Xixón al día

Etiqueta: Tresformación dixital

  • Iniciativa pol Asturianu demanda mayor presencia del idioma na nueva web del Conceyu de Siero

    Iniciativa pol Asturianu demanda mayor presencia del idioma na nueva web del Conceyu de Siero

    Iniciativa pol Asturianu reclama al Conceyu de Siero qu’aproveche’l remocique de la páxina web municipal pa dotala d’una mayor presencia del asturianu. L’equipu de gobiernu sacó a concursu públicu a finales del añu pasáu’l contratu pa rediseñar el portal web. El conceyal de Facienda y Xestión Económica, Alberto Pajares, anunció’l vienres l’axudicación del contratu.

    La nueva páxina va desendolcase a lo llargo de los próximos siete meses. Por mor d’ello, la organización reclama al Conceyu qu’aproveche’l rediseñu p’ameyorar la presencia del idioma nel portal web, permitiendo d’esta manera visibilizar y normalizar l’asturianu nesta canal de comunicación cola ciudadanía. Nesti sen, l’asociación recuerda que’l conceyu cunta con un Serviciu de Normalización Llingüística en funcionamientu, polo que la torna de los conteníos nun va suponer un encarecimientu del proyectu.

    La organización afala tamién al Conceyu a aprovechar esti procesu pa incorporar la toponimia oficial de Siero en tol portal web, d’alcuerdu colo qu’establez el Decretu 104/2009, de 29 de xunetu, pol que se determinen los topónimos oficiales del conceyu.   

  • L’Idepa concede 1,2 millones n’ayudes a una trentena d’empreses qu’impulsen proyectos de tresformamientu dixital

    L’Idepa concede 1,2 millones n’ayudes a una trentena d’empreses qu’impulsen proyectos de tresformamientu dixital

    L’Institutu de Desenvolvimientu Económicu del Principáu (Idepa) concedió 1,2 millones n’ayudes a 32 empreses para’l desenvolvimientu de proyectos de tresformamientu dixital que van movilizar una inversión global de 3,1 millones. Estes subvenciones pretenden impulsar y ameyorar la competitividá de les empreses asturianes venceyaes cola Industria 4.0 nel ámbitu de los procesos, el productu o’l modelu de negociu.

    Les ayudes dexen incorporar soluciones innovadores rellacionaes cola digitalización de procesos granibles, la instalación del software necesariu para la xestión intelixente d’infraestructures o la integración de sistemes d’empuestu en 3D. Tamién contemplen l’aplicación de la sensórica como ferramienta que, a partir de la captación de datos, dexa’l so procesamientu y la meyora de la competitividá empresarial.

    A esta convocatoria presentáronse un total de 48 proyectos, de los cualos aprobáronse 32, con una subvención concedida de 1,2 millones. Para optar a les ayudes, les empreses comprometiéronse a caltener 1.101 puestos de trabayu. Nel periodu 2019-2022 beneficiáronse d’esta llinia d’ayudes al tresformamientu dixital 183 empreses, con una inversión presentada de 13,5 millones, una subvención concedida de 4,6 y más de 4.000 empleos para caltener.