Xixón al día

Etiqueta: Iniciativa pol Asturianu

  • Iniciativa pol Asturianu demanda mayor presencia del idioma na nueva web del Conceyu de Siero

    Iniciativa pol Asturianu demanda mayor presencia del idioma na nueva web del Conceyu de Siero

    Iniciativa pol Asturianu reclama al Conceyu de Siero qu’aproveche’l remocique de la páxina web municipal pa dotala d’una mayor presencia del asturianu. L’equipu de gobiernu sacó a concursu públicu a finales del añu pasáu’l contratu pa rediseñar el portal web. El conceyal de Facienda y Xestión Económica, Alberto Pajares, anunció’l vienres l’axudicación del contratu.

    La nueva páxina va desendolcase a lo llargo de los próximos siete meses. Por mor d’ello, la organización reclama al Conceyu qu’aproveche’l rediseñu p’ameyorar la presencia del idioma nel portal web, permitiendo d’esta manera visibilizar y normalizar l’asturianu nesta canal de comunicación cola ciudadanía. Nesti sen, l’asociación recuerda que’l conceyu cunta con un Serviciu de Normalización Llingüística en funcionamientu, polo que la torna de los conteníos nun va suponer un encarecimientu del proyectu.

    La organización afala tamién al Conceyu a aprovechar esti procesu pa incorporar la toponimia oficial de Siero en tol portal web, d’alcuerdu colo qu’establez el Decretu 104/2009, de 29 de xunetu, pol que se determinen los topónimos oficiales del conceyu.   

  • Iniciativa pol Asturianu y la Fundación Almastur presenten la Xira pola Oficialidá

    Iniciativa pol Asturianu y la Fundación Almastur presenten la Xira pola Oficialidá

    Iván Llera, presidente d’Iniciativa pol Asturianu, y Carlos Rubiera, presidente de la Fundación Almastur, presentaron esti xueves a los medios la campaña conxunta que van a entamar les dos entidaes baxo’l títulu de ‘Xira pola Oficialidá’.

    Les organizaciones roblaron un conveniu de collaboración pa trabayar conxuntamente n’actividaes rellacionaes cola llingua y la cultura asturiana. Asinamesmo, la primer actividá conxunta que se pretende llevar alantre ye la ‘Xira pola oficialidá’ que consiste nuna movilización cívica que quier percorrer los conceyos d’Asturies nos próximos meses.

    La ‘Xira pola Oficialidá’ quier ser una actividá itinerante nos conceyos asturianos y n’otros territorios d’España; pretendiendo involucrar a la ciudadanía y a les organizaciones con sensibilidá llingüística pa defender el drechu a la oficialidá. La idea del proyectu ye organizar en cada conceyu una selmana d’actividaes con una esposición de bibliografía del idioma (testos normativos y una muestra representativa de la lliteratura de la llingua), amás de charres, proyecciones y diferentes actos reivindicativos. El primer puntu d’entamu de la ‘Xira pola Oficialidá’ va ser Bimenes, por ser ésti un conceyu hestóricu na defensa del idioma.

    Dientro de la rueda de prensa p’anunciar la ‘Xira pola Oficialidá’ y la robla del conveniu de collaboración ente l’asociación de reivindicación llingüística y la fundación, presentóse tamién un manifiestu conxuntu que fundamenta la necesidá d’entamar una movilización ciudadana en defensa de la oficialidá de les llingües d’Asturies y que reclama’l drechu constitucional al reconocimientu de la oficialidá de los idiomes nel Estatutu d’Autonomía.

    La Fundación Almastur, presidida por Carlos Rubiera, tien ente los sos fines l’estudiu, investigación, enseñanza, divulgación, promoción y defensa de la cultura asturiana en tolos sos aspectos y manifestaciones, tanto patrimoniales como de nueva creación.  

  • Iniciativa pol Asturianu urxe al nuevu director d’informativos de RTPA a introducir l’idioma nos Informativos

    Iniciativa pol Asturianu urxe al nuevu director d’informativos de RTPA a introducir l’idioma nos Informativos

    Iniciativa pol Asturianu urxe al recién escoyíu director d’Informativos y deportes de RTPA, Nacho Monserrat, a acelerar el procesu d’incorporación del idioma de forma tresversal nos espacios informativos de la canal pública. El mediu públicu de comunicación tien por mandatu la visibilización de la diversidá llingüística d’Asturies, siendo los ‘TPA Noticies’ un pegoyu fundamental pa esta xera.

