El Gobiernu asturianu esixó esti xueves al empresariáu del ociu nocherniegu l’estrictu cumplimientu de les normes de seguridá frente al coronavirus. Esta petición llega depués de que la Policía Local pesllara dos d’estos establecimientos na fin de selmana. L’Executivu quier evitar midíes más restrictives, como l’amenorgamientu d’aforos, la llimitación d’horarios o, n’última instancia, el zarru temporal de los establecimientos.
El vicepresidente y conseyeru d’Alministración Autonómica, Mediu Ambiente y Cambéu Climáticu, Juan Cofiño, presidió la xunta del comité de coordinación pa la desescalada, na que participaron tamién el conseyeru de Salú, Pablo Fernández Muñiz; la conseyera de Cultura, Berta Piñán; la delegada del Gobiernu n’Asturies, Delia Losa; la presidenta de la Federación Asturiana de Conceyos, Cecilia Pérez, y el presidente de OTEA, Hostelería y Turismu d’Asturies, José Almeida.
Al rematar, Cofiño esplicó que l’asistencia de representantes del sector de la hostelería y l’ociu nocherniegu al alcuentru respuende a que nesti ámbitu tán detectándose riesgos en relación cola pandemia que xeneren esmolición, tanto a nivel nacional como autonómicu. Nesti sentíu, valoró’l compromisu del empresariáu pa encamentar al cumplimientu xeneralizáu de les midíes de seguridá en tolos locales. «Convoquémoslos pa esixi-yos que cumplan como empresarios coles obligaciones establecíes en relación colos aforos, l’usu de mázcaros y el distanciamientu interpersonal. Ellos tamién son conscientes del problema y amosáronse esmolecíos pola situación», señaló.
Estremar los precuros
El vicepresidente aseguró que’l Gobiernu asturianu va controlar nos próximos díes la evolución del sector pa tomar decisiones: «Si siguimos constatando que pueden ser o son una fonte de problemes, vamos tener que tomar midíes más restrictives», alvirtió. Tamién recordó qu’en delles comunidaes detectáronse biltos venceyaos al ociu nocherniegu y que, anque n’Asturies nun asocedió lo mesmo, el riesgu sigue presente. Amás, encamentó a la ciudadanía, a los turistes que visiten la comunidá y a la xente nuevo a estremar los precuros y cumplir les normes establecíes. «Si nun se respeten eses midíes, les alternatives tán clares: restricciones o zarru», alvirtió.
Nel mesmu sentíu pronuncióse’l conseyeru de Salú en participando per vía telemática nel Conseyu Interterritorial del Sistema Nacional de Salú. «Asturies, xuntu con dalguna otra comunidá, ta siendo xuna esceición, pero n’España la incidencia del coronavirus ta esguilando con muncha rapidez y munchos de los biltos tán venceyaos al ociu nocherniegu», indicó.
