Xixón al día

Etiqueta: sucesos

  • Socorren a un montañeru que cayó en Casu

    Socorren a un montañeru que cayó en Casu

    Efectivos del Serviciu d’Emerxencies del Principáu d’Asturies (SEPA), a bordu del helicópteru medicalizáu, evacuaron a un varón de 65 años que resultó mancáu en sufriendo una cayida entre Felguerina y Infiesta, en Casu. L’afectáu presentaba policontusiones y una posible quebra del brazu esquierdu. Foi treslladáu al Hospital Universitariu Central d’Asturies (HUCA).

    El Centru de Coordinación d’Emerxencies recibió l’avisu a les 20:02 hores. Na llamada indicóse que yeren trés montañeros y unu d’ellos, un varón, cayera y nun podía siguir caminando. Darréu movilizóse al equipu de rescate a bordu de l’aeronave medicalizada del SEPA. El grupu de rescate alcontró al afectáu, que s’atopaba acompañáu por otres dos persones. N’atendiendolu foi evacuáu al HUCA.

    El grupu de rescate dio per rematada la intervención a la so llegada a base, a les 21:22 hores. La sala del 112 del SEPA informó del sucesu a la Guardia Civil y al Serviciu d’Atención Médica Urxente (SAMU).

  • Cai a les víes del tren dende un desnivel de 5 metros

    Cai a les víes del tren dende un desnivel de 5 metros

    Un ciclista de 25 años resultó mancáu de considerancia en cayendo unos cinco metros por un desnivel hasta les víes del tren en Xibares, en Carreño. Los fechos tuvieron llugar alredor de les 18 hores del xueves. El mozu atopábase na pista que pasa percima de los túneles del tren cuando, en circunstancies que se desconocen, cayó. Foi atendíu nel llugar del accidente pol equipu médicu de la UVI-móvil de Xixón que lu treslladó al Hospital Universitariu Central d’Asturies (HUCA), n’Uviéu. Por cuenta de más pruebes y hasta nueva valoración médica presentaba politrauma de calter grave.

    Hasta’l llugar del accidente movióse una dotación de Bomberes del Serviciu d’Emerxencies del Principáu d’Asturies (SEPA) con base nel parque d’Avilés. Los bomberos cortaron con una cizalla un candáu pa poder abrir una portiella pola qu’aportar, a cuerpu, hasta’l llugar onde s’atopaba l’afectáu. En collaboración col serviciu sanitariu que lu inmovilizó con tabla de rescate y colchón de vacíu, porteáronlu cola camiya nial, unos 60 metros, hasta la UVI-móvil.

    La sala del 112 Asturies recibió l’avisu a les 18.07 hores. Na llamada indicaben qu’un ciclista cayera dellos metros escontra les víes del tren. Nun había accesu. Amás de pasar l’avisu al SAMU, la Sala 112 del SEPA movilizó a los bomberos del parque avilesín ya informó a la Guardia Civil y a Alministrador d’Infraestructures Ferroviaries (ADIF) qu’indicó paró tola circulación hasta que se rescatara al mancáu. El corte afectó a tres trenes.

    A les 19.02 los bomberos comuniquen que yá sacuparon al afectáu, información que se tresllada a ADIF por que vuelva a entamar la circulación. Parte de la dotación torna a la so base y el restu permanez nel llugar hasta les 19.34 hores, momentu nel que la UVI-móvil sale del incidente escontra’l centru hospitalariu.

  • Un camioneru muerre arolláu por una carretilla en Castropol

    Un camioneru muerre arolláu por una carretilla en Castropol

    Un camioneru de 52 años perdió la vida en pasándo-y percima una carretilla, en circunstancies que se desconocen. La víctima alcontrábase nuna empresa de productos y servicios agrarios allugada nel polígonu de Barres, en Castropol. Hasta’l llugar de los fechos desplazóse l’equipu d’atención primaria d’A Veiga con ambulancia de soporte vital básicu y un equipu médicu de la UVI-móvil de Xarrio. Los sanitarios tuvieron practicándo-y maniobres de reanimación cardiopulmonar avanzada mientres una hora, pero namás pudieron confirmar el so fallecimientu.

    El Centru de Coordinación d’Emerxencies del 112 Asturies recibió l’avisu a les 06.59 hores. Na llamada señalaben qu’un trabayador mancárase en pasándo-y un vehículu percima. Nun taba atrapáu. La Sala 112 del SEPA pasó l’avisu al SAMU qu’unvió los medios yá citaos y comunicó lo asocedío a l’autoridá llaboral competente y a la Guardia Civil.

  • Rescaten a un home que se mancara cuando practicaba barranquismu en Ponga

    Rescaten a un home que se mancara cuando practicaba barranquismu en Ponga

    Efectivos del serviciu d’emerxencies, a bordu del helicópteru medicalizáu, sacuparon esti domingu a un varón que resultó mancáu mientres practicaba barranquismo en Carangres, en Ponga. L’afectáu, que presentaba una posible mancadura de tibia y peroné, foi evacuáu al Hospital Comarcal de Les Arriondes.