    L’ente públicu de comunicación recibió en setiembre’l mandatu de la Xunta Xeneral d’incorporar l’asturianu y l’eonaviego nos sos informativos. Foi nuna resolución aprobada nel últimu alderique d’orientación política a propuesta de Podemos col sofitu de la Federación Socialista Asturiana (FSA-PSOE), Partíu Popular (PP), Asturies pela Izquierda (IX-IAS) y Foro Asturies.

    Iniciativa pol Asturianu considera que l’alcuerdu algamáu de forma mayoritaria na Xunta Xeneral tien que se notar de manera inmediata na programación diaria de RTPA. Nesi sen, ye difícil d’entender que cuatro meses después de l’aprobación d’esa resolución, l’ente públicu inore esti mandatu y nun incluya nin un minutu de conteníu n’asturianu nos nuevos informativos de la Radio del Principáu d’Asturies (RPA) pa los fines de selmana. La emisora pública dedica a lo llargo de la selmana más de tres hores diaries a la información, pero’l porcentaxe de conteníu n’asturianu supón menos d’un 10% d’esi tiempu.

    La entidá recuerda la potente función pa la visibilización y normalización de les llingües propies que tienen los servicios de comunicación públicos. Les llingües d’Asturies nun solo habríen tar presentes nos informativos nos fines de selmana, sinón de manera constante y habitual nos programes informativos de la RPA.

    Pa Iniciativa pol Asturianu, los medios de comunicación tienen un papel central a la hora de revertir l’actual procesu de minorización del asturianu y l’eonaviego, oxetivu qu’agora comparten la mayor parte de les fuercies polítiques representaes na Xunta Xeneral del Principáu d’Asturies. Nesi sen, la organización reclama a la dirección de RTPA qu’apueste definitivamente poles llingües propies y que trabaye pa que los medios de comunicación públicos se conviertan d’una vegada por toes nun axente principal de normalización con una presencia d’estes digna, tresversal y continuada.  

  • Iniciativa pol Asturianu critica l’ausencia de la diversidá llingüística nel especial de Nuechevieya de TVE

    Iniciativa pol Asturianu critica l’ausencia de la diversidá llingüística nel especial de Nuechevieya de TVE

    Televisión Española (TVE) emitió un programa especial pa celebrar la entrada nel nuevu añu 2023. Nesta programación musical nel qu’apaecen diferentes interpretaciones en distintos estilos dicen dende la organización que «solo hubo presencia del castellán; en contraposición cola realidá llingüística del Estáu nel que hai 6 llingües (oficiales o non) que conviven col mesmu (catalán, occitanu aranés, aragonés, euskera, asturianu y gallegu), pero nesi programa solamente tuvo presencia la llingua castelllana».

    Nesti sen, diferentes organizaciones de reivindicación llingüística, ente les que s’alcuentra Iniciativa pol Asturianu, considerens que ye «una total falta de consideración per parte de Radiotelevión Española nun tener en cuenta a les diferentes llingües del Estáu nesti programa. Amás, esa presencia monolingüe xenera una minusvaloración de los diferentes artistes y grupos que faen música (nos sos diferentes estilos) nes llingües distintes al castellán».

    Esta falta de creaciones musicales nes diferentes llingües del Estáu (oficiales o non) supón un emburrión a la realidá multillingüe y multicultural d’España, qu’amás colisioná cola propia Constitución Española que nel so artículu 3.3 afala la diversidá llingüística (“La riqueza de las distintas modalidades lingüísticas de España es un patrimonio cultural que será objeto de especial respeto y protección).

    Inciativa pol Asturianu reclama a RTVE un mayor respetu a la diversidá llingüística y a los y les músiques feches nes diferentes llingües del Estáu y añade que «resulta increíble qu’un ente públicu escuenda de manera deliberada la pluralidá y realidá llingüística d’España».

