Xixón al día

Etiqueta: lliteratura

  • Nieves González Fernández gana’l I Premiu Amparo Pedregal

    Nieves González Fernández gana’l I Premiu Amparo Pedregal

    L’Institutu Asturianu de la Muyer otorgó l’I Premiu Amparo Pedregal al trabayu Apuntes para la compleción de la Historia de la Filosofía Medieval. Las pensadoras omitidas, de Nieves Fernández González. El xuráu escoyó la investigación pola aportación que supón pa la visibilización de les muyeres científiques ya intelectuales, mesmo que pol anováu puntu de vista del trabayu frente al androcentrismu hexemónicu nel ámbitu cultural y académicu.

    El xuráu tuvo formáu pola periodista y escritora María Teresa Álvarez; la catedrática de Filoloxía Inglesa y cofundadora de los estudios de xéneru na Universidá d’Uviéu, Isabel Carrera; la directora de la Unidá d’Igualdá de la Universidá, Paz Menéndez; la llibrera Mónica Iglesias, y l’asesora de coeducación de la dirección xeneral, Paz Menéndez.

    L’Institutu de la Muyer, adscritu a la Dirección Xeneral d’Igualdá, quixo facer públicu’l fallu coincidiendo cola celebración del Día de les Escritores y llueu entamar l’actu d’entrega del galardón, dotáu con 5.000 euros. Esta iniciativa tien como oxetivu reconocer y espublizar obres lliteraries de ficción realices por muyeres, mesmo que trabayos d’investigación con perspectiva de xéneru qu’aporten conocencies para promover la igualdá ente muyeres y homes. D’esta miente, el premiu tien dos categoríes: una dedicada a fomentar la creatividá lliteraria de les muyeres, una llinia que nesta edición quedó erma, y otra, pa espublizar los trabayos d’investigación y afondar na conocencia de les situaciones de desigualdá acomuñaes al xéneru.

    El galardón lleva’l nome de la historiadora de la Universidá d’Uviéu Amparo Pedregal, finada de secute en 2015. Foi titular d’Historia Antigua de la Universidá d’Uviéu, especialista d’asuntos de xéneru y una piedra angular na fundación del Máster de Xéneru y Diversidá de la institución académica. Coles mesmes, promovio l’Asociación Universitaria d’Estudios de la Muyer.

  • TPA cuntará la hestoria de la lliteratura n’asturianu fecha por muyeres

    TPA cuntará la hestoria de la lliteratura n’asturianu fecha por muyeres

    El programa estrénase esti miércoles 18 de payares a les 23:30 hores en TPA con un documental de trés capítulos.

    TPA va emitir un programa documental de trés capítulos nel que se percuerre la hestoria
    de la lliteratura asturiana fecha por muyeres a lo llargo de la hestoria. L’espaciu “Elles,
    muyeres na lliteratura asturiana”, va emitise los miércoles n’horariu de nueche.
    Esti espaciu divulgativu pensáu pa dar a conocer a les muyeres escritores n’asturianu y
    gallego-asturianu visita los llugares nos que vivieron y crearon estes escritores, recreando
    les vides de dalgunes d’elles, con actrices que dramaticen les sos vivencies.
    El programa-documental, realizáu por Cuatro Gotes Producciones, ta presentáu pola
    periodista Sonia Avellanada, con guión y dirección del periodista y Doctor n’Humanidaes
    Inaciu Galán, cunta col asesoramientu de les escritores y estudioses de la lliteratura
    asturiana Marta Mori, profesora de la Universidá d’Uviéu, Esther Prieto, editora, y María
    Esther García, presidenta de l’Asociación d’Escritores d’Asturies.
    La serie dixébrase en trés capítulos plantegaos n’orde cronolóxicu y caún d’ellos arranca
    cola presentadora nos llugares onde vivieron les autores, n’espacios rellacionaos con
    elles, introduciendo la cuestión como si d’una investigación se tratara y como un viaxe
    alredor d’Asturies.
    Más de mediu centenar d’investigadores y escritores participen col so testimoniu nesti
    documental, cuntando les característiques de cada autora, la novedá y la importancia de
    la so obra.

