Etiqueta: salú

Uviéu va ser la sede estatal del Diálogu sobre’l Futuru del Sistema Sanitariu

Asturies ta acabante de ser elexida pa celebar nel so territoriu el Diálogu sobre’l Futuru del Sistema Sanitariu, por ser una de les comunidaes autónomes con meyores servicios de salú. Esta xornada busca enriquecer el debate públicu sobre la sanidá del futuru y ufrir a la ciudadanía la posibilidá de participar directamente na conversación sobre cómo se debería afrontar la meyora y modernización de los servicios sanitarios del estáu.

L’eventu va tener llugar n’Uviéu los díes 11 y 12 de payares. El día 11 va celebrase nel HUCA y el día 12 nel Aula Magna de la Universidá d’Uviéu. Va tar abiertu a tolos ciudadanos que quieran participar de forma presencial o virtual.

Ente los ponentes, destaquen la Ministra de Sanidá, Carolina Darias; la Secretaria d’Estáu de Sanidá, Silvia Calzón; la xefa de la Unidá HealthInnovations&Ecosystems de la Comisión Europea, Carmen Laplaza Santos, y tamién dellos espertos y académicos. Tamién van intervenir el presidente del Principáu d’Asturies, Adrián Barbón; el conseyeru de Salú del Principáu d’Asturies, Pablo Ignacio Fernández Muñiz, y el rector de la Universidá d’Uviéu, Ignacio Villaverde.

Amás de les meses de debate, va haber dos talleres ciudadanos diseñaos pa sentir les idees de la población, tomar nota d’elles ya incorporales a dellos documentos y estratexes de futuru. Nel primeru va conversase sobre como se pueden ameyorar los servicios sanitarios de pueblos y ciudaes, mientres que’l segundu va reflexonar sobre qué se necesita facer pa educar n’hábitos de vida saludables.

Diálogos sobre’l Futuru

Los Diálogos sobre el Futuro son una iniciativa del Gobiernu, la Comisión Europea, el Parllamentu Européu y otres 70 instituciones públiques (ayuntamientos, gobiernos autonómicos, fundaciones y universidaes) que quier contribuir a impulsar conversaciones plurales, informaes y constructives sobre les oportunidaes y desafíos que va traer el mundu pos-covid.

Los Diálogos van tener llugar ente setiembre y avientu nes 17 comunidaes autónomes. Van incluyir cien meses de debate, 37 talleres ciudadanos y reuniones d’altu nivel nes que van participar más de 500 ponentes, ente los que va tar el presidente y vicepresidentes del Gobiernu, presidentes y conseyeros autonómicos, ministros, secretarios d’estáu, altos cargos y espertos de la Comisión Europea y del Parllamentu européu, alcaldes, CEO, emprendedores, académicos, periodistes y llíderes del tercer sector y la sociedá civil.

El programa del eventu puede consultase en www.futuros.gob.es/sistemasanitario

08/11/2021
El Sespa convoca’l procedimientu pa solicitar la carrera profesional del personal estatutariu sanitariu

El Serviciu de Salú del Principáu d’Asturies (Sespa) convocó’l procedimientu de reconocencia de los graos de la carrera profesional pal personal estatutariu llicenciáu y diplomáu sanitariu en periodu ordinariu, col que 6.126 profesionales, ente médicos/ médiques y enfermeros/enfermeres, van ameyorar les sos condiciones económiques l’aumentar les sos retribuciones.

La convocatoria que recueye los requisitos y condiciones foi publicada güei nel Boletín Oficial del Principáu d’Asturies (BOPA). Los profesionales interesaos, fundamentalmente facultativos/es y enfermeros/es, van disponer d’un plazu d’un mes pa solicitar el so grau. Pa ello, tendrán de rellenar una única solicitú al traviés del siguiente enllaz: https://carrera2021.sespa.es. Darréu tendrán d’imprimir la solicitú por duplicao y apurrir un exemplar énte la xerencia del área onde ta emprestando los sos servicios.