    Les organizaciones que s’axunten nesti comunicáu van presentar conxuntamente una reclamación a RTVE pa finar con esta discriminación a los nuesos idiomes pa que la televisión pública del Estáu tenga respetu, consideración y sensibilidá pa les llingües del Estáu. Eses organizaciones son A Mesa, Acció Cultural Del País Valencià, Associació Cívica Valenciana Tirant lo Blanc, CIEMEN, Escola Valenciana, Iniciativa pol Asturianu, Kontseilua, Nogará y Plataforma per la Llengua.

  • Iniciativa pol Asturianu vuelve abrir matriculación de cursos d’asturianu

    Iniciativa pol Asturianu vuelve abrir matriculación de cursos d’asturianu

    Iniciativa pol Asturianu abrió esti martes el plazu de matriculación p’apuntase a los nuevos cursos de llingua asturiana (nivel básicu 1 y nivel básicu 2) que van facese a distancia, al traviés d’una plataforma dixital.

    Los cursos van tener una duración de 36 hores llectives y van entamar el llunes 6 de febreru y van acabar a mediaos d’abril. La modalidá a distancia favorez la auto organización del alumnáu y permite-yos dir faciendo les actividaes según l’horariu de caún, de manera mas conveniente.

    El nivel inicial ta empobináu a persones ensin formación d’asturianu o con nivel baxu de conocencia. El nivel II ta empobináu a persones con una conocencia más fonda del idioma, que yá ficieren dalgún cursu enantes. En dambos casos, los estudiantes que lu superen van algamar una acreitación de l’Academia de la Llingua Asturiana.

    El preciu de la matrícula ye de 60 euros. Les persones asociaes a Iniciativa pol Asturianu van beneficiase d’un descuentu y solo tienen qu’abonar 50 euros. Toles persones interesaes pueden asociase nel momentu de la matrícula y disfrutar d’esti descuentu.

    Les inscripciones pal cursu pueden cubrise nun formulariu na propia páxina web d’Iniciativa pol Asturianu, onde tamién s’alcuentren toles condiciones pal mesmu. El plazu d’inscripción acaba’l 3 de febreru.

  • Iniciativa pol Asturianu denuncia una nueva discriminación al reclamar la toponimia oficial nel DNI

    Iniciativa pol Asturianu denuncia una nueva discriminación al reclamar la toponimia oficial nel DNI

    Iniciativa pol Asturianu recibió ayeri la quexa d’un ciudadanu qu’al renovar el so Documentu Nacional d’Identidá na Comisaría de la Policía Nacional d’El Natahoyo, en Xixón, a les 14:50 hores, solicitó la presencia de la toponimia oficial del llugar de residencia (Les Vegues, Corvera). Énte esta solicitú, la funcionaria diz que nun ye posible, que’l sistema namás almite ‘Las Vegas’ na selección de topónimos y que’l topónimu tradicional y oficial (‘Les Vegues’) nun ta codificáu.

    El ciudadanu, suponiendo les posibles dificultaes, yá denunciaes n’otros casos pola nuesa asociación al reclamar l’aplicación de la toponimia oficial, aportó un certificáu del Institutu Nacional d’Estadística y tamién d’empadronamientu col topónimu ‘Les Vegues’.

    Nesi momentu, l’afectáu contacta con Iniciativa pol Asturianu y solicita la rempuesta per escritu de la problemática ya insiste, otra vuelta, na posibilidá de cuntar nel so DNI cola presencia del topónimu oficial lo qu’allarga’l trámite.

    A la fin, por mor de les prises, el ciudadanu tien qu’aceptar el nuevu carné cola toponimia en castellán (‘Las Vegas’). Al colar, intentó presentar una quexa nel espaciu d’información nel que yá nun s’atopaba naide al ser más de les 15:00 hores.

    La organización de reivindicación llingüística recalca que “la toponimia oficial ye Las Vegas / Les Vegues tal como recueye’l Decretu 6/2007, de 31 de xineru, pol que se determinen los topónimos oficiales del conceyu de Corvera d’Asturies. La presencia y usu de los topónimos oficiales de los diferentes conceyos na renovación de los DNI nun puede suponer un perxuiciu pa les persones que llibremente lo reclamen”.

