La nueche de Xixón el vienres foi pa la escena del rap, pa esa escena que cuasi nunca sal nos medios y que fai crítica a munches de les inxusticies sociales que se viven a caldía nel estáu español. Toni y Nega, xunto con DJ Plan B, xubiéronse un poco más tarde de les 21:30 a les tables d’una Sala Acapulco na que nun cabía naide más y que yá anunciaba un bon ambiente tres colgar el sold out dos díes enantes de l’actuación. Un publicu nel que había una mecigaya d’edaes, amuesa de que la música de Los Chikos llega a dellos sectores de la sociedá.
Tres abrir el conciertu con Ecos de un futuro pasado, los temes antiguos fueron mezclándose colos del nuevu discu, Yes Future, un LP que quixeron desvenceyar de la ironía, reclamando un futuru pa la clase obrera. Sonaron clásicos como Paraísos artificiales o Pasión de talibanes, pero tamién himnos nuevos como Criptobros o Pan y Rosas. Esti últimu que tien delles referencies a Asturies, precisamente, punxo’l ramu a una actuación del grupu valencianu na qu’amosaron qu’entá queda cuerda pa munchu tiempu.
