Xixón al día

Etiqueta: Cultura

  • Fito & Fitipaldis vuelven a Xixón nuna versión más íntima

    Fito & Fitipaldis vuelven a Xixón nuna versión más íntima

    Fito & Fitipaldis torna per tolo alto a Xixón. Tres el gran ésitu del so pasu pela ciudá mientres el mes d’abril, Fito volverá xubise a los escenarios en Xixón nel añu 2023, y va facelo nel teatru de La Llaboral, el vienres 20 de xineru. Dempués de completar la xira nacional más multitudinaria hasta la so finalización, la banda preséntase nun formatu que va averar al públicu a un ambiente más íntimu, nel que podrán escuchase cantares del so últimu discu “Cada vez cadaver” y los clásicos de la banda, interpretaos con un matiz distintu.

    Pa ello, Fito Cabrales incorpora a los Fitipaldis a Jorge Arribas y Diego Galaz de Fetén
    Fetén, que, al pie de Carlos Raya, Javier Alzola, “Boli” Climent y “Coki” Giménez, van completar la banda que va percorrer mientres la seronda ya iviernu dalgunos de los teatros y auditorios d’España. Una ocasión única pa ver a Fito & Fitipaldis en Xixón, nun formatu bien especial. Les entraes van tar a la vienta a partir del próximu martes 18 d’ochobre a les 12 hores, al traviés de la páxina web de compra d’entraes del teatru de La Llaboral.

  • El Muséu Arqueolóxicu recibe la donación d’una calota humana del Paleolíticu topada en 1947 en Ribeseya

    El Muséu Arqueolóxicu recibe la donación d’una calota humana del Paleolíticu topada en 1947 en Ribeseya

    El Muséu Arqueolóxicu d’Asturies recibió una donación de pieces paleolítiques per parte de la familia de José Antonio Sánchez Feliz. El llote inclúi una calota humana completa con tolos güesos del craniu, topada pol padre de Sánchez Feliz en 1947 na cueva de La Lloseta, en Ribeseya. Los analises realizaos por Rodrigo de Balbín y José Javier Alcolea asitien la calota (parte cimera de la bóveda cranial) a finales del Paleolíticu Cimeru.

    Mientres años, José Antonio Sánchez Prieto realizó distintes incursiones pela zona y topó pieces arqueolóxiques de valor en La Lloseta, nel macizu d’Ardines. Los fondos qu’agora dexa’l so fíu al Muséu Arqueolóxicu inclúin 17 restos paleolíticos. Asina, a la citada bóveda cranial humana suman restos d’estiles y güesos de distintos herbívoros y un bifaz de xil prietu recoyíu a finales de 1967 na redoma de la cueva. Trátase de pieces topaes dende los años 40 hasta finales de los sesenta nesti enclave ribeseyanu. El material atópase en bon estáu de caltenimientu, yá que foi envueltu y protexíu curioso pola familia mientres toos estos años.

    La donación quedó formalizada esta selmana. Quepe recordar qu’en 2019 José Luis Sánchez Feliz yá depositó temporalmente nel muséu’l legáu de pieces axuntáu pol so padre.

  • El Centru del Prerrománicu Asturianu acueye talleres y la esposición Pelayo y Covadonga al traviés de la novela

    El Centru del Prerrománicu Asturianu acueye talleres y la esposición Pelayo y Covadonga al traviés de la novela

    El Centru del Prerrománicu Asturianu súmase a la celebración del 1.300 aniversariu de la Batalla de Cuadonga amosando una representativa selección de noveles arrexuntaes pol Club de Llectura de Novela Histórica del Reinu d’Asturies, que dirixe Inés Arroni Castellanos y que s’axunta davezu nel Centru. A lo llargo de los postreros cuatro años, munches y variaes son les noveles que protagonizaron les sesiones del Club de Llectura del Centru del Prerrománicu, delles presentaes nel mesmu equipamientu. D’esta esperiencia naz l’amuesa Pelayo y Cuadonga al traviés de la novela, que va permanecer abierta al públicu dende’l vienres 14 d’ochobre al domingu 18 d’avientu, y qu’axunta un total de 25 noveles nes que cobra especial protagonismu la figura de Pelayo, el mitu y la trescendencia de la famosa Batalla de Cuadonga.

