Trés persones resultaron afectaes, dos per inhalación de fumu y una con una ferida leve, na quema d’una vivienda, esta nueche, allugada na cai Juan Antonio Bravo, en Cuideiru.
Según los datos facilitaos pol Serviciu d’Atención Médica Urxente (SAMU) los mancaos de mayor considerancia son un varón de 35 años y una muyer de 31. Dambos fueron treslladaos pa más pruebes, afectaos por inhalación de fumu, al Hospital San Agustín d’Avilés. Hasta nueva valoración médica’l so pronósticu ye reserváu. L’home foi treslladáu pol equipu médicu de la uvi móvil avilesina y la muyer na ambulancia de soporte vital básicu de Sotu’l Barcu. La tercera afectada ye una muyer que resultó mancada llevemente nuna pierna y foi atendida nel centru de salú.
La quema xamuscó la cocina de la vivienda onde s’anició la quema, na primer planta del edifico de trés altores. El restu del pisu resultó afectáu pol fumu. Mientres llegaben al llugar los bomberos l’inmueble, con seis viviendes, según comunicó la Guardia Civil, foi desallugáu.
El Centru de Coordinación d’Emerxencies del 112 Asturies recibió l’avisu a les 23.46 hores d’ayeri martes. Na llamada indicaben que taba saliendo fumu pela ventana del pisu. Trátase d’un edificiu de trés plantes y desconocía lo que podía tar quemando y si había xente nel so interior.
La Sala 112 del SEPA movilizó a efectivos de Bomberos del Serviciu d’Emerxencies del Principáu d’Asturies (SEPA) con base nos parques de Pravia y Avilés y pasó l’avisu SAMU qu’unvió los medios citaos enantes. Tamién informó a la Guardia Civil que mandó axentes al llugar.
A les 00.48 hores los bomberos dieron per controláu la quema y la dotación avilesina tornó a base. En realizando xeres de ventilación y refrigeración los bomberos movíos dende’l parque de Pravia retiraron del llugar pa tornar a la so base a les 01.55 hores.
