Etiqueta: música

Coldplay aterriza nel Centru Niemeyer

D’ente les propuestes culturales qu’ufre esta selmana el Centru Niemeyer d’Avilés destaca, en clave musical, la proyección na Sala de Cine d’unu de los conciertos de la banda británica Coldplay nel estadiu River Plate de Bonos Aires dientro de la so nueva xira mundial “Music of the Spheres”. Podrá vese como un estrenu, tan solo unes hores dempués de ser grabáu, en Salar Cine del centru cultural el sábadu 29 d’ochobre en dos sesiones, a les 16:30 y a les 20:00. Magar la hora del directu varia de la hora de reproducción, esto asocede para afaer l’eventu en Suramérica al horariu européu.

Sentáu n’una butaca d’Avilés, pero viendo la gran pantalla directamente dende Arxentina,
podrá esfrutase de los clásicos de tola carrera del grupu, como “Yellow”, “The Scientist”, “Fix You”, “Viva La Vida”, “A Sky Full Of Stars” y “My Universe”, nun estadiu llenu de vida, lluces, fueos artificiales y emoción. Les entraes pa esti eventu pueden adquirise al preciu de 13 €.

24/10/2022
Amosando pieslla 2022 con Slum Suit y Mostru l’Horru

Esti domingu 23 a les 12h remata la edición 2022 d’Amosando, el ciclu de presentaciones de novedaes discográfiques impulsáu por musicasturiana.com, con un formatu ente conciertu acústicu con aforu reducíu, programa de televisión y alderique. Nesta grabación participen el grupu jazz Slum Suit pa presentar el so discu ‘La Casa Vieya’ y el dúu de rap Mostru l’Horru, que publicaron apocayá’l so primer trabayu ‘Señales de Fumu’.

Slum Suit ye una banda de jazz de raigañu que trabaya cola música popular asturiana amestándola a armoníes jazz. Formólu en 2017 el gaiteru y saxofonista carbayón Carlos Casado, cuando taba emigráu a Nueva York, y en 2019 afitó’l proyectu n’Asturies. ‘La Casa Vieya’ ye’l so tercer EP, nel qu’anoven el so soníu y incorporen al grupu a veteranos de la escena jazzística astur.

Mostru l’Horru ye una formación de hip hop n’asturianu fundáu en 2021 pol xixonés Fran
Méndez y nel que participa’l productor llangreanu Zeros. ‘Señales de Fumu’ ye’l so primer
trabayu, un discu rap d’ocho cantares nel que tamién suenen influyencies d’otros estilos
como’l reggae o’l rock.

Cola participación d’estos dos proyectos musicales nuevos -que reflexen la diversidá de la música fecha n’asturianu-, Amosando zarra la so cuarta temporada. La entrada pal eventu ye de baldre, pero namás tienen invitación les persones asociaes a L’Ensame de musicasturiana.com que ganaron el sortéu d’entraes.

Cuatro años y 20 artistes
Amosando nació en marzu de 2019 a idea de la plataforma musicasturiana.com. Nesti
tiempu tocaron 20 artistes pa presentar les sos novedaes discográfiques: L-R, Xaime
Martínez, Ún de Grao, D’Urria, Anabel Santiago, Eva Tejedor & Les Pandereteres, Cerezal, Silvia Quesada, Felpeyu, Fruela 757, Bestiariu, Misiva, Carlos Rubiera, José Manuel Tejedor, Llevólu’l Sumiciu, Fernando Valle Roso y Silvia Moreno, Toli Morilla, Caldo y Os Rabizos Baxel y Algaire. La suma de los videos de los conciertos algama más de 200.000
reproducciones en YouTube. Estes actuaciones amuesen la calidá de la música fecha en llingua asturiana amás de la so variedá, yá qu’estilos como’l pop, indie, electrónica, folk, tonada, canción d’autor, rap, jazz y rock suenen nesta iniciativa producida por Ixuxú Cultura, realizada audiovisualmente por Javi Lueje y Rubén Álvarez, patrocinada nesta edición por Fundación Caja Rural de Asturias, cola collaboración de Fuensanta y subvencionada pola Fundación Municipal de Cultura y Educación de Gijón/Xixón.

20/10/2022
Fito & Fitipaldis anuncien fecha nueva en Xixón tres esgotar les entraes pal Teatru de la Llaboral

La salida a la vienta de les entraes pal conciertu de Fito & Fitipaldis causó una importante movición na ciudá. En tan solo unes hores colgóse’l cartelu de sold out, lo que fixo que la banda anuncie nueva fecha pa un segundu conciertu a otru día, 21 de xineru.

