La perda de los hábitats tradicionales nos que viven los osos por efectu del cambéu climáticu puede obliga-yos a migrar escontra árees cercanes a núcleos de población humana, lo que, de la mesma, va xenerar un aumentu de la conflictividá ente dambes especies. Esta ye la principal conclusión d’una investigación internacional, na que participa la Universidá d’Uviéu, que foi publicada na revista Science of the Total Environment, de máximu impactu na so área de la conocencia.
L’investigador de la Universidá d’Uviéu y del CSIC Vincenzo Penteriani, adscritu al Institutu Mistu d’Investigación en Biodiversidá del Campus de Mieres, recuerda que la supervivencia d’un númberu cada vez mayor d’especies ta amenaciada pol cambéu climáticu. “Ente’l 20% y el 30% de plantes y animales paecen tar en riesgu de cambéu de rangu o estinción si’l calentamientu global va algamar los niveles proxectaos pa finales d’esti sieglu”, destaca. “Poro, el cambéu climáticu ye un de los principales desafíos pal caltenimientu de la biodiversidá”, añede.
El trabayu espublizáu agora en Science of the Total Environment evalúa l’impactu del cambéu climáticu na distribución de la especie emplegando como modelu l’osu pardu na llende más al sur de la so distribución global, nel oeste d’Irán. Los montes montascosos d’esti país tán habitaos por poblaciones pequeñes y aisllaes d’osos pardos que son propenses a la estinción nun futuru próximu. Los investigadores modelaron l’impactu potencial del cambéu climáticu pa los años 2050 y 2070 so cuatro escenarios distintos de calentamientu global.
Penteriani sorraya que les proyecciones revelaron que l’área de distribución actual de la especie, que toma’l 40,8% del territoriu disponible, podría menguar ente un 10% y un 45%. Abargana del 27,4% de l’área de distribución actual del osu pardu n’Irán ta cubierta por una rede d’árees de protección que, según l’estudiu, prevese podría menguar n’ente un 0,64% y un 5,6% debíu al cambéu climáticu.
“La perda d’hábitats fayadizos ye un desafíu pal caltenimientu de los osos pardos porque puede facer que los osos se muevan fuera de les árees protexíes y dar como resultáu aumentos posteriores nos niveles de conflictu ente osos y humanos”, afirma l’investigador. “La reevaluación de la rede d’árees protexíes y l’establecimientu de más árees protexíes en paisaxes potencialmente más fayadizos a los futuros cambeos debíos al cambéu climáticu, según el caltenimientu de corredores ente les distintes árees ocupaes polos osos son estratexes cruciales pa caltener y xestionar les poblaciones amenaciaes del osu pardu”, añade.
