L’artista uvieín y de sangre cordobés Sergio Llunik ye’l responsable de la ilustración de la X décima edición del Festival de Cine LGTBI del Centru Niemeyer, que va tener llugar del 4 al 13 d’abril.
“Ye un arguyu pa mi diseñar la imaxe d’anguaño por dos razones, la primera ye que ye un proyectu mui necesario al que llevo siguiendo dende los sos entamos, y la segunda ye que colegues y compañeres d’oficiu, a les qu’almiro fondamente, realizaren la imaxe d’ediciones anteriores”, afirma Llunik, sergio.llunik na rede social Instagram.
Amante de los colaxes y el surrealismu máxicu, Llunik ye un optimista empederníu qu’intenta vivir, diseñar y crear “siempres dende l’amor, l’humor y la creatividá, tratando de comunicar dende un puntu de vista allegre y positivu”.
“El colax ye’l mio idioma natural y con él espreso inclusive meyor que cola palabra, por eso escoyí esta técnica pa ilustrar la edición d’anguaño. Esti colax en concretu bebe de les mios referencies personales, y con él quiero representar les distintes sexualidaes al traviés de les formes y combinaciones de color (retrucando la bandera LGTBIQ) qu’apaecen nes figures principales nun estilu vintage y personal. Los elementos qu’envolubren y acompañen a estes figures simbolicen la llibertá que munches vegaes ye cortada y anulada”, asegura’l diseñador gráficu.
Amás, “hai guiños cinéfilos vintage como pueden ser la cámara Super 8 o la piértiga del sonidista que suxeten dalgunu de los protagonistes. El Centru Niemeyer tamién ta presente al traviés de dos les sos formes más característiques del conxuntu.”, añede Llunik.
