Un audiovisual de la Universidá d’Uviéu, premiáu n’Estaos Xuníos

La cinta 'Memories culturales d'un pasáu industrial', dirixida por Irene Díaz y Rubén Vega, enmárcase nun proyectu d'I+D+i de la institución académica

0
1078
Un audiovisual de la Universidá d'Uviéu, premiáu n'Estaos Xuníos
Rubén Vega y Irene Díaz. / Universidá d'Uviéu

L’audiovisual ‘Memories culturales d’un pasáu industrial‘ foi premiáu col ‘Studs Terkel Award‘, que concede añalmente la Working-Class Studies Association (WCSA) d’Estaos Xuníos. El trabayu, dirixíu por Irene Díaz y Rubén Vega, investigadora y profesor de la Universidá d’Uviéu, respectivamente, ye frutu del proyectu d’I+D+i ‘Cambéu sociocultural, memoria, patrimoniu ya identidaes en contestos de desindustrialización‘. El galardón fallóse en Xeorxa (Estaos Xuníos) y va apurrise en Canterbury (Kent, Reinu Xuníu) el próximu mes de setiembre.

La cinta, producida pola Universidá d’Uviéu y AFOHSA anguaño 2019, tien una duración de 49 minutos. Ta basada n’entrevistes con artistes y ceadores y ceadores culturales d’Asturies que cavilguen sobro cómo’l trabayu, la industria, la mina y los sos legaos constitúin motivos d’inspiración o temes de les sos obres. Un total de 16 testimonios componen un relatu coral sobro los significaos qu’otorguen al patrimoniu tanxible ya intanxible del nuesu pasáu industrial: el fotógrafu José Ferrero, el pintor y escultor Ricardo Mojardín, l’artista visual Avelino Sala, l’artista visual Natalia Pastor, el dibuxante Alfonso Zapico, la escritora Vanessa Gutiérrez, la cantante Anabel Santiago, el raperu Arma X, el director de cine Marcos M. Meríno, l’escritor Xandru Fernández, el dramaturgu y actor Maxi Rodríguez, l’actriz y baillarina Mónica Cofiño, el cantante y productor musical Xune Elipe, l’escritor, cineasta y productor Ramón Lluis Bande, los artistes sonoros Mind Revolution, y l’escritor de grafiti El Séptimo Crío. Les entrevistes pertenecen al Arquivu de Fontes Orales pa la Hestoria Social d’Asturies, que dirixe’l codirector del documental, Rubén Vega.

La realización tuvo al cargu de Pedro Timón, Javier Lueje: les entrevistes lleváronles a cabu Irene Díaz, María del Mar Díaz, Marta Mori y Rubén Vega; los operadores de cámara fueron Javier Fernández Ovies, Pedro Timón, Pelayo M. Duarte, Alex Zapico; y los fotógrafos, Álex Zapico, Marcial Gómez, Pelayo M. Duarte. L’audiovisual ta realizáu en castellán y asturianu, con subtítulos n’inglés.

El proyectu d’I+D+i nel que s’enmcarca’l documental plantégase, dende una perspectiva comparada y interdisciplinar, la cuestión de cuál ye la suerte que cuerre’l patrimoniu material ya inmaterial amestáu al trabayu industrial en contestos de desindustrialización. Pa ello, diríxense miraes dende un ángulu triple: la memoria oral, les muertes materiales y la creación cultural y artístico. Preténdese, primero, al traviés de los testimonios, afondar nos relatos y les representaciones colectives amestaes al pasáu industrial; segundu, establecer un diagnósticu avera del destín asignáu a mines, fábriques, infraestructures ya instalaciones una vegada que dexen de tener l’usu pal que fueron originalmente concebíes; y, terceru, caracterizar los procesos actuales de creación en diverses aguaes del arte y la cultura que remembren el pasáu industrial.