Etiqueta: esquí

Rescaten a una muyer mancada en Valgrande-Payares

Una muyer resultó mancada mientres s’atopaba esquiando na estación Valgrande-Payares nel conceyu de L.lena. L’afectada foi evacuada, pol Grupu de Rescate del Serviciu d’Emerxencies del Principáu d’Asturies (SEPA), a bordu del helicópteru medicalizado de Bomberos d’Asturies, al Hospital Universitariu Central d’Asturies (HUCA). Por cuenta de más pruebes y hasta nueva valoración médica’l so pronósticu ye reserváu.

El Centru de Coordinación d’Emerxencies recibió l’avisu a les 15:41 hores. La llamada efectuábase dende la mesma estación iverniza y de monte, qu’esplicó qu’una persona cayera esquiando. A pidimientu del Serviciu d’Atención Médica Urxente (SAMU) movilizóse al equipu de rescate a bordu de l’aeronave medicalizada.

Cuando llegaron a la zona, la muyer afectada yá taba siendo atendida pol personal sanitariu de la mesma estación d’esquí y atopábase inmovilizada nun colchón de vacíu. En siendo atendida pol médicu-rescatador, pasaron a l’afectada, col colchón de vacíu, a la camiya de rescate, y treslladóse hasta l’aeronave, qu’aterrizara cerca, pa la so evacuación al HUCA.

23/01/2023
La estación de Valgrande-Payares abre mañana les sos pistes

La estación d’esquí de Valgrande-Payares va abrir mañana les sos pistes a los y les esquiadores. La estación atropa nieve polvo con espesures que van dende los 50 centímetros na zona baxa hasta los 70 na parte alta. Tolos remontes van tar en funcionamientu, coles esceiciones de les pistes de la zona d’El Vallón y los telesquís del Tubo y Funte la Reina. El dominiu esquiable va afacese en función de les condiciones meteorolóxiques.

Nel casu de la estación de Fontes d’Iviernu (Ayer), a pesar de cuntar con espesures acumulaes suficientes pa la práctica del esquí, l’apertura de les instalaciones caltiense condicionada poles restricciones d’accesu esistentes na vertiente asturiana del puertu de San Isidro.

El Gobiernu d’Asturies caltuvo conxelaos esta temporada los precios públicos pa la práctica del esquí nos dos aparques asturianes, Valgrande-Payares y Fontes d’Iviernu. La temporada d’esquí abrióse oficialmente’l 2 d’avientu nel Principáu y ta previstu que s’enllargue hasta’l 9 d’abril.

19/01/2023
Retrásase l’aniciu de la temporada en Valgrande-Payares y Fontes d’Iviernu

Los espesores de ñeve acumulaos nes estaciones invernales Valgrande-Payares y Fontes d’Iviernu nun van permitir l’apertura de les estaciones asturianes mañana, 26 de payares, día previstu pal aniciu de la temporada d’esquí, nin mientres la fin de selmana.

La lluvia cayida na xornada d’ayeri miércoles menguó los espesores, anque les previsiones apunten a que va haber precipitaciones en forma de ñeve mientres la fin de selmana que, en caso de cumplise, permitiríen acumular ñeve enforma pa abrir les pistes de les estaciones asturianes lo antes posible.

Tanto nes páxines web como nes redes sociales de cada estación se va dir informando de cualesquier novedá.

25/11/2021
El Gobiernu d’Asturies garantiza que Valgrande-Payares cunta con dirección técnica y va iniciar la temporada d’esquí con toles midíes de seguridá

La estación de Valgrande-Payares va empecipiar la temporada d’esquí con toles garantíes de seguridá para les persones ususaries. Asina lo aseguró güei la directora xeneral de Deporte, Beatriz Álvarez Mesa, quien esplicó que l’equipamientu ivernizu “cuenta col contratu a valir de responsabilidá técnica o dirección técnica, axudicáu a la empresa Inxeniería y Control d’Obres ya Instalaciones S.L”.

Álvarez señaló que la seguridá de la estación “ye un asuntu demasiao seriu como para nun crear alarma social innecesaria y que rique rigor a la hora d’informar”. La responsable de Deporte indicó que Valgrande-Payares va abrir la temporada’l próximu día 27 “con toles midíes de seguridá necesaries”.

Proyectu de desestacionalización y reconstrucción

En relación col proyectu de reconstrucción de la estación iverniza y de monte de Valgrande-Payares como motor económicu pal valle de L.lena, Álvarez recordó que’l Gobiernu d’Asturies llogró una financiación de 10 millones de los fondos mineros del Institutu de Transición Xusta, organismu que contribúi col 75% de la inversión, ente que’l 25% apúrrelu l’Alministración autonómica.

La directora añedió que’l proyectu inicial dimensionóse y esgazóse depués, adaptándolu a l’actuación oxetu del conveniu y adaptándolu a la financiación disponible.

El proyectu de reconstrucción, que se va executar nuna distribución tresañal (2021-2023), va llicitase a finales d’esti añu o primeros de 2022, tal que s’esplicó na Xunta Xeneral, cola fin d’empezar les obres na primavera del próximu añu al tratase d’un espaciu onde ye complicada cualquier actuación pel iviernu.

Coles mesmes, la directora de Deporte especificó que para la primer fase propónse la execución d’un nuevu sistema de tresporte per cable pa la estación qu’inclúi la telecabina Cuitu Nigru, mesmo que l’acurtiamientu de la telesilla Brañil.lín y el desmontaxe de los telesquíes La Hoya y Arroyo, y de los telesillas Hoya de Cuitu Nigru y Les Patines.

17/11/2021
La temporada d’esquí va empezar el vienres

La temporada d’esquí n’Asturies va empezar el 29 de payares y va allargase hasta’l 12 d’abril del 2020. La estación de Fontes d’Iviernu, nel conceyu d’Ayer, va abrir les sos instalaciones esti vienres. La de Valgrande-Payares, pela so parte, va facelo una vegada remataren los llabores d’acondicionamientu habituales. La estación ḷḷeniza trabaya coles mires de tar en funcionamientu pa la ponte d’avientu. L’apertura va ser anunciada con antelación pola dirección de Valgrande-Payares. L’anunciu de la fecha de la temporada d’esquí produz un día dempués de que’l Conseyu de Gobiernu aprobara’l caltenimientu de los precios de la pasada campaña.

26/11/2019