    Tres la problemática del ciudadanu, Iniciativa pol Asturianu presentó delles reclamaciones énte Delegación de Gobiernu y énte’l Defensor del Pueblu desplicando’l casu y reclamó nel escritu l’actualización de les bases de datos pal usu de la toponimia oficial a toles instancies, de manera que les lleis autonómiques seyan respetaes y que nengún ciudadanu seya discrimináu pol usu de los topónimos tradicionales, equiparándose al restu de ciudadanos del conxuntu d’España.

    L’asociación considera que “nesa adaptación a los Decretos de Toponimia de los Conceyos, sería lóxico que los nomes de llugar salgan de forma automática na aplicación informática y nun dependan del pidimientu del ciudadanu pa llevalos n’asturianu, como asocede agora”.

  • Xicu Ilesies, l’afectáu por nun poder poner el so nome n’asturianu, presenta un nuevu escritu en Llaviana

    Xicu Ilesies, l’afectáu por nun poder poner el so nome n’asturianu, presenta un nuevu escritu en Llaviana

    Xicu Ilesies presentóse güei énte la xusticia en Llaviana p’amosar los sos derechos a poner el so nome n’asturianu nos documentos d’identidá oficiales. L’afectáu presentó nueves pruebes a la xusticia xunto colos papeles requeríos pa camudar los datos d’identidá y añedió que «l’arbitrariedá y el caprichu» son les causes poles que nun puede facer el cambiu de nome.

    Esta situación allárgase nel tiempu cuatro años y güei súmase un nuevu capítulu nel que presenta los papeles en Llaviana, depués d’entamar en Llangréu, ser treslladáu al conceyu mentáu y, posteriormente, a Madrid. El procesu pol que’l so nome cambiaba de «Francisco» a «Xicu» foi almitíu en Llaviana, pero non en Madrid.

    Xicu sigue reclamando los sos derechos llingüísticos y cree que «hai un prexuiciu ideolóxicu, llingüísticu y social» pa col asturianu y amuésase «cansáu» nesti procesu llargu y qu’espera que nun dure muncho más.

    Al afectáu acompañáronlo delles entidaes, como Iniciativa pol Asturianu, que dio sofitu dende’l primer momentu y trató d’ayudar a solucionar el problema.

  • Iniciativa pol Asturianu llanza una consulta pal ‘Meyor noticia pal asturianu en 2022’

    Iniciativa pol Asturianu llanza una consulta pal ‘Meyor noticia pal asturianu en 2022’

    Iniciativa pol Asturianu entama esti llunes, 3 de xineru, la votación de la ‘Meyor noticia pal asturianu en 2022’. D’esta manera, la organización pretende escoyer, pente medies d’una votación popular n’internet, la meyor noticia pal idioma nel pasáu añu 2022.

    La organización apuntó que “tamos mui contentos porque esta iniciativa estrenóse nel añu 2013 y cumple 10 años recoyendo bones noticies pal idioma. Cada exerciciu añal que pasa va medrando’l númberu de participantes y la cantidá de noticies positives pal idioma. Tamién val pa facer un repás a tol llabor d’Iniciativa pol Asturianu y pa comprobar cómo añu a añu la llingua asturiana tien una repercusión positiva nos medios”.

    Pa Iniciativa pol Asturianu esta votación ye importante porque “con esta campaña pretendemos facer llegar a la ciudadanía asturiana delles bones noticies pal nuesu idioma. Amás, dende Iniciativa pol Asturianu queremos recoyer lo positivo d’esti 2022 pal asturianu y treslladar que la llingua asturiana sigue ganando presencia nes instituciones y normalidá na sociedá”.

    Los y les participantes pueden escoyer ente un total de 17 bones noticies pal asturianu de diferente tipu d’un total de 33. La votación entama esti llunes 3 de xineru y va acabar el vienres 13 d’esti mes. Amás, los y les participantes van participar nun sortéu d’un llote de llibros n’asturianu.

    Puede participase calcando nesti enllaz.