Los profesionales que nun tengan reconocíu nengún grau de carrera profesional van poder optar al grau I y el restu va poder solicitar el inmediatu superior al que tengan aprobáu.

05/11/2021
Asturies rexistra 21 aules y 442 estudiantes aisllaos na última selmana pola incidencia de la covid

Asturies rexistró dende’l 19 d’ochobre y hasta’l día 25, 21 aules y 442 estudiantes confinaos pola incidencia del coronavirus nos centros educativos públicos, concertaos y privaos, oncluyíes les escueles de 0 a 3 años.

Esto supón que les autoridaes sanitaries dedicieron aisllar el 0,31% de les 6695 clases abiertes na comunidá y al 0,32% del alumnáu matriculáu (137.500) dende’l primer ciclu d’Infantil hasta Bachilleratu y Formación Profesional.

A lo llargo de la selmana, la Conseyería de Salú notificó 38 positivos por covid dientro de la comunidá educativa: 35 ente l’alumnáu y 3 ente’l personal docente.

Mesmo que nel cursu pasáu, los procedimientos que se ponen en marcha énte la detección de positivos de coronavirus vinculaos a centros educativos tan recoyíos na Guía d’actuación énte l’apaición de casos de covid-19, ellaborada pola Dirección Xeneral de Salú del Principáu (Sespa) y actualizada el 17 de setiembre. Esti documentu ta a disposición de tola comunidá educativa na web www.educastur.es

La guía, que s’alcuentra en constante revisión p’adaptase a la evolución de la pandemia, recueye tola información necesaria, desde los confinamientos a la regulación de los grupos de convivencia estable y la gestión de posibles brotes.

27/10/2021
El Sespa va citar a la población de riesgu pa la campaña de vacunación antigripal, que va entamar el martes 2 de payares
El Serviciu de Salú del Principáu (Sespa) entamó la citación a la población de riesgu pa l’alministración de la vacuna del gripe, que va empezar el martes 2 de payares. Per segundu añu consecutivu, toles árees van realizar una captación proactiva pa protexer a los colectivos vulnerables énte esti virus respiratoriu, polo que nun ye mester llamar al centru sanitariu de referencia.

Los equipos d’enfermería d’atención primaria inocularán les dosis a pacientes crónicos nos centros de salú. Asina, a los mayores de 70 años va aplicáse-yos simultáneamente esta profilaxis cola de refuerzu frente a la covid -una en cada brazu- nos centros de salú, quitando nel área sanitaria IV, con cabecera n’Uviéu, onde van recibir la vacuna contra la covid nel Hospital Monte Naranco y nel serviciu d’Estracciones del Hospital Universitariu Central d’Asturies (HUCA).

Pela so parte, na área V, con cabecera en Xixón, van alministrase dambes dosis nos puntos de vacunación masiva habilitaos nel Palaciu de Deportes de La Guía, na Conservera de Candás y nel Atenéu Obreru de Villaviciosa. Les persones de 65 a 69 años namás van recibir nos puntos de vacunación masiva la profilaxis antigripal, ente que les mayores de 70 van recibir los dos (la del gripe y el refuerzu frente a la covid).

El xefe de Vixilancia Epidemiolóxica, Ismael Huerta, y el xefe de Xestión Asistencial del Sespa, Óscar Suárez, presentaron esta tarde l’operativu de la campaña 2021-2022. Huerta sorrayó la importancia de la inmunización de los grupos de riesgu “porque la coinfección del gripe cola covid dobla’l riesgu de muerte na población vulnerable”.

Grupu diana pa la vacunación antigripal

La vacuna antigripal ta indicada pa mayores de 65 años, persones inmunodeprimíes, con enfermedaes cróniques o obesidá y embarazaes, que presenten mayor probabilidá d’entueyos. Tamién s’aconseya a quien convive con persones d’altu riesgu, estudiantes en práctiques de centros sanitarios y sociales, y trabayadores de servicios públicos esenciales, como policíes, bomberos y voluntarios de Protección Civil, etcétera.