    L’amuesa va dir acompañada de trés maquetes rellacionaes con tan emblemáticu momentu y la que foi la primer capital del Reinu d’Asturies: Cangues d’Onís. Trátase de recreaciones de La Santa cueva, la ponte de Cangues d’Onís y l’ilesia de la Santa Cruz en Cangues d’Onís, obra de Joaquín Suárez Fernández “Perucho” que les realizó de forma artesanal a perfecta escala, con materiales similares a los orixinales: piedra, lladriyos, etc.

    Les actividaes del Centru del Prerrománicu pa los próximos meses complétense cola programación de dellos talleres p’afayar la Edá Media y les formes de vida de la dómina.

    El públicu adultu va poder empecipiase nel arte de la esgrima’l 15 d’ochobre nel taller Vida militar nel Reinu d’Asturies nel que van aprender l’arte del duelu y l’esgrima con armes medievales utilizando retruques hestóriques. Amás, el día 29, el públicu familiar va poder participar nel risonderu escape room La desapaición de XX y el domingu 30 pecar van convertir n’auténticos arquiteutos medievales nel taller Pilpayu Medieval. ¡Construyendo a lo grande!

    L’historiador, documentalista y novelista Yeyo Balbás vuelve visitar el Centru del Prerrománicu, el 5 de payares, pa falar sobre’l so ensayu Espada, fame y cautiveriu: La conquista islámica de Spania y sobro el so premiu de Novela Histórica Ciudá de Úbeda, Covadónnica. Amás, por cuenta de la celebración del Día Mundial del Patrimoniu, el 20 de payares, el públicu infantil a partir de 6 años va poder crear con Hamma Beads la fachada d’unu de los edificios catalogaos como Patrimoniu Mundial, xuna forma lúdica d’afayar l’arquitectura del Prerrománicu Asturianu y de llevase una alcordanza.

    Tamién en payares, los díes 26 y 27, Sylvie Allix y Juanma Rivero van impartir el taller de cantar Cantar el Camín, una inmersión na música medieval. Trátase d’una esperiencia musical pa vivir la Edá Media, dende un enfoque sensorial dafechu orixinal y distintu, na que se van tratar cantares de pelegrinos del Codex Calixtinus y dalguna cantiga, acompañaos con preseos de música medieval, pa terminar realizando un cuentu musical participativu. Esti taller ta dirixíu a tolos públicos a partir de 8 años.

    Con distintos tipos d’ingredientes los menores a partir de 6 años van aprender a crear los sos propios xabones nel taller L’arte del xabón que se va realizar el 4 d’avientu y, el 17 del mesmu mes, van aprender a preparar la tinta ferrogálica cola que van poder escribir la so carta a los Reis Magos.

    L’accesu a la esposición Pelayo y Cuadonga al traviés de la novela y a la presentación del ensayu de Yeyo Balvás ye gratuitu. Les entraes pa participar nos talleres pueden adquirise yá na web del Centru.

  • Llaboral Ciudá de la Cultura acueye la Gala del XIV Premiu Camaretá al Meyor Cantar n’asturianu

    Llaboral Ciudá de la Cultura acueye la Gala del XIV Premiu Camaretá al Meyor Cantar n’asturianu

    Llaboral Ciudá de la Cultura acueye’l próximu sábadu 22 d’ochobre a les 22:00 hores, la Gala final del XIV Premiu Camaretá al Meyor Cantar n’asturianu que convoca la Conseyería de Cultura, Política Llingüística y Turismu. La gala, que va ser retresmitida en directu per TPA, va acoyer les actuaciones de los trés grupos finalistes, Algaire, Mostru l´horru y Dixebra, escoyíos nuna primer fase pol xuráu especializáu ente toles composiciones musicales escrites n’asturianu o eonaviegu, espublizaes a lo llargo del añu 2021 y que se presentaron a esta convocatoria.

