Xixón al día

Etiqueta: Fitur

  • Asturies acuerda en Fitur un plan de promoción en mercaos estranxeros

    Asturies acuerda en Fitur un plan de promoción en mercaos estranxeros

    El Gobiernu d’Asturies alcordó en Fitur coles ocho oficines de turismu europees un programa operativu qu’inclúi más de mediu centenar d’acciones de promoción en mercaos estranxeros, col fin de dar respuesta al creciente interés qu’espierta Asturies como destín.

    El plan diseñáu con Turespaña inclúi 30 viaxes a Asturies de periodistes, axentes de viaxes y otros prescriptores; dos foros internacionales de cicloturismu y turismu industrial, la participación en nueve feries y cinco presentaciones de la comunidá en Bruxeles, Londres, Dublín, Roma y Milán.

    Esti ye unu de los alcuerdos zarraos na edición 2023 de Fitur y que se caracterizó pol interés que xeneró Asturies ente los axentes y operadores turísticos estranxeros. Amás, el estand d’Asturies na feria internacional recibió un 72% más de visitantes que l’añu pasáu, de cuenta que s’asitia yá en niveles previos a la pandemia.

    Distintes axencies ente les que destaca Studiosus -el principal turoperador alemán de turismu cultural- tomaron per primer vegada la iniciativa de solicitar cita col equipu técnicu de Turismu Asturies, interesaes pola nuevu ufierta de vuelos al Gobiernu, coles mires d’ampliar viaxes y estancies. Les consultes rellacionaes cola sostenibilidá y el ecoturismu acoparon l’interés del restu d’axencies.

    La viceconseyera de Turismu, Graciela Blanco, venceya esti creciente interés per parte de los mercaos internacionales col trabayu de promoción desenvueltu nos últimos años. “Queremos intensificar la mesma llinia de trabayu que dexó qu’unu de cada cinco turistes que visiten Asturies venga de mercaos internacionales, aprovechando les conexones directes que tenemos agora colos principales mercaos europeos”, esplicó.

    Nesta edición de la feria, 25.773 persones pasaron pol estand d’Asturies pa solicitar información o esfrutar de les actividaes programaes pol Gobiernu del Principáu. Ente otres acciones, más de 40 asociaciones y entidaes presentaron los sos productos turísticos y más de 300 persones caltuvieron xuntes comerciales na Terraza del paraísu, la área del espositor dedicada a profesionales.

  • Asturies da’l relevu a Euskadi na coordinación de la España Verde

    Asturies da’l relevu a Euskadi na coordinación de la España Verde

    El Gobiernu d’Asturies dio güei el relevu institucional al mandu de la coordinación d’actividaes de la España Verde al Executivu d’Euskadi, que va ser l’encargáu d’entamar les actividaes de la marca que xunta a Asturies, Cantabria, Galicia y País Vascu a lo llargo de 2023. El estand d’Asturies en Fitur acoyó esta tarde l’actu, nel que tuvieron presentes representantes de les cuatro comunidaes y nel que la conseyera de Cultura, Política Llingüística y Turismu, Berta Piñán, trespasó les funciones al so homólogu vascu, Javier Hurtado.

    Piñán amosóse bien satisfecha del trabayu desenvueltu l’añu pasáu dientro del senu de la España Verde. “En 2022 la España Verde llogró probablemente unu de los finxos más importantes de la so hestoria como proyectu común de les cuatro comunidaes: la captación de fondos europeos Next Generation pa convertise nel mayor corredor d’ecoturismu d’Europa”, destacó la conseyera de Cultura Política Llingüística y Turismu.

    El proyectu de la España Verde enmárcase dientro del programa Experiencia Turismo España y va recibir de los fondos europeos el 98% de la inversión total, envalorada en 954.073 euros. El plan va tener como beneficiaries directes a más diez asociaciones y 250 empreses turístiques aniciaes n’espacios protexíos de 16 destinos de la España Verde, que van poder participar nes acciones de formación y certificación n’ecoturismu y nes diverses iniciatives de promoción que se van desenvolver en 2023.