Salú encamienta la dosis a les muyeres embarazaes en cualesquier momentu pa protexer a los ñácarosal nun poder recibir la profilaxis hasta pasaos los seis meses de vida. L’andada del gripe incrementa’l riesgu d’entueyos pa los naciellos y provoca ingresos y casos graves equipables a los qu’afecten a les persones mayores de 65 años. Esti encamientu tamién s’estiende nel puerperiu, hasta los seis meses tres el partu, a quien nun recibieren antes la profilaxis.

Otramiente, la vacuna ta indicada pa menores de 6 meses a 2 años que nacieren con menos de 32 selmanes de xestación.

Les autoridaes sanitaries tamién aportunen na importancia de que’l personal sanitariu y sociosanitariu se vacune pa prevenir andaes a pacientes y usuarios de los centros residenciales de mayores.

Oxetivu: llegar al 75% de la población vulnerable

La Conseyería de Salú confía en que la cobertura vacunal algame al 75% de la población diana, pa lo qu’adquirió 440.000 dosis, que supunxeron una inversión de 5.090.280 euros, al traviés d’un procesu centralizáu entamáu pol Ministeriu de Sanidá.

Per segundu añu consecutivu van alministrase cuatro tipos de vacunes tetravalentes, incluyida la de cultivu celular, polo que protexen ante los dos tipos de virus A y los dos variantes del B que tán circulando na actualidá.

A los mayores de 65 años van inoculáse-yos dos tipos de profilaxis distintes, dependiendo de si viven nuna residencia o na so casa. Asina, quien tean institucionalizaos van recibir la tetravalente con adyuvante, que llogra una meyor respuesta inmune nesti colectivu. Tamién se-yos va espachar mayor cantidá de dosis p’ampliar la protección.

Al igual que na campaña anterior, al restu d’adultos de los grupos de riesgu, ente los 14 y los 64 años, va alministráse-yos la tetravalente clásica de cultivu celular, ente que pa edaes pediátriques va usase la clásica tetravalente.

Midíes hixéniques

Salú Pública sorraya que la vacunación antigripal añal ye la meyor estratexa pa la prevención del gripe y los sos entueyos, de la qu’encamienta delles midíes hixéniques cola fin d’evitar la tresmisión del virus de persona a persona:
- Tapase la boca y la ñariz con un pañuelu de papel, utilizando la cara interna del coldu al espirriar o tusir, y refugar el pañuelu recién usáu.
- Utilizar mázcara énte síntomes compatibles col gripe, especialmente nes relaciones con persones vulnerables.
- Llavar les manes con frecuencia, especialmente en sonándose o espirriar, al dir al aséu y antes d’inxerir alimentos.
- Nun compartir vasos, cubiertos, toalles y otros oxetos que pudieren tar en contactu con cuspia y secreciones respiratories.
La Conseyería de Salú ellaboró un documentu d’entrugues frecuentes sobre’l gripe que ta disponible na páxina de Astursalud (www.astursalud.es) p’ayudar a estremar ente los síntomes d’un gripe y los d’un resfriáu.
26/10/2021
El Sespa aumenta un 23 % l’actividá quirúrxica nos primeros nueve meses del añu

L’actividá quirúrxica aumentó n’Asturies un 23 % nos primeros nueve meses del añu, al pasar de 42.733 intervenciones a 52.664, lo que supón 9.931 más que nel mesmu periodu del 2020. En setiembre, cuando se rexístren davezu peores cifres, el númberu d’operaciones medró un 9 % al respective del mesmu mes del exerciciu anterior. Al zarrar setiembre contabilizábense 21.147 ciruxíes pendientes, según l’últimu informe publicáu esta tarde pol Serviciu de Salú del Principáu (Sespa).