    Nel primer capítulu, dedicáu, a les pioneres de la lliteratura asturiana, fálase de les autores del sieglu XVIII y XIX: Xosefa Xovellanos y Taresa Cónsul (XVIII) y Enriqueta
    González Rubín y Matilde de Soingie (XIX), destacando en Xovellanos la importancia de
    la so obra, como primer muyer qu’escribe n’asturianu y la misteriosa hestoria d’Enriqueta
    González Rubín, qu’inaugura la novela n’asturianu y de la que nun llegó nenguna semeya,
    asina como’l misteriu de la desapaición del so llibru El viaxe del tíu Pacho el Sordu a
    Uviedo, redescubiertu en 2008.
    El segundu capítulu céntrase yá nes autores del sieglu XX, hasta l’apaición del
    Surdimientu y el cambiu de paradigma que supón nos años setenta. Setenta años nos
    que tenemos una amuesa muncho mayor d’autores, que vivieron momentos mui
    estremaos, los años trenta, la Guerra, l’exiliu o la dictadura franquista.
    El tercer capítulu dedícase a la obres de les autores contemporánees y la so visión del
    presente y el futuru de la lliteratura asturiana. Nesti capítulu va poder sentise la voz
    d’autores de xeneraciones tan estremaes como Sabel de Fausta o Laura Marcos,
    pasando per Lourdes Álvarez o Berta Piñán, ente munches otres.

  • ‘Hasta aquí hemos llegado’, de Antonio Fontana, Premiu Café Xixón 2020

    ‘Hasta aquí hemos llegado’, de Antonio Fontana, Premiu Café Xixón 2020

    La novela Hasta aquí hemos llegado, de Antonio Fontana (Málaga, 1964) resultó ganadora de la edición d’anguaño del Premiu Café Xixón. El gallardón convoca’l Conceyu de Xixón con una dotación de 20.000 euros. Fontana yá fuera finalista nesti mesmu premiu en 2003 con El perdón de los pecaos.

    Aconceyáu, per primer vegada telemáticamente, el xuráu compuestu por Mercedes Monmany, Rosa Regàs, Antonio Colinas, Marcos Giralt Torrente y José María Guelbenzu, en calidá de presidente, decidió conceder el galardón a la novela por dos cualidaes fundamentales: «La primera ye que se trata d’una visión tan sutil como insólita de la ancianidad; la segunda, el riesgu qu’asumió l’autor al crear un conxuntu de voces bien caracterizaes, que ruempen colos estereotipos que más circulen na nuesa sociedá y dan una perspectiva complexa, dinámica y tragicómica de dicha etapa vital».

    La hestoria d’Hasta aquí hemos llegado céntrase nun grupu de vieyes que conviven na residencia Peña Hincada, allugada nun llugar indetermináu de la provincia de Málaga. Son muyeres a les que’l tiempu váse-yos en rumiar les sos obsesiones y remembrar les vides que dexaron tras. Elles, feministes ensin sabelo, tracen una semeya despiadada de los homes, con grandes dosis d’incorreición y, sobremanera, d’humor negro, nesti modernu Decamerón nel qu’una de les residentes sume y otra empéñase en topar el so cadabre.

    Autor de cinco noveles

    Fontana ye autor de cinco noveles: Sol poniente (Premio Málaga 2017), Hostal Parisien, Planu detalláu del infiernu, El perdón de los pecaos y De home a home. Llicenciáu en Periodismu, la so trayectoria profesional tuvo amestada al diariu ABC mientres trenta años, diecinueve d’ellos como coordinador de llibros nel suplementu ABC Cultural.

    El Premiu de Novela Café Xixón, que convoca’l Conceyu de Xixón, tien una dotación de 20.000 euros. Dende 2007 Ediciones Siruela publica les obres ganadores del certame. Ente la so nómina de ganadores figuren nomes como César González-Ruano, Ana María Matute, Carmen Martín Gaite y Luis Mateo Díez. José Morella foi’l ganador del añu pasáu cola so novela West End, que va tar presente nesta edición de la Feria de Llibru de Xixón.

  • Alberto Vázquez gana’l XII premiu Alfonso Iglesias de Cómic n’asturianu con ‘El sol na escombrera’

    Alberto Vázquez gana’l XII premiu Alfonso Iglesias de Cómic n’asturianu con ‘El sol na escombrera’

    La obra El sol na escombrera, del creador Alberto Vázquez, consiguió’l Premiu Alfonso Iglesias de Cómic en llingua asturiana d’anguaño, falláu n’Uviéu. El dibuxante mierense yá llograra’l galardón na so novena edición col títulu Los llazos coloraos. El xuráu, que valoró «la variedá y l’interés» de tolos trabayos presentaos, destaca «l’enfoque realista y la propuesta sobria» de la obra ganadora, que narra la vida de José Fernández Sánchez, un neñu asturianu de la guerra, «una tema bien poca tratáu nes artes visuales», según puntualiza l’acta de la deliberación. El fallu señala tamién la calidá de «un estilu de dibuxu característicu y personal, yá consolidáu», y la brillosa ellaboración d’una obra envuelta nun tonu de señardá que reflexa a la perfección el de les memories del protagonista».

