Xixón al día

Etiqueta: sucesos

  • Rescaten a una muyer que quedó enriscada nun pedreru na sablera d’Aguilar

    Rescaten a una muyer que quedó enriscada nun pedreru na sablera d’Aguilar

    Efectivos d’emerxencies rescataron esti martes a una muyer que quedó enriscada nun pedreru, en siendo arrastrada pela corriente na sablera d’Aguilar, en Muros. Na operación intervino l’helicópteru medicalizáu de Bomberos d’Asturies. La muyer, d’aprosimao 35 años, foi evacuada del llugar, acompañada d’un bomberu-rescatador, por aciu una operación de grúa na que s’esplegaron 25 metros de cable. Atopábase acompañada por un bañista que tornó a la sablera pelos sos propios medios. L’afectada atopábase bien nerviosa en siendo arrastrada pela corriente nun pequena llancha neumática. Foi atendida nel sable, onde aterrizó l’helicópteru. Por prevención foi treslladada al Hospital San Agustín d’Avilés n’una ambulancia de soporte vital básicu movilizada pol SAMU (Serviciu d’Atención Médica Urxente).

    El Centru de Coordinación d’Emerxencies del 112 Asturies recibió l’avisu a les 19.37 hores. Na llamada indicaben qu’había trés bañistes nun flotador con problemes pa salir. La corriente arrastráralos y xubiéronse a unes roques. Tratábase d’una muyer y dos neños. A eses hores el serviciu de salvamentu yá rematara.

    La Sala 112 del SEPA movilizó al Grupu de Rescate col helicópteru medicalizáu, pasó la llamada al SAMU ya informó a la Guardia Civil. A les 19.41 hores, dende la sablera, informen que los neños yá fueron rescataos y un surfista atópase falando cola muyer que ta bien nerviosa y nun quier soltase de les roques. A les 20.17 hores el Grupu de Rescate comunica que yá rescató a la muyer para la que la Guardia Civil, al traviés del SAMU, va solicitar una ambulancia. Ellos tornen a la so base en Llamorgal onde aterricen a les 20.30 hores.

  • Rescaten a una familia belga que se desnortió en monte cuando intentaba llegar al Urriellu

    Rescaten a una familia belga que se desnortió en monte cuando intentaba llegar al Urriellu

    La nube sosprendiólos en plenu monte. Efectivos d’emerxencies alcontraron y rescataron a una familia que se desnortió cuando se dirixíen al refuxu del Urriellu, en Cabrales, onde pretendíen faer nueche. Los cuatro afectaos, un varón de 55 años, una muyer de 54, una muyer de 19 años y un menor de 16, fueron alcontraos a les 02.40 hores d’esta madrugada nel valle de Les Moñetes. El grupu de rescate formáu por dos bomberos-rescatadores y una médica-rescatadora, llogró llegar hasta ellos en caminando más de cuatro hores y media dende la Vega del Toru. Hasta ellí llevólos un vecín de Sotres. Nesta localidá tuvo qu’aterrizar l’helicópteru medicalizáu, trés una complicada maniobra por cuenta d’una nube lléctrica.

    Los cuatro afectaos, el matrimoniu y los sos dos fíos, d’orixe belga, pasaron la nueche acompañaos pol equipu que-yos facilitó ropa d’abrigu y bébores calientes. A primer hora d’esta mañana fueron treslladaos nel helicópteru hasta Fuente Dé, en Cantabria, onde dexaran el so vehículu.

    El Centru de Coordinación d’Emerxencies del 112 Asturies recibió l’avisu a les 18.19 hores del martes. Na llamada esplicaben que yeren un grupu de cuatro persones que s’atopaben desnortiaes na parte alta del valle de Les Moñetes. La Sala 112 del SEPA movilizó darréu al Grupu de Rescate col helicópteru medicalizáu yá informó de la intervención a los servicios d’emerxencies de Cantabria y Castiella y Llión y a la Guardia Civil.

    L’equipu de rescate facilitó-yos ropa d’abrigu y bébores calientes. / SEPA

    A les 19.20 hores los afectaos indiquen que tán escuchando l’helicópteru bien cerca pero hai mala visibilidá. Nesi momentu desamarra una nube eléctrica con vientu y xarazu qu’obliga al equipu a abandonar la zona. Treslládense a Sotres a la espera de poder retomar la intervención. Daes condiciones meteorolóxiques l’equipu decide empecipiar el rescate a pie. Los afectaos taben cansaos y nun llevaben ropa d’abrigu. Un vecín tresllada a los dos rescatadores y a la médica, en touterrén, hasta Vega del Tornu. Dende ellí empiecen a caminar un total de cuatro hores y media, dos d’elles so l’agua, hasta atopar a los senderistes.