Dempués de completar la xira nacional más multitudinaria hasta la so finalización, la banda preséntase en La Llaboral con un formatu que va averar al públicu a un ambiente más íntimu, nel que podrán escuchase cantares del so últimu discu “Cada vez cadaver” y los clásicos de la banda, interpretaos con un matiz distintu. Pa ello, Fito Cabrales incorpora a los Fitipaldis a Jorge Arribas y Diego Galaz de Fetén Fetén, que, al pie de Carlos Raya, Javier Alzola, “Boli” Climent y “Coki” Giménez, van completar la banda que va percorrer mientres la seronda ya iviernu dalgunos de los teatros y auditorios d’España. Una ocasión única para ver a Fito & Fitipaldis en Xixón, nun formatu bien especial.

Les entraes pal segundu conciertu van salir a la vienta mañana, a partir de les 12 hores, al traviés de la páxina web de compra d’entraes del teatru de La Llaboral http://www.laboralciudaddelacultura.com/

19/10/2022
Llangréu abre’l plazu pa conseguir les entraes del conciertu de baldre de Marisa Valle Roso

El Conceyu de Llangréu yá tien a disposición del públicu gratuitu les entraes pal conciertu que la cantante Marisa Valle Roso va ufiertar el vienres 28 d’ochobre, a les 20.15 hores, nel Nuevu Teatru de La Felguera. L’accesu va ser de baldre amosando les invitaciones que pueden retirase na Casa de Cultura Escueles Doráu de Sama, el centru cultural Casa de los Alberti de Ciañu y la mesma taquilla del Teatru.

L’actuación, na que l’artista va presentar los cantares del so últimu álbum, Lo fugaz, publicáu ese mesmu añu, ta incluyíu nel programa Dinamizart del Ministeriu pa la Transición Xusta y el Cambéu Demográficu, y ta promovíu pol Institutu pa la Transición Xusta, la Fundación Ciudá de la Enerxía (CIUDEN) y el Conceyu de Llangréu.

18/10/2022
Héroes ensin nome arranca esta nueche en RPA

Héroes ensin nome entama esta nueche nes ondes de la Radio del Principáu d’Asturies a partir de les 23:30 hores. Esti programa, que de manera independiente llanzó en redes sociales una primer temporada con 21 programes y entrevistes a xente como L-R, Misiva o Inaciu Galán, ente otros, vuelve agora al traviés de la radio y con una producción fecha por Cuatro Gotes Producciones.

La nueva temporada pretende ser una continuación de l’anterior, onde dellos personaxes de la cultura asturiana van pasar pelos sos micros a falar de la so trayectoria, d’Asturies y a pasar un bon ratu con delles preguntes incómodes, pero gracioses. Nel primer episodiu, que s’estrena güei, falen dende Mieres con Ferla Megía, cantautor sierense. Sicasí, les entrevistes a personaxes más relevantes del panorama cultural asturianu tovía tan por llegar. Bandes como Desakato o Algaire y escritores como Diego Solís van tener la oportunidá de sentase a charrar con Yedra Riesgo y Raúl Alonso, presentadores del programa.

Héroes ensin nome ye un proyectu fechu por xente mozo, col asturianu como llingua vehicular, col oxetivu de promover y d’esparder les propuestes y proyectos culturales que surden n’Asturies al traviés d’entrevistes onde s’analiza y se debate colos propios autores y onde se conversa tanto formal como informalmente. La finalidá del proyectu ye amosar, al públicu xeneral, al traviés d’un alderique curtiu, la bayura cultural qu’hai dientro de la sociedá asturiana en dellos ámbitos, como la música, la lliteratura o la moda, ente otros.

17/10/2022
Fito & Fitipaldis vuelven a Xixón nuna versión más íntima

Fito & Fitipaldis torna per tolo alto a Xixón. Tres el gran ésitu del so pasu pela ciudá mientres el mes d’abril, Fito volverá xubise a los escenarios en Xixón nel añu 2023, y va facelo nel teatru de La Llaboral, el vienres 20 de xineru. Dempués de completar la xira nacional más multitudinaria hasta la so finalización, la banda preséntase nun formatu que va averar al públicu a un ambiente más íntimu, nel que podrán escuchase cantares del so últimu discu “Cada vez cadaver” y los clásicos de la banda, interpretaos con un matiz distintu.