    Alberto Vázquez (Mieres, 1969) ye un artista gráficu, dibuxante, cortometrista y documentalista, autor d’obra tan reconocida como la mentada Los llazos coloraos, y los documentales 1962. La lluz que vieno del corazón, 1965. Asaltu a la comisaría de Mieres o 1934-1935. Diez asturianos nel exiliu francés. Vázquez ye tamién autor de numberoses tires risibles en medios periodísticos asturianos.

    El xuráu del premiu, que ta dotáu con 5.000 euros, tuvo presidíu pol director xeneral de Política Llingüística, Antón García, y formáu pola escritora Mariluz Pontón, la profesora Tamara Collar, la dibuxante Raquel Lagartos, la historiadora del arte Mercedes Menéndez, el ceador Ruma Barbero, ganador de la última edición del galardón, y Juncal García, qu’actuó como secretaria.

  • Xixón tresllada a la rede la celebración del Día del Llibru

    Xixón tresllada a la rede la celebración del Día del Llibru

    Xixón va celebrar el Día Internacional del Llibru de forma virtual na páxina web ‘Xixón queda en casa’. El xueves, 23 d’abril, el conteníu del portal va xirar en redol d’esta efeméride con diverses propuestes y actividaes. Sol lema Xixón, de llibru, el Conceyu llanza esta iniciativa pa fomentar la llectura y reconocer el papel de les llibreríes como axentes imprescindibles del sector cultural. D’esta miente, quier eponderase’l so llabor nel espardimientu de la cultura y la so contribución al texíu social local.

    Con estos oxetivos definíos, la web va cuntar esi día con una sección denominada ‘Un llibru nun minutu’. Nella, llibreros xixoneses van encamentar una llectura al traviés de dellos vídeos. Pel momento, yá se sumaron a l’acción una docena de llibreríes. Coles mesmes, ‘Xixón quédase en casa’ va recoyer el trabayu de la Rede Municipal de Biblioteques. Ellaboraron dos guíes de llectura na plataforma E-Biblio con accesu a dellos títulos, una infantil y otra para adultos qu’inclúi, a manera d’homenaxe, dos llibros del apocayá fináu Luis Sepúlveda.

    L’alcuentru dixital con Alfonso Zapico va poner fin al Día Internacional del Llibru. Va tar moderáu por Diego González, responsable de la llibrería Identidad Secreta. Va tener llugar a les 19.30 hores d’esi mesmu xueves nel perfil de la Rede Municipal de Biblioteques de Xixón n’Instagram. El dibuxante asturianu, ganador del Premiu Nacional de Cómic, va falar, ente otres temes, del cuartu y últimu tomu de la so obra La Balada del norte que ta preparando mientres el confinamientu. Esta novela gráfica céntrase na Revolución de 1934. Esti va ser el primeru d’una serie d’alcuentros dixitales con otros autores, que van tener continuidá a partir de la próxima, tamién al traviés d’Instagram a la mesma hora, a les 19:30 hores. Yá confirmaron la so participación Elvira Lindo (28 d’abril), Ricardo Menéndez Salmón (30 d’abril), Marta Sanz (7 de mayu) y Eloy Tizón (15 de mayu).

  • Gonzalo G. Barreñada, premiu Xuan María Acebal de poesía n’asturianu

    Gonzalo G. Barreñada, premiu Xuan María Acebal de poesía n’asturianu

    La ventésima quinta edición del Premiu Xuan María Acebal de poesía n’asturianu recayó nel escritor Gonzalo González Barreñada. El premiu, que concede la Conseyería de Cultura, Política Llingüística y Turismu, tien una dotación de 5.000 euros. D’otra manera, el Premiu María Josefa Canellada de lliteratura infantil y xuvenil en llingua asturiana foi declaráu ermu na so decimosegunda edición, al considerar el xuráu “que nenguna de les obres presentaes axunta nel so conxuntu la calidá lliteraria y llingüística necesaria pa llograr el galardón”, según consta nel acta.

    Polo que se refier al Premiu Xuan María Acebal, el xuráu encargáu de valorar les nueve obres finalistes tuvo presidíu pol director xeneral de Política Llingüística, Antón García Fernández, y integráronlu los escritores Pablo Texón Castañón, Marta Mori de Arriba y Laura Marcos Domínguez. A esti gallardón podíen presentase poemarios de tema, xéneru y estructura llibres escritos en llingua asturiana con una estensión mínima de quinientos versos, siempre que fueren inéditos y non premiaos n’otros concursos.