    El grupu Algaire, formáu por Iratxe Espina, Carla Miranda, Loreto Suárez y Juan Yagüe, preséntase a esta edición del Premiu Camaretá con Coral y maera, un cantar con lletra y música de Luis Ángel Fernández Santos. El dúu de rap Mostru l’horru que formen Francisco Méndez y Yannick Gutiérrez participen col tema Fíu d’un pueblu, de composición propia. Xune Elipe, Primi Abella, Rubén Álvarez, Javi Rodríguez, Llorián García, Sergio Álvarez, Eladio Díaz y Agus Lara formen anguaño la banda de rock Dixebra que presenta’l el cantar Como’l mar, con lletra de Primitivo Abella.

    Tres de l’actuación de los trés candidatos, el xuráu formáu por especialistes en música y llingua asturiana, va decidir el cantar ganador. Mientres la deliberación del xuráu, el públicu va poder disfrutar de dos actuaciones. La primera del grupu Llevólu’l sumiciu, qu’actúen fuera de concursu xunto cola cantautora Anabel Santiago. Depués van facelo Carla Armas y Rubén García, que van interpretar col so grupu, Tras el muro El que conoz a tierra, tema ganadora del XIII Premiu Camaretá, y otres composiciones. Tres d’esta actuación, va dase a conocer el nome del grupu gallardonáu y va facese entrega d’un troféu a los sos intérpretes.

    El premiu, dotáu con 6.000 euros, inclúi la realización d’un videoclip, asina como la promoción y espardimientu del cantar ganador nos medios de comunicación y nos eventos organizaos o promovíos pol Gobiernu del Principáu d’Asturies, asina como nel circuitu Autores nel Camín del programa Asturies, Cultura en Rede.

    La entrada a la gala ye llibre y gratuita previa retirada d’invitación na Recepción de la Llaboral, nel Centru d’Información Turística del Principáu d’Asturies (CITPA) n’Uviéu, nel Centru Niemeyer n’Avilés, nel teléfonu 952 076 262, en unientradas.es y na web de Llaboral Ciudá de la Cultura.

  • Asturies, Cultura en Rede enllena l’últimu trimestre del añu d’actividaes

    Asturies, Cultura en Rede enllena l’últimu trimestre del añu d’actividaes

    El programa Asturies, Cultura en Rede sigue col so compromisu cola divulgación de la cultura tradicional asturiana y esti trimestre programa un total de 50 actividaes en 23 conceyos asturianos, onde 21 profesionales van presentar al públicu propuestes interesantes sobre la historia, la música, la tradición oral o la mitoloxía del Principáu.

    Sergio Buelga va repasar Un sieglu de teatru del pueblu: el Teatru Popular Asturianu en Llangréu y va organizar les Olimpiaes asturianes de xuegos tradicionales en Grau, Bual y Gozón; de la mano d’Aladanza Educación y Tradición vamos averanos en Grau a la danza tradicional asturiana con Sal a baillar y a los instrumentos tradicionales en Casu y Xixón con Sones y Percusiones. Amás, vamos deprender sobre Los reyes asturianos con Higiénico Papel Teatro nuna conferencia teatralizada en Ḷḷena y Navia; sobre l’alfarería tradicional con Toño Huerta y La memoria del barru en Llaviana; y vamos averanos al llibru La Ayalga: tesoros de Asturias con una gynkana en La Ribera y Gozón.

