Etiqueta: Mocedá

Xixón presenta una nueva edición d’Esparciendo Cultura

L’Ayuntamientu de Xixón promueve una nueva edición d’Espardiendo Cultura, el programa d’ociu cultural y educativu pa neños y neñes del Departamentu d’Educación de la Fundación Municipal de Cultura, Educación y Universidá Popular.

L’oxetivu del programa Espardiendo Cultura ye averar la cultura a los barrios al traviés del ociu, facilitando a les families l’accesu a les distintes actividaes previstes y dando a conocer los más pequenos los equipamientos públicos disponibles.

Pa ello, ente los meses d’abril y xunu van ufiertase 20 talleres y 4 espectáculos, con un total de 1.146 places, que van tratar sobre distintes temátiques como la improvisación, la maxa, la danza, la ciencia, etc.

Nel actu de presentación, celebrao esta mañana nel Salón de Recepciones, participó la concejala d’Educación, Natalia González Peláez, que señaló que se trata d’una iniciativa enmarcada nel programa Corresponsables del Ministeriu d’Igualdá que busca tamién favorecer la conciliación familiar. Poro, van desenvolvese coles mesmes seis ediciones distintes d’un campus multidisciplinar mientres les vacaciones escolares de Selmana Santa.

Pela so parte, el xefe de división d’Educación, Mocedá y Universidá Popular, Marcos Xuez Tárano, indicó que, con este mesmu fin, los sábados tamién se van programar espectáculos familiares, por casu, teatru o cuentacuentos. Les actividaes, concluyó, son gratuites y tán dirixíes a neños y neñes d’ente 3 y 12 años.

21/03/2023
Asturies va sovencionar el llogru del carné de conducir a la mocedá pa qu’ameyoren les sos oportunidaes llaborales

La conseyera de Presidencia, Rita Camblor, esplicó delles midíes que va poner en marcha’l so departamentu pa impulsar les polítiques de mocedá. Ente otres iniciatives, el Gobiernu d’Asturies va conceder subvenciones pal llogru del permisu de conducir y va anovar el carné mozu, que va incluyir más prestaciones. Amás, va amontar la cuantía de les beques empobinaes al asociacionismu y a la espresión artística.

Camblor, que visitó l’amuesa ODA del artista Adrián Prada en la sala Borrón, informó que les cuentes d’Asturies p’anguaño destinen 100.000 euros a sovencionar parte de los gastos que supon el llogru del permisu de conducir. L’oxetivu, destacó, ye “ameyorar la empleabilidá de la mocedá”. La posesión del carné ye un requisitu frecuente nes ufiertes llaborales.

Nesta mesma llinia, la conseyera avanzó que la convocatoria d’ayudes destinada a entidaes xuveniles va incluyir 20.000 euros p’ameyorar equipamientos.

Pel so llau, el carné mozu va anovar tanto la so imaxe como les sos prestaciones, D’equí p’arriba, va llograse con una tramitación más senciella y de forma gratuita. “Tamién tamos trabayando pa que esti documentu dexe l’accesu gratuitu o en condiciones bien ventaxoses a servicios culturales, deportivos, d’ociu o de movilidá”, manifestó la conseyera.

06/02/2023
Servicios Sociales pon en marcha una escuela de teatru pa promocionar la salú

L’Ayuntamientu de Xixón, al traviés de la área División de Promoción, Igualdá y Participación Social de la Fundación Municipal de Servicios Sociales, va poner en marcha una escuela de teatru pa promover vezos saludables en menores d’ente 6 y 16 años y favorecer la conciliación familiar.

Nesi sentíu, esta propuesta participativa y d’aprendizaxe activu va desenvolvese les tardes de los vienres y los sábados nel Centru Municipal Integráu d’El Llanu, onde amás d’encetar conteníos rellacionaos cola salú, va tratase cuestiones como la construcción del xéneru, el bon tratu a la infancia como modelu preventivu de conductes disruptivas o factores de riesgu énte’l consumu de sustancies.

Van entamase dos grupos de trabayu estremaos por edaes: unu de 6 a 12 años los vienres de 17.00 a 19.00 hores, y otru grupu de 12 a 16 años los sábados de 11.00 a 13.00 hores, respetando la inclusión de criterios de equidad con places asignaes a neñes y neños que presenten indicadores de vulnerabilidá, con dalgún tipu de discapacidá o pertenecientes a minoríes culturales.

