Xixón al día

Etiqueta: sucesos

  • Un home de 58 años, intoxicáu por fumu nun incendiu en Cangues

    Un home de 58 años, intoxicáu por fumu nun incendiu en Cangues

    Un home de 58 años resultó afectáu por inhalación de fumu al quemase un sofá nun pisu de Cangues d’Onís. El sucesu producióse na vivienda del afectáu, situada na tercer planta d’un edificu de cuatro plantes asitiáu nel númberu 3 de l’avenida de Cuadonga. Según los datos facilitaos pol Serviciu d’Atención Médica Urxente (SAMU) el varón, de 58 años d’edá, foi atendíu pol equipu médicu de la UVI-móvil de Les Arriondes que darréu lu treslladó al Hospital del Oriente. Foi evacuáu con pronósticu reserváu, por cuenta de más pruebes y hasta nueva valoración médica.

    Hasta’l llugar movióse una dotación de Bomberos del Serviciu d’Emerxencies del Principáu d’Asturies (SEPA) con base nel parque cangués. Los bomberos apagaron la quema que se reactivara y sacaron el mueble fora de la vivienda que resultó afectada pol fumu.

    El Centru de Coordinación d’Emerxencies del 112 Asturies recibió l’avisu a les 00.35 hores. Na llamada indicaben que taba saliendo fumu de la tercer planta d’un edificiu de cuatro altores. Amás de movilizar a los bomberos ya informar al SAMU qu’unvió los medios sanitarios yá citaos, comunicóse lo asocedío a la Policía Local y a la Guardia Civil.

  • Un firíu nun atropellu en L’Arena

    Un firíu nun atropellu en L’Arena

    Un home resultó firíu esti meudía nun atropellu en L’Arena. Los fechos tuvieron llugar a les 12.31 hores. L’afectáu, un varón de 67 años, resultó mancáu de consideración cuando cruciaba indebidamente la cai Menéndez Pelayo, al altor del parque de la Fábrica del Gas. La víctima foi treslladada al Hospital de Cabueñes. El conductor del vehículu dio negativu nel control d’alcoholemia.

  • Ocho viaxeros mancaos nel choque d’un autobús urbanu

    Ocho viaxeros mancaos nel choque d’un autobús urbanu

    Ocho persones resultaron mancaes esti llunes nel choque d’un autobús d’Emtusa y un turismu nel barriu de Pumarin. Los fechos tuvieron llugar a les 16.15 hores na confluencia de l’avenida de la Constitución cola cai Ramón Areces por causes que se desconocen. Ocho viaxeros del autobús mancáronse nel accidente. Seis d’ellos acudieron a curase polos sos propios medios; los otros dos, ún d’ellos una muyer embarazada, fueron treslladaos al Hospital de Cabueñes.

  • Firida una muyer nun accidente de tráficu en Venta les Ranes

    Firida una muyer nun accidente de tráficu en Venta les Ranes

    Una muyer resultó mancada en saliéndose de la vía y entornar llateralmente el turismu que conducía. El sucesu producióse en circunstancies que se desconocen cuando circulaba pola N-632 al altor de Venta les Ranes, en Villaviciosa.

    Según los datos facilitaos pol Serviciu d’Atención Médica Urxente (SAMU), l’afectada, de 38 años d’edá, foi evacuada con policontusiones de pronósticu reserváu, por cuenta de más pruebes y hasta nueva valoración médica, al Hospital de Cabueñes. Foi atendida nel llugar del accidente pol equipu médicu de la UVI-móvil xixonesa.

    La ferida tuvo que ser escarcelada del interior del turismu por efectivos de Bomberos del Serviciu d’Emerxencies del Principáu d’Asturies. Pa lliberar a la muyer, que taba prindada contra’l volante y les piernes, cortaron parte del techu del turismu y retiraron el respaldu y l’asientu. Una vegada lliberada sacáronla, inmovilizada con collarín, con ayuda de la tabla de rescate.

    El Centru de Coordinación d’Emerxencies del 112 Asturies recibió l’avisu a les 21.12 hores del llunes. Na llamada indicaben qu’un coche entornara na carretera y había una persona mancada y atrapada. Amás de movilizar a los bomberos y pasar l’avisu al SAMU informar de lo asocedío a la Guardia Civil de Tráficu y a los responsables de caltenimientu de la vía de comunicación.

  • Arde un coche na autopista Y

    Arde un coche na autopista Y

    L’incendiu d’un vehículu na autopista Y ta provocando retenciones na circulación del tráficu nel centru d’Asturies. Según confirmaron fontes de la Guardia Civil a Europa Press, el fueu producióse por una avería mecánica dle vehículu. L’incidente tuvo llugar poco enantes de les siete de la tarde. El sucesu ta complicando la circulación na zona de La Cruciada. Nun hai que llamentar daños personales.