    La nota musical del circuitu llega con dellos formatos n’Esa ye la de… d’El Arca de Mozart en Villaviciosa y Navia; en Si Beethoven fuera asturianu d’Ensemble L’Arca en Llanera; nos conciertos de Xiranda Brass Band en Colunga; Calea con Silvia Quesada, Ruben Bada y Leticia Baselgas en Sotu’l Barcu y Grau; con Los Gascones en Mieres; y con Loína en Llanes. Amás, José Ángel y María José Hevia presenten La Conferencia en Nava y Tina Gutiérrez lleva los sos Cancios tradicionales a Colunga y Llanes. 6 Riales presenta’l so últimu proyectu, Sutripar, en Bual y Toli Morilla’l so repertoriu basáu en testos de poetes asturianes en Cangas y Ḷḷena.

    Tamién va haber cuentos, cantares y poemes con Elisabet Martín Teatro, que presenta Cuentos de la Xana, el Trasgu, el Cuélebre y el Nuberu n’Ayer, Navia, Ḷḷena y Casu; Cuentos de nuestros abuelos en Navia; y Cuentos, conseyes y marionetes n’Ayer. Factoría Norte cunta histories tradicionales en Contábamelo la bruxa en Muros de Nalón y Ḷḷena y Teatro del Cuervo va presentar Ágada (contadora de historias) en Ḷḷena. Carlos Alba Cellero va llevar Dos oreyes y una boca a Castrillón y Tinéu y La matazuga a Gozón y Ḷḷena. Pela so parte, Aventurina l´ablana de Factoría Norte va poder vese esti trimestre en Navia y Grau y Las aventuras de Torpecillo y Remangu d’El Arca de Mozart en Llaviana, Tinéu y Cangas.

    Esti circuitu forma parte d’Asturies, Cultura en Rede, un proyectu de la Conseyería de Cultura, Política Llingüística y Turismu realizáu en collaboración colos conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies, nel que tamién s’incluyen circuitos temáticos d’artes escéniques, música, artes visuales, Xacobéu, Autores nel Camín, lliteratura y Cuadonga 2022 – Camín de los santuarios.

    La información ampliada de la programación pue consultase na web asturiesculturaenrede.es.

  • El C.P. Rey Pelayo presenta la campaña «Fai barriu con Pelayín»

    El C.P. Rey Pelayo presenta la campaña «Fai barriu con Pelayín»

    El Colexu Públicu Rey Pelayo de Gijón/Xixón, al traviés de la so Asociación de Mas y Pas del Alumnáu, punxo en marcha la campaña “Fai Barriu con Pelayín”, coles mires de fomentar el consumu local nos establecimientos del barriu, crear un venceyu ente la comunidá educativa del centru y los comercios de la zona y ufiertar un beneficiu extra a les sos families.

    El primer distintivu va ser apurríu pol Conceyal de Promoción Económica, Empléu, Turismu y Comerciu Local del Conceyu de Gijón/Xixón, Santos Tejón Llaneza, mañana xueves a les 16:30 na Llibrería Ensueño (C/Juan Alvargonzález, 39). Toles families que presenten El Carné Escolar de l’AMPA del cole, podrán beneficiase d’una serie de descuentos en distintos establecimientos de la zona, que van dende’l 5%-30%, amás de promociones especiales y ufiertes puntuales. Ente les empreses participantes pueden atopase una gran variedá d’actividaes, como llibreríes, papeleríes y copisterías, moda y complementos, centros de formación, óptiques, clíniques dentales, centros de fisioterapia, confiteríes y cafeteríes y munchos servicios más. Yá roblaron la so participación más de 30 establecimientos, pero la inscripción va siguir abierta a lo llargo de tol cursu.

    Cada comerciu va cuntar con un distintivu visible, que-y acredita como establecimientu collaborador. Amás, dende l’AMPA, se distribuyirán cartelos pel barriu y va apurrise a toles families información de la campaña y de tolos descuentos ufiertaos polos establecimientos.
    Amás, col Carné Escolar, los escolinos y escolines tamién tienen accesu a una serie de descuentos n’actividaes culturales y nos recursos turísticos xestionaos pola Sociedá Pública de Xestión y Promoción Turística y Cultural del Principáu d’Asturies (Muséu del Xurásicu d’Asturies, Parque de la Prehistoria de Teberga, Llaboral Ciudá de la Cultura, Estación Iverniza Fontes d’Iviernu, Centru d’Arte Rupestre de Pedrete Bustillo, Centru de Recepción ya Interpretación del Prerrománicu Asturianu y Muséu Etnográficu Grandas de Salime “Pepe El Ferreiro”.