    El Centru de Coordinación d’Emerxencies recibió l’avisu a les 13:33 hores. Na llamada esplicóse que yeren un grupu de persones practicando barranquismu y unu d’ellos mancárase nun pie. Inmovilizáron-y la estremidá y sacáronlu a una zona segura. Nun había accesu rodáu hasta’l llugar nel que s’atopaben. Darréu, movilizóse al equipu de rescate de Bomberos del SEPA, a bordu del helicópteru medicalizáu, que nesi momentu taba concluyendo una intervención en Llanera.

    Por cuenta de la dificultá d’accesu, executáronse dos operaciones de grúa d’entrada pa un bomberu-rescatador y la médica-rescatadora. Una vegada col afectáu, atendieronlu suministrándo-y -y analxesia ya inmovilizándo-y la pierna que presentaba una posible quebra de tibia y peroné. Pa ello asitióse-y una férula neumática y una férula ríxida. Al paecer l’afectáu sufrió una cayida mientres se movía pela zona cimera del ribayu, escontra l’espaciu correspondiente, a lo que sería’l cuartu y quintu rápel.

    Por aciu una operación de grúa, la médica-rescatadora salió de la zona, xuntu al varón mancáu, col triángulu de rescate. Una vegada tuvieron toos nel helicópteru foi treslladáu al Hospital de Les Arriondes.

  • Sancionaos los conductores d’una bicicleta y un patinete en topetando y dar positivu n’alcohol

    Sancionaos los conductores d’una bicicleta y un patinete en topetando y dar positivu n’alcohol

    La Policía Local de Xixón sancionó esti sábadu a los conductores d’una bicicleta y un patinete eléctricu en topetando y dar positivu n’alcohol. Asocedió a les 01:20 de la madrugada na cai Francisco de Paula Xovellanos. Les tases algamaron los 0’98 mg/l y 0’80 mg/l d’alcohol en sangre. Los vehículos fueron inmovilizaos y treslladaos al depósitu.

    Per otru llau, a les 20.00 hores de la tarde del sábadu, denuncióse a 19 mozos que taben de fiesta nun baxu de cai Allegría por saltase les midíes impuestes pol decretu d’estáu d’alarma. Amás, la Policía denunció a un camareru de la cai Santa Lucía que nun llevaba mázcaru y que, según un testigu, nun llimpiaba les meses. Tamién a otros trés establecimientos de les cais Consolación, Carretera del Obispu, y Enrique Martínez por entepasase nel horariu d’apertura. Les persones que taben nel interior nun llevaben nin mázcaru nin guardaben la distancia de seguranza. Por esti motivu fueron sancionaes un total de 42 persones.

    Coles mesmes, a les 12.00 de la mañana, un home foi deteníu nel esterior de la Cocina Económica por frayar una orde d’alloñamientu.

  • Rescaten ilesu a un escursionista que se perdió en Morcín

    Rescaten ilesu a un escursionista que se perdió en Morcín

    Efectivos del grupu de rescate de bomberos, a bordu del helicópteru medicalizáu, rescató ilesu esti domingu a un escursionista que se perdió mientres faía la ruta circular de La Gamonal, en Morcín. El varón, que taba en perfectu estáu, foi alcontráu na fastera oeste de La Gamonal. El Centru de Coordinación d’Emerxencies recibió l’avisu a les 17:25 hores. La llamada fízola l’afectáu qu’esplicó que taba bien, pero perdiera’l camín. Darráu movilizóse al equipu de rescate, a bordu de l’aeronave medicalizada.

    Una vegada na zona, el grupu de rescate empecipió’l rastrexu del llugar, p’alcontrar al afectáu. La xera resultó complicada por cuenta de la trupa vexetación y arboláu qu’enzancaba la visibilidá del llugar. Finalmente, l’equipu de rescate pudo alcontrar al senderista que s’atopaba nuna fastera con mal accesu, por cuenta de la rimada del terrén.

    Un bomberu-rescatador aportó hasta’l senderista por aciu una operación de grúa. Na mesma operación, en asitiándo-y el triángulu de rescate, executóse una segunda operación de grúa pa sacar a dambos del llugar. Una vegada nel helicópteru  foi treslladáu hasta l’aparcamientu de La Vara onde tenía aparcáu’l so vehículu. L’equipu de rescate dio per rematada la intervención a la so llegada a base, a les 18:56 hores. La sala del 112 del SEPA informó del sucesu a la Guardia Civil y al Serviciu d’Atención Médica Urxente (SAMU).

  • Un incendiu xamusca un baxu en Tinéu

    Un incendiu xamusca un baxu en Tinéu

    Efectivos de bomberos escastaron una quema declarada nel baxu d’una vivienda de dos altores n’El Pedregal, en Tinéu. La quema afectó, fundamentalmente, a una de les estancies de la planta baxa del inmueble que d’antiguo utilizabase como cuadra. Tamién quemaron diversos enseres y resultó afectada parte de la cubierta, un vehículu qu’había nel interior y l’instalación eléctrica.