    Piñán sorrayó que la marcha turística fundada fai 34 años poles cuatro comunidaes “ye la hestoria d’un ésitu asitiáu na capacidá de cooperar y xunir fortaleces trabayando con rigor y llealtá”. La conseyera reafitó’l compromisu del Gobiernu d’Asturies pa siguir trabayando nel senu de la España Verde p’avanzar na proyección y la imaxe de la marca.

    Pela so parte, la viceconseyera de Turismu, Graciela Blanco, fixo balance de la intensa actividá desenvuelta mientres 2022 cola celebración de cuatro xuntes presenciales y el desenvolvimientu de diverses actividaes promocionales y formatives.

  • El chef José Andrés va recibir la Medaya d’Asturies de 2023 “pol so compromisu solidariu y los sos valores”

    El chef José Andrés va recibir la Medaya d’Asturies de 2023 “pol so compromisu solidariu y los sos valores”

    El presidente del Principáu anunció güei en Fitur que’l cocineru José Andrés va recibir la última Medaya d’Asturies de 2023 rimada, que va aprobar llueu’l gobiernu xuntu coles otres cuatro anunciaes. Adrián Barbón destacó la reconocida trayectoria del chef asturianu: «Solidariu, amuesa de compromisu y valores, persona de referencia internacional y quería por toos”. Al so xuiciu, constitúi un exemplu más de “la meyor Asturies”.

    El Conseyu de Gobiernu va aprobar llueu la concesión de les máximes distinciones institucionales al oftalmólogu y expresidente de la Fundación Princesa d’Asturies, Luis Fernández-Vega, a la expresidenta de la Xunta Xeneral Laura González, al primer presidente de l’Academia de la Llingua, Xosé Lluis García Arias, a la escritora María Teresa Álvarez y, tal como anunció güei Barbón, tamién al chef José Andrés. Amás, va proponer el títulu de Fíu Predilectu/Fía Predilecta pal fináu rector Leopoldo Alas Argüelles, la hestórica militante socialista Ánxeles Flórez Maricuela y l’empresariu asturmexicanu Antonio Suárez, y el Fíu Adoptivu para’l periodista Juan Ramón Lucas.

  • Asturies amuesa en Fitur la so apuesta por convertise en referente européu del ecoturismu

    Asturies amuesa en Fitur la so apuesta por convertise en referente européu del ecoturismu

    El Gobiernu d’Asturies esplega’l potencial de la so ufierta na Feria Internacional de Turismu (Fitur), que se celebra hasta’l domingu en Madrid. La conseyera de Cultura, Política Llingüística y Turismu, Berta Piñán, presentó esta mañana nel estand del Principáu les claves del turismu de naturaleza como seña indiscutible de la marca Paraísu Natural p convertise la comunidá en referente européu del ecoturismu.

    “L’apuesta pol ecoturismu y el turismu de naturaleza ye una de les nueses señes d’identidá y enllena tola filosofía del estand. La sostenibilidá ye la piedra angular del nuesu modelu de desenvolvimientu turísticu y Asturies foi pionera nesi camino yá nos años 80, asina que ye lóxicu reforzar el nuesu compromisu con esa máxima”, señaló la conseyera.

    Dientro d’esa llínea d’actuación, Piñán destacó los nuevos activos culturales, turísticos y naturales que’l Gobiernu impulsó, como’l Camín de los Santuarios, la ruta de 200 kilómetros que xune trés grandes centros de pelegrinación ente Santu Toribio de Llébana (Cantabria), Cuadonga y la catedral d’Uviéu. “Trátase d’una ruta que vieno pa quedase y na qu’a lo llargo d’anguaño vamos encarar inversiones por valor de 880.000 euros p’ameyorar la so accesibilidá y señalización”, avanzó.

    Coles mesmes, adelantró la puesta en marcha d’un plan d’allugamientu pa potenciar el turismu industrial, con una primer inversión d’un millón. Esti proyectu va suponer la creación d’una nueva marca turística que va arrexuntar toles acciones, recursos patrimoniales y esperiencies venceyaes a esti sector.