Pa ello, Fito Cabrales incorpora a los Fitipaldis a Jorge Arribas y Diego Galaz de Fetén
Fetén, que, al pie de Carlos Raya, Javier Alzola, “Boli” Climent y “Coki” Giménez, van completar la banda que va percorrer mientres la seronda ya iviernu dalgunos de los teatros y auditorios d’España. Una ocasión única pa ver a Fito & Fitipaldis en Xixón, nun formatu bien especial. Les entraes van tar a la vienta a partir del próximu martes 18 d’ochobre a les 12 hores, al traviés de la páxina web de compra d’entraes del teatru de La Llaboral.

14/10/2022
Llaboral Ciudá de la Cultura acueye la Gala del XIV Premiu Camaretá al Meyor Cantar n’asturianu

Llaboral Ciudá de la Cultura acueye’l próximu sábadu 22 d’ochobre a les 22:00 hores, la Gala final del XIV Premiu Camaretá al Meyor Cantar n’asturianu que convoca la Conseyería de Cultura, Política Llingüística y Turismu. La gala, que va ser retresmitida en directu per TPA, va acoyer les actuaciones de los trés grupos finalistes, Algaire, Mostru l´horru y Dixebra, escoyíos nuna primer fase pol xuráu especializáu ente toles composiciones musicales escrites n’asturianu o eonaviegu, espublizaes a lo llargo del añu 2021 y que se presentaron a esta convocatoria.

El grupu Algaire, formáu por Iratxe Espina, Carla Miranda, Loreto Suárez y Juan Yagüe, preséntase a esta edición del Premiu Camaretá con Coral y maera, un cantar con lletra y música de Luis Ángel Fernández Santos. El dúu de rap Mostru l’horru que formen Francisco Méndez y Yannick Gutiérrez participen col tema Fíu d’un pueblu, de composición propia. Xune Elipe, Primi Abella, Rubén Álvarez, Javi Rodríguez, Llorián García, Sergio Álvarez, Eladio Díaz y Agus Lara formen anguaño la banda de rock Dixebra que presenta’l el cantar Como’l mar, con lletra de Primitivo Abella.

Tres de l’actuación de los trés candidatos, el xuráu formáu por especialistes en música y llingua asturiana, va decidir el cantar ganador. Mientres la deliberación del xuráu, el públicu va poder disfrutar de dos actuaciones. La primera del grupu Llevólu’l sumiciu, qu’actúen fuera de concursu xunto cola cantautora Anabel Santiago. Depués van facelo Carla Armas y Rubén García, que van interpretar col so grupu, Tras el muro El que conoz a tierra, tema ganadora del XIII Premiu Camaretá, y otres composiciones. Tres d’esta actuación, va dase a conocer el nome del grupu gallardonáu y va facese entrega d’un troféu a los sos intérpretes.

El premiu, dotáu con 6.000 euros, inclúi la realización d’un videoclip, asina como la promoción y espardimientu del cantar ganador nos medios de comunicación y nos eventos organizaos o promovíos pol Gobiernu del Principáu d’Asturies, asina como nel circuitu Autores nel Camín del programa Asturies, Cultura en Rede.

La entrada a la gala ye llibre y gratuita previa retirada d’invitación na Recepción de la Llaboral, nel Centru d’Información Turística del Principáu d’Asturies (CITPA) n’Uviéu, nel Centru Niemeyer n’Avilés, nel teléfonu 952 076 262, en unientradas.es y na web de Llaboral Ciudá de la Cultura.

13/10/2022
Canción lírica asturiana de conciertu, de Vicente J. Sánchez García, va presesentase al travíes d’un conciertu-presentación

Canción lírica asturiana de conciertu, de Vicente J. Sánchez García, va presesentase al travíes d’un conciertu-presentación el próximu vienres, 7 d’ochobre, a les 19:00 hores nel Conservatoriu Superior de Música “Eduardo Martínez Torner” d’Uviéu.

L’actu va cuntar coles actuaciones d’Eliana Sánchez (declamación), Beatríz Díaz (sopranu) y Mario Bernardo (pianu). Amás, va participar Antón García, director xeneral de Política Llingüística y Esther Prieto, d’Ediciones Trabe.

04/10/2022
Boombastic, nomináu como meyor festival nos Premios 40 Music Awards 2022

Casi ensin aliendu del esfrute de los festivales d’esti branu, Boombastic yá se prepara pa nueves ediciones cargaes d’esperiencies. A ello suma esta nominación a los Premios 40 Music Awards 2022, que se desvelaba ayeri mesmo, y na que’l festival va competir na Categoría España como meyor festival, xira o conciertu, coles xires de Manuel Carrasco, Rosalía, Dani Martín y C. Tangana, y col Concert Music Festival.