La Escuela de Teatru va empezar esti vienres, 27 de xineru, como una actividá enmarcada dientro de les acciones municipales del Plan Corresponsable 2022 del Ministeriu d’Igualdá. Les persones interesaes pueden inscribise al traviés de la web del Ayuntamientu ensin fecha llende yá que pueden dise incorporando na midida na qu’haiga places llibres de les 40 disponibles.

26/01/2023
Servicios Sociales presenta una guía didáctica pa prevenir adicciones na mocedá

L’Ayuntamientu de Xixón, al traviés de la Fundación Municipal de Servicios Sociales, presentó una guía didáctica pa la promoción de la salú y la prevención d’adicciones ena mocedá.

Trátase d’una ferramienta de trabayu pa que les y los profesionales de les entidaes sociales que trabayen cola población xuvenil y que participen nel proyectu (Mar de Niebla, Fundación Siloé, Asociación Centro Trama, Asociación Cuantaya, Cáritas Diocesanes d’Asturies Llugarín, Escuela de Segunda Oportunidá, Secretariáu Xitanu y Centru d’Iniciativa Solidaria y Empléu CISE) puedan encetar conductes específiques.

La guía cumple con trés oxetivos fitos pal so desenvolvimientu:

-Incorporar la perspectiva de xéneru como un factor determinante de la salú na práctica profesional pa favorecer la detección de dificultaes y les respuestes preventives al traviés d’acciones formatives empobinaes a profesionales del tercer sector y de los servicios sociales que trabayen con población xuvenil.

-Impulsar l’aprendizaxe sobre prevención d’adicciones y la promoción de la salú aumentando la percepción de riesgu con talleres qu’inclúin formación en prevención d’adicciones.

-Impulsar el trabayu en rede ente l’alministración y axentes sociales que desenvuelven el so llabor por aciu l’espardimientu del productu resultante de los talleres.

Ta estructurada nuna parte teórica como sofitu pa les persones que quieran poner en práctica los sos conteníos, y n’otra parte práctica con cinco talleres formativos y el so desenvolvimientu de sesiones de dos hores de duración.

La guía enmárcase dientro del proyectu La Bona Fiesta, que forma parte del Plan Municipal d’Adicciones 2019-2024, que’l so oxetivu ye sensibilizar a grupos de mozos que presenten o pueden presentar una mayor esposición a factores de riesgu énte’l consumu de sustances al traviés d’un procesu formativu qu’incorpora la participación y l’aprendizaxe activu como exe de la so actuación y qu’inclúi la perspectiva de xéneru nel so desenvolvimientu. Surde como resultancia y continuidá de la evaluación y analís de les resultancies del proyectu del añu pasáu desenvueltu cola entidá Mar de Niebla.

24/01/2023
Asturies y los colexos de l’abogacía d’Uviéu y Xixón entamen un cursu pa emprestar asesoría llegal a les persones LGTBI

La Conseyería de Presidencia, xuntu col Colexu d’Abogaos d’Uviéu y el Colexu de l’Abogacía de Xixón, programó pa mañana y pasáu les primeres xornaes formatives destinaes a profesionales del derechu que quieran emprestar asesoramientu xurídicu a persones LGTBI. Un total de 270 persones inscribiéronse nel cursu p’ameyorar les sos competencies nesti ámbitu, col fin d’ufiertar orientación a esti colectivu, por casu, pa denunciar supuestos casos de discriminación, delitos d’odiu y agresiones rellacionaes cola so identidá.

El cursu, de 12 hores de duración, va ser gratuitu pa colexaos y colexaes d’Uviéu y de Xixón y va ser oxetu de certificación como formación especializada.

Los conteníos tomen temes como la protección de datos, los derechos fundamentales de les persones, l’accesu al mercáu llaboral, la identidá sexual, la comisión de delitos d’odiu y la protección de les sos víctimes, les violaciones de derechos rellacionaes col usu de les nueves tecnoloxíes, delitos nel ámbitu familiar, prestaciones sanitaries, derechu de familia o l’internamientu n’instituciones de persones LGTBI.

El programa, que se va repitir dacuando, pretende formar nesta materia a un plantel de profesionales que va constituyir el núcleu d’una futura collaboración ente’l Principáu y los dos colexos, empuesta a emprestar un serviciu gratuitu d’asesoría, siquier na primer consulta, que se va establecer al traviés d’un númberu de teléfonu de la llínea 900.

