Etiqueta: PSOE

El PSOE arranca col primer alcuentru de tola candidatura dispuestu a abordar otru gran tresformamientu de la ciudá

La Casa del Pueblu del PSOE acoyó la primer xunta de la candidatura de Luis Manuel Flórez ‘Floro’ a l’alcaldía de Xixón, con vistes a la celebración de la Conferencia Política que va marcar la fueya de ruta del proyectu socialista pal conceyu.

‘Floro’ amosóse bien satisfechu de cuntar nel so equipu con muyeres y homes de diversos perfiles profesionales que representen el sentir de la ciudadanía xixonesa. ‘Ye un equipu integrador con amplia esperiencia profesional y comprometíu pa construyir un proyectu de ciudá al traviés del diálogu y el consensu’

El candidatu socialista añadió al entamu de la xunta ‘tenemos equipu y tenemos proyectu para trabayar pol conceyu’.

Los socialistes de Xixón van celebrar la so Conferencia Política los próximos díes 24, 25 y 26 de febreru nel Palaciu de Congresos del Recintu Ferial Luis Adaro.

15/02/2023
La xusticia tumba la ordenanza de movilidá de Xixón

El grupu municipal de FORO Xixón nel Conceyu anunció, en base a la sentencia dictada pol Tribunal Cimeru de Xusticia d’Asturies (TSXA) tres el recursu presentáu pola formación, la nulidá de la ordenanza de movilidá puesta en marcha pol gobiernu del PSOE. «Trátase del enésimu varapalu a l’acción de gobiernu illegal a la qu’acostuma’l PSOE siempres que gobierna la ciudá», afirmó’l voceru municipal, Jesús Martínez Salvador, quien aseguró qu’esta sentencia súmase a una «llarga llista de tropelíes illegales» como la regasificadora, la depuradora de la zona este, dos planes xenerales d’ordenación y, nesti mesmu mandatu, el Cascayu.

Nesti sentíu, Foro Xixón va esixir que, dende mañana, cualquier vehículu «seya como quier la so tipoloxía» pueda volver aparcar en zona ORA igual qu’asocedía con anterioridá a esta normativa. «El gobiernu tien d’asumir la so derrota. A partir de mañana naide tien obligación a llevar distintivu dalgunu nel so vehículu. Otramiente, aquelles cases nes qu’haya dos o más vehículos tamién van poder tener más d’una tarxeta de residente y nenguna multa rellacionada con esti plan d’ordenación va tener validez», esplicó’l conceyal Pelayo Barcia.

07/02/2023
Floro, candidatu del PSOE a l’Alcaldía En Xixón

La xornada d’ayeri foi de votación na see del PSOE en Xixón. Ana Puerto o Floro yeren los candidatos nunes eleiciones primaries marcaes pola alfuencia alta de militantes, un total de 897, lo que supón el 74% del censu. Al remate del día, Floro salió como candidatu del PSOE a l’Alcaldía de Xixón nes próximes eleiciones con un total de 504 votos.

Floro dedicó unes pallabres namás se dieron los resultaos, pidiendo xunidá y remarcando que «güei entama un tiempu nuevu que nos va llevar a conectar muncho más con un Xixón que yá ta en camín».

10/10/2022
Les Mocedaes Socialistes d’Asturies espublicen un vídeu pa esplicar por qué se celebra’l 8M

Trátase de la primer campaña de la nueva dirección de la organización xuvenil que dirixe, dende va unes selmanes, la uvieina, Olaya Rosell y que trata sobre’l 8-M, la importancia del feminismu y la llucha de la muyer pa consiguir.

Les Mocedaes Socialistes d’Asturies llanzaron una campaña, en formatu vídeu, esplicando por qué celebra’l 8 de marzu como «día internacional de la muyer trabayadora» nun añu nel que, espliquen, tán viéndose los derechos conquistaos poles muyeres apeligrar por formaciones polítiques d’estrema derecha al igual que tán nel puntu de mira otros colectivos nos que se consiguieron importantes meyores na última década.

“Un exemplu ye na vecina comunidá de Castiella y Llión, que nes sos recién elecciones la fuerza parlamentaria de VOX sería la llave del gobiernu y unu de los sos primeros pidimientos, na mesma xornada de matinada electoral’ foi la derogación de la llei d’igualdá de la comunidá, daqué que ye totalmente surrealista, yá que una llei que fala sobre igualdá nun puede perxudicar nin faer de menos a naide. Lo que en realidá-yos fadia ye que teamos al so mesmu altor” esplicó Olaya Rosell.

