Un home resultó mancáu de considerancia tres cayer per un desnivel nuna pista forestal, barganal de la localidá de Pola del Pinu, nel conceyu d’Ayer. L’afectáu, un varón de 52 años, foi rescatáu por efectivos de Bomberos del Serviciu d’Emerxencies del Principáu d’Asturies (SEPA) con base nel parque de Mieres y el Grupu de Rescate del organismu autónomu xunto a vecinos de la mesma localidá que collaboraron nel operativu.
Según datos facilitaos pol Serviciu d’Atención Médica Urxente (SAMU) el mancáu foi treslladáu pol equipu médicu de la UVI-móvil de Mieres al Hospital Álvarez Buylla. Por cuenta de más pruebes y hasta nueva valoración médica foi treslladáu con politraumatismos de pronósticu reserváu.
L’afectáu foi atendíu nel llugar del accidente, nun primer momentu, pola médicu de la UVI-móvil que fuera treslladada nun quad por un vecín de la zona. La mélica que llegó al par que los bomberos del parque de Mieres suminístro-y analxesia intravenosa y emprestó-y asistencia sanitaria.
Cuando’l Grupu de Rescate llegó al incidente, xunto al médicu-rescatador, treslladaron al mancáu a una camiya de costazu, inmovilizáu con un colchón de vacíu, pal so portéu. Bomberos y vecinos treslladaron a cuerpu, unos 3 kilómetros, hasta la localidá de Pola del Pinu onde esperaba la UVI-móvil de Mieres.
El Centru de Coordinación d’Emerxencies del 112 Asturies recibió l’avisu a les 19.16 hores. Na llamada, realizada pol mesmu afectáu, esplicaba que taba caminando per una pista forestal y sufriera una cayida por un desnivel d’unos 300 metros. Nun podía movese. Dolía-y el pechu.
La Sala 112 del SEPA pasó l’avisu al SAMU y movilizó per tierra una dotación, con trés efectivos del parque de Mieres y al Grupu de Rescate de bomberos con seis efectivos y un médicu-rescatador.