A la medría de l’actividá ordinaria súmase’l plan de choque p’amenorgar les llistes d’espera quirúrxica. Asina, dende’l 20 de setiembre, realizáronse 267 intervenciones n’horariu de tarde, polo que’l Sespa calcula qu’a partir de payares va notase la mengua del númberu de pacientes qu’aguarden una operación.

Los profesionales del Sespa atendieron 126.740 consultes esternes el mes pasáu, polo que menguó en siete díes la espera media estructural en comparanza col mesmu mes del 2020 y asitióse en 70. Esta mengua ye destacable sobre manera nes especialidaes de Traumatoloxía y Dermatoloxía, que los sos pacientes aguarden, de media, 41 y 24 díes menos, respectivamente.

Otra manera, tamién xubió’l númberu de pruebes de diagnósticu al respective d’agostu. De resultes d’esó, menguó la demoranza media d’espera pa una colonoscopia, mamografía y ecografía, y caltúvose pal TAC en referencia a setiembre del 2020.

21/10/2021
Asturies rexistra 3 aules y 49 estudiantes aisllaos na última selmana pola incidencia de la covid en centros docentes

Asturies rexistró dende’l 12 de ochobre hasta’l día 18, un total de 3 aules y 49 estudiantes confinaos pola incidencia del coronavirus nos centros educativos públicos, concertaos y privaos, incluyíes les escueles de 0 a 3 años.

Esto supón que les autoridaes sanitaries decidieron aisllar el 0,04% de les 6.695 clases abiertes na comunidá y al 0,03% del alumnáu matriculáu (137.500) dende’l primer ciclu d’Infantil hasta Bachilleratu y Formación Profesional (FP).

A lo llargo de la selmana, la Conseyería de Salú notificó 10 positivos por covid dientro de la comunidá educativa: nueve ente l’alumnáu y ún ente’l personal docente.

Mesmo que nel cursu pasáu, los procedimientos que se ponen en marcha énte la deteición de positivos de coronavirus vinculaos a centros educativos tán recoyíos na Guía d’actuación énte l’apaición de casos de covid-19, ellaborada pola Dirección Xeneral de Salú Pública y el Serviciu de Salú del Principáu (Sespa) y actualizada el 17 de setiembre. Esti documentu ta a disposición de tola comunidá educativa na web Educastur.

La guía, que s’alcuentra en constante revisión p’adaptarse a la evolución del andanciu, recueye tola información necesaria, dende los confinamientos a la regulación de los grupos de convivencia estable y la xestión de posibles brotes.

20/10/2021
L’Axencia de Cooperación y la Universidá d’Uviéu impulsen un cursu d’intervención n’ayuda humanitaria

El cursu enmárcase na estratexa d’acción humanitaria del Principáu, que define ente los sos oxetivos la protección de les poblaciones en situación de crisis aguda o crónica, la prevención del sufrimientu y l’atención a les necesidaes básiques ya inmediates.

L’Axencia Asturiana de Cooperación al Desenvolvimientu, en collaboración cola dirección de la Área de Cooperación, Tercer Sector y Responsabilidá Social y la Unidá d’Investigación n’Emerxencia y Desastre, dambes de la Universidá d’Uviéu, entamen el cursu gratuitu Introducción a la calidad y los estándares de intervención en la ayuda humanitaria, destináu a organizaciones non gubernamentales pal desenvolvimientu (ongd), al alumnáu de la institución académica y a toles persones interesaes n’adquirir conocimientos nesti ámbitu.

La formación va impartise los díes 22 y 23 d’esti mes na aula Clarín del Edificiu Históricu de la Universidá d’Uviéu, concretamente la tarde del vienres y el sábadu n’horariu de mañana y tarde. La cobertoria de les 20 places previstes va realizase per orde d’inscripción, bien al traviés de llamada telefónica al númberu 985668924 o per aciu un corréu al buzón cooperacion@asturias.org

Al términu de les xornaes apurriráse un certificáu d’asistencia al alumnáu que participara en toles sesiones.