Son bien bones noticies pa la organización de Boombastic, onde se valora’l gran esfuerzu d’aunir a más d’un centenar d’artistes nun festival multidisciplinar qu’agora cunta tamién cola reconocencia d’unos premiostan prestixosos como son los 40 Music Awards. Mientres se celebra la gala de los premios que va dar el veredictu final, el festival prepárase pa 2023 y yá tien confirmaes dalgunes de les sos cites. Boombastic va volver a Madrid, al auditoriu Miguel Ríos de Rivas, los díes 16 y 17 de xunu; tamién va pasar per Asturies, que’l so llugar escoyíu volverá ser Llanera, y va tener llugar los díes 20, 21 y 22 de xunetu; a lo último, Alicante va acoyer el festival los díes 17, 18 y 19 d’agostu.

Por esta últimu edición pasaron más de 275.000 persones mientres los díes de festival,
onde se xubieron al escenariu un gran elencu d’artistes ente los que destaquen artistes internacionales como Bizarrap, Duki, Emilia, Cazzu, Nathy Peluso, María Becerra o Nicki Nicole, a los que tamién se suman artistes nacionales como C. Tangana, Quevedo, Hijos de la Ruina, Ayax y Prok, Bad Gyal, Rels B o Beret, ente otros. Amás de música, Boombastic foi toa una esperiencia, polo que yá se convirtió nel festival de moda d’esti branu, al qu’allegaron persones de toles comunidaes autónomes pa esfrutar d’estos díes de música, nos que’l bon tiempu acompañó en toles ediciones, y que contribuyó a convertise nun festival referente nel nuesu país.

28/09/2022
El ciclu Autores nel Camín va promover alcuentros con creadores asturianos en 27 conceyos

El ciclu Autores nel Camín ponse en ruta pa llevar el trabayu de losl ceadores y artistes asturianos a 27 conceyos del Principáu. Nos próximos meses los ganadores de premios lliterarios y escénicos convocaos o promovíos pola Conseyería de Cultura, Política Llingüística y Turismu van protagonizar 62 alcuentros col públicu.

Dientro del proyectu Asturies, Cultura en Rede, pretende dar a conocer los trabayos de los ceadores y artistes asturianos abriendo espacios d’alcuentru col públicu. La dirección xeneral de Política Llingüística invierte 50.000 euros nel ciclu xestionáu pola Sociedá Pública de Xestión y Promoción Turística y Cultural del Principáu d’Asturies.

La caravana d’Autores nel Camín va echar a andar mañana vienres, 11 de marzu, en Bual con un alcuentru lliterariu que va dirixir Miguel Rodríguez Monteavaro, premiu Ría del Eo de Poesía en eonaviegu cola obra Oi, que diz mama que volvas.

Los alcuentros lliterarios per tol territoriu asturianu van tar protagonizaos por Pablo Texón (premiu Xuan María Acebal de Poesía), Xilberto Llano (premiu María Josefa Canellada de Lliteratura infantil y xuvenil), Ángel de la Calle (premiu Alfonso Iglesias de Cómic), Blanca Fernández Quintana (Premiu Enriqueta González Rubín de Narrativa moza), Alberto Castro Gión (premiu Quiastolita de Lliteratura infantil en eonaviegu), Miguel Rodríguez Monteavaro (yá citáu), José Ángel Gayol (premiu Xosefa Xovellanos de Novela) y Ramón d’Andrés, coordinador y revisor llingüísticu y lliterariu de la traducción de La Biblia al asturianu (premiu Florina Alías a la Meyor Traducción), amás de premiu Fuertes Acevedo d’Ensayu.

Pela so parte, la compañía teatral Producciones Nun Tris, premiu Nel Amaro de Teatru Profesional en llingua asturiana y eonaviegu, va representar La reina de la guapura de Leenane en Sotu’l Barcu, Llangréu, Corvera, L.lena, Cangas del Narcea, Grau, Carreño, Nava y Colunga. Otramiente, Carla Armas y Rubén García, reconocíos col premiu Camaretá al meyor Cantar pol cantar El que conoz a tierra, van actuar en Samartín del Rei Aureliu, Villaviciosa, Candamou, Colunga, Castrillón y Tinéu.

Asturies Cultura en Rede ye un proyectu de la Conseyería de Cultura, Política Llingüística y Turismu, realizáu en collaboración colos conceyos asturianos y, nel que tamién s’inclúin circuitos temáticos d’artes escéniques, música, artes visuales, Xacobéu, cultura tradicional y lliteratura. La información ampliada de tola programación puede consultase na web asturiesculturaenrede.es.

10/03/2022