Una encuesta amuesa’l descontentu coles polítiques actuales de desanciu de les infraestructures p’andar en bici na ciudá
Nos sos primeros díes de vida, l’Observatoriu Xixonés de Movilidá fixo una encuesta, espublizada peles redes sociales, pa tomar la temperatura de les munches persones que se mueven per Xixón en bicicleta davezu o querríen facelo.
Escoyóse una amuesa de les les cien primeres persones, una y bones les impresiones, quexes y suxerencies repitíense a lo llargo del total de respuestes, lo que da una amuesa clara de cuálos son les xeres pindies pa l’espoxigue de la bicicleta na ciudá
La mayoría de les persones que davezu circulen pela ciudá son homes, cuasi un 70% del total. Usen pa dir al trabayu, llevar a neños al colexu o movese a facer espor, faciendo una distancia habitual d’ente 2 y 3 quilómetros.
Nel apartáu familiar dalgunes menten desplazamientos habituales, pero na mayor parte son ocasionales, mientres la fin de selmana o pel branu. Dalgunes úsenla más, pero esmolez la seguridá hasta’l puntu de que munchos abandonen la idea de dir en bicicleta pola falta de seguranza qu’observen nes cais de Xixón.
Tamién s’usa indistintamente carril bici y cai, anque se quier más circular pel carril bici si ta disponible. La seguridá esmolez enforma, modificando y escoyendo rutes pa intentar evitar les zones con munchu tráficu o peligroses, cuando ye posible.
El 60% camienta que Xixón ye una bona ciudá pa pedaliar, anque la mayoría coincide en que, anque ye llana, la ciudá tien una escasa infraestructura. Ye tamién signficativo la coincidencia de munchos d’ellos en comentar l’agresividá de los conductores y la desconexón de los carriles bici, que desincentiva’l so usu.
Un 20% camienta que la infraestuctura “ta faltal” y un 48% suspende a les víes ciclistes de la ciudá. En total, cuasi’l 70% valora negativamente les infraestructures actuales.
Sobre l’aparcamientu pa bicicletes, más del 70% declara que nun hai nengunu o bien pocos aparcamientos na ciudá, un defectu hestóricu que nun atopa comparanza en ciudaes del tamañu y l’usu ciclista de Xixón y claramente desincentiva el so usu, espliquen dende l’Observatoriu.
Los ciudadanos encuestaos esixen aselar el tráficu, con concienciación, regulación y sanciones. Piden tamién más infraestructura, citando aparcamientos y carriles bici. La mayoría piden urbanismi y diseñu de ciudá que permita desplazamientos en bici con comodidá y seguridá.
A la vista de los resultaos l’Observatoriu Xixonés de Movilidá declara que “nun s’entiende nel contestu medioambiental actual la falta de sofitu al usu de les bicis” y faen un llamáu a les autoridaes llocales p’apurrir soluciones. “Precísense yá infraestructures pa movese en bici n’igualdá de condiciones”, reclamen.
