, Rafael Cofiño, señaló que la situación d’alerta naranxa ha d’entendese «como una llamada d’atención» pa estremar les midíes de vixilancia. Hai d’evitar pasar a otres más drástiques como pueden ser zarros perimetrales o confinamientos».

    N’agostu, la área sanitaria VI, correspondiente a la fastera oriental, dobló la tasa d’incidencia del coronavirus al respective de la media de la comunidá. Asina, esti mes detectáronse 36 andaes, lo que supon una tasa de 64 casos por cada 100.000 habitantes. «El sistema de detección precoz y vixilancia analizó a más de 250 contactos esti mes, ensin cuntar a aquelles persones a les que se fixo un llamamientu al tar rellacionaes con dalgún de los biltos declaraos», precisó’l coordinador del Observatoriu de la Salú del Principáu, Mario Margolles.

    De persistir una evolución epidemiolóxica desfavorable, nun se refuguen zarros perimetrales y otres midíes de confinamientu. Amás, encamiéntase a les alministraciones locales a identificar les sos zones calientes.

  • Rescaten a una familia belga que se desnortió en monte cuando intentaba llegar al Urriellu

    Rescaten a una familia belga que se desnortió en monte cuando intentaba llegar al Urriellu

    La nube sosprendiólos en plenu monte. Efectivos d’emerxencies alcontraron y rescataron a una familia que se desnortió cuando se dirixíen al refuxu del Urriellu, en Cabrales, onde pretendíen faer nueche. Los cuatro afectaos, un varón de 55 años, una muyer de 54, una muyer de 19 años y un menor de 16, fueron alcontraos a les 02.40 hores d’esta madrugada nel valle de Les Moñetes. El grupu de rescate formáu por dos bomberos-rescatadores y una médica-rescatadora, llogró llegar hasta ellos en caminando más de cuatro hores y media dende la Vega del Toru. Hasta ellí llevólos un vecín de Sotres. Nesta localidá tuvo qu’aterrizar l’helicópteru medicalizáu, trés una complicada maniobra por cuenta d’una nube lléctrica.

    Los cuatro afectaos, el matrimoniu y los sos dos fíos, d’orixe belga, pasaron la nueche acompañaos pol equipu que-yos facilitó ropa d’abrigu y bébores calientes. A primer hora d’esta mañana fueron treslladaos nel helicópteru hasta Fuente Dé, en Cantabria, onde dexaran el so vehículu.

    El Centru de Coordinación d’Emerxencies del 112 Asturies recibió l’avisu a les 18.19 hores del martes. Na llamada esplicaben que yeren un grupu de cuatro persones que s’atopaben desnortiaes na parte alta del valle de Les Moñetes. La Sala 112 del SEPA movilizó darréu al Grupu de Rescate col helicópteru medicalizáu yá informó de la intervención a los servicios d’emerxencies de Cantabria y Castiella y Llión y a la Guardia Civil.

    L’equipu de rescate facilitó-yos ropa d’abrigu y bébores calientes. / SEPA

    A les 19.20 hores los afectaos indiquen que tán escuchando l’helicópteru bien cerca pero hai mala visibilidá. Nesi momentu desamarra una nube eléctrica con vientu y xarazu qu’obliga al equipu a abandonar la zona. Treslládense a Sotres a la espera de poder retomar la intervención. Daes condiciones meteorolóxiques l’equipu decide empecipiar el rescate a pie. Los afectaos taben cansaos y nun llevaben ropa d’abrigu. Un vecín tresllada a los dos rescatadores y a la médica, en touterrén, hasta Vega del Tornu. Dende ellí empiecen a caminar un total de cuatro hores y media, dos d’elles so l’agua, hasta atopar a los senderistes.

    El 112 tuvo en contactu permanente cola familia. A les 01.09 hores el grupu de rescate que señala que tien a la vista a los senderistes pero tienen que dar un rodiu hasta llegar a ellos. Los afectaos tamién tán viendo les lluces de los rescatadores. Una hora y media más tarde yá s’atopen toos xuntos. L’equipu xubiera cobertores térmicos, ropa d’abrigu y unos termos con bébores calientes pa poder esperar nel llugar a que los fora a recoyer l’helicópteru medicalizáu.