La conseyera de Presidencia, Rita Camblor, presentó güei en rueda de prensa estos cursos xuntu col presidente del Colexu de l’Abogacía de Xixón, Benigno Villarejo; la vicedecana del Colexu d’Abogaos d’Uviéu, María Escanciano, y el director xeneral de Mocedá, Diversidá Sexual y Derechos LGTBI, Marcos Torre.

Camblor aseguró que’l Gobiernu d’Asturies demostró a lo llargo d’esta llexislatura’l so compromisu coles persones LGTBI. “Hemos puestos en marcha midíes pioneres, como la creación del Observatoriu contra la LGTBIfobia, el teléfonu d’asistencia a víctimes o’l proyectu de Llei de Garantía de los Derechos y Llibertaes de les Persones LGTBI y les sos Families”, detalló.

“Asturies ye una tierra tolerante, respetuosa y comprometida colos derechos de toles sos persones. Güei damos un pasu más, avanzando escontra esa igualdá de toles persones, en contra de la discriminación por orientación o identidá sexual, cola puesta marcha d’esti serviciu”, amestó la titular de Presidencia.

A xuiciu de la conseyera, el compromisu d’Asturies cola erradicación de la LGTBIfobia y cola total llibertá por que cada persona desenvuelva la so sexualidá ensin torgues “tien de tomar tolos aspeutos de la vida y afitar derechos en múltiples aspeutos: educación, sanidá, trabayu, ociu, deporte”. “Toos ellos van quedar reforzaos pola Llei de Garantía de los Derechos y Llibertaes de les persones LGTBI y les sos families”, esplicó.

23/11/2022
La mocedá pedalea en Xixón

Más de 1000 alumnos y alumnes de Primaria y Secundaria van percorrer la ciudá en bici mientres el día de güei, dientro de una de les munches actividaes complementaries pa centros educativos qu’entama cada cursu la FMCEyUP.

Per tercer cursu consecutivu van participar nesta actividá de conocencia de la redolada en bicicleta más de 1000 alumnos y alumnes de 42 aules de distintos centros educativos Primaria y Secundaria. Esta selmana los grupos de 5º y 6º del Colexu Públicu Begoña van circular per Xixón aprovechando la rede de carriles bici, ciclocarriles y otres cais de tráficu sele. L’actividá compaxínase con un trabayu interdisciplinar: xeografía, hestoria, educación física y la vial, de cuenta qu’al traviés de distintes paraes estúdiense aspeutos rellacionaos cola crecedera y los cambeos de la ciudá; la hestoria de los sos distintos barrios y les persones que los habiten; la movilidá sostenible y l’espaciu y los servicios públicos.

Tamién pretende contribuyise de manera activa a llograr una ciudá y unes redolaes escolares más accesibles, seguros y saludable Una forma distinta de conocer meyor la ciudá y afayala con nuevos itinerarios alloñaos de los que-yos resulten más habituales

19/10/2022
Asturies va recibir más de 60 millones del Plan Estatal de Vivienda y el bonu alquiler xoven

Asturies va recibir 60.819.000 euros procedentes de los fondos del Plan Estatal para l’Accesu a la Vivienda 2022-2025 y pal bonu alquiler xoven. D’esta cifra, 13,2 millones van dir empobinaos a facilitar l’arrendamientu per parte de la población nueva y 47,6 van destinase a favorecer l’accesu a un pisu de los sectores de la población con menos recursos.

Esta repartida foi ratificada güei na xunta telemática de la Conferencia Sectorial de Vivienda y Suelu, presidida pola ministra de Tresportes, Raquel Sánchez, y na que participó la conseyera de Derechos Sociales y Bienestar, Melania Álvarez. Primeramente, el 2 de febreru, el ministeriu y les comunidaes suscribieron un prealcuerdu sobre la distribución territorial de los 1.843 millones n’ayudes financieres con que se dotaron dambos programes.

El bonu xoven al arriendu preve una ayuda de 250 euros mensuales mientres dos años pa persones de 18 a 35 años. Pa beneficiase d’esta subvención, los solicitantes tendrán de cuntar con un contratu d’arriendu y otru de trabayu que nun implique una renta cimera a trés vegaes l’Indicador Públicu de Renta d’Efectos Múltiples (Iprem), lo que supon unos ingresos añales de 24.318,84 euros.

Amás, la llende del preciu del arriendu va ser de 600 euros, nel casu de los pisos, y de 300 p’habitaciones.