    El 112 tuvo en contactu permanente cola familia. A les 01.09 hores el grupu de rescate que señala que tien a la vista a los senderistes pero tienen que dar un rodiu hasta llegar a ellos. Los afectaos tamién tán viendo les lluces de los rescatadores. Una hora y media más tarde yá s’atopen toos xuntos. L’equipu xubiera cobertores térmicos, ropa d’abrigu y unos termos con bébores calientes pa poder esperar nel llugar a que los fora a recoyer l’helicópteru medicalizáu.

  • Rescaten a un pescador que cayó al ríu en Ḷḷena

    Rescaten a un pescador que cayó al ríu en Ḷḷena

    Efectivos de Bomberos d’Asturies, a bordo del helicóperu medicalizáu, rescataron a un pescador mancáu, en sufriendo una cayida nel ríu, en Samiguel, en Ḷḷena. L’afectáu, de 65 años, presentaba politraumatismos y foi sacupáu al Hospital Universitariu Central d’Asturies (HUCA). El Centru de Coordinación d’Emerxencies recibió l’avisu a les 14:32 hores al traviés del 112 Madrid. Na llamada indicóse qu’un pescador cayera mientres taba pescando. Darréu movilizóse a cinco efectivos, que se treslladaron col furgón multisocorro y un vehículu llixeru y al equipu de rescate a bordu de l’aeronave medicalizada.

    Una vegada na zona, los bomberos comprobaron que’l pescador atopábase nun espaciu de mal accesu. Al paecer l’afectáu sufrió una cayida d’unos 10 metros. Los efectivos inmovilizaron al varón y cola camiya nial lo tresportaron pol calce del ríu hasta un claru que permitiera la intervención del grupu de rescate. El varón mancáu foi atendíu pola médica-rescatadora. De siguío dar en la execución d’una operación de grúa, enzancada pola trupa vexetación y l’arboláu de la zona, pa sacar al mancáu en camiya, al pie de la médica. Una vegada a bordo del helicópteru foi treslladáu al HUCA.

  • Treslladen al HUCA a un escalador mancáu en Cantabria

    Treslladen al HUCA a un escalador mancáu en Cantabria

    Efectivos de Bomberos d’Asturies rescataron esti vienres a un escalador mancáu en Camaleño, en Cantabria. L’afectáu, un home de 62 años, que presentaba politraumatismos, foi treslladáu al Hospital Universitariu Central d’Asturies (HUCA).

    El Centru de Coordinación d’Emerxencies recibió’l pidimientu de collaboración del 112 Cantabria p’allegase a un rescate nesta zona. La llamada fízose a les 13:31 hores. Esplicábase qu’había un montañeru mancáu en Camaleño, nel Macizu Oriental de los Picos d’Europa, ente’l Picu Cortés y Tabla Lechugales. Darráu movilizóse al equipu de rescate de Bomberos del SEPA, a bordo de l’aeronave medicalizada.

    L’afectáu, al paecer, sufriera una cayida d’unos 30 metros, mientres esguilaba una paré del monte y quedó colgando de les cuerdes. L’equipu de rescate de Bomberos del SEPA sacó al varón de la zona mediante una operación de grúa pa treslladalu a una collada. Una vegada en tierra, la médica-rescatadora atendiólu pa la so posterior evacuación al Hospital Universitariu Central d’Asturies (HUCA). Nel treslláu utilizóse’l colchón de vacíu p’asegurar la mayor inmovilización posible del escalador.

  • Un incendiu xamusca una nave en Les Regueres

    Un incendiu xamusca una nave en Les Regueres

    Efectivos de bomberos escastaron l’incendiu declaráu esti miércoles nuna nave de maquinaria allugada na localidá de Premoñu, en Les Regueres. La quema xamuscó por completu l’interior de la nave con diversu material y maquinaria. Les lluminaries del techu tamién resultaron afectaes. Amás consiguióse llibrar de les llapaes una pala cargadora.