    Les empreses que yá zarraron el so compromisu de participación hasta’l momentu son: La Barba Blanca, De Buena Tinta, Dental Alba, Kiosco Pili, Garaje RG, General Óptica, Fisioterapia Fernández Blanco, Tu Coses, Café Bandana, Confitería San Antonio, Label Informática, Soyar regalos, Punto Cero, Librería Ensueño, Zapatillería Marcos, TEC, Opticalia, Clínica Dental Ayala, Carey, Cuidafarm, Barbería Mondragón, Deli Taper, Copistería Saavedra, Churrería La Gloria, Decoraciones Murciego, Euronics Electrodomésticos, Style Peluquería, Fotógrado Armando, Centro Dietético Concha, Biodieta, Teclas Formación, Churrería La Milagrosa, la Asociación Caltener Colors y la collaboración especial de America Limousine Services, anque se tán recibiendo más solicitúes que se van tramitar nos próximos díes.

  • Ribeseya y Teberga celebren el Día Européu del Arte Rupestre

    Ribeseya y Teberga celebren el Día Européu del Arte Rupestre

    El Centru d’Arte Rupestre de Tito Bustillo y el Parque de la Prehistoria de Teberga celebren el Día Européu del Arte Rupestre’l 9 d’ochobre. El Centru Tito Bustillo propón esti domingu un viaxe a cuatro cueves asturianes con arte rupestre al traviés de gafes de realidá virtual. Con elles, el públicu va poder adentrase dende l’equipamientu ribeseyanu nel interior de Llonín, La Loxa, El Pindal y El Buxu y reparar les pintures y grabaos qu’atesoren. Va haber ocho pases dende les 11:00 hasta les 17:00 hores, con places llimitaes.

    El Parque de la Prehistoria de Teberga entama’l 9 d’ochobre, a les 13:00 hores, una visita empuesta especial pola so Galería para conocer los peligros, les dificultaes y les soluciones de caltenimientu y protección de los monumentos con arte rupestre paleolíticu.

    Dambes actividaes nun tienen costu adicional cola entrada al equipamientu y puede retirase la entrada para participar al traviés de les respectives webs, en centrotitobustillo.com y parquedelaprehistoria.es

  • Canción lírica asturiana de conciertu, de Vicente J. Sánchez García, va presesentase al travíes d’un conciertu-presentación

    Canción lírica asturiana de conciertu, de Vicente J. Sánchez García, va presesentase al travíes d’un conciertu-presentación

    Canción lírica asturiana de conciertu, de Vicente J. Sánchez García, va presesentase al travíes d’un conciertu-presentación el próximu vienres, 7 d’ochobre, a les 19:00 hores nel Conservatoriu Superior de Música “Eduardo Martínez Torner” d’Uviéu.

    L’actu va cuntar coles actuaciones d’Eliana Sánchez (declamación), Beatríz Díaz (sopranu) y Mario Bernardo (pianu). Amás, va participar Antón García, director xeneral de Política Llingüística y Esther Prieto, d’Ediciones Trabe.

  • Entama esti xueves el VI Festival Nel Amaro

    Entama esti xueves el VI Festival Nel Amaro

    Esti próximu xueves, 7 d’ochobre, entama el VI Festival Nel Amaro nel Teatru Filarmónica d’Uviéu, nel que se van representar les obres finalistes qu’opten al VI Premiu de Teatru Profesional Nel Amaro en llingua asturiana.