Polo que se refier Plan Estatal pal Accesu a la Vivienda 2022-2025, dalgunos de los sos oxetivos al curtiu plazu n’Asturies son los siguientes:

– Facilitar l’accesu a la vivienda d’arriendu a les persones con menos recursos por aciu ayudes directes.

– Favorecer l’accesu a la vivienda o a soluciones habitacionales lo más inmediates posibles a víctimes de violencia, persones ensin llar y aquelles especialmente vulnerables.

– Collaborar colos oxetivos del retu demográficu por aciu ayudes a moces pa l’alquisición de vivienda habitual y permanente en conceyos o localidaes con menos de 10.000 habitantes.

Como propósitos al mediu plazu destaquen los siguientes:

– Amontar la ufierta de vivienda n’arriendu algamadizu pa persones mayores o con discapacidá, por aciu ayudes a la promoción d’edificaciones con diseñu, instalaciones y servicios que respuendan a les sos especiales circunstancies.

– Facilitar la rehabilitación y accesibilidá de les viviendes de propietarios privaos, por aciu ayudes pa la instalaciones d’ascensores o la reforma interior, col fin d’afaeles a les persones con movilidá amenorgada.

10/03/2022
La Oficina de Mocedá de Xixón organiza 12 talleres de recursos complementarios pal trabayu con mozos
La Oficina de Mocedá de Xixón/Xixón a lo llargo d’esti añu entama 12 talleres pa dotar de ferramientes útiles nel trabayu directu con adolescencia y mocedá, pensando sobre manera nel ámbitu del tiempu llibre, pero teniendo en cuenta qu’estes conocencies pueden aplicase igualmente nel ámbitu asociativu, escolar y familiar.

El programa diríxese preferentemente a mozos de 16 a 35 años, anque se contempla la posibilidá de que participen persones de mayor edá, siempres que tean desenvolviendo un trabayu n’educación non formal con moces (monitores, educadores, animadores d’ociu y tiempu llibre, deporte o cultura, madres y padres…). Trátase de talleres bien prácticos que van impartir profesionales y especialistes de reconocíu prestíu y que se van desenvolver nuna o delles sesiones, n’horariu de tarde o fines de selmana.

La inscripción va tar abierta dende 20 díes antes del entamu de cada taller y puede realizase al traviés de la plataforma municipal d’inscripción a actividaes. La inscripción ye gratuita

PROGRAMACIÓN DE TALLERES 2022
- Lo que me faltaba por amar: dinámiques creatives en relación a la naturaleza y l’arte
- Narración oral, oficiu d’escucha.
- ¿Qué me xuegues? El xuegu de mesa modernu como recursu educativu.
- ¿Qué puedo faer pola mio redolada? Promoviendo’l cambéu social dende la mocedá (rural).
- Alimentación y salú: aprender a comer, faer la compra, pa vivir meyor.
- Xuegos grandes: carreres d’orientación, rastrexos y gymkanas dixitales.
- Formación de profesionales del futuru: Innovación socioeducativa.
- Emociones: técniques pa trabayales con moces y adolescentes
- Vídeu y Redes Sociales. Claves pa comunicar ante la cámara.
- Qué ye la música. Notes pa quien trabayen con moces.
- Diccionariu de sexualidá(es).
- Series pal entendimientu.
16/02/2022
El Gobiernu d’Asturies va recibir 18 millones pa poner en marcha’l bonu d’arriendu xoven y el Plan Estatal de Vivienda 2022-2025

El Gobiernu d’Asturies va recibir 18 millones pa poner en marcha’l bonu xoven d’ayuda al arriendu y el Plan Estatal de Vivienda 2022-2025. En concreto, na Conferencia Sectorial de Vivienda y Suelu celebrada güei asignáronse al Principáu pa esti exerciciu 6,6 millones pa subvenciones al arrendamientu y 11,4 pal plan nacional. Les cuantíes pal restu d’exercicios (2023-2025) van depender de los socesivos presupuestos xenerales del Estáu.

Na xunta telemática, la conseyera de Derechos Sociales y Bienestar, Melania Álvarez, aprobó los criterios de repartida pa les comunidaes. ‘Entá queden meses de trabayu ente l’Estáu y el Gobiernu d’Asturies pa poder poner en marcha de forma real les convocatories, pero tresllademos al ministeriu que va cuntar con tola collaboración y dinamización posible dende’l Principáu’, señaló.

