Dos persones finaron y otros trés resultaron mancaes de diversa considerancia (una mui grave, otra con pronósticu reserváu y una tercera leve), nun accidente de tráficu nel que se vieron implicaos dos turismos na carretera AS-115 ente Vibañu y Rales, nel conceyu de Llanes.
Según los datos facilitaos pol Serviciu d’Atención Médica Urxente (SAMU) el mancáu de calter mui grave ye un menor que foi treslladáu al Hospital Universitariu Central d’Asturies (HUCA), n’Uviéu, nel helicópteru medicalizáu de Bomberos d’Asturies. Los otros dos mancaos son una muyer que foi treslladada al Hospital de Les Arriondes, con pronósticu reserváu a falta de más pruebes, na ambulancia de soporte vital básicu de Llanes y un varón que resultó mancáu leve. El SAMU unvió al incidente l’equipu médicu de la UVI-móvil del Oriente, l’equipu d’Atención Primaria de Llanes y una ambulancia de soporte vital básicu.
Los dos finaos, una muyer y un menor, fueron escarcelaos, en recibiendo la correspondiente autorización, por efectivos de Bomberes del Serviciu d’Emerxencies del Principáu d’Asturies (SEPA) con base nos parques de Llanes y Cangues d’Onís. Nesti vehículu tamién viaxaba, na parte trasera, el menor que resultó mancáu mui grave y que tamién foi rescatáu polos bomberos. Hasta’l llugar tamién se movió’l xefe de zona del oriente.