El cursu va cuntar cola asistencia, en calidá de profesores, de Pedro Arcos y Camille Nusbaumm.
Arcos ye doctor en Medicina y Ciruxía pola Universidá d’Uviéu y en Ciencies de Salú Pública pola Universidá de Londres. Foi unu de los fundadores de Médicos Ensin Fronteres, entidá na qu’exerció de presidente. Anguaño ye profesor de Medicina Preventiva y Salú Pública de la Universidá d’Uviéu, onde dirixe la Unidá d’Investigación n’Emerxencia y Desastres (UIED) y el Programa de Formación de Posgráu en Medicina d’Emerxencia y Desastres. Pela so parte, Camille Nussbaum ye llicenciáu n’Hestoria pola Universidá Marc Bloch d’Estrasburgo (Francia) y espertu en calidá, rindición de cuentes y aprendizaxe.

Les xornaes van incluyir tamién una sesión sobre esperiencies n’acción humanitaria na que, amás de Nussbaum, van intervenir como ponentes Llisa Bay, manager humanitaria en Oxfam Intermon; Felipe Noya, miembru del Hospital Start de l’Axencia Española de Cooperación al Desenvolvimientu, y Virgina Pérez, xefa de Protección de la Infancia en Unicef Bolivia y esperta n’Emerxencies. Los representantes de Oxfam Intermon y Unicef van participar per vía telemática.

18/10/2021
Asturies podría entrar na fase 3 a partir d’esta tarde
El consejo internacional Sistema Nacional de Salud (SNS) actualizó ayeri tres un conceyu de los presidentes de les comunidaes autónomes del estáu el so plan de respuesta temprana nun escenario de control del andanciu pol COVID. Nesti conceyu acordose el seguimiento de la viniente tabla a la hora de definir los niveles d’alerta.

La combinación del resultáu d’estos indicadores afectaríen a les fases de les comunidades d’esta manera:
- Nivel de alerta 1: Cuando al menos dos indicadores del bloque I1 y uno del bloque II están en nivel bajo
- Nivel de alerta 2: Cuando al menos dos indicadores del bloque I1 y uno del bloque II están en nivel medio
- Nivel de alerta 3: Cuando al menos dos indicadores del bloque I1 y uno del bloque II están en nivel alto
- Nivel de alerta 4: Cuando al menos dos indicadores del bloque I1 y uno del bloque II están en nivel muy alto
Según estes tables, Asturies taría anguaño na fase 3, yá que nos últimos 14 díes tan una situación de 279 casos por 100.000 habitantes, una incidencia acumulada de 157 y una ocupación de cames por pacientes por COVID de 12’24% y 15% na UCI.

Ente les midíes de prevención que s’aplicaríen na fase tres taríen llimitar les reuniones a un másimu de seis persones, recomendación de nun salir del domiciliu salvo que seya necesario, llimitar el contactu social, fomentando’l teletrabayu y clases online, reducción d’aforu de los locales y mercadillos, y un horariu d’apartura de los comercio non esenciales hasta les 23.00.
23/10/2020
Salú aplica midíes adicionales pa ralentizar la tresmisión del coronavirus

La Conseyería de Salú va aplicar midíes adicionales pa ralentizar la tresmisión del coronavirus nuevu. Asina lo comunicó esti miércoles el conseyeru, Pablo Fernández Muñiz, al Comité de Coordinación d’Asturies frente al coronavirus nuevu. Muñiz esplicó qu’España «sigue en fase de contención» y precisó que «s’aumentó la sensibilidá del sistema de detección y midíes pa ralentizar la tresmisión de la enfermedá».

El Sespa repite los conseyos empobinaos a los profesionales, que consisten n’estremar les midíes d’hixene de manes, y l’usu de mázcares quirúrxiques pa pacientes con clínica respiratoria y el personal sanitario que los atiende. Amás, han usar l’equipu de protección individual pa realizar la toma de muestres a persones con sospecha de sufrir esta patoloxía. El personal considerao contactu estrechu va controlase polos servicios de prevención de riesgos llaborales del área sanitaria y de Vixilancia Epidemiolóxica.

