Xixón al día

Etiqueta: Conceyu de Xixón

  • Aurelio Martín asumirá Movilidá y Mediu Ambiente

    Aurelio Martín asumirá Movilidá y Mediu Ambiente

    Aurelio Martín va asumir les competencies de Movilidá y Mediu Ambiente. El representante de Xixón por la izquierda va asumir esta nueva conceyalía dempués d’algamar un alcuerdu de gobiernu col PSOE. L’alcuerdu tien de ser ratificáu’l 26 de xunetu en votación presencial n’agrupación llocal d’Izquierda Xunida.

    El documentu alcordáu contempla que l’edil de la coalición formada por Izquierda Xunda ya IAS asuma la responsabilidá en materia de preservación del mediu ambiente, urbanu y rural, protección de la naturaleza y recuperación de la zona costera. D’esta manera, Martín responsabilizaráse de la finalización del Plan de Xestión de Borrafes del conceyu. L’edil tamién va asumir les cuestiones venceyaes a la planificación y la xestión de la movilidá. Amás, incorporaráse como vicepresidente d’Emtusa y la Empresa Mista de Tráficu y presidente del Centru de Tresportes.

  • La megafonía de San Llorienzo va quedar instalada güei

    La megafonía de San Llorienzo va quedar instalada güei

    El Conceyu de Xixón axudicó a les empreses Galicia Event Crew y Técniques Submarines, los servicios de megafonía y balizamientu nes sableres urbanes. La megafonía va instalase nes sableres de San Llorienzo y Poniente. El preciu d’axudicación foi de 3.327’50 euros. El del serviciu d’abalizamientu, que se va instalar en San Llorienzo, Poniente y L’Arbeyal, licitóse por 27.760 euros+IVA. Dambos contratos son pa los dos próximos años.

    La sablera de San Llorienzo foi’l primeru onde empezó la instalación d’estos dos servicios. A lo llargo de la mañana yá van tar dafechu operativos. Tres San Llorienzo van siguir les sableres de Poniente y El Arbeyal, onde van rematar la so instalación a principios de la próxima selmana.

    El conceyal delegáu de Policía Local y Serviciu d’Estinción d’Incendios, José Luis Fernández, llamentó esta mañana’l «perxuiciu causáu a usuarios de les sableres urbanes de la ciudá pola ausencia d’estos dos servicios», que tendríen de tar instalaos el pasáu 1 de xunu, día nel qu’empezó la temporada de baños.

    Nesti sentíu esplicó que’l procesu de llicitación de dambos servicios tendría d’empezar nel mes de marzu pero «cuando llegamos al Conceyu topamos cola desagradable sorpresa de qu’esta llicitación nun taba fecha, colo cual tuvimos qu’empezar dende cero lo más rápido que la burocracia que traen esti tipu de procesos dexónos».