    Piñán recordó qu’Asturies “ye la comunidá española con un catálogu más ampliu de muertes patrimoniales calteníos, especialmente nel ámbitu mineru”. Nesti sentíu, el estand d’Asturies en Fitur inclúi anguaño una galería inmersiva qu’ufierta al visitante una pequena amuesa del patrimoniu industrial.

    Per otru llau, l’espositor acueye hasta’l domingu’l Rincón sidreru y tamién la ufierta MICE, p’atraer turismu de negocios y xuntes a les ciudaes asturianes. La Cocina de Paisaxe, abanderada por chefs y guisanderes, cuenta tamién con un espaciu promocional.

    Campaña promocional conectividá

    El Gobiernu d’Asturies va invertir 1,9 millones na promoción nacional ya internacional de les meyores de la conectividá ferroviaria y aérea de la comunidá. Berta Piñán destacó en Fitur “l’inmensu poder que dambes acciones tienen pa llograr desestacionalizar la demanda y consiguir qu’Asturies seya un destín prioritariu tol añu”. “Qu’Asturies tea más cerca pal viaxeru ye una ventaya que tenemos d’aprovechar al máximu”, añedió.

    En concretu, la conseyera anunció que se va destinar un millón a promocionar la llegada de l’alta velocidá a Asturies y 900.000 euros a la campaña promocional de les nueves conexones aérees, qu’inclúi acciones publicitaries en seis ciudaes europees. Amás, el Gobiernu va entamar presentaciones de les nueves rutes a operadores turísticos y profesionales del sector en Dublín, Roma, Bruxeles, Londres y Milán.

    Al so xuiciu, tratar de “una apuesta decidida y ambiciosa por captar nuevos públicos”, que va dexar avanzar escontra un modelu de desenvolvimientu turísticu más sostenible, “al gradiar l’aporte de visitantes a lo llargo de tol añu”.

  • El gobiernu va aprovechar Fitur pa destacar el potencial turísticu que va suponer l’apertura de la variante de Payares

    El gobiernu va aprovechar Fitur pa destacar el potencial turísticu que va suponer l’apertura de la variante de Payares

    Asturies va tornar a la Feria Internacional de Turismu (Fitur), que se va celebrar del 18 al 22 de xineru en Madrid, con un estand de 900 metros cuadraos nel que se va desenvolver una intensa axenda promocional y de trabayu, y que va tener na naturaleza y l’ecoturismu les sos temátiques principales. El Día d’Asturies en Fitur va celebrase’l xueves 19 de xineru cola presencia del presidente del Principáu, Adrián Barbón.

    Como novedá, l’espaciu va presentar una gran cascada de vídeos que se van esibir nel frontal del recintu p’asemeyar un viaxe en tren por dellos paisaxes asturianos, de mariña ya interior. Ye’l soporte escoyíu pa dar a conocer al gran públicu la próxima llegada de l’alta velocidá a Asturies. El Gobiernu del Principáu confía nel que la puesta en serviciu de la variante de Payares multiplique’l potencial turísticu d’Asturies, qu’en 2022 algamó de nuevu cifres récord de visitantes y pernoctaciones.

    Amás, la galería inmersiva o túnel del espositor va tener como protagonista al turismu industrial. Al traviés d’un xuegu visual, los visitantes van poder percorrer centros temáticos, museos y recursos estrella del nuesu patrimoniu cultural venceyáu cola industria.

    Na primer edición ensin restricciones sanitaries tres la pandemia, l’espaciu d’Asturies en Fitur va acoyer más de 40 presentaciones de conceyos, contornes y asociaciones turístiques, y va cuntar con más de 200 profesionales asturianos acreditaos.

    El estand va cuntar con dos amosadores d’información turística atendíos por 10 técnicos municipales de distintos conceyos, otru dedicáu a les ciudaes d’Asturies y un puestu virtual conectáu en vivu coles Oficines de Turismu asturianes.

    Mientres la fin de selmana de’l 21 y 22 de xineru l’atención va centrase nos potenciales turistes que visiten la feria, a los que va ufiertar un xuegu interactivu sobre recetes de cocina tradicional. Al tiempu, l’equipu técnicu de Turismu va caltener en paralelu una axenda de trabayu nel área estremada de Fitur MICE, dedicada a establecer contactos ente profesionales del turismu de negocios y organizadores de xuntes, congresos y viaxes d’incentivu.

