– Los 278 quemes forestales rexistraos del 29 de marzu al 9 d’abril afectaron a 32.000 hectárees de 51 conceyos y causaron daños de considerancia en montes, camperes, cultivos y servicios
– El Principáu aprueba l’espediente que va dexar llanzar ayudes para prevención y reforestación destinaes a empreses y particulares
– L’Executivu avanza na reorganización de les Bripas y de la Guardería del Mediu Natural col fin de reforzar dambos servicios y amontar la seguridá
El Gobiernu d’Asturies alcordó güei solicitar al Conseyu de Ministros la declaración de la comunidá como zona afectada gravemente por una emerxencia de protección civil –lo qu’antes se denominaba zona catastrófica-, de resultes de los 278 quemes forestales rexistraos dende’l 29 de marzu al 9 d’abril. Los fueos afectaron a 51 conceyos y 32.000 hectárees. L’aprobación de la declaración per parte del Executivu central dexaría aportar a distintes llínees d’ayudes.
El Principáu sostien que los perxuicios causaos pola fola de quemes xustifiquen sobradamente la solicitú. Asina, detalla que se producieron daños de gran considerancia en mases arbolaes de rexeneración natural y repoblación forestal, tanto en terrenes d’utilidá pública como en montes vecinales en mano común y privaos.
El fueu, abonda’l gobiernu, tamién afaró zones de carba, pacional y cultivu, de cuenta que provocó graves perdes en pación, madera, reserves y cotos de caza, na collecha de castañes y setes, y na producción ganadera y de miel.
Les consecuencies de les quemes tamién se fixeron notar n’infraestructures, equipamientos, instalaciones y servicios, con series perturbaciones pa la vida de la población: hubo cortes de carreteres, desprendimientos, cayida de tendíos eléctricos y de telecomunicaciones ya interrupciones del suministru d’agua, ente otros problemes.
Tou esti catálogu de daños, que la so valoración entá nun foi concluyida, motiva la solicitú del Executivu autonómicu.
Amás d’esti pidimientu –que yá fuera adelantráu pol presidente, Adrián Barbón-, el gobiernu avanza n’otres midíes previstes nel plan de choque pa encarar les consecuencies de les quemes.
Etiqueta: Quemes forestales
-
El Gobiernu d’Asturies solicita al Conseyu de Ministros la declaración de la comunidá como zona afectada gravemente por una emerxencia de protección civil
-
El Principáu refuerza la collaboración vecinal nel mediu rural pa efectuar quemes controlaes y desaniciar combustible del monte
El Principáu reforzó la collaboración vecinal nel mediu rural pa efectuar quemes controlaes qu’ayuden a desaniciar combustible nos montes. Pa ello, la Conseyería de Mediu Rural y Cohesión Territorial simplificó los trámites, editó folletos informativos y estableció mecanismos de supervisión.
Esta práctica ye una de les midíes recoyíes na Estratexa Integral de Prevención y Llucha contra les Quemes Forestales n’Asturies 2020-2025, la ferramienta de xestión y principal marcu de les polítiques y actuaciones del Gobiernu d’Asturies nesta materia.
El númberu de pidimientos recibíos anguaño xube a 121, una cifra que se foi incrementando dende 2019, lo que demuestra la bona acoyida que la iniciativa tien ente vecinos y ganaderos. La mayoría de les solicitúes vienen de les contornes del monte central y l’oriente de la comunidá. Asina, los conceyos onde más quemes controlaes se realicen son Piloña, Sobrescobiu, Casu y Onís.
L’Executivu simplificó los trámites pa entainar el procesu. D’esta miente, la persona o asociación que pretenda llevar a cabu una quema controlada tien d’unviar una solicitú na que defina la zona onde se va a actuar y especificar los medios de los que dispón Una vegada aceptáu’l pidimientu, el Principáu pon los medios en collaboración colos vecinos implicaos.
Les quemes controlaes realícense sol asesoramientu de los técnicos de la Conseyería de Mediu Rural y Cohesión Territorial, cola participación d’axentes del Mediu Natural y, dependiendo de la modalidá de quema, con medios del Ministeriu d’Agricultura, Pesca y Alimentación, al traviés de les Brigaes de Refuerzu en Quemes Forestales y los Equipos de Prevención Integral de Quemes Forestales
Antes de realizar la quema estúdiase la opción más afayadiza, en función del tipu de zona y la intensidá arbustiva. Les alternatives van dende la quema por mates a la más intensiva en zones de mayor densidá. Seya que non, siempre se respeten les indicaciones que marca’l nivel de riesgu de quemes y evítense les époques más seques.
-
El Principáu concede 2,4 millones a entidaes locales pa la creación d’infraestructures de defensa contra les quemes forestales
El Gobiernu d’Asturies concedió 2.410.718 euros a 70 entidaes locales (conceyos y parroquies rurales) pa la creación d’infraestructures de defensa contra quemes forestales.
La resolución d’estes subvenciones, cofinanciaes pola Unión Europea (UE) al traviés del Fondu Européu Agrícola de Desenvolvimientu Rural (Feader), publícase güei nel Boletín Oficial del Principáu d’Asturies (BOPA).
Les ayudes tienen calter plurianual —distribúyense al 50 % ente anguaño y el próximu— y faciliten la prevención frente al fueu mediante acciones adaptaes a la singularidá del territoriu y el modelu d’organización territorial.
En concreto, esta llinia sofita intervenciones que dexen afitar puntos de discontinuu y pasu, prevenir daños en pueblos y instalaciones agraries y entainar los llabores d’estinción en casu de quema. Ente otres iniciatives, incluyen roces, llimpieza de caminos y siendes.