    Ente les obres presentaes, el xuráu decidió conceder el premiu al poemariu tituláu El llar n’orde destacando “la singularidá de la voz poética que recrea con emoción el paisax natural y humanu n’Asturies con una llingua qu’esplora les posibilidaes del versu llargo averándose a la prosa”. La obra presentóse col seudónimu M.R Beyle. Abierta la plica, l’autor ganador resultó ser  Gonzalo González Barreñada.

    Gonzalo González Barreñada (Sotrondio, 1973), llicenciáu en Xeografía y Historia, ye poeta y narrador en llingua asturiana que se recueye na revista Campo de los Patos y nes obres titulaes: Biografíes, La casa de Xuan Buelga, Hestories de Burgundu y El pesu de la lluz, publicada esti añu.

  • La Selmana Negra vuelve a Xixón

    La Selmana Negra vuelve a Xixón

    Vuelve la Selmana Negra. Del 5 al 14 de xunetu los terrenos del antiguu astilleru Naval Xixón van ser de nuevu la sede del festival lliterariu, cultural, reivindicativu y popular más llonxevu d’España. El cartelu d’esta edición ye obra del dibuxante español Víctor Blanco, conocíu internacionalmente poles sos obres nel cómic con títulos tan significativos como Polar o Filthy Rich.

    [Consulta’l programa completu d’actividaes de la XXXII Selmana Negra]

    Más de cientu venti escritores confirmaron la so participación nes distintes actividaes programaes. Nesta edición destaca la interesante presencia d’autores en llingua inglesa. Tres venti años d’espera vien l’irlandés John Connolly, unos de los maestros mundiales del xéneru negru. Otros recién llegaos al públicu español como Steve Cavanagh, especialista en thrillers llegales, Joseph Knox que col so opera prima Serenes convertir n’una revelación para la crítica lliteraria y Anthony Horowitz, unu de los grandes de la lliteratura xuvenil inglesa amás de ser guionista de series de televisión.

    L’humor y la risa vienen de la mano de Edu Galán y Darío Adanti, los componentes más destacaos de la revista Mongolia. Van presentar La Biblia negra de Mongolia y de Marta Flich, que lo fadrá con Necroeconomía. La poesía tamién tien el so llugar nel festival al traviés de les velaes nocherniegues del sábadu 6 protagonizada por Carlos Salem y de un llargu plantel de poetes: Escandar Algeet, María Nieto, Pablo Cortina y Carolina Sarmiento y la del día 13 conducida por Luis García Montero con Luisa Castro, Martín López Vega, Angels Gregori, Xuan Bello y Kirmen Uribe.

  • La Feria del Llibru de Xixón toma Begoña

    La Feria del Llibru de Xixón toma Begoña

    La lliteratura garra protagonismu en Xixón. Esti xueves entama la tercer edición de la Feria del Llibru de Xixón, FeLiX19, que va tener llugar hasta’l domingu nel Paséu de Begoña y va cuntar cola participación d’un total de 24 llibreríes y 24 editoriales. La programación de la feria inclúi alcuentros poéticos, cuentacuentos, talleres y actividaes d’animación a la llectura, un ciclu de cine. Va proyectase’l documental ‘Exlibris: The New York Public Library’, un concursu de rap y hip-hop y la yincana ‘Los primeros tributos del Panem’, en redol a la saga ‘Los juegos del hambre’. Va entregase tamién el premiu de Fomentu de la llectura a Nieves Concostrina, y va homenaxase al escritor José Antonio Mases.

    En total van ser alredor de 70 actividaes les que se van celebrar en Begoña. La Escuela de Comerciu va acoyer delles, como’l ciclu de cine realizáu en collaboración col Festival Internacional de Cine de Xixón. La Rede de Biblioteques Municipales de Xixón va cuntar con estand propiu onde se va facilitar información a los visitantes sobro les distintes actividaes de la feria y la so actividá.

    Les biblioteques municipales entamen talleres infantiles Flipbooks, de creación de llibros animaos

    La programación d’esti eventu abrirá’l día 13 de xunu a les 12:30 hores cola presentación oficial de Palabras Mayores. Trátase d’un nuevu serviciu que busca promover l’avieyamientu activu y atender a les demandes d’información y ociu de les persones mayores. Esti programa va poner en marcha’l serviciu ‘La biblioteca en casa‘, de préstamu a casa pa usuarios de teleasistencia. Tamién ‘Salimos al to alcuentru‘, con actividaes culturales y d’animación a la llectura pa usuarios de los centros municipales de persones mayores.