    El Centru de Coordinación d’Emerxencies del 112 Asturies recibió l’avisu a les 21.27 hores. Na llamada, fecha por un emplegáu de la nave de maquinaria, señalaben qu’había una quema nes instalaciones. Dientro de la nave de 200 metros cuadraos había una pala, aceite quemao y dalguna batería. Taben quemando, señalaron, los llaterales y les estanteríes. Nun había persones afectaes.

    A les 22.16 los bomberos dieron la quema por controlada y parte de la dotación de Llamorgal tornó a la so base. El restu permaneció nes instalaciones realizando xeres de ventilación y enfriamientu hasta les 23.28 hores que retiraron para tornar a la so base los bomberos movíos dende Grau.

  • Dos mancaos nun accidente de tráficu en Balmonte

    Dos mancaos nun accidente de tráficu en Balmonte

    Dos persones resultaron mancaes, una leve y otra bien grave, nun accidente de tráficu na localidá d’Abeduriu, en Balmonte. Los fechos tuvieron llugar cuando’l vehículu touterrén nel que viaxaben salióse de la via y cayó unos 20 metros per un desnivel.

    El mancáu de mayor considerancia ye un varón de 80 años. Por cuenta de más pruebes y hasta nueva valoración médica, presentaba politrauma de calter bien grave. Foi atendíu nel llugar del accidente y treslladáu n’helicópteru al Hospital Universitariu Central d’Asturies (HUCA). La otra ferida ye una muyer de la mesma edá. Foi treslladada tamién al HUCA n’ambulancia. A falta de más exames el so pronósticu ye leve.

    L’home quedara atrapáu nel vehículu y foi escarceláu por un grupu de vecinos. El Centru de Coordinación d’Emerxencies del 112 Asturies recibió l’avisu a les 14.20 hores. Na llamada señalaben qu’un señor cayera con un touterrén a un prau y taba dientro del vehículu.

  • Muerre un trabayador en quedando atrapáu por una piedra d’unes 3 tonelaes

    Muerre un trabayador en quedando atrapáu por una piedra d’unes 3 tonelaes

    Un trabayador perdió la vida en quedando atrapáu por una piedra de gran tamañu, d’ente 2 o 3 tonelaes, cuando s’atopaba cortando madera na localidá de Nuñez, en Corvera. L’equipu médicu de la UVI-móvil d’Avilés namás pudo confirmar el so fallecimientu. Los restos mortales del fináu, un varón de 40 años, tuvieron que ser lliberaos por efectivos de Bomberos del Serviciu d’Emerxencies del Principáu d’Asturies (SEPA) con base nel parque d’Avilés. Los bomberos, con ayuda d’una eslinga y una pala, recuperaron el cuerpu ensin vida del fináu. Darréu instalaron un polipastu y cola camiya nial izáronlu hasta una pista forestal onde taba trabayando una máquina escavadora.

    La sala del 112 Asturies recibió l’avisu a les 14.59 hores. Na llamada indicaben qu’un trabayador mancárase en cayéndo-y una piedra de gran tamañu. Taba atrapáu nuna zona de mal accesu. Dende’l llugar del accidente hasta la pista forestal hai unos 100 metros. Darréu movilizóse una dotación de bomberos del parque avilesín y pasó l’avisu al SAMU qu’unvió la UVI-móvil d’Avilés y solicitó la intervención del helicópteru medicalizáu. L’equipu nun llegó a intervenir, anulóse la so activación en vuelu, en confirmando’l médicu de la UVI que la persona finara.

    Tamién s’informó a la Policía Local y a la Guardia Civil que, darréu, fíxose cargu de los trámites pa proceder al llevantamientu del cadabre. Como marca’l protocolu, amás, comunicóse lo asocedío a l’autoridá llaboral competente. Rematada la intervención, los bomberos retiren del llugar pa tornar a la so base a les 18.14 hores.

  • Mancáu grave en volcando col quad en Bimenes

    Mancáu grave en volcando col quad en Bimenes

    Un home resultó mancáu de considerancia n’entornando col quad que conducía. Los fechos tuvieron llugar, en circunstancies que se desconocen, nuna pista forestal ente les localidaes de Navagua y Fayacaba, en Bimenes. L’afectáu, un varón de 59 años, foi evacuáu al Hospital Universitariu Central d’Asturies (HUCA), n’Uviéu, con traumatismu torácicu de pronósticu reserváu, por cuenta de más pruebes y hasta nueva valoración media.