  • Empotra un taxi que conducía drogáu y ensin llicencia

    Empotra un taxi que conducía drogáu y ensin llicencia

    La Policía Local de Xixon identificó esta madrugada a un conductor que circulaba ensin llicencia municipal y baxo los efectos de les drogues. El sucesos producióse a les dos de la madrugada n’avenida Pablo Iglesias. Una patrulla intervino depués de qu’un taxi que topetara contra dos vehículos aparcaos, quedando parcialmente sobro ellos.

    Los axentes identificaron al conductor y darréu ficiéron-y les pruebes reglamentaries n’alcohol y drogues, refundiando una resultancia positiva en cocaína y ḥaxís. L’home nun contaba con llicencia municipal pa conducir un taxi. Nun cachéu superficial interviénose-y una bolsa de supuesta cocaína y seis cachos de supuestu ḥaxís.

    El vehículu foi inmovilizáu y treslladáu al Depósitu Municipal. Amás, cursáronse les denuncies por conducir con presencia de drogues, por non caltener l’atención na conducción, por tenencia de drogues y por nun contar con permisu municipal de conductor de taxi. Según manifestó a los axentes despistóse por mirar una tablet mientres
    conducía.

  • Mancáu un ciclista que cayó cuando baxaba L’Angliru

    Mancáu un ciclista que cayó cuando baxaba L’Angliru

    Un ciclista de 38 años resultó mancáu esti miércoles depués de cayer cuando baxaba L’Angliru, en Riosa. L’afectáu, un varón de 38 años d’edá, presentaba politrauma de pronósticu reserváu. Foi atendíu nel llugar del accidente pol médicu-rescatador del equipu de bomberos. Darréu, foi evacuáu n’ambulancia hasta la zona onde aterrizó l’helicópteru del Serviciu d’Emerxencies del Principáu d’Asturies (SEPA). La borrina torgó llegar directamente al accidentáu y l’aeronave medicalizada tuvo qu’aterrizar nun prau a unos dos kilómetros del incidente.

    Una patrulla de la Guardia Civil de Tráficu averó al médicu-rescatador y a unu de los bomberos-rescatadores hasta l’accidentáu. En prestándo-y asistencia solicitóse una ambulancia pa poder baxalo hasta l’helicópteru. Hasta’l llugar tamién se movió l’equipu d’Atención Primaria de Riosa.

    El Centru de Coordinación d’Emerxencies del 112 Asturies recibió l’avisu 12.16 hores. Un particular sollertaba de qu’un ciclista cayera baxando L’Angliru al altor del puntu kilométricu 8. La Sala 112 del SEPA pasó l’avisu al SAMU que solicitó la intervención del helicópteru medicalizáu de Bomberos y del Grupu de Rescate. Tamién s’informó a la Guardia Civil de Tráficu.

  • Firida una conductora al chocar contra un árbol en Siero

    Firida una conductora al chocar contra un árbol en Siero

    Una persona resultó mancada en saliéndose de la vía’l vehículu que conducía y chocar contra un árbol nel AS-17, na rotonda d’accesu dende l’A-66, en Siero. Según los datos facilitaos pol Serviciu d’Atención Médica Urxente (SAMU) la ferida, una muyer de 26 años d’edá, foi sacupada al Hospital Universitariu Central d’Asturies (HUCA), con policontusiones de pronósticu reserváu, por cuenta de más pruebes y hasta nueva valoración médica. Foi atendida nel llugar del accidente pol equipu médicu de la UVI-móvil d’Uviéu que darréu la treslladó al centru hospitalariu.

    La muyer tuvo que ser escarcelada del interior del turismu por efectivos de Bomberos del Serviciu d’Emerxencies del Principáu d’Asturies (SEPA) con base nel parque de Llamorgal. La operación resultó complexa debíu al estáu nel que quedó’l vehículu. N’estabilizándolo pa garantizar la seguridá de los intervinientes los bomberos abrieron-y güecu retirando trés de les pilastres del turismu y parte del techu. Amás, pa lliberala tuvieron que retirar parte del volante, del salpicaderu y del respaldu del coche. Nel turismu viaxaba un varón que salió pelos sos propios medios del coche y resultó ilesu.

