La Viceconseyería de Mediu Ambiente y Cambéu Climáticu del Gobiernu d’Asturies sacó a llicitación el suministru ya instalación de la nueva estación mididora de la calidá del aire de la zona oeste de Xixón. El presupuestu ye de 164.148 euros ya inclúi’l costu d’esmantelamientu de la estructura actual, asitiada na cai Hermanos Felgueroso de la ciudá.

La empresa axudicataria va tener un plazu de 120 díes pa instalar na avenida del Cerilleru la estación, que va cuntar con un analizador de partícules PM2,5 (menores de 2,5 micres) y PM10 (menores de 10 micres), un analizador d’ozonu (O3), otru de bencenu, toluenu y xilenu (BTX), y un equipu captador secuencial de peñeres PM10.

Amás, va incorporar un analizador de dióxidu d’azufre (SO2) y otru d’óxidos de nitróxenu (NOx), amás del sistema d’alquisición de datos y los restantes equipos de comunicaciones procedentes del equipu asitiáu anguaño n’Hermanos Felgueroso. Va incluyir tamién una torre meteorolóxica con sensores de dirección y velocidá de vientu, presión atmosférica, temperatura, humedá relativa y radiación solar.

La estación ye un compromisu del Gobiernu d’Asturies incluyíu nel plan d’acción al curtiu plazu p’amenorgar los niveles de partícules en suspensión na atmósfera de la zona oeste de Xixón, aprobáu pol Conseyu de Gobiernu. La infraestructura va pasar a integrase na Rede de Control de la Calidá del Aire d’Asturies.

La documentación pa les empreses interesaes, que disponen d’un plazu de 16 díes pa presentar ufiertes, pue consultase nel perfil del contratante de la web  www.asturias.es.