  • El funicular de Bulnes vuelve circular

    El funicular de Bulnes vuelve circular

    El funicular de Bulnes, que permaneció paráu dende’l pasáu 18 de febreru pa la inspección de los vagones, retoma esti xueves la so actividá. Los trabayos de revisión incluyeron los suministros necesarios pa la revisión completa de los frenos, suspensión, exes, ruedes y otros elementos menores como latiguillos, tornillería y casquillos. Con posterioridá, y consensuáo colos vecinos, va realizase otra parada para comprobar el funcionamientu y axuste de los elementos qu’afecten a la polea motriz, sistemes de frenu, ente otros, que fueron sustituyíos nos trabayos realizaos nes paraes precedentes.

    El funicular yá suspendiera los sos servicios los díes 12, 13 y 14 d’avientu de 2019 pa la inspección del grupu motriz y del reductor. Nesa ocasión desmontáronse y repunxeron aquellos componentes que, pol so estáu, nun cumplíen coles tolerancies prescrites. El contratu d’inspección del funicular xube a 391.246,24 euros, a abonar en dos añalidaes.

  • El funicular de Bulnes, zarráu del 18 de febreru y el 1 de marzu

    El funicular de Bulnes, zarráu del 18 de febreru y el 1 de marzu

    El funicular de Bulnes va parar dende’l próximu 18 de febreru hasta’l 1 de marzu, dambos inclusive, p’acometer trabayos d’inspección integral. Mientres los trelce díes nos que va tar interrumpíu’l serviciu van revisase y van inspeccionase los vagones y tolos sos elementos: frenos, suspensión, exes y ruedes y otres pieces y elementos menores. L’actuación, que va riquir alzar los vagones, va realizase na estación inferior.

    El director xeneral de Movilidá y Conectividá, Jorge García, y el director de l’Axencia Asturiana de Tresportes y Movilidá, José Manuel Caldevilla, acompañaos del alcalde de Cabrales, José Sánchez, informaron a los vecinos de Bulnes de tolos detalles de la próxima parada, cola mira de minimizar les molesties.

    El serviciu de tresporte per cable yá suspendiera los sos viaxes los díes 12, 13 y 14 d’avientu de 2019 p’acometer l’exame del grupu motriz y del reductor. Nesa ocasión desmontáronse tamién les pieces y repunxéronse los componentes que, pol so estáu, nun cumplíen coles tolerancies prescrites. El contratu d’inspección del funicular xube a 391.246 euros, a abonar en dos anualidaes.

  • El funicular de Bulnes rexistró un 8% más de viaxeros que l’añu anterior

    El funicular de Bulnes rexistró un 8% más de viaxeros que l’añu anterior

    Un total de 64.764 viaxeros utilizaron el funicular de Bulnes ente 1 de xineru y el 26 avientu de 2019. Esta cifra representa una medría del 8% respectu al añu anterior cuando se rexistraron 59.875 usuarios. El funicular tuvo paráu los díes 12, 13 y 14 avientu pol desenvolvimientu d’unos trabayos de revisión xeneral y caltenimientu del motor. Coles mesmes, mientres el próximu mes ta previstu que se realice’l control de los vagones.

    Amás de la gran inspección, en 2019 realizáronse distintes obres de caltenimientu nel funicular. Ente otres, la reconstrucción de los dados de sofitu de los carriles, la inspección del cable tractor, la reposición de dellos dispositivos eléctricos y l’arreglu del vagón de carga de mercancíes. Estes actuaciones nun tuvieron nenguna incidencia nel funcionamientu diariu del funicular.

  • El funicular de Bulnes va suspendese trés díes n’avientu por una inspección

    El funicular de Bulnes va suspendese trés díes n’avientu por una inspección

    El funicular de Bulnes va parar los díes 12, 13 y 14 d’avientu por cuenta de la inspección integral de la infraestructura que se ta acometiendo. El serviciu va permanecer atayáu mientres estos trés díes polos trabayos de revisión del grupu motriz y del reductor, que riquen desmontar y reponer los componentes que, pol so estáu, nun cumplan coles tolerancies prescrites.

    Coles mesmes, el director xeneral de Movilidá y Conectividad, Jorge García, informó que, en febreru del próximu añu, va proceder a la inspección de los vagones. Nesta revisión van incluyíse los suministros necesarios pa la revisión completa de los frenos, suspensión y maniobra p’alzar los vagones na estación inferior. Tamién se van sustituir los exes y les ruedes. El contratu d’inspección del funicular xube a 391.246 euros. La Conseyería d’Infraestructures, Mediu Ambiente y Cambéu Climáticu, consensuó la parada col conceyu y los vecinos.