    L’espositor va contener amás guiños a tolos productos marcaos como prioritarios pol plan estratéxicu de Turismu 2020-2030, con un rincón temáticu dedicáu al cicloturismu y el turismu activu, un mostrador específicu pa Ciudaes d’Asturies, turismu de negocios, una isla de Cocina de Paisaxe onde se van ufiertar talleres gastronómicos y el citáu túnel dedicáu al turismu industrial.

    La cultura de la sidra va tener presencia estremada como manifiestu del sofitu a la candidatura de la Cultura Sidrera a Patrimoniu Mundial Inmaterial de la UNESCO, con un Rincón Sidreru atendíu pola Asociación d’Escanciadores. Les marques de calidá propies del Principáu -Casones, Aldegues, Meses y Sidreríes d’Asturies- van tar tamién representaes.

  • L’estand d’Asturies en Fitur acoyó unes 350 reuniones profesionales y favoreció 1.784 contactos comerciales

    L’estand d’Asturies en Fitur acoyó unes 350 reuniones profesionales y favoreció 1.784 contactos comerciales

    L’espaciu d’Asturies na Feria Internacional de Turismu (Fitur), premiáu como Meyor estand de comunidaes autónomes y instituciones, acoyó anguaño 343 reuniones profesionales del sector y favoreció 1.784 contactos comerciales.

    Estes cifres reflexen que la decisión d’aumentar la zona espositiva —un 30 % más amplia que l’añu pasáu— llogró bonos resultaos. Tamién influyó nestos rexistros la capacidá d’atracción del propiu estand, dedicáu al turismu de naturaleza y reflexu del apueste del Principáu pol compromisu medioambiental como exa de la competitividá turística.

    La participación d’Asturies na feria tamién tuvo una repercusión importante nos medios de comunicación, reforzada gracies a la realización nel mesmu estand de más d’un centenar d’entrevistes en distintu formatu a representantes institucionales y empresariales del sector turísticu rexonal.

    Pela so parte, los perfiles de Turismu Asturies llograron unes 300.000 visualizaciones nes distintes redes sociales. La retresmisión de presentaciones nel estand tuvo cuasi 13.500 visualizaciones y les fotografíes de los eventos publicaes en redes superaron les 40.000 visites.

    La edición de Fitur, clausurada apocayá, recuperó les presentaciones y actividaes nel espaciu d’Asturies, qu’acoyó una ventena d’actos. Ente otros, destaquen la mesa redonda sobre la cultura sidrera asturiana y l’espaciu temáticu dedicáu a la Cocina de Paisaxe, onde se celebraron diverses demostraciones gastronómiques.

  • Asturies apuesta en FITUR pola candidatura sidrera a patrimoniu mundial inmaterial de la Unesco

    Asturies apuesta en FITUR pola candidatura sidrera a patrimoniu mundial inmaterial de la Unesco

    L’estand del Principáu na Feria Internacional de Turismu (Fitur) allugó güei una mesa redonda sobro la cultura sidrera asturiana, que va ser la candidata que va representar a España en marzu énte la Unesco pa la so inclusión na Llista Representativa del Patrimoniu Mundial Inmaterial.

    El director xeneral de Cultura y Patrimoniu, Pablo León, foi l’encargáu de moderar l’alcuentru, nel que participaron el director de la Cátedra de la Sidra de la Universidá d’Uviéu, Luis Benito García; el presidente de la Denominación d’Orixe Protexida (DOP) Sidra d’Asturies, Guillermo Guisasola; Ana Soberón, representante del Club de Productu Sidraturismo, y Saúl Moro, presidente de l’Asociación d’Escanciadores, en nome de la patronal Otea.

    Mientres l’alderique, Luis Benito García esplicó’l procesu siguíu pa optar a la declaración de patrimoniu mundial y detalló les principales característiques de la cultura sidrera: el so referente simbólicu como parte esencial de la identidá colectiva y d’una cultura con personalidá propia, los elementos que lu integren y les sos distintes manifestaciones.