Conseyos

El Sespa desaconseya a los profesionales l’asistencia a congresos, xornaes, seminarios y cursos de formación presenciales, sacante les sesiones clíniques de los servicios. Amás, el Serviciu de Salú retardó tola actividá docente nos centros sanitarios con casos positivos. Tamién restrinxó temporalmente la presencia de visitadores médicos y voluntarios a hospitales y centros de salú. Aparte, decidió llimitar l’acompañamientu de pacientes hospitalizaos o n’Urxencies a un únicu familiar que nun presente fiebre nin síntomes respiratorios agudos.

Pa prevenir la tresmisión de la infección, les autoridaes sanitaries aconseyen la llavadura frecuente de manes con agua y xabón, amás d’usar el flexu del coldu o pañuelos desechables d’un solu usu pa tusir o espirriar. La ciudadanía dispón d’información sobre esti virus respiratoriu nuevu na páxina web Astursalud. El Principáu va siguir informando de la evolución de la situación cuando haya novedaes.

05/03/2020
L’andanciu de gripe empieza a menguar

La incidencia del gripe empezó a menguar na cuarta selmana del añu hasta algamar una tasa de 485,8 casos por cien mil habitantes. La situación considérase d’intensidá media. L’amenorgamientu de la onda epidémica produzse por igual en toles edaes, sacante nel grupu de 5 a 14 años, nel qu’aumenta llixeramente. El virus gripal predominante ye l’A, con más del 95% de los casos.

Al respective de los ingresos, el HUCA, como hospital centinela d’Asturies, rexistró hasta esta selmana 237 ingresos por esta causa, de los cualos 86 fueron graves. Nel conxuntu de la comunidá, les hospitalizaciones fueron 729. La mayor parte de los ingresos y nes afectaciones más acusaes presentaben dalgún factor de riesgu y nun taben vacunaos. Tocantes a los casos graves, la incidencia aumenta nes dos últimes selmanes y vien acomuñada al picu de la onda epidémica que ta percima de la temporada del añu pasáu, pero de forma asemeyada a les de 2016-2017 y 2017-2018.

Los datos nacionales reflexen una incidencia en fase d’ascensu, pero con ciertu enclín a la estabilización. La intensidá ye media y nótase un ascensu significativu de les tases d’incidencia nos grupos de 5 a14 años y de 15 a 64, permaneciendo estables nel restu de los grupos d’edá. Asturies, xunto con Andalucía, Canaries, Castiella La Mancha, Estremadura y Madrid tán n’intensidá media d’espardimientu, ente que Melilla, La Rioxa y Navarra tán n’alta.

Vacunación y encamientos

Na cuarta selmana de xineru los asturianos siguen vacunándose y yá son 544 persones más les que se protexen contra’l gripe. Por edaes, cinco son neños, 271 adultos menores de 65 años, 268 superen los 65 y otros 60 son muyeres embarazaes. No que va de campaña vacunáronse 206.832 persones, que suponen 4173 más al respective de la campaña del añu pasáu.

La llavadura frecuente de manos con agua y xabón ye una de les midíes más eficaces para evitar les andaes de gripe. Les autoridaes sanitaries encamienten caltener una bona ventilación de los espacios zarraos. En casu de tusir o espirriar tienen d’utilizase pañuelos de papel d’un solu usu pa tapar la boca y la ñariz, o bien el buecu del coldu para evitar contaminar les manes. Coles mesmes, suxúrese llimpiar con frecuencia les superficies que se toquen coles manes como los pomos de les puertes, interruptores etc. Los síntomes del gripe son malestar xeneral, una fiebre alta súbita y tos, que se trata con antitérmicos. Los antibióticos nun curen el gripe.

31/01/2020