    L’eventu ta organizao pola Dirección Xeneral de Política Llingüística y van poder vese estes obres:

    • Kamante Teatro, col espectáculu Con M mayúscula que se representa’l 7 d’ochobre,
    • Carlos Alba, col espectáculu Les madreñes vacíes que se representa’l 14 d’ochobre,
    • Factoría Norte, col espectáculu Aventurina, L’ablana y que se representa’l 21 d’ochobre, y
    • Nun Tris Producciones, col espectáculu La sierva patrona que se representa’l 28 d’ochobre.
  • Un bocetu de cartel de Legazpi de 1976 ingresa nel Muséu del Pueblu d’Asturies

    Un bocetu de cartel de Legazpi de 1976 ingresa nel Muséu del Pueblu d’Asturies

    El Muséu del Pueblu d’Asturies acaba d’adquirir un bocetu de Legazpi pa cartelu anunciador de les fiestes d’A Veiga de 1976, que representa un xigantón de los que desfilen peles cais los díes de fiesta en munches villes asturianes, y nel que se ve al home que va dientro portando la xigantesca figura y baillando.

    Ye una obra (pintura acrílica sobro llenzu, midíes: 85 x 66 cm) absolutamente singular del cartelismu asturianu de los años setenta con otru tipu de representación.

    Nesi tiempu, nos cartelistes asturianos primaba’l triunfante grafismu americanu de la década anterior, pero nesti diseñu, Legazpi axúntase a la llinia europea trazada por esa escuela polaca de cartelistes que revolucionó’l contestu européu. Marxinando toa referencia a los modelos festivos, l’artista xuega col humor, l’absurdu y busca la complicidá del espectador por que pueda esquizar neses necesaries alternatives a los modelos triaos dende una absoluta modernidá rupturista.

    Esti bocetu, que s’espón na recepción del muséu hasta’l 30 de payares, súmase a otros dos cartelos de Legazpi que caltien el Muséu del Pueblu d’Asturies y que fueron donaos pol so autor: un cartelu p’anunciar regates de bateles en Castripol, de 1977, y el cartelu del Concursu de pesca de salmón Homenaxe Miguel Castro, I Troféu «Miguelín», Ríu Narcea, Cornellana, de 1990.

    Col ingresu d’esti bocetu s’amplia la colección de cartelos que caltien el Muséu del Pueblu d’Asturies, colección que na actualidá cuneta con unos 3.500 exemplares y que dexa documentar exhaustivamente l’orixe y desenvolvimientu hasta güei del cartelu fechu n’Asturies o de temática asturiana.

    José Manuel Legazpi nació en Bres (Taramundi) en 1943, pasó la so infancia y mocedá n’A Veiga, d’onde él se consideraba nativu. Equí desenvuelvo la so primer afición pola pintura y el trabayu artesanal. Yera un artista polifacéticu y orixinal, qu’apoderaba a la perfección les técniques de dibuxu, pintura, escultura, talla de madera, forxa de fierro, llabra de piedra, fibra de vidriu, etc. Dedicó tola so vida al arte y realizó numberoses esposiciones. Tuvo estudiu en Tenerife, Uviéu, Castripol, Tapia de Casariego y dende 1979 en Las Dorigas (Salas). Llogró’l premiu al meyor pintor asturianu nel Concursu Ástur-Lleonés de Pintura (1975) y el Primer Premiu nel VIII Certame Nacional de Pintura de L.luarca, en 1977. La so conocencia de les técniques artesanales de madera, piedra y fierro, bien vixentes nel A Veiga de la so infancia, reflexar na so obra artística y tamién n’unos modélicos estudios etnográficos: «La Patefa» (1980), «El llagar y la sidra» (1982), «Inxenios de madera. Carpintería mecánica medieval aplicada a l’agricultura» (1991), «Sidra y mazana n’Asturies» (1993), «Carpinteros de ribera y pesca de mariña» (inéditu). Nos sos últimos años realizó una serie de semeyes de personaxes anónimos marxinales, dellos tomaos de les sos alcordances d’infancia y mocedá n’A Veiga, que constitúin una galería de tipos populares y marxinaos qu’él quixo perpetuar. Legazpi finó en Las Dorigas en 2019.