    Guillermo Guisasola, pela so parte, apurrió información sobro la situación actual de la producción sidrera n’Asturies, y ufiertó datos del universu sidreru, como’l númberu de llagares, los tipos de sidra o los llugares de consumu fuera del Principáu.

    Les intervenciones d’Ana Soberón y Saúl Moro contestualizaron la presencia de la sidra na actividá turística. Asina, la representante de Sidraturismo esplicó la relevancia del caldu rexonal como elementu fundamental nesti sector. Pela so parte, Saúl Moro refirióse al escanciáu, un elementu esclusivu qu’apurre mayor grau de diferenciación.

    Los participantes na mesa redonda coincidieron en valorar la posibilidá de que la cultura sidrera pase a formar parte de la llista de patrimoniu inmaterial, daqué que contribuyiría a espublizar unes práctiques y tradiciones qu’apurrien sostenibilidá al mundu rural autóctonu. Amás, ayudaría a revitalizar les actividaes amestaes a la producción d’esta bébora y a dinamizar el sector, de la qu’impulsaría les actividaes turístiques y hosteleres.

  • Xixón, premiáu en FITUR pol so llabor nel turismu accesible

    Xixón, premiáu en FITUR pol so llabor nel turismu accesible

    La alcaldesa de Gijón/Xixón, Ana González, recibió esta tarde en FITUR un reconocimiento pol llabor realizáu nos años caberos nel desendolcu del turismu accesible. El presidente de Predif, Francisco Sardón, entregó el distintivu a la rexidora con motivu del 25 aniversariu de la so organización y agradeció-y tol trabayu na defensa del drechu al espardimientu de les persones con capacidá.

    Nel actu tamién tuvieron Berta Piñán, conseyera de Cultura, Política Llingüística y Turismu del Principáu d’Asturias, y Daniel Martínez Junquera, direutor de Xixón Turismu.

    “Éste es uno de los premios más importantes que ha recibido la ciudad de Gijón, porque no se puede decir que queremos una ciudad para las personas, una ciudad amigables y una ciudad para estar, y sin tener una ciudad al alcance de las personas”, reconoció l’alcaldesa.

    Xixón Turismu lleva trabayando más de 20 años n’accesibilidad. En 2014 punxo en marcha’l Programa d’Accesibilidá Turística, que buscaba tener información actualizada sobro l’accesibilidá de los recursos y establecimientos turísticos de Xixón; afitar a Xixón como un destín turísticu accesible pa toles persones; y ufrir a los turistes con discapacidá y necesidaes especiales y a les empreses turístiques información detallada sobro’l gráu d’accesibilidá de los establecimientos turísticos de Xixón y ferramientes teunolóxiques que faciliten l’accesibilidá.

    Tola información sobro’l programa, les empreses y la ufierta accesible de Xixón ta en: www.gijon.es/es/turismo/destino-accesible, www.gijonturismoprofesional.es y www.tur4all.com/destinations/gijon-xixon.

    Collaboración con Predif

    Xixón Turismu realizó, tamién en 2014 y en collaboración con Predif, el primer diagnósticu d’accesibilidá d’establecimientos y servicios turísticos de Xixón. Esti diagnósticu repítese cadañu y concédese’l distintivu TUR4all a les empresas qu’amuesen un gráu d’accesibilidá aceptable. Ente les actividaes distinguíes atópense agospios, museos y recursos turísticos, restoranes, tresportes, Teatru Xovellanos, Oficina de Turismu, Playa de Poniente, Palaciu de Congresos.

