VerAsturies pon a la venta una edición llimitada del Ramu Nadal

VerAsturies quier sofitar la recuperación de la tradición asturiana del Ramu Nadal. Por ello pon a disposición de los sos llectores una edición llimitada de ramos de Nadal. Faite cola cadarma del Ramu y decórala cada añu na to casa, negociu o asociación por 150 euros. Un Ramu de 129 cm. d’altor, desmontable en trés pieces pa poder guardalu ensin problemes tol añu y fechu en madera de pinu macizo acabao en color nocéu.

VerAsturies ufre una tirada llimitada pa recoyer a partir del 21 d’avientu en Xixón, yá que nun se faen unvios. Acuta’l tuyu con un corréu a hola@cuatrogotes.com.

El Ramu Nadal ye ún de los adornos navidiegos asturianos más antiguos, con un orixe bien llonxanu, datáu dende enantes de la llegada del cristianismu, y equivalente al árbol de Nadal que se suel poner nes cases nos meses d’avientu y xineru. Esti oxetu ta formáu por una cadarma de madera triangular na que s’alluguen 12 veles (simbolizando los meses del añu) Amás, d’esta cadarma tamién se cuelguen ofrendes, como rosquielles o frutes, y dellos elementos ornamentales, como bordaos o filos de llana, ente otros.

Esta tradición, antaño bien estendida per Asturies y Llión principalmente, foi perdiendo puxu col pasu del tiempu por ser un elementu paganu, anque fuere asimilao pola Ilesia dempués de ver que nun yeren quien a prohibilo. Sicasí, anguaño l’usu d’esti adornu nes feches navidiegues va garrando mayor presencia, polo que podemos ver como esta tradición, cuasi desaniciada, ta recuperándose y estendiéndose a zones onde nun yera mui común atopar esti tipu de xeres.