La pedagoxía ye daqué básicu que la nueva executiva autonómica tien como retu y va consistir en llevar a cabu numberoses campañes informatives como esta, na qu’esplicamos el por qué del feminismu, lo qu’esti colectivu consiguió y sigue consiguiendo a lo llargo de los años, porque solo llegando a la ciudadanía y n’especial a la xente nuevo naide va poder reescribir la hestoria, nin demonizarnos a les muyeres.

“El derechu al votu, al trabayu, a tener una cuenta corriente, a escoyer la nuesa pareya, a poder albortar… son dalgunos de los derechos o que se fueron conquistando a lo llargo de los años pol colectivu feminista, pero entá queda muncho por conquistar, como por casu l’abolición de la prostitución, trata de blanques y que se comercialice’l cuerpu d’una muyer, daqué que’l PSOE tien na so axenda y onde nos atopará al so llau a les mocedaes socialistes” apunta Águeda Areces, secretaria d’igualdá de JSA.

07/03/2022
La reforma del estatutu queda bloqueada énte les esixencies de FORO Asturies

Tres el conceyu d’esta mañana ente los principales partidos políticos que taben d’alcuerdu na reforma estatutaria, ye dicir, PSOE, IU, Podemos Asturies y FORO Asturies, la reforma del estatutu d’autonomía d’Asturies sigue bloqueada, principalmente poles esixencies de FORO.

En pallabres de Dolores Carcedo, vocera del PSOE «hai tres fuercies a favor de la oficialidá y de la reforma con 26 diputaos y otru partíu, que ye FORO, col oxetivu de baxar impuestos. Lo que FORO tresllado con esto ye’l no a la oficialidá».

Per otra parte, Rafael Palacios, voceru de Podemos Asturies declaró que nel conceyu «trés grupos políticos vinieron a falar d’oficialidá y otru vieno a falar d’impuestos y ye mui dificil alcontrar un puntu d’alcuerdu ya imposible poder avanzar cuando se fala de coses distintes. Tanto tiempu trabayando y planteando pa reconocer un derechu, alcontrámanos con un partíu políticu que’l so interés ye otru.» Sofía Castañón añedía «que’l momentu pa la oficialidá ye agora y que Adrián Pumares tovía puede recapacitar».

Hasta’l 31 de xineru, según los partidos políticos, tarán a la espera del cambéu de parecer pa poder siguir alantre cola reforma del estatutu d’autonomía qu’incluyá la oficialidá de les llingües propies d’Asturies.

24/01/2022
Luisa Carcedo, nueva presidenta de la Fundación Pablo Iglesias

La executiva del PSOE designó a Luisa Carcedo, exministra de Sanidá, actual presidenta del Comité d’Ética y Garantíes del PSOE y diputada por Asturies nel Congresu, nueva presidenta de la Fundación Pablo Iglesias.

Carcedo, que va sustituyir nel cargu al actual secretariu d’Organización del PSOE, Santos Cerdán, amosóse arguyosa y estimosa pol nomamientu: «Supón un enorme honor. Sobre manera, pol especial significáu de la Fundación pal PSOE y la figura de Pablo Iglesias Posse y el so socialismu humanista, imprescindible agora y pal enfoque del socialismu del futuru», valoró.

18/01/2022
Los partíos ceden 54.666 euros de les sos asignaciones a programes sociales

Pocos son los asuntos que davezu algamen l’alcuerdu unánime de tolos grupos políticos con representación na Casa Conceyu. Sicasí, les siete formaciones presentes n’actual corporación pactaron ceder dos mensualidaes de les sos asignaciones a programas sociales. Esto ye, 54.666 euros. Trátase d’una partida que los grupos reciben pa desendolcar la so actividá como representantes de los ciudadanos. L’alcuerdu algamóse por unanimidá de los voceros municipales na comisión permanente celebrada’l vienres pela mañana.

Nel conceyu, tamién se punxo fecha al viniente Plenu ordinariu. Va tener llugar el miércoles 27 de mayu. N’él, presentaránse les primeres modificaciones presupuestaries destinaes a programes venceyaos a la xestión de la crisis de la COVID-19. Otramanera, alcordose convocar el Conseyu Social de la ciudá pal viniente día 25. Nesti conceyu, informaráse de les midíes previstes pa recuperar l’actividá económica y l’empléu. Los voceros municipales tamién pactaron la torna de les comisiones municipales, que van celebrase de manera presencial nel Salón de Plenos.