  • Muerre una muyer al cayer na ruta del Cares

    Muerre una muyer al cayer na ruta del Cares

    Una muyer, d’unos 60 años d’edá, morrió en cayendo d’unos 100 metros, en circunstancies que desconocen, cuando realizaba la ruta del Cares, en Cabrales. Los restos mortales fueron alcontraos pol Grupu de Rescate de Bomberos del Serviciu d’Emerxencies del Principáu d’Asturies (SEPA), a bordu del helicópteru medicalizáu, na zona de Los Colladinos. L’afectada cayó per debaxo del antiguu camín del Cares hasta’l ríu. La Guardia Civil fíxose cargu de los trámites para proceder al llevantamientu del cadabre.

    P’aportar al llugar onde s’atopaba la muyer y confirmar el médicu-rescatador el so fallecimientu l’equipu tuvo que realizar dos ciclos de grúa na que s’esplegaron 40 metros de cable. El Centru de Coordinación d’Emerxencies del 112 Asturies recibió l’avisu a les 14.38 hores. Na llamada señalaben que se trataba d’un grupu que taben realizando la ruta del Cares y qu’una muyer cayérase per una fastera de siquier trenta metros de desnivel na vertical col ríu.

  • Cultura popular y deporte tradicional nel Día d’Asturies en Cabrales

    Cultura popular y deporte tradicional nel Día d’Asturies en Cabrales

    Les localidaes d’Arenas y Carreña van acoyer los principales actos de la programación del Día d’Asturies que se celebra esti fin de selmana. La festividá va tener como protagonistes la cultura popular, el deporte tradicional y l’apertura al públicu de los equipamientos más emblemáticos del conceyu. La conseyera de Cultura, Política Llingüística y Turismu, Berta Piñán, y l’alcalde de Cabrales, José Sánchez, presentaron esti xueves el programa, que combina’l folclore, l’artesanía, los xuegos tradicionales y los espectáculos na cai cola posibilidá de conocer el patrimoniu material y natural del conceyu cabraliegu.

    La plaza del Castañéu, n’Arenas de Cabrales, va acoyer el mercáu tradicional, la feria de productos asturianos y el mercáu del Conseyu Regulador DOP Cabrales, que van tar abiertos los dos díes a partir de les 12.00 hores. Na mesma plaza, van llevar a cabu la muestra y los talleres de llabores tradicionales. El domingu, tamién al mediudía, va impartir nel escenariu d’Arenas una masterclass d’escanciáu de sidra y una exhibición de campeones. La programación d’esta edición inclúi como novedá una exhibición de la Unidá Canina de Rescate del Principáu d’Asturies, que se va realizar nel CP Las Arenas el sábadu 7, a partir de les 12.00 hores.

    Música y teatru na cai

    Mientres los dos díes, Nun Tris, la Banda Picos d’Europa y el grupu folclóricu Corri-Corri van llevar l’animación y los pasacalles per tol conceyu. El grupu Corri-Corri, amás, va actuar el domingu en Carreña. Les compañíes La Sonrisa del lagarto y Tras la puerta títeres escenificarán los sos espectáculos teatrales na plaza de la Salú, en Carreña, tamién los dos díes.

    La tonada va tar presente con dos conciertos na plaza de la Salú de Carreña: el de l’Agrupación Coral Ecos d’Onís y el de la Avocación d’Intérpretes de Cantar Asturianu, que va repitir nel escenariu d’Arenas. Los conciertos pa cerrar dambes xornaes, que se van celebrar nel escenariu d’Arenas, protagonizar Rebeca y Lafu y Asturiana Mining Company con Berto Varillas, el sábadu, y Héctor Braga y Marisa Valle Roso, el domingu.

    Na Casa Bárcena, en Carreña, el sábadu a les 17.00 van proxectase los curtiumetraxes Entaína y Historia de una casualidad, cola presencia del so director, el cineasta cabraliegu Alberto Pardo. En cuanto al deporte y los xuegos tradicionales, dellos grupos de deporte rural van competir y van realizar demostraciones na bolera y nel anexu de la bolera d’Arenas. El tornéu de bolos na cai va apostar les sos fases eliminatoria y final na bolera de Carreña. La Federación de Deportes de Minusválidos Físicos del Principáu (Fedema), tamién, va realizar un taller de deporte adaptáu n’Arenas.

