La Comisión Europea echó voz de al Principáu l’aprobación del Programa del Fondu Européu de Desenvolvimientu Rexonal (Feder) 2021-2027, que va dexar impulsar inversiones por más de 445 millones na comunidá. El financiamientu européu va ser del 60%, esto ye, va llegar a los 267,1 millones. Estes inversiones, que va xestionar directamente l’Executivu autonómicu, van suponer una medría de barganal de 120 millones en relación col programa anterior (2014-2020), van dexar sofitar a más de 900 pymes y van xenerar una inversión privada cimera a los 250 millones.
El programa Feder va facilitar el desenvolvimientu de proyectos qu’escuerren trés grandes oxetivos prioritarios:
– Una Europa más competitiva ya intelixente. Esti apartáu, dotáu con 173 millones d’inversión, promueve unu tresformamientu económicu innovadora.
– Economía verde. Esti oxetivu impulsa proyectos por más de 169 millones rellacionaos cola transición enerxética, llimpia y equitativa.
– Una Europa más social ya inclusiva. Va Cuntar con una dotación de más de 87 millones.
Una Europa más competitiva ya intelixente
No que se refier al primer oxetivu, que supon el 40% de la inversión del programa, inclúyense ayudes a empreses para la execución de proyectos d’innovación y desenvolvimientu. Destaquen aquelles empobinaes a centros d’I+D+i empresarial y les destinaes a la tresferencia de conocencia y tecnoloxía al traviés de los centros tecnolóxicos; el sofitu a la internacionalización de la I+D+i y el respaldu a la capacidá investigadora y talentu.
Coles mesmes, van tener en cuenta los proyectos d’inversión empresarial nes pymes, les ayudes a entamadores y la promoción internacional. El desenvolvimientu d’aplicaciones de y-gobiernu y de digitalización de los sistemes del ciclu integral d’agua tamién s’enmarca nesti oxetivu.
Economía verde
Esta área inclúi’l sofitu a los proyectos de rehabilitación enerxética d’edificios públicos, principalmente en centros educativos y sanitarios. Tamién se preve l’adaptación de les infraestructures del Principáu a los riesgos del cambéu climáticu, con obres en distintos puertos y actuaciones en zones inundables.
Dientro d’esti oxetivu, van destinase más de 74 millones d’inversión a ameyorar infraestructures de saneamientu y suministru, principalmente nel occidente asturianu.
Una Europa más social ya inclusiva
Nesti apartáu inclúyese financiamientu para la construcción y reforma de centros educativos en Primaria y Secundaria, según n’infraestructures sanitaries.