Amás, Álvarez resaltó que la planificación de les midíes estatales en materia de vivienda ta en plena sintonía coles polítiques que desenvuelve dende va años l’Executivu autonómicu. ‘N’Asturies tenemos clares nueses prioridaes: vivienda algamadiza, vivienda accesible y sostenible y vivienda pa les persones más vulnerables. Estes trés premises tán tamién claramente definíes nel plan estatal, los fondos Next Generation y l’anteproyectu de Llei de Vivienda’, sorrayó.

El Ministeriu de Tresportes, Movilidá y Axenda Urbana informó de que queden inda dellos meses de tramitación alministrativa pa que les comunidaes reciban los fondos que-yos correspuenden. Sicasí, toles alministraciones comprometiéronse a entainar lo máximo posible les xestiones pa que les persones nueves puedan solicitar y, nel so casu percibir, l’ayuda anunciada pol Gobiernu central hai unes selmanes. De la mesma, va informase debidamente de la fecha d’apertura de la convocatoria.

Fondos Next Generation

La conseyera tamién amosó’l so contentu polos 28 millones de los fondos europeos Next Generation asignaos al Principáu en 2021, que se van poner en marcha anguaño pa una convocatoria empobinada a actuaciones en barrios a la que namás se pondrán presentar conceyos, que tendrán d’identificar les zones pa les que proponen una rehabilitación integral.

Esta cuantía súmase a los 47,6 millones del Programa de Rehabilitación Enerxética d’Edificios (PREE) de la convocatoria 2020-2021 y a los 800.000 euros del PREE del añu pasáu.

A lo último, Asturies va recibir otros 12,5 millones de fondos Next Generation esti exerciciu, que se van destinar a la promoción de vivienda protexida pública de renta llindada. ‘Tamos poniendo tolos esfuerzos de planificación y execución por que estes partíes tengan un altu impactu y valor na política de vivienda asturiana’, concluyó la conseyera.

03/02/2022
Las estudiantes enllenen los siete premios a los meyores espedientes académicos concedíos pol Ayuntamientu de Llangréu

El Conceyu de Llangréu apurrió esti llunes los sos premios al estudiu, destinaos a reconocer a los alumnos y alumnes que llograron los meyores espedientes mientres el cursu académicu 2020-2021 n’enseñances medies y n’estudios universitarios de llicenciatura o grau. L’añu dexa un plenu de muyeres qu’acopen los siete reconocencies nes cuatro categoríes posibles: dos premios para los ciclos formativos, de grau mediu, dos premios pa los ciclos formativos de grau cimeru, dos premios pal bachilleratu y un premiu pa titulaciones universitaries de llicenciatura o grau. Los gallardones, dotaos con 2.800 euros y convocaos pola Conceyalía de Cultura, Educación, Mocedá y Política Llingüística del Conceyu, inclúin tamién una quinta categoría destinada a aplaudir l’esfuerzu de quien completen los sos estudios en circunstancies especialmente meritories y respondíes por por un informe del centru onde tuvieren matriculaos. Por categoríes, asina quedaron los premios nesta edición. Fueron apurríos pola conceyala d’Educación, Pamela Álvarez, y el teniente d’alcalde, Javier Castro.

Meyores espedientes de Ciclu Formativu de Grau Mediu:
– Estela Canga García, CFGM Cuidos Auxiliares d’Enfermería cursáu nel IES
La Quintana con una nota de 10 (200 €).
– Nadia Marqués Fernández, CFGM Xestión Alministrativa cursáu nel IES
Cuenca del Nalón con una nota de 9,73 (200 €).

Meyores espedientes de Ciclu Formativu de Grau Superior:
– Sara Menéndez Redón, CFGS Hixene Bucodental cursáu nel IES La Quintana con
una nota de 10 (400 €).
– María Rojo Fernández, CFGS Hixene Bucodental cursáu nel IES La Quintana con
una nota de 10 (400 €).

Meyores espedientes de Bachilleratu:
– Isabel Menéndez González, Bachilleratu n’Humanidaes y Ciencies Sociales
cursáu nel IES Cuenca del Nalón (300 €).
– Alba Pacios Fernández, Bachilleratu en Ciencies cursáu nel IES Santa Bárbara
(300 €).

Meyor espediente de Grau:
– Elena Álvarez Alonso, Grau n’Alministración y Dirección d’Empreses pola Universidá d’Uviéu (650 €).

Premiu al esfuerzu:
– Osmel Corral Ortega, IES Cuenca del Nalón (350 €). Por compatibilizar los estudios col trabayu y llograr una bona nota media.

28/12/2021