    Museos y rutes

    El conceyu cabraliegu va abrir al públicu l’Atenéu Cabraliegu, onde pueden conocese el costumes y tradiciones queseres, la Casa Bárcena, onde s’espón unu reproducción de la cueva de Covaciella, la Cueva Muséu de la Fundación Cabrales, la Ilesia de Santa María de Llas, y la Quesería de Maín, en Sotres. Otramiente, el conceyu ufierta les sos rutes más célebres: la de los Puertos, la de la Mayada de el Pastores y la ruta arqueolóxica d’ Asiegu. Para poder realizales, ye imprescindible la reserva previa.

  • Asiegu, en Cabrales, Premiu al Pueblu Exemplar d’Asturies

    Asiegu, en Cabrales, Premiu al Pueblu Exemplar d’Asturies

    L’aldea d’Asiegu, nel Conceyu de Cabrales, foi galardonada col Premiu al Pueblu Exemplar d’Asturies 2019, según fixo públicu esti llunes n’Uviéu’l xuráu encargáu de la so concesión. Con una población de 98 vecinos, el so allugamientu constitúi un privilexáu balcón dende’l que reparar, al sur, los macizos d’altu monte de los Picos d’Europa. Na redolada atópense yacimientos arqueolóxicos como la cueva prehistórica de la Covaciella, lo que certifica que se trata d’una zona poblada dende tiempos bien remotos. A principios del sieglu XX descubriéronse un grupu de catorce hachos dataos ente 1700 y 1500 a.C., conocíes como los ‘hachos de Asiegu’. Anguaño atópense nel Muséu Arqueolóxicu d’Asturies. Amás, nesta aldea alcontróse un enterramientu con dote funeraria, que pol tamañu de los restos foi conocíu como la tumba del ‘xigante d’Asiegu’. Tamién hai nel pueblu restos d’una construcción defensiva, conocida como El Castru, que nel sieglu XVIII yera yá descritu como’l castiellu de Asiegu.

    El llendo y la ganadería fueron, mientres sieglos, la fonte de riqueza tanto d’Asiegu como de tol conceyu de Cabrales y l’ellaboración de quesos p’aprovechar l’escedente llácteo constituyó tamién dende antiguu una traza característica. El barriu de La Caleya constitúi’l núcleu primitivu del pueblu, onde se repara l’arquitectura tradicional asturiana de corte popular, con delles cases de corredor, ente que la conocida como la casa d’El Cuetu de las Abellotas, el barriu más altu d’Asiegu, ye una de les muestres constructives más vieyes que se caltienen y que tien el so orixe nuna posada d’orixe medieval.

    Los vecinos crearon en 1999 l’Asociación Cultural Asiegu XXI pa recuperar la conciencia de comunidá y la iniciativa vecinal perdida pola crisis del mundu rural. Una de les sos primeres acciones foi la recuperación de fotografíes históriques sobro dellos llogros de la comunidá vecinal y la so publicación en calendarios monográficos, por casu, sobro la construcción de la carretera o la escuela. Asiegu XXI impulsó la realización de diversos trabayos comunales, como la meyora de les infraestructures pal llendo, la renovación del tendíu eléctricu y l’allumáu públicu y les trayíes d’agua. Tamién dotó d’usu a l’antigua escuela, rehabilitada pol Conceyu, como centru social pa los vecinos.

    Anguaño, Asiegu cuenta con dos queseríes acoyíes a la DOP Quesu de Cabrales, dellos agospiamientos de turismu rural y l’itinerariu Ruta’l Quesu y la Sidra. Con cuatro fataos d’oveya xalda, Asiegu convirtióse en referencia na recuperación, manexu y promoción d’esta raza autóctona. El pueblu foi’l primer núcleu de población d’Asturies n’instalar una rede interna pa conectar dellos llares a internet y dar cobertoria a la mayada de Tebrandi.

    Esti galardón convocar por primer vegada en 1990, al cumplise’l décimu aniversariu de la Fundación, y tien una naturaleza y calter distintos a los Premios Princesa d’Asturies. La so dotación económica ye de venticinco mil euros. Nesta edición allegaben un total de 26 candidatures.