    El mancáu foi treslladáu dende’l llugar del accidente, ensin accesu p’ambulancia, hasta’l so alcuentru colos servicios sanitarios inmovilizáu, nuna tabla de rescate. El Centru de Coordinación d’Emerxencies del 112 Asturies recibió l’avisu a les 16.03 hores. Na llamada señalaben que una persona resultara mancada n’entornando’l quad que conducía entre Fayacaba y Melendreros. Atopábase nuna pista forestal ensin accesu rodáu pa una ambulancia.

    La Sala 112 del SEPA pasó l’avisu al SAMU que solicitó la intervención del helicópteru medicalizáu de Bomberos d’Asturies y del Grupu de Rescate del que forma parte un médicu rescatador. Daes les condiciones meteorolóxiques na zona l’equipu nun podía intervenir. Paralelamente yá se movilizara, per tierra, una dotación de bomberos. A les 17.16 hores los bomberos informen que yá tán baxando col mancáu nel touterrén al alcuentru del equipu sanitariu.

  • Dos mozos mancaos, unu d’ellos graves, al estrellase en coche contra un muriu en Mieres

    Dos mozos mancaos, unu d’ellos graves, al estrellase en coche contra un muriu en Mieres

    Dos mozos resultaron mancaos de diversa considerancia, unu mui grave y otru leve, en topetando contra un muriu’l coche nel que viaxaben. Los fechos tuvieron llugar, en circunstancies que se desconocen, na cai Bazuelo, na redolada del campus de Mieres. El firíu de mayor considerancia ye un varón de 19 años d’edá. Presentaba politrauma de pronósticu bien grave por cuenta de mas pruebes y hasta nueva valoración médica. L’equipu médicu de la UVI-móvil de Llangréu permaneció alredor d’una hora nel llugar estabilizándolu enantes de treslladalu al Hospital Universitariu Central d’Asturies (HUCA) n’Uviéu. L’otru mancáu, otru varón de 19 años, conductor del turismu, foi evacuáu al Hospital Álvarez Buylla de Mieres. A falta de más exames presentaba luxación d’un costazu.

    El firíu de mayor gravedá viaxaba como acompañante. Tuvo que ser escarceláu por efectivos de Bomberos. Xuntu al xefe de zona centro retiraron la puerta del llateral derechu y abrieron buecu pa poder lliberar les estremidaes inferiores. En coordinación col equipu sanitariu sacáronlu, inmovilizáu, cola tabla de rescate.

    El Centru de Coordinación d’Emerxencies del 112 Asturies recibió l’avisu a les 19.01 hores. Na llamada señalaben qu’un coche topetara contra un muriu. Lo taba viendo dende la so casa. Había persones mancaes que creíen nun podíen salir del turismu. La Sala 112 del SEPA movilizó a los bomberos y al xefe de zona centro y pasó l’avisu al SAMU qu’unvió los medios yá citaos. Amás, informó de lo asocedío a la Policía Local y Nacional y a la Guardia Civil. Rematada la escarcelación y en realizando xeres de seguridá y llimpieza de la calzada, a les 20.02 hores, retiraron del llugar para tornar a la so base.

  • Rescaten a un ciclista que cayó por un desnivel en Lada

    Rescaten a un ciclista que cayó por un desnivel en Lada

    Efectivos de bomberos rescataron esti miércoles a un ciclista que se cayó por un desnivel a un kilómetru y mediu de la localidá de Lada, en Llangréu. El mancáu, un home de de 52 años, presentaba policontusiones de pronósticu reserváu por cuenta de más pruebes y hasta nueva valoración médica. Foi atendíu pol equipu médicu de la UVI-móvil de Llangréu y treslladáu al Hospital Valle del Nalón.

    L’home foi rescatáu polos bomberos del llugar onde cayera. Tanto pa poder aportar a él como pa la so evacuación tuvieron que montar un sistema de polipastu pa, finalmente, sacalu inmovilizáu en camiya hasta la carretera onde esperaben los servicios sanitarios. La sala del 112 Asturies recibió l’avisu a les 13.00 hores. Na llamada señalaben qu’un ciclista cayera por un terremplén d’unos 20 metros. La Sala 112 del SEPA movilizó a los bomberos y pasó l’avisu al SAMU qu’unvió los medios yá citaos. Tamién informó a la Guardia Civil.