Xixón al día

Etiqueta: solidaridá

  • L’Axencia Asturiana de Cooperación al Desenvolvimientu llama a facer donaciones en solidaridá con Ucraína

    L’Axencia Asturiana de Cooperación al Desenvolvimientu llama a facer donaciones en solidaridá con Ucraína

    L’Axencia Asturiana de Cooperación al Desenvolvimientu aconseya a la ciudadanía que quiera collaborar cola población ucraíno afectao pola invasión militar de Rusia que canalice les sos acciones de solidaridá al traviés de donaciones de fondos a les organizaciones humanitaries especializaes que tán trabayando ellí sobre’l terrén.

    Esti ye’l mecanismu más eficiente y eficaz pa facer llegar les ayudes nel marcu de los principios de la bona acción humanitaria.

    A títulu informativu y por si pue ser d’utilidá, d’alcuerdu colos conseyos de l’Axencia Española de Cooperación, facilitamos los enllaces a posibles víes de canalización de les ayudes al traviés de les ONG y organismos internacionales presentes na zona:

    Delles de les organizaciones non gubernamentales pal desenvolvimientu (Ongd) que trabayen actualmente n’Ucraína o zones fronterices y que tienen delegación n’Asturies son:

    L’Axencia Asturiana de Cooperación valora les muestres constantes de solidaridá de la población asturiano que se traducen na ufierta de munches formes d’ayuda. Sicasí, la capacidá de recibir, almacenar y xestionar donaciones n’especie ye perlimitada, polo que tanto les ONG como los organismos internacionales tán llanzando llamamientos y pidimientos d’ayuda que s’enconten nun análisis de necesidaes y la estimación d’un presupuestu pa la so cobertura, respuesta que s’afái a les necesidaes de la población afectao.

  • Conceyu País Llionés amuesa la so solidaridá a Inaciu Galán polos ataques recibíos nes últimes selmanes

    Conceyu País Llionés amuesa la so solidaridá a Inaciu Galán polos ataques recibíos nes últimes selmanes

    L’agrupación leonesista Conceyu País Llionés amuesa la so solidaridá y sofitu al periodista, escritor, profesor y activista asturianu Inaciu Galán, y tamién a la productora Cuatro Gotes, nun actu nel que l’asociación argumentan que tán «afrellaos pola estrema derecha nel so intentu d’amedranar el so ponderatible trabayu por oficializar l’asturlleonés na hermana Asturies, formosa llingua que compartimos asturianos y lleoneses.»

    Dende Conceyu País Llionés, amás de treslladar la solidaridá a Galán, llancen un mensaxe d’acción: «Ye’l momentu de que les asociaciones d’Asturies, Estremadura, Aragón y País Lleonés que defendemos la dignidá, espardimientu, enseñanza y oficialidá de les nueses llingües xunamos les nueses fuerces con cuenta de repeler les amenaces que, lamentablemente y con esmolición, reparamos que van a más. Agora más que nunca, faise imprescindible acciones conxuntes de los cuatro territorios qu’amplifiquen les demandes llingüístiques. Coles mesmes, encamentamos a les autoridaes competentes a qu’actúen de momentu, ensin contemplaciones nin miramientos, contra los violentos y lleven énte la Xusticia a aquellos que’l so únicu llinguaxe ye la intimidación, l’amenaza y l’odiu al que piensa esto ye distintu, fala xuna llingua minoritaria o defenden los nuesos derechos individuales y colectivos.»

    Nun comunicáu enllenu de pidimientu de xusticia, Conceyu País Llionés fai un llamamientu d’exerciciu de responsabilidá a los partíos políticos que tán axustando la oficialidá del asturlleonés n’Asturies, por aparcar los sos salvables diferencies y eses reivindicaciones que nada tienen que ver cola diversidá llingüística.

    Con estes pallabres de sofitu y acción, zarraba l’asociación el so comunicáu:»Si nun espolleta la “oficialidá” van ganar los violentos, el deu acusador, los postulaos fascistes que taracen los derechos llingüísticos d’una parte de los asturianos y asturianes. Tenemos bien claro que cola “oficialidá” n’Asturies, la nuesa llingua va tener un fuerte impulsu nel País Lleonés, onde ye sistemáticamente condergada al ostracismu per parte de la Xunta de Castiella y Llión, frayando l’Artículu 5.2 del Títulu Preliminar del Estatutu d’Autonomía. Conceyu País Llionés, colos sos cartelos de sofitu, alzando les banderes lleoneses, tuvo presente na manifestación pola “Oficialidá” celebrada n’Uviéu’l 16 d’ochobre de 2021, y de nuevu, como respuesta a les agresiones de los antitolerantes, ponse a disposición d’Inaciu Galán pa collaborar en cuanto precise y asina compensar a los que pretenden callanos la nuesa llingua, llevala a la desapaición. Énte l’ataque contra la nuesa llingua, esiximos OFICIALIDÁ; frente a los actos violentos contra Inaciu Galán y Cuatro Gotes, amosemos UNIDÁ.»

  • Asturies necesita sangre de los grupos 0- a A-

    Asturies necesita sangre de los grupos 0- a A-

    Asturies necesita sangre de los grupos 0- y A-. El Centru Comunitariu de Sangre y Texíos d’Asturies ta acabante de facer un llamáu al traviés de les redes sociales nes qu’alerta de la escasez de reserves. L’organismu encamienta a tolos donantes d’estos grupos a allegase a un centru de donación. La epidemia de gripe ta enllenando les urxencies de los hospitales y la necesidá de sangre medra.

    Les persones interesaes pueden contribuyir nel puntu fixu de donación asitiáu na cai Donato Argüelles, 20. Esti centru permanez abiertu los llunes y miércoles n’horariu de 16 a 21 hores y los vienres de 10 a 20 hores. Tamién puede donase nel hospital de la Cruz Roja (C/. Uría nº 37) los llunes, miércoles y vienres de 11 a 14 hores. Amás, podrá contribuyise averándose a la unidá móvil de donación, qu’el xueves y el vienres de la selmana que vien va tar na cai Manuel R. Álvarez, en La Calzada.

    El Centru Comunitariu de Sangre y Texíos cunta con otros dos puntos fixos de donación n’Asturies: n’Uviéu, na cai Emilio Rodríguez Vigil, s/n (de llunes a vienres de 8 a 21 hores y sábados de 8 a 14 hores); y n’Avilés, na plaza Santiago López, 1 (martes de 16 a 21 hores). Tola información actualizada de los puntos fixos de donación de sangre y la ubicación de les unidaes móviles puede consultase na páxina web www.donasturias.org.