Que les bicis seyan una alternativa de tresporte. Xixón sigue sumando midíes pa camudar la movilidá na ciudá de cara a la nueva normalidá que va entamar esti branu. Movilidá activa, tresporte públicu y movilidá compartida configuren les prioridaes na nueva política de movilidá sostenible del Gobiernu local. El conceyal de Mediu Ambiente y Movilidá, Aurelio Martín, presentó’l vienres un conxuntu de midíes empobinaes a facilitar y promocionar la movilidá ciclista más allá del ociu. «La bicicleta tien de ser una opción más pa movenos nel día a día».
El Conceyu busca un cambéu nos vezos de desplazamientu. Nesti contestu enmárquense los 29 ciclocarriles anunciaos va unes selmanes, que busquen favorecen la circulación segura de bicicletes y patinetes eléctricos. Agora, la Conceyalía de Mediu Ambiente y Movilidá pon en marcha la campaña ‘Muévite pel ciclocarril‘. En palabres del conceyal «ha d’entendese como una midida de concienciación y sensibilización», y que busca ameyorar la seguridá vial. La campaña ufierta mensaxes y conseyos pa la circulación de ciclistes y usuarios de patinetes y fai un llamamientu a la convivencia, respetu y prudencia en cualesquier mediu de tresporte.
Nuevos ciclocarriles
La implantación de los 29 ciclocarriles ta desenvolviéndose en paralelu a la creación de nuevos tramos de carriles bici segregaos pa completar la rede ciclista de la trama urbana. El Conceyu tien previstu habilitar dos nuevos tramos n’El Coto y la cai Mariano Pola.
El desenvolvimientu de nueves infraestructures ciclistes nun ye la única midida. Tamién se va poner en marcha la BiciEscuela Municipal. El programa quier promocionar l’alquisición de mañes y habilidaes pa circular en bicicleta de forma autónoma, segura y responsable pela vía pública. Va ponese en marcha la próxima seronda y va tar dirixida a población adulta y a población escolar, afaciendo los conteníos y actividaes a les distintes edaes. La BiciEscuela escolar va desenvolvese en 5 centros educativos de la ciudá, y va cuntar con un cursu de formación pal profesoráu.
Les actividaes de promoción y sensibilización completen el plan ciclista presentáu por Martín, con marches ciclistes pa families, campañes informatives, actividaes mientres la Selmana Europa de la Movilidá y el desenvolvimientu d’una xornada técnica de bones práctiques.