    El Centru de Coordinación d’Emerxencies del 112 Asturies recibió l’avisu a les 09.27 hores. Na llamada señalaben que taba quemando un depósitu de gasoil d’unos 500 llitros asitiáu nel baxu de la casa. La Sala 112 del SEPA movilizó una dotación de bomberes del parque de Tinéu que se treslladó al llugar con dos autobombes urbanes y otra dende’l parque de Cangas con una nodriza, una autoescalera y una autobomba urbana.

    A les 09.50 hores diose la quema por controlada. Tres desescombrar y esfrecer a les 10.54 hores retiraronse del llugar tolos efectivos, anque ta previstu allegar de nuevu a la zona d’intervención pa revisar el so estáu.

  • Rescaten a una pareya que se perdiera nel picu Vízcares

    Rescaten a una pareya que se perdiera nel picu Vízcares

    L’helicópteru medicalizáu de Bomberos d’Asturies rescató esti domingu ilesos a un varón y una muyer que se perdieren mientres faíen la ruta del Picu Vízcares, en Piloña. El Centru de Coordinación d’Emerxencies recibió l’avisu, fechu polos mesmos afectaos, a les 16:10 hores. Na llamada esplicaron que salieren a realizar la ruta pela mañana, y cuando llevaben unes dos hores de caminada decatárense que posiblemente nun la taben faciendo bien. En dando la vuelta pa tornar terminaron nuna zona bien arbolada y con un regatu. Dambos atopabense bien.

    Darréu, movilizóse al equipu de rescate del SEPA, a bordu de l’aeronave medicalizada. Una vegada na zona, el grupu empezó’l rastrexu del llugar p’alcontrar a la pareya. La busca resultó complexa, tantu pol arboláu como pola falta de cobertoria móvil, qu’enzancó la comunicación ente los afectaos y l’equipu de rescate. Finalmente, el grupu de rescate alcontró a la pareya na zona del ríu Color.

    P’aportar a los afectaos executóse una operación de grúa, cola qu’un bomberu-rescatador baxó hasta los senderistes. Una vegada con ellos, y en comprobando que taben bien, fueron evacuaos a l’aeronave col triángulu de rescate y dos tales operaciones de grúa, nes que s’esplegó, cada vez, alredor de 30 metros de cable.

    El grupu de rescate treslladó a los afectaos hasta una zona aledaña al llugar nel que teníen aparcáu’l so vehículu. L’equipu dio per rematada la intervención a la so llegada a base, a les 19:14 hores. La sala del 112 del SEPA informó del sucesu a la Guardia Civil.

  • La Policía Local rescata a un perru que cayera al mar en La Providencia

    La Policía Local rescata a un perru que cayera al mar en La Providencia

    La Policía Local rescató esti sábadu a un perru que cayera al mar na zona de La Providencia. Asocedió a les 20:30 hores al altor del Parque de San Llorienzo. L’animal, de raza border collie, escapó del control de la so dueña y acabó cayendo. Un buzu que s’atopaba nesi momentu nel llugar del sucesu llogró sacalu de l’agua, ente qu’un axente encargóse de xubilu pel desnivel hasta la sienda d’El Cervigón. Aparentemente, la mascota nun presentaba mancadures.

  • Valtáu un edificiu en ruines n’El Natahoyo

    Valtáu un edificiu en ruines n’El Natahoyo

    El Conceyu de Xixón actuó énte l’estáu de ruina d’un edificiu de l’Avenida de Galicia númberu 30 pa evitar que se produxeren daños personales y materiales. Trátase d’un inmueble deshabitáu de dos llantes sobro rasante y so cubierta que, finalmente, tuvo que ser valtáu. Un vecín sollertó qu’apreciara dende la so ventana cómo la cubierta del inmueble fundiérase llixeramente. Tres una valoración inicial del Serviciu de Prevención, Estinción de Quemes y Salvamentu, y por precuru, acordonóse la zona y regulóse’l tráficu.

    La Dirección Xeneral d’Urbanismu, xuntu al serviciu d’arquitectura municipal, realizó delles visites al llugar pa la so correspondiente inspección, comprobando que la situación empioraba col pasu del tiempu. Dempués de diseñar una intervención nel teyáu pa evitar la cayida de cascotes a la vía pública y suxetar la fachada principal y medianería por aciu cable d’aceru y tensores, l’informe ellaboráu determinó un fallu estructural de la cubierta. Una de les cerches de madera rompiérase y taba movida del so llugar orixinal. Esto fixo que se produxeren deformaciones nuna de les medianeres y nel bistechu de la fachada principal.

    Amás, reparóse la esistencia de dos resquiebros verticales na medianera derecha del edificiu que, en poques hores, aumentaren el so tamañu nun centímetru. Tou ello, señala, podría producir el colapsu de la cubierta y el desprendimientu de la fachada escontra la cai y escontra la nave allegante, por tanto, ye necesariu dar en la so baltadera en tantu llevar a cabu la so rehabilitación. Comunicada la gravedá de la situación a la propiedá del edificiu, ésta procedió ayeri a la valtadera del inmueble. L’actuación concluyó nel meudía del sábadu.