    El Centru de Coordinación d’Emerxencies del 112-Asturies recibió l’avisu a les 04.51 hores. Na llamada señalaben qu’un turismu saliérase de la vía y quedara colgáu d’un árbol. Nel so interior, añadieron, había una persona atrapada. La Sala 112 del SEPA movilizó a bomberos del parque de Llamorgal y pasó l’avisu al SAMU qu’unvió los medios yá citaos. Amás informó de lo asocedío a la Guardia Civil. A les 05.38 hores los bomberos comuniquen que la muyer yá s’atopa na UVI-móvil. Rematada la intervención tornaron a la so base a les 06.19 hores.

  • Un trabayador, mancáu en siendo golpeáu por un árbol en Pravia

    Un trabayador, mancáu en siendo golpeáu por un árbol en Pravia

    Un trabayador resultó mancáu en siendo cutíu por un árbol y quedar zarráu na cabina d’una autocargardora de madera en Beifar, Pravia. Según los datos facilitaos pol Serviciu d’Atención Médica Urxente (SAMU) l’afectáu, un varón de 47 años, foi evacuáu al Hospital San Agustín d’Avilés con una quebra de miembru cimeru. Foi atendíu nel llugar del accidente pol equipu d’Atención Primaria de Pravia.

    El mancáu tuvo que ser rescatáu del interior de la cabina por efectivos de Bomberos del Serviciu d’Emerxencies del Principáu d’Asturies (SEPA) con base nel parque de Pravia. N’asegurando’l vehículu y la carga, los bomberos movieron escontra tras el tueru y lliberaron al afectáu con ayuda de la tabla de rescate.

    El Centru de Coordinación d’Emerxencies del 112 Asturies recibió l’avisu a les 13.26 hores. Na llamada señalaben que taben trabayando nun monte con un autocargador y un árbol travesara la cabina de la máquina. El so conductor recibiera un golpe y nun podía salir.
    Amás de pasar l’avisu al SAMU y movilizar a los bomberos, la sala 112 del SEPA comunicó lo asocedío a l’autoridá llaboral y a la Guardia Civil. A les 14.13 hores, dende l’incidente, los bomberos comuniquen que la persona yá foi sacupada a l’ambulancia. Rematada la intervención retiraron para tornar al so parque a les 14.49 hores.

  • Mancáu por quemadures nel incendiu d’un pisu n’Avilés

    Mancáu por quemadures nel incendiu d’un pisu n’Avilés

    Un home de 36 años resultó mancáu por quemadures la pasada nueche al declarase un incendiu nun pisu d’Avilés. Efectivos de Bomberos del Serviciu d’Emerxencies del Principáu d’Asturies (SEPA), con base nos parques d’Avilés y Pravia, escastaron el fueu na vivienda afectada, asitiada na tercer planta d’un edificiu de 9 plantes del númberu 29 de l’Avenida de la Constitución.

    La quema xamuscó una habitación de la vivienda que resultó afectada pol fumu na so totalidá. Según los datos facilitaos pol Serviciu d’Atención Médica Urxente(SAMU) el mancáu, un varón de 36 años d’edá, foi evacuáu al Hospital Universitariu Central d’Asturies (HUCA), n’Uviéu, con pronósticu reserváu, por cuenta de más pruebes y hasta nueva valoración médica. Foi atendíu nel llugar pol equipu médicu de la UVI-móvil avilesina que darréu lu treslladó al centru hospitalariu. Hasta la zona tamién se movió una ambulancia de soporte vital básicu.

    Los bomberos retiraron parte d’un falsu techu y revisaron el llugar cola cámara d’imaxes térmiques

    El Centru de Coordinación d’Emerxencies del 112 Asturies recibió l’avisu a les 06.40 hores d’esta mañana. Na llamada sollertaben d’una quema na tercer planta d’un edificiu de 9 plantes. Esplicaron que taba quemando un pasiellu y había una persona mancada.

    La Sala 112 del SEPA activó a los bomberos del parque avilesín y otra dotación dende’l parque de Pravia. Amás, pasóse l’avisu al SAMU qu’unvió los medios citaos enantes ya informóse a la Policía Local y Nacional. A les 07.21 hores los bomberos comuniquen que l’incendiu ta escastáu. Pa escastar el fueu, amás d’instalar una llínea d’agua pel interior del inmueble, los bomberos tuvieron que trabayar colos equipos de respiración autónoma. Tamién retiraron parte d’un falsu techu y revisaron el llugar cola cámara d’imaxes térmiques.

    Nes xeres d’estinción participaron nueve efectivos de Bomberos del SEPA que treslladaron al llugar trés autobombas, un vehículu d’altor y unu de mandu. Rematada la intervención, a les 08.25 hores, retiraron del llugar para tornar a les sos respectives bases.