Una publicación codirixida pola Universidá d’Uviéu y la Universidá de Barcelona axuntó investigaciones piqueres y refeches de 40 especialistes internacionales sobre la Antártida, qu’enceten tantu’l so pasáu como’l so estáu actual y l’influencia que’l cambéu ambiental global -non solo climáticu- ta exerciendo sobro ella. “Past Antarctica. Paleoclimatology and Climate Change” (“La Antártida pasada. Paleoclimatología y cambéu climáticu”), publicada pola editorial científica Elsevier, tuvo como directores a Jesús Ruiz, profesor del Departamentu de Xeografía de la Universidá d’Uviéu, y a Marc Oliva, investigador del Departamentu de Xeografía de la Universidá de Barcelona.
Les y los científicos que collaboraron na obra ufierten la reconstrucción más completa del paleoclima y el mediu ambiente de l’Antártida y los enclinos ambientales actuales. Coles mesmes, estudien l’Antártida en conexón col restu del globu terráqueu, yá que, esta gran cúpula d’aire frío, magar que tien un funcionamientu climáticu particular, nun evoluciona de manera unillateral, sinón que ta conectada, como nun pue ser otra manera, con tola dinámica atmosférica de les llatitúes medies del hemisferiu sur, produciéndose una rellación directa ente elles.
A escala planetaria, esisten munches rellaciones del clima antárticu cola dinámica del cambéu global, y una de les más clares manifiéstase nos glaciares, qu’en términos xenerales tán menguando pol calentamientu recién -lo qu’afecta a la xuba del nivel de la mar-. Sicasí, dientro d’esti enclín de calentamientu de llargu percorríu, pue haber décades o ámbitos concretos de l’Antártida nos que, otra manera, produzse un enfriamientu. Precisamente, esti fenómenu asocede pola mentada conexón climática de l’Antártida col restu del globu. Por casu, el fenómenu del Neñu», una anomalía de radicalización del clima que tien llugar nel Pacíficu oriental central, con años más templaos y polo xeneral secos nos que, de la mesma, davezu radicalícense eventos como les agües enchentes, refléxense en variaciones nel clima antárticu, como quedó patente nes series climátiques de les estaciones de la Península Antártida desque hai rexistros instrumentales.
Un añu en qu’esto asocedió foi 1997-98 y, magar que’l Neñu” tien el so orixe, como s’indicó, nel Pacíficu oriental, a partir de dichu añu rompió la enclín al calentamientu de la Península Antártida rexistrada en décades previes, produciéndose a partir d’esa fecha un enfriamientu que s’enllargó hasta 2016, lo que se reflexó, por casu, na estabilización o la llixera meyora de los glaciares d’esti sector. «Nun hai dulda de que se producen esti tipu d’interconexiones ente’l clima de l’Antártida y el clima global, y por esta razón resulta de vital importancia siguir les investigaciones que nos dexen conocer meyor esti fenómenu y les sos consecuencies», afirma’l profesor Jesús Ruiz.
En “Past Antarctica” tamién s’enceten el volcanismu, los suelos antárticos, los enclinos climáticos recién, la fauna y flora relicta y actual, la colonización humana y la geopolítica ya investigación antártica del nuesu tiempu, ufiertando recursos pa la comprensión de l’Antártida y la so hestoria y promoviendo la investigación adicional nos esfuercios de caltenimientu.