    Arriendes d’ello, en 2016 desendolcáronse 4 rutes d’interés turísticu accesibles y diseñóse un planu de turismu accesible pa informar sobro esos itinerarios peatonales accesibles. Un añu dempués, diseñáronse 4 esperiencies turístiques accesibles pa esfrutar en Xixón: Gijón sabe a mar; Gijón cultura y naturaleza; Gijón Rural; Gijón Urbano. Son propuestes de turismu accesible que promueven recursos adaptaos: agospios, restauración, paseos y rutes, museos, playa, actividaes d’espardimientu…

  • Asturies amplía’l so espaciu en Fitur

    Asturies amplía’l so espaciu en Fitur

    El Gobiernu d’Asturies va participar na 42 Feria Internacional de Turismu (Fitur) col enfotu de reforzar énte profesionales y visitantes el lideralgu de la comunidá como destín de naturaleza y bienestar, seguro y sostenible. La Cocina de paisaxe y la candidatura de la cultura sidrera a patrimoniu inmaterial de la Unesco van tener tamién el so protagonismu nel estand asturianu.

    La viceconseyera de Turismu, Graciela Blanco, presentó güei los detalles xenerales del espaciu del Gobiernu d’Asturies na feria, que va abrir les sos puertes el miércoles, día 19, y va rematar el domingu 23. L’espaciu crez nesta edición un 30%, hasta algamar 901 metros cuadraos, de cuenta que gana amplitú pal área destinada a los alcuentros profesionales y pa la zona de presentaciones.

    D’acordies col apueste del Principáu pola sostenibilidá y el compromisu medioambiental, l’espositor se construyó y decoró con materiales sostenibles, reciclaos y reciclables. Nel so interior van asocedese más d’una ventena de presentaciones de proyectos, iniciatives y eventos impulsaos por promotores del sector turísticu, tantu públicos como privaos. Ente los actos más destacaos figura la celebración xuna mesa redonda sobro la cultura sidrera y l’esposición de los planes de sosteniblidad turística financiaos con fondos europeos. La gastronomía tamién va ser protagonista, con talleres desenvueltos por embaxadores de Cocina de paisaxe.

    Per otra parte, Asturies va tar presente en dalgunos de los eventos temáticos que s’entamen de forma paralela a la feria, como Fitur MICE, destináu al turismu de xuntes, congresos, eventos ya incentivos pa la contratación especializada nel ámbitu nacional ya internacional. Tres les xornaes dedicaes a profesionales y empreses, mientres la fin de selmana Fitur va abrir les sos puertes al públicu xeneral.

    L’espaciu d’Asturies na feria va ufiertar diverses actividaes d’animación centraes fundamentalmente na gastronomía y realizaes por aciu xuegos y interaccciones colos visitantes

  • Asturies reivindícase en Fitur como la capital quesera

    Asturies reivindícase en Fitur como la capital quesera

    El quesu foi protagonista esti fin de selmana nel estand d’Asturies en Fitur. La rexón va convertise nel 2020 na capital quesera del mundu. La directora xeneral de Desenvolvimientu Rural y Industries Agraries, Begoña López, presentó nel espaciu l’Asturies Paraísu Natural International Cheese Festival. El certame de quesos más importante del mundu va celebrase n’Uviéu del 4 y al 7 de payares.

    El festival acueye como actu central la 33 edición de los World Cheese Awards. El concursu otorga’l premiu al meyor quesu del mundu. Ta previsto que participen más de 3.000 quesos y 300 xueces internacionales encargaos d’escoyer los meyores. Ente les actividaes previstes destaca la celebración del primer congresu científicu del quesu, la participación de restauradores de sonadía o la creación d’un espaciu de fusión de gastronomía y de comedia abiertu al públicu llamáu Gastro Cheese Comedy. Amás, van entamase degustaciones, esperiencies y prebes onde los Alimentos del paraísu van ser los protagonistes.

    El certame, qu’incluye tamién una exhibición de productos, va atrayer a Asturies a críticos y prensa gastronómica, compradores y distribuidores, que van tener la oportunidá de rellacionase de manera directa colos productores y conocer les últimes tendencies de gastronomía y quesu. Begoña López destacó que la cita va impulsar la proyección internacional d’Asturies, xunto a los quesos y la industria agroalimentaria rexonal. Tamién valoró la oportunidá que s’abre pa pa dar a conocer los productos que formen parte de la marca Alimentos del paraísu, vinculaos al territoriu y a parámetros de sostenibilidá, elementos diferenciadores que-yos dan un valor añedíu y son cada vez más apreciaos nun mercáu global.