  • Iniciativa pol Asturianu presenta alegaciones al Decretu de la Rede de Biblioteques Públiques del Principáu d’Asturies

    Iniciativa pol Asturianu presenta alegaciones al Decretu de la Rede de Biblioteques Públiques del Principáu d’Asturies

    Iniciativa pol Asturianu ta acabante de presentar les sos alegaciones al decretu pol que se crea y regula la Rede de Biblioteques Públques del Principáu d’Asturies. Na so alegación, la organización reclama l’usu del nome n’asturianu del ente (Rede de Biblioteques Públiques del Principáu d’Asturies y Rede de Bibliotecas Públicas del Principao d’Asturias utilizando l’eonaviego na so zona) pola visibilidá y el papel normalizador que pueden tener estos espacios pa les llingües propies d’Asturies.

    Nel documentu presentáu al Gobiernu d’Asturies, la organización propón que l’artículu 8 del Decretu que reúne los ‘Principios informadores’ apaeza un puntu concretu que reciba’l títulu de ‘Principiu de compromisu llingüísticu’ nel que se recueya’l papel que tien que xugar esta rede en materia llingüística en consonancia col Estatutu d’Autonomía y la propia Llei 1/1998, de 23 de marzu, d’usu y promoción del bable/asturianu.

    La entidá recuerda tamién na so esposición que, a la hora de tener en cuenta les adhesiones d’entidaes llocales a la Rede, sedría interesante siempres tener en cuenta l’usu de la toponimia oficial nes comunicaciones y na cartelería de la propia Rede de Biblioteques.

    Con carácter xeneral, Iniciativa pol Asturianu considera qu’esta Rede puede cumplir un papel fundamental nes campañes o iniciatives de la Dirección Xeneral de Política Llingüística asina como de la propia Selmana de les Lletres Asturianes. Pudiendo facese dende la propia Rede campañas de promoción del escritor o escritora que tenga’l reconocimientu en cada edición. La Rede Pública de Biblioteques d’Asturies tien un papel fundamental na promoción y visualización de la lliteratura n’asturianu y n’eonaviegu. Ésti puede ser l’entamu d’una acción conxunta de collaboración ente les distintes biblioteques del territoriu, qu’amás va permitir un aforru de costos y de trabayu por mor de l’acción conxunta y la optimización de recursos materiales y personales.

  • Iniciativa pol Asturianu espera que 2023 seya l’añu pa llograr el consensu constitucional pol idioma

    Iniciativa pol Asturianu espera que 2023 seya l’añu pa llograr el consensu constitucional pol idioma

    Ayeri, 6 d’avientu, conmemoróse’l 44 aniversariu d’aprobación de la Constitución Española. Nesti aniversariu, Iniciativa pol Asturianu quixo aprovechar pa facer, un añu más, un llamáu a los partíos políticos asturianos pa llograr l’acuerdu constitucional pal futuru de les llingües d’Asturies.

    Iniciativa pol Asturianu lleva utilizando en diferentes campañes, alcuentros y actos el so lema ‘Oficialidá, el camín constitucional de futuru pal asturianu’ que resume, en definitiva, el valor constitucional de trabayu en defensa de les llingües d’Asturies amparáu pola llei cimera nel sistema xurídicu español. Nesi sen, la organización considera qu’esti añu 2023 que ta a piques d’entamar ye una ocasión perfecta pa llograr el consensu constitucional pol idioma. “El resultáu de les elecciones de 2023 tien que ser el consensu, l’alcuentru y la suma de voluntaes pa llograr salvar l’idioma y da-y el mesmu rangu llegal que’l restu de les llingües d’España” declara la entidá.

    La organización apunta que “44 años depués de l’aprobación de la Carta Magna ye’l momentu de da-y cumplimientu constitucional al artículu 3.2 n’Asturies que significa la declaración d’igualdá pa tola ciudadanía independientemente de la llingua que llibremente quiera utilizar”.

    Iniciativa pol Asturianu recuerda amás que “los valores constitucionales tamién declaren la igualdá ente tolos ciudadanos del Estáu Español, independientemente de la llingua que s’utilice, amás de la non discriminación. Esto ye, en definitiva, garantizar la igualdá de tolos españoles. Si un falante de gallegu quier usar la so llingua en diferentes situaciones, ¿por qué non un asturfalante?”.