El Gobiernu d’Asturies consiguió l’aprobación de la Fundación Institutu Cameral pa la Creación y Desenvolvimientu de la Empresa (Incyde) al proyectu presentáu pa instalar n’Uviéu una incubadora d’alta tecnoloxía en ciencies de la vida. El conseyeru de Ciencia, Empreses, Formación y Empléu, Borja Sánchez, indicó que ye bien bona noticia, una y bones los dos millones de financiamientu con fondos Feder van sirvir de puntu de partida pa poner en marcha un equipamientu que va ayudar a crear y consolidar empreses nel sector biosanitariu.
El director xeneral del Incyde, Javier Collada, anunció esta tarde, na inauguración de les nueves instalaciones de la Cámara de Comerciu d’Uviéu, qu’Asturies va formar parte de la rede d’incubadores del órganu cameral, qu’anguaño cunta con 21 equipamientos piqueros y competitivos n’Europa.
Énte esti anunciu, el conseyeru indicó que nos próximos díes van dase más detalles del proyectu, pero incidió na necesidá de cuntar con espacios pal emprendimientu. Esti tipu d’incubadores “son redolaes flexibles y llugares con capacidá d’aceleración por que un proyectu empresarial pueda dar el saltu al mercáu, daqué bien importante nel ámbitu bio, un sector en puxanza na rexón, que requier procesos más llargos”.
La propuesta presentada al Incyde al traviés de l’Axencia de Ciencia, Competitividá Empresarial ya Innovación Sekuens, inclúi ente los sos oxetivos facilitar la instalación d’una quincena de compañíes hasta 2027 y xenerar un centenar d’empleos.
L’horizonte pal desenvolvimientu del proyectu ye de cuatro años (2024-2027), con una dotación de partida de dos millones, de los que 1,2 provienen de los fondos Feder.
Ente los oxetivos de la propuesta, que cunta col sofitu del Conceyu d’Uviéu y la Cámara de Comerciu, ente otres instituciones y entidaes, atópase favorecer la creación y afitamientu de firmes innovadores nel sector biosanitariu ya impulsar la tresferencia de conocencia, la captación de talentu y la collaboración públicu-privada colos principales centros d’investigación d’Asturies.
El documentu recueye tamién como oxetivu “impulsar un ecosistema d’innovación rexonal fuerte en ciencies de la vida 5.0”, pa lo que se va dotar la incubadora con un equipamientu tecnolóxicu avanzáu: equipos de realidá virtual, aumentada y mista, tecnoloxía d’intelixencia artificial, prototipado, innovación dixital, robótica y simulación, ente otros.