11/05/2020
Adrián Barbón, en Lugo: «Asturies y Galicia tenemos de trabayar de la mano»

El presidente del Principáu y ecretariu xeneral de la Federación Socialista Asturiana, Adrián Barbón, participó esti llunes nun actu en Llugo entamáu pol PSOE de Galicia nel que tuvo presente’l candidatu a la Xunta, Gonzalo Caballero. Un alcuentru nel que Barbón aludió a la necesidá de qu’Asturies y Galicia trabayen «de la mano» en tolos ámbitos, y en concretu a la de faer frente al retu demográficu. Barbón xulgó especialmente importante qu’esti capítulu sía agora encetáu dende’l Gobiernu central como «una política global, d’estáu», nel marcu de la vicepresidencia qu’encabeza Teresa Ribera.

«Gústame falar de retu demográficu, non de drama demográficu, porque ye un retu y pue ganase», indicó Barbón. El presidente del Principáu destacó’l trabayu que n’Asturies se ta faciendo na materia con iniciatives como la creación d’un comisionáu específicu o una comisión na Xunta Xeneral. «Hai un compromisu claru que tamién s’afigura na orientación de los presupuestos de 2020 que a finales d’avientu aprobó’l parlamentu rexonal».

Barbón concretó dalgunes de les prioridaes qu’emponen l’acción del gobiernu asturianu a la d’encetar el retu demográficu. Destacó l’apueste pol sostenimientu de los servicios públicos, les polítiques d’empléu y l’impulsu de sectores como’l agroalimentariu y el forestal, les bonificaciones fiscales y el compromisu d’acabar colos problemes de cobertoria. Barbón aplaudió’l «enorme trabayu» que ta realizando’l PSOE de Galicia nestos meses y amosóse «convencíu» de qu’esi llabor va vese recompensáu el 5 d’abril. Resaltó, amás, que la converxencia de gobiernos socialistes, n’Asturies, nel restu de comunidaes y tamién n’España, ye la meyor vacuna pa convertir en «irrelevante» a la estrema derecha.

03/03/2020
PSOE y XP roblen un protocolu pal siguimientu del alcuerdu de coalición

El PSOE y Xuníes Podemos (XP) roblaron esti miércoles un protocolu de coordinación y siguimientu del alcuerdu de gobiernu de coalición algamáu ente dambes formaciones. El documentu suscritu pol Grupu Parlamentariu Socialista y pol Grupu Confederal de Xuníes Podemos inclúi unos principios básicos de funcionamientu, amás de la creación d’una comisión permanente de siguimientu que revise la so marcha y el cumplimientu los oxetivos que figuren nel pactu. Tamién recueye un compromisu de coordinación y unidá nel ámbitu parlamentariu, según una estratexa de comunicación conxunta y un procedimientu pal resolvimientu de posibles discrepancies.

09/01/2020
El rey propón a Sánchez como candidatu a la investidura

El secretariu xeneral del PSOE y presidente del Gobiernu en funciones, Pedro Sánchez, peslló esti miércoles la ronda de contactos con Felipe VI pa la formación de gobiernu. El candidatu socialista recibió l’encargu del rei pa sometese a la investidura. Nuna rueda de prensa posterior, aseguró qu’asume esti encargu «con honor, responsabilidá y enorme gratitud al conxuntu del pueblu español».

Sánchez sorrayó que la so voluntá ye «gobernar dende los valores progresistes y construyendo grandes consensos dientro del marcu constitucional». Coles mesmes anunció que’l llunes va convocar al presidente del PP, Pablo Casado, a una xunta nel Congresu. D’igual manera tamién va convocar a la nueva vocera de Ciudadanos, Inés Arimadas, en respuesta al alcuentru que solicitó.

La vocera socialista nel Congresu, Adriana Lastra, va aconceyar con tolos partíos políticos «pa ver si podemos atopar una mayoría parlamentaria más amplia». La intención del presidente del Gobiernu en funciones ye llamar a tolos presidentes autonómicos, incluyíu el catalán Quim Torra, y al presidente de la FEMP.

El candidatu a la presidencia del Gobiernu recordó que l’encargu del Rei ye consecuencia directa del mandatu de les urnes el 10 de payares y el 28 d’abril. «Los ciudadanos fueron claros col so votu: quieren que gobierne’l PSOE, nun hai otres alternatives parlamentaries». «Toos tenemos de poner de la nuesa parte pa que la llexislatura eche a andar y faigamos frente a los desafíos que tenemos per delantre», concluyó.

12/12/2019