Les consecuencies de la falta d’oficialidá vense cada día- Nel colexu públicu Santiago Apóstol de Mieres, cuasi’l 100% del alumnáu de 4 grupos d’Educación Infantil (EI) demandaron recibir enseñances de Llingua Asturiana. La escuela lleva impartiendo estes enseñances na Educación Infantil dende hai una montonera años. Lo mesmo asocede col alumnáu d’Educación Primaria qu’escoyó mayoritariamente esta asignatura.
La dirección del centru demandó a la Conseyería Educación, yá al acabar el cursu pasáu, la necesidá
de contratar a tiempu completu a un profesor/a de Llingua Asturiana p’atender a tol alumnáu qu’escoyó recibir clases d’esta área. Sicasí, solo contrató a una persona a media xornada. Como consecuencia d’ello lleva ensin recibir clases d’Asturianu tol alumnáu d’EI dende primeros de cursu y va siguir ensin recibiles tou esti cursu si la Conseyería d’Educación nun camuda la so decisión.
Esta forma d’actuar ye pa SUATEA, que denuncia’l casu «contraria a derechu y atiende esclusivamente a criterios economicistes de recortes nel gastu a costa de los derechos de los padres y madres». Amás, espliquen «Vulnera la llei d’Usu de 1998 que nel so artículu 10.1 diz: “Nel exerciciu de les sos competencies, el Principáu d’Asturies ha garantizar l’enseñu del bable/asturianu en tolos niveles y
graos, respetando sicasí la voluntariedá del so aprendimientu”.
Pa SUATEA «Nun ye comprensible qu’un Gobiernu que va promover la reforma del nuestru Estatutu Autonomía pa que recueya la oficialidá de les nuestres llingües siga actuando activamente contra los derechos llingüísticos de la ciudadanía yá recoyíos na normativa asturiana».
Dende SUATEA denuncien a la opinión pública «esta forma d’actuar de la Conseyería d’Educación contrariamente al derechu, apoyamos la demanda de l’Asociación de Padres y Madres del Colexu» y, esixen «l’ampliación de la xornada llaboral de la persona contratada pa impartir enseñances de Llingua Asturiana de media a completa pa poder atender a tol alumnáu d’EI».