    Les biblioteques municipales entamen talleres infantiles Flipbooks, de creación de llibros animaos. Los neños que participen van crear les sos propies hestories animaes sobro papel, xenerando la ilusión de movimientu por aciu la combinación d’imaxes fixes. Ye necesaria inscripción previa hasta’l miércoles 12 en caxeros ciudadanos, oficines d’atención a la ciudadanía, la páxina web xixon.es, app igijon o presencialmente una hora antes del entamu de l’actividá. Sesiones gratuites de 12 places en caúna d’elles. Amás, l’estand de la rede de biblioteques va acoyer una esposición coles meyores fotografíes de les últimes ediciones del concursu xuvenil Xixón Lleendo.

    Consulta equí’l programa completu d’actividaes de la Feria del Llibru de Xixón [PDF]

  • Convocaos los premios lliterarios y de teatru profesional n’asturianu

    Convocaos los premios lliterarios y de teatru profesional n’asturianu

    El Boletín Oficial del Principáu d’Asturies (BOPA) acaba de publicar la convocatoria de los premios lliterarios n’asturianu que promueve la Conseyería d’Educación y Cultura: ‘Xosefa Xovellanos’ de novela, na so cuarentena edición; ‘Xuan María Acebal’ de poesía, na so ventésima quinta edición; ‘Máximo Fuertes Acevedo’ d’ensayu, na so ventésima quinta edición; ‘María Josefa Canellada’ de lliteratura infantil y xuvenil, na so decima segunda edición; y ‘Alfonso Iglesias’ de cómic, na so decimoprimer edición.

    Estos premios, qu’ayuden a potenciar, consolidar y arriquecer la creatividá de la llingua asturiana nel ámbitu lliterariu, aumentaron la dotación a 5.000 euros nesta edición. El plazu de presentación d’orixinales acaba’l 2 de setiembre nel casu del premiu ‘Alfonso Iglesias’ de cómic y el 16 de setiembre nos demás concursos lliterarios.

    Los finalistes d’esti gallardón van participar nel III Festival de Teatru ‘Nel Amaro’, que se va celebrar en payares n’Uviéu

    Nel BOPA del llunes 3 de xunu tamién se publicó la convocatoria de la tercer edición del Premiu ‘Nel Amaro’ de teatru profesional n’asturianu o gallego-asturianu, dotáu con 6.000 euros, pa propuestes teatrales yá estrenaes y representaes en cualquiera d’estes dos llingües, tanto obres orixinales como versiones o adaptaciones d’otros títulos.

    El plazu de presentación acaba’l 3 de xunetu del 2019. Los finalistes d’esti gallardón van participar nel III Festival de Teatru ‘Nel Amaro’, que se va celebrar nel Teatru Filarmónica d’Uviéu los díes 8, 15, 22 y 29 de payares, y onde se van defender enriba l’escenariu les obres teatrales qu’opten al premiu.

    Amás, con fecha de 28 de mayu, convocáronse subvenciones a empreses editoriales pa la promoción del llibru n’asturianu o gallego-asturianu. Trátase d’ayudes económiques pa la edición de llibros orixinales o traducíos que pola so calidá y interés ayuden a la normalización social de la llingua y l’arriquecimientu de los sos fondos bibliográficos. La cuantía total d’esta llinia d’ayudes ye de 100.000 euros, cantidá qu’aumentó al respective del añu anterior. El plazu de presentación de proyectos subvencionables remata’l 26 de xunu.

  • Trabe inaugura n’Uviéu una llibrería especializada en lliteratura asturiana

    Trabe inaugura n’Uviéu una llibrería especializada en lliteratura asturiana

    Ediciones Trabe pon llibrería otra vuelta. «Préstanos enforma davos esta noticia y dar al mundu del llibru asturianu y a la sociedá asturiana en xeneral una allegría y una nota d’optimismu: ye posible vivir y trabayar n’Asturies y n’asturianu, ensin aspavientos, pasín a pasu, col llabor diariu y con esperanza, con enfotu», afirma la editorial nuna nota na so páxina web.

    El nuevu espaciu inaugúrase güei de magar les 20 hores na cai Fernando Alonso, 17 – Baxu d’Uviéu. «Depués d’años de crisis y resistencia, Ediciones Trabe reabre la so llibrería, especializada en lliteratura asturiana, d’Asturies y sobre Asturies».

    Depués del pieslle de les hestóriques Alborá Llibros en Xixón, Paraxuga n’Uviéu, y otres esperiencies con menos percorríu pero tamién destacables como la Llibrería Seronda n’Avilés, Llibrería Ítaca en Xixón, o la propia d’Ediciones Trabe nel barriu de Pumarín, n’Uviéu, Asturies torna a cuntar con una llibrería especializada en llibru n’asturianu.