Efectivos de Bomberos d’Asturies rescataron esti vienres a un escalador mancáu en Camaleño, en Cantabria. L’afectáu, un home de 62 años, que presentaba politraumatismos, foi treslladáu al Hospital Universitariu Central d’Asturies (HUCA).
El Centru de Coordinación d’Emerxencies recibió’l pidimientu de collaboración del 112 Cantabria p’allegase a un rescate nesta zona. La llamada fízose a les 13:31 hores. Esplicábase qu’había un montañeru mancáu en Camaleño, nel Macizu Oriental de los Picos d’Europa, ente’l Picu Cortés y Tabla Lechugales. Darráu movilizóse al equipu de rescate de Bomberos del SEPA, a bordo de l’aeronave medicalizada.
L’afectáu, al paecer, sufriera una cayida d’unos 30 metros, mientres esguilaba una paré del monte y quedó colgando de les cuerdes. L’equipu de rescate de Bomberos del SEPA sacó al varón de la zona mediante una operación de grúa pa treslladalu a una collada. Una vegada en tierra, la médica-rescatadora atendiólu pa la so posterior evacuación al Hospital Universitariu Central d’Asturies (HUCA). Nel treslláu utilizóse’l colchón de vacíu p’asegurar la mayor inmovilización posible del escalador.
