La compañía Covenant Producciones ganó’l IX Premiu Nel Amaro de teatru profesional n’asturianu col espectáculu Tía Miseria. El xuráu d’esti galardón, impulsáu pola Conseyería de Cultura, Política Llingüística y Deporte, reflexa nel acta “la calidá llingüística y el nivel interpretativu d’un espectáculu que, con ritmu axilosu y gran naturalidá, trai a l’actualidá’l corpus cultural de la tradición asturiana, apurriendo una mirada crítica a la sociedá actual”.
Tía Miseria llegó a la final del Nel Amaro xunto coles producciones 1001 Una odisea nel desiertu (Higiénico Papel Teatro), Vuelu d’andarines (Nun Tris Teatro) y Al rodiu l’horru (É Vero Teatro). Estos espectáculos representáronse a lo llargo del mes pasáu nel Teatru Filarmónica d’Uviéu, mientres el festival de teatru que lleva’l mesmu nome que’l premiu.
Covenant Producciones creóse coles mires d’entamar y producir espectáculos sobre tradición oral, identidá cultural, memoria y tradición. Unu de los sos trabayos más conocíos ye Animalada xabaz, serie infantil de TPA qu’axunta marionetes, cuentos tradicionales, teatru y música rock.
En 2003, la compañía empezó a desenvolver ¡Rodando! Esnidien les histories, un proyectu multiplataforma sobre la cultura nel mediu rural, cola obra Tía Miseria como exa central. Esta producción, qu’acaba d’alzase col Premiu Nel Amaro, nació de la tradición oral, al traviés d’una serie d’escenificaciones d’hestories basaes nesta fonte de sabiduría popular. El monologuista Carlos Alba Cellero afai y reformula esti cuentu d’oríxenes milenarios con música, cantares, danza, cosadielles, preseos tradicionales y humor.
El galardón Nel Amaro, dotáu con 6.000 euros, tien por oxetu consolidar, arriquecer y prestixar l’asturianu y l’eonaviegu nel ámbitu del arte dramáticu.
El premiu y festival lleva’l nome de Nel Amaro, autor fináu en 2011 al que se dedicó la 42ª Selmana de Les Lletres Asturianes. A postreros de la década de los setenta del sieglu pasáu abrió’l camín pa la vanguardia teatral n’asturianu. Ente les sos obres de teatru destaquen Xénesis o alborá de la concencia (1978); Glayíos nueos, vieya murnia (1979); L’únicu rebalbu (1980) y Antígona, por exemplu, que ganó’l Premiu de Teatru de l’Academia de la Llingua Asturiana en 1991. Les manes en caxón (2003) foi la so última publicación teatral.
